Laasaga 8

Saili le Faamagaloga

Mataupu Faavae Autu: Tusia uma suafa o e ua afaina ona o oe ma toe galueaina auala e faaleleia ai ma i latou.

Ao lei toe faaleleia i matou, o aga o o matou olaga o le tagofia o mea ua fai ma vaisu sa pei o se asiosio e tumu i le malosi faatamai na osofaia ai a matou mafutaga, ma tuua ai le anoanoai o mea na faaleagaina. O le Laasaga 8 o se avanoa e faia ai se fuafuaga e faamama ai mea na faaleagaina ma toe fausia mea uma e ono mafai ona faasaoina. Ina ua matou lagonaina le mana faamalolo o le alofa mutimutivale o le Faaola a o matou galulue i le Laasaga 7, sa matou lagona le naunau e aapa atu i isi ma toe uluulu mafutaga ua malepelepe. E ui i lea, sa matou iloa o le faananati i le taimi lava lena ia faia ni suiga laiti ae lei faaaluina se taimi mo le tatalo ma atonu foi mo se fautuaga mai se faufautua faatuatuaina, e pei o le epikopo po o isi taitai perisitua, ua tutusa lava le ogaoga, ma le le faia o se faaleleiga. O le Laasaga 8 sa o se faamautinoaga o le faamanualia o isi ina ua amata ona matou faafesootaia i latou i le Laasaga 9.

A e matou te lei toe fausia mafutaga, sa manaomia lo matou faailoaina o mafutaga sa faaleagaina. Sa amata ona matou lisia tagata sa matou faamanualia, peitai e toatele i matou sa iloa e le mafai ona matou lisia nei tagata e aunoa ma le faalavelaveina i lagona inoino ia i latou sa faatiga ia i matou. Sa ta’uta’u atu ma le faamaoni i le Alii o matou lagona le lelei. I le tali mai, sa Ia faaali mai ia i matou sa matou feagai ma le filifiliga lava e tasi e pei o le tagata i le faataoto, o le sa faamagaloina ana aitalafu uma, ma sa manaomia lona faamagalo atu o isi. Sa toetoe ina a matou faalogo atu o fetalai mai le Alii ia i matou, “Na au faamagaloina atu a’u mea uma ua ia te oe, ina ua e aioi mai ia te au: E le tatau ea ona e alofa atu i lou uso a auauna, e pei o au foi, ua ou alofa atu ia te oe?” (Mataio 18:32–33).

Afai e te lua feagai ma lenei faafitauli, atonu e manaomia ona fai e pei ona faia e le toatele o i matou. A o lei faia lau lisi o tagata o loo e manaomia mai ai le faamagaloga, ia muamua lisi tagata e tatau ona e faamagaloina. Aua e te tei pe i ai ni igoa e vaaia i lisi uma e lua. E masani ona paulia tagata i faatamiloga matautia o le lafo o upu faatiga i isi. Ina ia talepeina nei taamiloga o le tau fai inoino, e tatau lava i se tasi ona naunau e faamagalo atu.

Ina ia amataina lenei faagasologa o le faamagalo atu, sa matou toe iloa ai le taua tele o le meafaigaluega o le tusitusi. E pito atu i igoa o tagata sa manaomia ona matou faamagaloina, sa matou tusitusia ai o matou lagona muamua ina ua tulai mai mea faatiga ma mea sa tofotofoina pea i matou e lagona. Sa fesoasoani le lisi e faapatino a matou tatalo a o matou faasoa atu i le Tama o matou lagona uma e lei faaleleia. Sa matou faatoga mo le alofa tunoa o Keriso ia fesoasoani ia i matou e faasafua atu i isi lea lava alofa tunoa ua Ia tuuina mai ia i matou. Afai matou te maua ni tagata ia matou lisi sa faapitoa ona faigata ona matou faamagaloina, sa matou talia le fautuaga a le Faaola, e tatalo mo lo latou manuia, talosagaina faamanuiaga uma mo i latou e pei ona matou mananao ai mo i matou lava (tagai i le Mataio 5:44).

A o matou tatalo mo se fesoasoani e faamagalo isi—e tusa pe sa pei e le moni i le taimi muamua—sa oo ina faamanuiaina i matou i se lagona faavavega o le agalelei. E oo lava i tulaga ogaoga, o tagata sa faia lenei faiga sa maua le malosi e faamagalo atu ai e sili atu nai lo i latou lava. O se tasi o tuafafine sa faaalu ni vaiaso e tusitusi ai e uiga i aso a o laitiiti ma tatalo mo lona tamā faasauā. Ua ia tautino mai ma le fiafia ua faatoafilemuina o ia e le Faaola mai ona lagona le lelei, lagona tiga i lona tama. I le faia o se taumafaiga faapea, ua matou iloa ai o le faia o se faamaumauga mae’ae’a o o matou lagona inoino ma faailoa atu i le Faaola, ua iu ina le toe avea ai i matou ma tagata e faamanualia e i latou sa faatiga ia i matou. Ina ua matou taumafai faamaoni e lafoai mea sese sa agai mai ia i matou, sa mafai loa ona faamae’a a matou lisi o i latou sa matou faamoemoe o le a faamagaloina i matou.

A e oo i lenei tulaga ma amata lau lisi, e tatau ona e tatalo mo le taitaiga mai le Alii. O le a fesoasoani nei taiala. Fesili ifo ia te oe lava, “O i ai se tasi i lo’u olaga, ua tuanai po o le taimi nei, ou te lagona ai le matamuli, fememea’i, po o le maasiasi?” Tusi o latou igoa ma tetee le tofotofoga e tauamiotonuina ou lagona pe faia ni ‘alofaga o au amioga le lelei ia i latou. Ioe, ia aofia ai i latou sa e fuafuaina e faatiga, atoa ma i latou e te lei faamoemoe e faatiga. Ia aofia ai i latou ua maliliu, ma i latou ua e le iloa pe faapefea ona faafesootai. O le a e faafeagai ma nei tulaga faapitoa pe a e faia le Laasaga 9. Mo le taimi nei, a o e galue i le Laasaga 8, ia taulai atu i lou naunautai ia sa’o ma ia le suia lou faamaoni.

Ina ia maeaea lelei, vaai mo mea sa e tuulafoaia po o mea sa e tuua e le faia sa faatiga ai i isi. Aua le tuua mea laiti. Mafaufau faamaoni i le faatiga sa e faatupuina i isi ao e faaloloto i ou mausa, e tusa pe e te lei matua ita ia i latou. Ioeina mea faatiga sa e faia i e pele ma uo i lou faatamala, maitaita, faitio, le to’a ma le faalumaluma. Vaai mo soo se mea e tele pe itiiti sa faaopoopo atu i avega a se isi tagata pe na faanoanoa pe luitauina ai se tasi. Vaai i au pepelo sa e faia po o folafolaga sa e talepeina ma auala na e olegia pe faaaoga ai isi. Lisi i latou uma sa aafia ai. Atonu e fesoasoani lau faamaumauga o loo i le Laasaga 4 i lenei faagasologa.

Ma le mea mulimuli, a uma ona e lisiina tagata uma sa e faamanualia, toe tasi lava le igoa e faaopoopo atu i le lisi—o lou lava igoa. A e faaloloto i au mausa, ua e faamanualia oe lava faapea ma isi.

A o e galue, manatua o le Laasaga 8 e le o se gaoioiga e lafo atu ai le tausalaga po o le maasiasi i luga o se tasi—pe o oe po o i latou o loo i lau lisi. O le a sii ese e le Faaola avega o le tausalaina ma le maasiasi a o e toe tepa tasi ma le faamaoni i faafitauli i au fegalegaleaiga ma lau vaega na fai ai. O le naunau e fai ni faaleleiga, e faamanuiaina ai oe i le toafilemu i le iloa ua faafiafiaina le Tama Faalelagi i au taumafaiga. E fesoasoani le Laasaga lenei i lou faia o galuega e mafai ai e le Faaola ona faasaoloto oe mai lou olaga ua tuanai. O lou naunautai, ua e saunia ai e uia le 9.

Laasaga e Faatino

Faamagalo oe lava ma isi; fai se lisi o tagata sa e faatiga i ai pe faamanualia

I le Laasaga 8, ua e amataina se sailiga ofoofogia e faatatau i se loto fou mo oe lava, i isi, ma i le olaga. Ua e saunia e saofaga atu le filemu i le lalolagi, nai lo le faaopoopo atu o feeseeseaiga ma lagona le lelei. Ua e naunau e lafoai le faamasinoina ma le le amiotonu o soo se tasi ma aua le toe faia ni faamaumauga o olaga ma leaga o isi. Ua e saunia e taofi le ta’u faaitiitia o au lava amioga po o le faia o ‘alofaga. Ua e saunia e fai se isi faamaumauga maeaea—i le taimi nei o i latou sa e faamanualia.

E ui lava atonu e te fefe e mafaufau i ai, e mafai ona e naunau e feiloai atu i tagata o loo i lau lisi pe a manu ae se avanoa. E mafai ona e saunia e faia mea uma e te mafaia ia fai ai se faaleleiga ma i latou. E mafai ona e ola i le faatuatua i le Alii, ae le o le fefe i mea e ono fai e isi. E mafai ona e naunau i le Laasaga 8 e ola i se olaga e taialaina i mataupu faavae nai lo le maasiasi ma le fefe.

Saili le meaalofa o le alofa mama; tatalo mo isi

Mo le faitau afe o tausaga, sa faitau ai e tagata tusitusiga maoae a Paulo e faatatau i le alofa mama ma taumafai e faataitai i ai o latou olaga. E toatele sa tauivi ia maua le alofa mama ma e masani ona toilalo faanoanoa i lo latou le mafai ona faatinoina.

Ua faamanino mai i tusitusiga a le perofeta o Mamona lea alofa mama ma auala e maua ai. Sa ia faamatalaina le alofa; “o le alofa mama lea o Keriso” ma aoao mai e aumai e le Tama lena alofa ia i latou o e “tatalo atu ma le malosi uma o le loto” ma ia “te i latou uma o e ua fai ma soo faamaoni o Lona Alo o Iesu Keriso” (Moronae 7:47, 48).

O le alofa o se meaalofa tatou te maua a o tatou aoao e mulimuli atu ia Iesu Keriso ma a o tatou alolofa ia te Ia ma o tatou loto atoa, manatu atoa, ma agaga atoa. I le faatumulia ai i lenei alofa mama mai ia te Ia ma mo Ia, tatou te iloa ai e mafai ona tatou alolofa atu i isi e pei ona Ia alofa mai ia te i tatou. Ua mafai ona tatou faamagalo atu sese o isi ma fai ni faaleleiga mo a tatou mea sese.

I tapenapenaga mo le faia o faaleleiga, e toatele i matou sa iloa le fesoasoani tele o le gaoioiga lenei. Mafaufau i se tagata sa e le fiafia i ai. Mo vaiaso e lua, ia e tootuli ma le iloa lelei ma tatalo mo ia i aso taitasi. Ia tausia se faamamauga o ni suiga o ou mafaufauga ma lagona e uiga i lena tagata. (Tagai i le Mataio 22:37–38; 1 Korinito 13; 1 Ioane 4:19; Moronae 7:44–48.)

Suesue ma Malamalama

O mau nei ma saunoaga mai taitai o le Ekalesia e mafai ona fesoasoani ia te oe i le uia o le Laasaga 8. Ia faaaoga nei mau ma fesili mo manatunatuga loloto, suesuega ma tusitusiga.

Soo faatupu filemu o Keriso

“Ou te tautala atu ai ia te outou o e o i le ekalesia, o soo agamalu o Keriso, o e ua maua le faamoemoe ua lava tou te ulu atu ai i le malologa o le Atua, e afua i lenei aso ae oo i le aso tou te malolo ai faatasi ma ia i le lagi.

“O lenei foi, o’u uso e, ua ou manatu ua i ai nei mea ia te outou ona o lo outou savavali filemu faatasi ma le fanauga a tagata” (Moronae 7:3–4).

• I uluai Laasaga e 7, sa outou amataina ai se faagasologa o le avea o se soo faatupu filemu o Keriso. Afai ua e faalelei ma le Alii, ua e saunia lelei e faalelei ma isi. O a nisi Laasaga e te manaomia ina ia e faalelei ai ma tagata i lou olaga?

• Tusi e uiga i le atamai i le uia o Laasaga i le faasologa e tatau ai.

O le alofa afoafoa o le Alii

“E leai se fefe i le alofa; a o le alofa atoatoa e faateaeseina ai le fefe, aua o le mea tiga le fefe. O le ua fefe e le faaatoatoaina o ia i le alofa.

“Ua tatou alolofa [i le Atua] aua na ia muai alofa mai ia te i tatou” (1 loane 4:18–19).

• O le manatu i le faia o faaleleiga e mafai ona tau faamata’u pe a e tulimatai atu e faia ia atoatoa. E mafai faapefea ona e faatuatua i le alofa atoatoa o le Alii mo oe ma mo le tagata sa e sailia mai ai le faamagaloga ona faamalosia lou mafaufau e fai se faaleleiga i soo se mea e mafai ai.

Aapa afu i isi

“Aua tou te faamasino atu, ona le faamasinoina mai ai lea o outou, aua tou te faasala, ona le faasalaina mai ai lea o outou; ia outou faamagaloina atu, e faamagaloina mai ai outou:

“Ia outou foai atu, e foaiina mai ai ia te outou; e foai mai e i latou i lo outou lava ie pulupulu le fua lelei, e lolomi, ma luluina, e tumu ma solo i tua, aua o le fua tou te fuaina atu ai, e fuaina mai ai ia te outou” (Luka 6:37–38).

• E ui lava atonu e te fefe i teena e nisi tagata au taumafaiga e faalelei ma i latou, aua le avea lenei fefe e tutaia ai oe mai le tuuina o i latou i lau lisi, ma le saunia o oe lava e aapa atu ia i latou. E sili mamao atu faamanuiaga nai lo le tiga. Suesue i le fuaitau lenei, ma tusi e uiga i faamanuiaga o le naunau e faia faaleleiga.

“O le latalata lava o lo tatou o atu i lo tatou Tama Faalelagi, o le tele foi lea o lo tatou mafuli atu e vaavaai ma le agalelei i agaga ua fano; tatou te lagona lo tatou mananao e fafa i latou i o tatou tauau, ma tiai a latou agasala i o tatou tua…. Afai e te manao ia i ai le alofa mutimutivale o le Atua ia te oe, ia e alofa mutimutivale foi i le tasi ma le isi” (Joseph Smith, i le History of the Church, 5:24).

• A aunoa ma Iesu Keriso, o i tatou o ni tagata ua fano ma le atoatoa. E faapefea ona fesoasoani ia te oe le iloa o le uia o le Laasaga 8 o oe o se tagata e fano ua saunia e faia se faaleleiga i se isi tagata e fano?

Faamagalo atu ma talosaga atu mo se faamagaloga

“Ona alu ane ai lea o Peteru ia te ia, ua faapea ane, Le Alii e, e agaleaga mai faafia ea lo’u uso ia te a’u, ma ou faamagalo ia te ia? seia atu fitu ea?

“Ua fetalai atu Iesu ia te ia, Ou te le fai atu ia te oe, seia atu fitu, a ia fitugafulu ni fitu” (Mataio 18:21–22).

• O le faamagalo atu po o le ole atu mo se faamagaloga mo se mea sese e tasi e faigofie atu nai le ole atu mo se faamagaloga o ni tulaga ua leva ua faatumulia i le tele o tausuaiga. Mafaufau i fegalegaleaiga, ua te’a ma aso nei sa tupu ai le tele o tausuaiga ma o loo manaomia ona faamagaloina. E faapefea ona e maua le malosi e faamagalo ma saili ai le faamagaloga?

• E faapefea ona avea lesu Keriso ma faataitaiga sili o le mafai ona faamagalo atu? Manatunatu i Lona naunau e fesoasoani ia te oe e faamagalo isi.

“Ou te fai atu ai ia te outou, e tatau ona outou faamagalo atu le tasi i le tasi; aua o le le faamagalo atu i lona uso i ana solitulafono ua tausalaina i luma o le Alii, aua e i ai pea ia te ia le agasala e sili ona mamafa.

“O a’u le Alii, e faamagalo atu i e ou te loto ia faamagaloina, a o outou e ao ina outou faamagaloina atu i tagata uma” (MFF 64:9–10).

• Sa aoao mai Iesu o le le faamagaloina o isi o se agasala e sili le mamafa atu nai lo le uluai solitulafono po o sala. E faapefea ona tutusa le musu e faamagalo oe lava po o se isi, ma le faafitia o le Togiola a le Faaola mo agasala?

• E faapefea ona faaleagaina oe faaletino, faalelagona, ma faaleagaga e le inoino ma le loto tiga?

Talepeina le taamiloga o le ita ma le tausuaiga

“E leai se mea e sili atu ona aoga e tatai ai se tagata e lafoai le agasala i lo le taitai o i latou, ma vaai i latou ma le faapelepele. A faaalia e se tagata se agalelei faatauvaa ma le alofa ia te au, Oka se mana na te faia i lo’u mafaufau, ae o lona faafeagai e matele ina fatufatuai ai lagona le lelei uma ma fa’atu ai le mafaufau o le tagata” (Joseph Smith, i le History of the Church, 5:23–24).

• Sa faamalamalama e le Perofeta o Iosefa Samita o le agalelei e taitai atu ai i le salamo ma le faamagaloina. Mafaufau loloto ma tusi e uiga i lou naunautai ia avea ma tagata e talepeina le taamiloga o le ita ma tausuaiga.

• Mafaufau i tagata sa faaali atu ia te oe le agalelei ma le alofa. Sa faapefea ona musuia ma uunaia oe e sui au amioga ona o a latou faatinoga?

• Mafaufau i ni fegalegaleaiga faaletonu i lou olaga. O a ni auala e ono sui ai ao e aapa atu i isi tagata i le alofa ma le agalelei?