Laasaga 2

Faamoemoe

Mataupu Faavae Autu: Ia e talitonu o le mana o le Atua e mafai ona toefuatai ai oe i le malosi atoatoa faaleagaga.

Ina ua matou iloaina le leai o so matou malosi e faatoilalo ai mea ua avea ma vaisu, e toatele nisi o matou na lagona le aveesea mai o le faamoemoe. O i matou ia na tutupu ae ma le leai o se manatu i le Atua, sa matou mautinoa ua leai so matou avanoa mo se fesoasoani. Ae o le taimi foi lea, o i matou sa talitonu i le Atua sa talitonu na toasa tele o Ia ia i matou ua le fesoasoani mai ai. Po o le a lava le itu, ua tuuina mai e le Laasaga 2 se tali matou te lei manatu lava i ai pe na matou le amanaiaina foi—ia liliu atu i le Atua ma maua le faamoemoe i le Togiola a Iesu Keriso.

Ina ua iu ina faamaulaloina i matou, sa matou aapa atu mo se fesoasoani. Sa amata ona matou auai i fonotaga o le toe faaleleia, i le mulimuli ai i se mea na matou lagonaina na pei o se sulu itiiti o le faamoemoe. Sa faatumulia i matou i le masalosalo ma le fefe, i le taimi muamua na matou faatasi atu ai i fonotaga mo le toe faaleleia. Sa matou fefevavale, atonu foi na i ai lagona faaamuamu, ae o le mea sili na matou o mai. Sa matou faalogo ai iina i alii ma tamaitai o faamatalatala faamaoni le tulaga na i ai o latou olaga, o le mea na tupu na suia ai i latou, ma le tulaga na i ai le ola i le toe faaleleia mai le tagofia o mea ua fai ma vaisu. Sa matou iloa o le toatele o tagata sa matou feiloai i ai i fonotaga, sa i ai foi taimi na latou lagona ai le leai o se faamoemoe e pei ona sa matou lagonaina. A o lea ua matou talitalie, talatalanoa, fiafia, auai i fonotaga, tatalo, faitau tusitusiga paia, ma tusitusi ia latou api o talaaga o le toe faaleleia.

Sa faasolosolo malie lava ona aoga ia i matou ia mataupu faavae sa latou fefaasoaai ma faataitaia. Sa faaauau ona matou o mai pea, sa amata ona matou lagona se mea matou te lei toe lagonaina i le tele o tausaga—sa matou lagonaina le i ai o le faamoemoe. Afai sa i ai le faamoemoe mo isi o e sa toetoe a oo atu i le faatamaiaga, atonu foi la sa i ai le faamoemoe mo i matou uma. Sa matou talisapaia le faalogoina afai matou te liliu atu i le Alii, o le a “leai ni vaisu, leai ni mausa, leai se tetee, leai se solitulafono, leai se agasala e tuusaunoa mai le folafolaga o le faamagaloina atoatoa” (Boyd K. Packer, i le Conference Report, Oke. 1995, 22; po o le Ensign, Nov. 1995, 19).

I lenei siosiomaga o le faatuatua ma le molimau, na matou maua ai le faamoemoe na faapea ona amata fagua ai i matou i le alofa mutimutivale ma le mana o le Atua. Sa amata ona matou talitonu e mafai ona Ia laveai i matou mai noataga o le tagofia o mea ua fai ma vaisu. Sa matou mulimuli i faataitaiga a a matou uo ua toe faaleleia olaga. Sa matou auai atu i fonotaga, tatalo, toe faafou lo matou toaaga i le Lotu, ma mafaufau loloto ma faaaoga tusitusiga paia ma faapea ona tutupu ai a matou lava vavega. Sa matou iloa le faamanuiaina o i matou i le alofa mutimutivale o Iesu Keriso e faatumau ai lo matou le toe manao i mausa e tasi le aso i le taimi. A o matou uia le Laasaga 2, sa matou naunau e suia le faatuatuaina o i matou lava ma o matou mausa, i le faatuatua i le alofa ma le mana o Iesu Keriso. Sa matou uia lenei Laasaga i o matou mafaufau ma o matou loto, ma sa matou iloa le mea moni e faapea, o le faavae o le toe faaleleia mai le tagofia o mea ua fai ma vaisu e tatau lava ona faaleagaga.

O le a e iloa foi lenei mea moni a o e uia Laasaga ua fautuaina atu i lenei taiala. E matuai aoga ai taumafaiga uma lava. O lenei polokalama e faaleagaga, ma o se polokalama o faatinoga. Afai e te mulimuli i nei mataupu faavae ma faataga ia galueaiina i lou olaga, o le a e iloa ai le toefuataiina o oe lava i le maloloina faaleagaga e ala i la oulua sootaga fou ma le Alii. O le a fesoasoani Lona Agaga e te amata vaaia ai ma le faamaoni ma le manino o au filifiliga; o le a e faia faaiuga e ogatasi ma mataupu faavae o le talalelei.

O lenei vavega sa toetoe ina tupu i lena lava taimi i nisi o i matou; ae mo isi, sa faifai malie le toe faaleleia. Pe faapefea lava ona tupu ia te oe, o le a iu ina mafai ona tatou fai atu faatasi e faapea, o le “faamaoni ia Keriso” ua faasaoina ai oe mai lou tagofia o mea ua fai ma vaisu ma olioli i se “faamoemoe atoatoa lelei” (2 Nifae 31:20).

Sa aoao mai Elder David A. Bednar o le Korama o Aposetolo e Toasefululua i le mana o le Alii e fesoasoani ia te outou:

E le tatau ona tatou manatu faatauvaa pe le amanaiaina le mana o le alofa mutimutivale o le Alii. O le faigofie, ma le lelei, ma le faamaoni o le alofa mutimutivale o le Alii, o le a matua aoga e faamalolosia ma puipuia ai i tatou i nei taimi faigata ua tatou ola ai ma o le a ola ai foi. A le mafai e upu ona maua ai le mafanafana tatou te manaomia pe faaali atu ai le olioli tatou te lagonaina, a le manuia le taumafai atu e faamatala se mea e le mafaamatalaina, a le mafai ona lava le malamalama e maua e le faavasegaga ma le mafuaaga e uiga i le le tonu o faamasinoga ma le tutusa o le olaga, a le lava le poto masani ma le iloiloga a le lalolagi e maua mai ai le taunuuga o loo naunau i ai, ma afai foi e foliga mai ua matua tuulafoaiina lava i tatou, e moni e faamanuiaina i tatou i le alofa mutimutivale o le Alii, ma e faamalolosi ai i tatou e oo lava i le mana o le faaolaina (tagai 1 Nifae 1:20).

“O nisi tagata ua faalogo pe faitau sese foi i lenei savali, e ono le maua i o latou olaga le alofa tunoa o le Alii ona ua talitonu “E le i filifilia a’u ma o le a le filifilia lava.” Tatou te ono mafaufau sese foi o na faamanuiaga ma meaalofa ua teuina mo isi tagata e sili atu ona amiotonu, pe auauna atu foi i ni valaauga taualoa o le Ekalesia. Ou te molimau atu o loo avanoa le alofa mutimutivale o le Alii mo i tatou uma, ma o loo naunau foi le Faaola o Isaraelu e faaee mai na meaalofa i o tatou luga” (i le Conference Report, Apr. 2005, 106–7; po o le Ensign, Me 2005, 100–101).

O le a e vaai i le alofa mutimutivale o le Alii i lou olaga a o e aoao e mataituina ma a o faasolo ina e talitonu e mafai moni e le mana o le Atua ona fesoasoani i lou toe faaleleia.

Laasaga e Faatino

Tatalo; faitau ma mafaufau loloto i mau

A o e tuu ese le faamaualuga ae amata ona mafaufau i le toe aumaia o le Atua i lou olaga, o le a amata ona e manatunatu i upu e sili atu ona agaga tatalo. Mulimuli ane, o le a e iloa ua e saunia e tootuli ma tatalo ma le leotele. O le a e maua se lagona lelei i le faaali atu o ou lagona ma manaoga i le Atua. O le a e lagona ua e toe tatalaina se talanoaga ma se tasi o le a tali mai pea ia te oe, e le faapea o le a tali mai ioe i taimi uma, ae o taimi uma lava e tali mai ma le alofa. O lea la ua e amata iloa taunuuga faamalolo o le alu ese mai le tuua na o oe.

O le naunautaiga e fesootai ma le Atua o le a taitai atu ai oe e suesue i upu a perofeta o aso nei ma anamua. O le a tuputupu ae lou faamoemoe e mafai foi ona maua au tali i lou faalogo i isi na maua a latou tali mai tusitusiga paia. O le a e maua ni musumusuga faaopoopo mai e le Agaga, a o e tusia ou manatu. Suesue ma le agaga tatalo ma o le a tuu mai ia te oe e le Alii tali i au fesili ma ou manao.

O se vaega sili e amata ai au suesuega o fuaiupu o loo i le faaiuga o mataupu taitasi i lenei taiala. Sa filifilia fuaiupu taitasi ma le mafaufau i le toe faaleleia, ma o fesili taitasi ua fesiligia ma le faamoemoe atonu e fesoasoani ia te oe e faatatau le fuaiupu i lou olaga. Faaalu ni nai minute o aso taitasi e saili ai po o le a le mea o finagalo le Atua e ta’u mai ia te oe.

Talitonu i le Atua le Tama Faavavau ma Lona Alo o Iesu Keriso, ma le Agaga Paia

O le toatele o tatou sa tutupu ae ma sina manatu i le Atua, ma o le avea ai ma tagata o le Ekalesia, sa i ai sina o tatou malamalama i le Tama Faalelagi, Iesu Keriso, ma le Agaga Paia. Atonu sa i ai foi sina o tatou talitonuga ia i Latou, ae sa masani ona tatou le faafesootaia a tatou tauiviga faaletagata lava ia ma lo tatou manaomia o le mana o le Atua i o tatou olaga.

O gaoioiga o loo manaomia i le Laasaga 2 ia i ai le naunautai e faataitai ona talitonu i le alofa ma le agalelei o le Tama Faalelagi ma Iesu Keriso ma le faigofie ona maua ma faamanuiaga o le Agaga Paia. O a matou tautinoga o le, e mafai ona e iloa le alofa soofaatasi atoatoa o le Aiga Atua e ala i le vaavaai mo ni faamaoniga o lo Latou alofa ma le mana i lou olaga ma olaga o isi.

Suesue ma Malamalama

O mau o loo mulimuli mai e mafai ona fesoasoani ia te oe i le uia o le Laasaga 2. Matou te fautuaina ia e faaaoga nei mau ma fesili mo talanoaga, suesuega ma tusitusiga. Manatua ia faamaoni ma faapatino au tusitusiga.

Talitonuga i le Atua

“Ina faatuatua ia i le Atua; ma ia talitonu o loo soifua o ia, na ia faia foi mea uma ua i le lagi atoa ma le lalolagi; ia talitonu foi ua le iloa e tagata mea uma e mafai ona silafia e le Atua” (Mosaea 4:9).

• E toatele molimau i le lagi ma le lalolagi ua tautino mai o loo i ai le Atua. O a ni faamaoniga o le Atua ma Lona alofa ua e mauaina?

Faatuatua ia Iesu Keriso

“la e talai atu ia te i latou le salamo ma le faatuatua i le Alii o Iesu Keriso; ia e aoao atu ia te i latou ia faamaualalo i latou, ma ia agamalu, ma ia loto maulalo; ia aoao atu ia te i latou e tetee atu i tofotofoga uma a le tiapolo, i le faatuatua i le Alii o Iesu Keriso” (Alema 37:33).

• E toatele tatou sa taumafai e o ese mai mea ua fai ma vaisu e ala i o tatou lava loto naunautai po o le i ai o se uo po o se fomai faufautua. Sa oo ina tatou iloa o lo tatou faatuatua ia i tatou lava, po o isi sa lei mafai ona faatoilaloina atoatoa ai lo tatou tagofia o mea ua fai ma vaisu. Ia tusi e uiga i ou lagona o i ai nei o le faamaulalo ma le naunautai e liliu atu ia Keriso ma Lana talalelei nai lo isi punavai uma o fesoasoani i au taumafaiga mo le toe faaleleia.

O Le agalelei o le Faaola

“Ona alaga loa lea o le tamā o le tama, ua fai mai ma le tagi, Le Alii e, ua ou faatuatua; ia e fesoasoani i lo’u le faatuatua” (Mareko 9:24).

• O lenei tagata sa sailia le fesoasoani mai le Faaola ma sa ia mauaina. E lei aoaia o ia e Iesu ona o lona masalosalo. Tusi e uiga i le agalelei ma le faapalepale o le Faaola.

• O le a sou lagona i le faasoa atu o ou lagona i le Alii?

O le meaalofa o le alofa tunoa

“O … lea ia tatou faalatalata atu ai ma le faamalosi i le nofoalii o le alofa tunoa, ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai” (Eperu 4:16)

• I le Bible Dictionary, o le alofa tunoa ua faauigaina o le “auala faalelagi o le fesoasoani po o le malosi” e tuuina mai e ala i le “tele o le alofa mutimutivale ma le alofa o Iesu Keriso” (“Grace,” 697). O lenei meaalofa faalelagi e mafai ai ona e faia ai mea e sili atu nai lo mea na semanu e te faia pe a na tuua na o oe. O le a faia e le Faaola mo oe mea e le gafatia ona e faia mo oe lava. O Lona alofa tunoa e te mafai ai ona e salamo ma suia. O a ni itu na e lagonaina ai le meaalofa o le alofa tunoa i lou olaga?

• E mafai faapefea e le meaalofa o le malosi faalelagi ona faatumau le faaauauina pea o le toe faalelei o lou olaga?

Faamalologa

“Po ua e faatuatua ea i le mana o Keriso i le faaolataga?… Afai ua e faatuatua i le togiola a Keriso, e mafai ona faamaloloina oe” (Alema 15:6, 8).

• A tatou manatu i le faamalologa, e masani ona tatou manatu i o tatou tino. O a nisi vaega e uiga ia te oe atonu e manaomia ai le mana faamalolo o lesu Keriso?

• Ia tusi e uiga i lou manaomia ona utuvai mai i le mana faaola (faamalolo, liua) o Keriso.

Fagua mai

“Afai tou te ala mai, ma fagua o outou mafaufau e oo i le tofotofo i au upu, ma faaaoga sina faatuatua itiiti lava; ioe afai tou [te] le mafaia se mea e sili i le manao i le fia faatuatua, ina tuu ia lenei manao e galue i totonu ia te outou, seia lava lo outou faatuatua e talia ai nisi o au upu” (Alema 32:27).

• O le nofouta—po o le fagua ma faagaeetia lou mafaufau—o se vaega taua o le faagasologa o le aoaoina ia talitonu. O a ni itu ua sili atu ai lou nofouta i le taimi nei ia Iesu Keriso ma Lona mana i lou olaga, nai lo le tulaga na e i ai i le vaiaso ua tea? i le masina talu ai? i le tausaga ua tuanai?

Laveai mai le nofopologa

“Sa faapologaina i latou ma ua toe laveaiina i latou ai le nofopologa e le Atua i le mana o lana afioga” (Alema 5:5).

• O le a mamana le afioga a le Atua i le tatalaina o oe mai le nofopologa. O le a e maua le afioga a le Atua i tusitusiga paia ma saunoaga e te faalogoina i konafesi ma le faitau i mekasini a le Ekalesia. E mafai foi ona e maua sao le afioga a le Atua mai le Agaga Paia. Tusi nisi o mea ua e manao e fai nei ia e maua ai Ana afioga.