Laasaga 5

Ta’uta’u Atu

Mataupu Faavae Autu: Ta’utino ia te oe lava, i lou Tama Faalelagi i le suafa o Iesu Keriso, i taitai perisitua e tatau ai, ma se isi uso a tagata le uiga moni o ou sese.

Ose uiga taatele o le toatele o e ua pagatia mai le tagofia o mea ua fai ma vaisu o le lagona o le tuua toatasi. E oo lava i se mea tumutumu pe o faia foi ni gaoioiga lea atonu o loo maua ai e isi se lagona fesootai, sa i ai lava o matou lagona o le faaesea. Ao matou o mai i fonotaga mo le toe faaleleia, sa amata ona matou o ese mai i le faaesea faalelagona lea sa malosi ai le tagofia o mea ua fai ma vaisu. O le toatele o matou sa na ona nonofo ma faalogologo i le taimi muamua ae na iu ina matou lagona le saogalemu e talanoa ma fefaasoaai. Ae sa taofia pea le tele o mea ia i matou lava—o mea faalumaluma, mea maasiasi, mea faamomoiloto, o mea sa matou lagona ai le leai o se faamoemoe.

Sa matou faia ni faamaumauga faamaoni ma le maeaea i le Laasaga 4, peitai o se aafiaga patino lena. Sa tuua pea na o i matou ma le maasiasi i mea na tutupu i aso ua mavae. A na matou le uia lava le Laasaga 5 e le mafai ona matou tiai ese noanoaga faaesea o mea lilo ae toe maua se vaaiga mamao ia i matou lava ma taimi ua mavae. Na amata e le ta’uta’u atu se faagasologa o le faailoa atu lea sa matou fefaasoaai ai lagona o le loto nutimomoia i uo, aiga ma isi. O se vaega lea o se taumafaiga faifai pea e toe fonofono ma toe faatulaga sootaga ua malepelepe. O le ta’uta’u atu foi na aofia ai le sailia o le faamagaloga mai le Alii e ala i le tatalo ma soo se fesootaiga talafeagai faaleperisitua.

Sa matou iloa e sili lava le fai o le Laasaga 5 i le taimi lava e maea ai le Laasaga 4. O le tolopoina o le a pei lava o le faailoa atu o se manua ua aloua ae le fufuluina. Sa foliga mai le Laasaga 5 e anagata, ae matou ole atu i le Alii mo se fesoasoani, sa Ia aumai ia i matou le lototele ma le malosi. Ina ua maea ona toe iloilo a matou faamaumauga, sa matou ta’uta’u atu i o matou epikopo soo se mea sa le tusa ai ma le tulafono po o se agasala, po o se mea sese, e ono taofia ai lo matou maua o se pepa faataga o le malumalu. O lenei faaali atu i taitai perisitua e tatau ai sa o se vaega taua o le toe faaleleia ma le faamalologa.

Sa matou filifilia foi se isi tagata faatuatuaina e mafai ona matou faailoa i ai le natura moni o o matou sese. Sa matou taumafai e filifili se tasi sa laasia Laasaga 4 ma le 5, ma sa matua malosi lelei i le talalelei. Sa amata le fonotaga i le tatalo e valaaulia ai le Agaga, ona matou faitauina leotele lea o a matou faamaumauga. O tagata taitoatasi sa faalogologo ia matou faamaumauga sa masani ona fesoasoani ia i matou ia iloa vaega sa faamalumalu solo o le olegia e le tagata o ia lava. Sa latou fesoasoani e tuu o matou olaga i se vaaiga mamao ma aloese i le faatele po o le faaitiitia o lo matou tali atu mo i matou lava.

O le tusiaina o a matou suesuega sa faapei o le faamaumauina o le faitau selau o vaaiga eseese mai o matou olaga. I le Laasaga 5, sa matou maua ai se avanoa e vaaia ai le fofola mai o o matou olaga, i lea vaaiga ma lea vaaiga, i se ata faasolo faamatala. A o matou faia, sa amata ona matou iloa mamanu o vaivaiga sa uunaia a matou filifiliga. Sa amata ona matou malamalama i lo matou lilifa atu i mafaufauga ma lagona le lelei (loto malosi, fefe, faamaualuga, alofa i le tagata lava ia, loto leaga, faafia-amiotonu, ita, inoino, o tuinanau ma manaoga e le taofiofia, ma isi mea faapena). O nei manatu ma lagona o natura moni lava ia o a matou mea sese.

I le faamaeaina o le laasaga 5, sa matou faaali atu i luma o le Atua, i matou lava ma se tasi molimau lo matou tautino i se olaga fou e faavae mau i le ta’u atu ma le faia o le mea moni. E ui o le Laasaga 5 o se Laasaga sa matua faigata ona uia, ae sa faamalosiauina i matou i le fautuaga a Peresitene Spencer W. Kimball: “E le mafai ona oo mai le salamo seiloga e faaali atu e se tasi lona agaga ma ioeina ana gaoioiga e aunoa ma ni alofaga po o ni fe’alofaiga.… O i latou ua filifili e faafetaiaia luitau ma suia o latou olaga, atonu o le taimi muamua e faigata ia i latou le uia o le auala i le salamo, ae o le a latou iloa o le auala aupito sili lea ona manaomia a o latou tofo i ona fua” (“The Gospel of Repentance,” Ensign, Oketopa. 1982, 4).

Ua matou oo i le mea na aoao mai e Peresitene Kimball. Ina ua matou faamaeaina ma le faamaoni ma le maeaea lelei le Laasaga 5, sa leai ma se isi lava mea na matou toe natia. Sa matou faaaliali atu lo matou naunau e “lafoaiina [a matou] agasala uma” (Alema 22:18) ina ia mafai ona matou maua se malamalama sili atu i le alofa o le Atua, le alofa ma le lagolago a le toatele o tagata lelei o e sa fesoasoani ia i matou.

Laasaga e Faatino

Amata ona saili le faamagaloga; talanoa ma le epikopo e pei ona manaomia; ia faamaoni i le Atua, ia te oe lava ma isi.

O le “tiute o tagata uma taitoatasi [ia] tautino atu a latou agasala uma i le Alii” (Bible Dictionary, “Confession,” 649). E tatau ona tautau atu soligatulafono matuia i taitai perisitua e tatau ai, e masani lava o le epikopo: “E ui e na o le Alii e faamagaloina agasala, ae o nei taitai perisitua latou te faia se galuega e matuai taua lava i le faagasologa o le salamo. O le a latou le faalauaiteleina le tautauina atu o au agasala ma o le a fesoasoani atu ia te oe i le faagasologa o lou salamo. Ia e matuai faamaoni ia i latou. Afai e te tautau na o se vaega o mea sese laiti, o le a e le mafai lava ona e foia se solitulafono matuia e te lei faailoa atu. O le vave ona e amataina o lenei faagasologa o le vave foi lena ona e maua o le filemu ma le olioli lea e maua mai i le vavega o le faamagalo atu” (Faamaoni i le Faatuatua: O se Tusi Taiala o le Talalelei [2004], 134).

Ia faaaoga le matuai faautauta ma le atamai pe a filifilia se isi e ese mai i se taitai perisitua e faailoa atu i ai au mea sese. Aua lava e te faasoa atu ia faamatalaga maaleale i tagata e te masalomia e latou te ono tuuina mai se taitaiga le talafeagai, tuuina mai ni faamatalaga sese, pe faigata foi ona tausisia le le faalauaiteleina o lau tautinoga. O i latou e te faasoa atu i ai au faamaumauga e tatau ona matuai faatuatuaina e le gata i le upu ae faapea i mea e fai.

Faataga le filemu e oo atu i lou olaga

Sa lapataia e Peresitene Polika Iaga ia tagata o le Ekalesia e aua le faailoaina atu agasala ma le le tusa ai. “A matou talosagaina le usoga, e pei ona matou faia soo, e saunoa i sauniga faamanatuga, e matou te talo-talo, afai sa latou faamanualia o latou tuaoi, ia tautau atu o latou sese; ae aua le faailoa atua au amioga faavalevalea e leai se isi o ona iloa sei vagana ai oe lava. Tau atu i tagata lautele mea e a tagata lautele. Afai sa e agasala i tagata, tautau atu ia i latou. Afai sa e agasala i se aiga po o se tuaoi, alu i ai e tautau atu ia i latou. Afai sa e agasala i lau uarota, tautau atu i lau uarota. Afai sa e agasala i se tagata se toatasi, ave lena tagata e na o oulua ma tautau atu i ai. Ma afai ua e agasala i lou Atua, pe o oe lava, ia tautau atu i le Atua, ae tuu pea na mataupu ia te oe lava, aua ou te le fia iloa se mea e uiga i ai” (Discourses of Brigham Young, sel. John A. Widtsoe [1954], 158).

Atonu e te matauina mai lea taimi i lea taimi ni tagata i fonotaga mo le toe faaleleia po o isi foi tulaga e foliga o loo faaauau pea ona talanoa i a latou agasala ma vaivaiga po o agasala sa faia e isi ia i latou. Latou te tautau atu i taimi uma ae le mafai ona maua se toafilemu.

Aua le fenumiaia le Laasaga 5 ma se manao soona fai e mafaufau ai pea i mea lelei. O le faamoemoega o le Laasaga 5 o le faafeagai tonu lea. Tatou te uia le Laasaga 5 e le ina ia taofi mau ai i mea ua uma ona tautau atu ae ina ia amata ona iloa ai le leaga mai le lelei mo i tatou lava ma ia filifili le lelei.

Suesue ma Malamalama

O mau nei ma saunoaga mai taitai o le Ekalesia e mafai ona fesoasoani ia te oe i le uia o le Laasaga 5. la faaaoga e mafaufau loloto ai, suesuega ma tusitusiga. Manatua ia faamaoni ma faapatino au tusitusiga.

Tautau atu i le Atua

“O au le Alii, ou te faamagaloina agasala a e ta’uta’u a latou agasala i o’u luma ma ole mai ia faamagaloina” (MFF 64:7).

• E faapefea ona fesoasoani ia te oe le ta’uta’u atu o au agasala i le Atua e faia ai ni suiga lelei i lou olaga?

• E toatele i tatou e lagona le fefe ma le mananao e fai le Laasaga 5. E mafai faapefea e le tautau atu o au agasala i le Atua ona avatu ia te oe le lototele ma le malosi e iu ai lava ina e tautau atu i se isi tagata?

Ta’uta’u atu i isi

“Ia fefaaaliai a otuou agasala, ma tatalo le tasi mo le tasi, ina ia faamaloloina outou” (lakopo 5:16).

• Atonu e te popole ne’i le taliaina oe e se tasi sa iloaina lelei ou vaivaiga ma ou toilalo uma. Peitai o se taitai perisitua po o se uo faatuatuaina e malamalama i le faagasologa o le toe faaleleia, e masani ona tali atu i le agaga malamalama ma le agalelei. E mafai faapefea e se tali faapena ona fesoasoani ia te oe ia faamaloloina?

Taumafai ia taulelei i isi

“Aua nei i ai se tagata na te faasalalau atu lona lava amiotonu … ; ia vave ona ta’uta’u atu e ia ana agasala, ona faamagaloina lea o ia, ma o le a na ia aumaia ni fua e tele atu” (Joseph Smith, i le History of the Church, 4:479).

• O se tasi o mea e sili ona mananao i ai i latou o loo tauivi ma le tagofia o mea ua fai ma vaisu o le naunau tele ia latou foliga lelei i isi. E faapefea ona taofia oe e lenei manao mai le alualu i luma ma le “aumaia o ni fua e tele atu?” (po o galuega lelei)?

• E faapefea ona suia lau amio pe afai ona pau lava lou popolega ia e foliga lelei i le Atua?

Faamaoni A’ia’i

“Ai se agasala mai ia te au, o ia lena e te faamasino i ai e tusa ma agasala ua faia e ia; afai foi e faaali e ia ana agasala i luma o oe ma a’u, ma ua salamo faamaoni i lona loto, o ia lena e te faamagaloina, ou te faamagaloina foi o ia” (Mosaea 26:29).

• E tatau ona e faamaoni a’ia’i pe a tautau atu au agasala. Ia mafaufau pe faapefea ona faavaivaia le faamaoni o au taumafaiga ona o le le tautauina atu o nisi o vaega o au agasala. O le a se vaega o lau faamaumauga, pe afai e i ai, e faaosoosoina oe e nana?

• O le a se mea e te maua i le faaauau ona e natia lenei vaega o lau faamaumauga? O le a se mea o aveesea mai ia te oe?

Ta’uta’u atu agasala i le taimi lava ua e iloa ai

“O lenei lava tausaga ua faailoatinoina ai ia te i latou lo latou sese ma ua latou faaali atu a latou agasala” (3 Nifae 1:25).

• O lenei fuaiupu o se faataitaiga o tagata sa le tolopoina le tautau atu o o latou sese i le taimi lava na latou iloa ai. O a ni aoga o le faia o le Laasaga 5 i le taimi lava e uma ai le Laasaga 4?

• O a ni taunuuga matautia o le tolopoina o le Laasaga 5?

Faateaese le atu ae maua le toafilemu

“Ana le aoga ia te oe po ua ou le tautala i au agasala e faaatuatuvale ai lou loto” (Alema 39:7).

• E faapea mai nisi tagata ua tele lo tatou nonofo i mea le lelei o le olaga i le faia o Laasaga 4 ma le 5, ma o le faia o lea ua na ona faaopoopo ai lo tatou atuatuvale. I lenei fuaiupu, ua aoaoina ai tatou o le faafesagai ma a tatou mea sese e lelei mo tatou, e le na ona “faaatuatuvale” (po o le faatigaina) o o tatou agaga. O a ni ala e mafai e le Laasaga 4 ma le 5 ona aveese lou atuatuvale ae aumaia ia te oe le toafilemu sili atu?

Lafoai o agasala

“Tou te iloa faapea se ua salamo i ana agasala—faauta, na te ta’uta’u atu ma lafoaia” (MFF 58:43).

• O le lafoaia o se mea o lona uiga o le tiai ese po o le matuai lafoai atoa. E faapefea ona faaalia lou naunau e lafoai ou ala tuai i le faamaeaina o le Laasaga 5?