Laasaga 9

Toe Totogi ma Toe Faalelei

Mataupu Faavae Autu: Faia tuusa’o faaleleiga i soo se mea e mafai ai ma tagata uma ua afaina ona o oe.

Ao tatou faagasolo atu i le Laasaga 9, sa tatou saunia e saili le faamagaloga. E pei o atalii salamo o Mosaea, o e na feoai solo, “ua vilivilitai lava e faalelei mea leaga uma na latou faia” (Mosaea 27:35), sa tatou naunau e fai ni faaleleiga. Ae a o tatou feagai ma le Laasaga 9, sa tatou iloa e le mafai ona fai o tatou manaoga, seiloga e faamanuiaina i tatou e le Atua i Lona Agaga. Sa tatou manaomia le lototele, faautautaga lelei, magafagafa, faaeteete ma le taimi talafeagai. O uiga nei sa lei maua e le toatele o tatou i na taimi. Ua tatou iloaina o le Laasaga 9, o le a toe tofotofoina ai o tatou naunautaiga ia faamaulalo i tatou lava ma saili se fesoasoani ma le alofa tunoa o le Alii.

Ona o o matou aafiaga i lenei faagasologa luitauina, ua matou ofoina atu ai ni nai fautuaga. E matua taua le aua nei e mateletele pe faatamala a o e taumafai e faia se leleiga. E tutusa foi ma le taua o le aua le tolopoina le faia o ni leleiga. E toatele tagata e toe faaleleia olaga e toe fulitua ona ua latou faataga le fefe e taofia lo latou faia o le Laasaga 9. Tatalo mo le taitaiga a le Alii ma talanoa i se faufautua faamoemoeina mo se fesoasoani e alo ese ai mai nei mailei.

O nisi taimi atonu e tofotofoina oe e ‘alo mai le feiloai atu i se tagata o loo i lau lisi. E ui lea, matou te fautuaina ia e tetee atu i lenei tofotofoga, vagana, ai o i ai se noataga faaletulafono e taofia ai oe mai le feiloai atu i se tasi. O le agaga o le lotomaulalo ma se lagona o le faamaoni e mafai ona toe faamafolafolaina ni mafutaga ua lepetia pe afai e te faia ni taumafaiga talafeagai e feiloai atu i le tagata. Faailoa atu i tagata o loo e agai atu e faia se faaleleiga. Ia aloaia o latou manao pe a latou faaali mai e sili ai le aua le talanoaina lea tulaga. Afai latou te tuu atu ia te oe le avanoa e faatoese ai, ia faapupuu ma ia fitoitonu i le tulaga o loo e manatua. E le manaomia ni tala auiliili. O le faamoemoega e le o le faamalamalama pe faamatala atu lou itu o mea na tutupu. O le faamoemoega o le ioeina o mea sese na e faia, tuuina atu se faatoesega ma fai se faaleleiga pe a mafai. Aua le finau ma tagata pe faitioina i latou, e tusa lava pe le manaia pe taliaina a latou tali. Alu atu i tagata taitasi i le agaga maulalo, ofoina atu le faaleleiga, aua le faafia amiotonu.

O le faatoese mo nisi o gaoioiga atonu e sili ona luitauina. Faataitaiga, atonu e tatau ona e talanoa i ni mataupu e i ai ni uiga faaletulafono, e pei o le le faamaoni, po o le agasala ogaoga tau i feusuaiga. Atonu e tofotofoina oe ia e le taofiofi po o le faia o ‘alofaga ma alo ese ai i le faia o faaleleiga. E ao ona e saili ma le agaga tatalo se fautuaga faale-ekalesia pe faapolofesa ae e te lei faia se gaoioiga i nei ituaiga o tulaga ogaoga.

I isi tulaga, atonu e leai ni auala e mafai ona e faia ai se faaleleiga tuusao. Atonu ua maliu le tagata, pe atonu foi e le mafai ona maua le mea e nofo ai. I ituaiga faapenei, e mafai lava ona e faia se faaleleiga i se auala e le tuusao. E mafai ona e tusia i ai se tusi e faaali atu ai lou faanoanoa ma lou manao mo se faaleleiga, e tusa pe le tilivaina le tusi. E mafai ona e aveina se meaalofa i se faalapotopotoga o galuega alofa e sili ona fiafia i ai lena tagata. E mafai ona e sueina se tagata e faamanatu atu ai ia te oe lena tagata ma fai se mea e fesoasoani ai ia te ia. Pe mafai foi ona e faia se mea e te fesoasoani faalilolilo ai i se tagata o le aiga.

Atonu e i ai taimi i le taumafai e fai atu i se isi pe saili e faafoi pe faia se leleiga, e tiga mo lena tagata pe oo foi i se tulaga e afaina ai. Afai e te manatu o le mea lena e ono oo i ai, talatalanoa ma se faufautua faatuatuaina a o lei faia lena faaleleiga. O lenei vaega o le toe faaleleia e le tatau ona oo atu i le faamanualia atili ai o isi. Ma le isi foi, e i ai taimi atonu sa e faatupuina ai ni manuaga e le mafai e le poto o le tagata ona toe faaleleia. Sa saunoa Elder Neal A. Maxwell i lenei mea moni: “O nisi taimi… e le mafai ai se toe faaleleia i tulaga moni, e pei, o le saofaga o se tasi i le aveesea o le faatuatua po o le mama o se isi tagata. Nai lo lena, o se faataitaiga e mulimuli mai o le amiotonu e tuuina atu ai se isi ituaiga taui o le faaleleiga” (i le Conference Report, Oke. 1991, 41; po o le Ensign, Nov. 1991, 31). Mai le taimi e te filifili ai e faaaoga nei mataupu faavae moni e avea ma se ala fou o lou olaga, ua amata ona e faia ni faaleleiga.

A mavae le faia o faaleleiga mo le tele o au gaoioiga ua te’a, atonu o i ai pea se tagata se toatasi pe toalua e te lagonaina e le mafai ona lua fesagai. Aua le popole. E toatele tatou e feagai ma lena lava mea moni. Matou te fautuaina e momoli ou lagona i le Alii i le tatalo faamaoni. Afai o i ai pea ia te oe le fefe tele po o le ita i se isi, atonu e sili ai le tolopo o le lua feiloaiga. Ina ia aveesea ni lagona le lelei, e mafai ona e tatalo mo le alofa ma vaai i le tagata e pei ona silasila i ai le Alii. E mafai ona e vaavaai i ni mafuaaga lelei o le a aoga ai le toe faalelei po o le toe faatasia. Afai e te faia ia mea ma e onosai, e mafai, ma o le a tuuina mai e le Alii—i Lana lava ala ma i Lona lava taimi—le gafatia ma avanoa faavavega e faalelei ai ma tagata taitoatasi o i lau lisi.

O le faamaeaina o le Laasaga 9 i le mea e gata ai lou mafai, ua iu ina e faamaea mea uma e te mafaia ina ia ogatasi ai ma poloaiga a le Alii. Ua e amata ona e oo i se olaga fou o le faamoemoe—e le ia te oe lava, ae i le alofa o le Alii. Ua e ifo i le loloto o le faamaulalo ma maua le Alii o loo faatalitali e opoina oe. Ua e faia mea uma e te mafai e fonofono ai mafutaga ma faalelei ma isi. Ua e i ai i se vaega e ulu atu ai i Lona malologa; o le tumau ai pea iina ua avea ma ou faanaunauga tele. Ua e aoao ia iloa ma mulimulitaia lelei faaaliga faaletagata lava ia, lea e taitai atu ai oe ia ogatasi lou olaga ma aoaoga a perofeta a le Atua i aso anamua ma aso nei. E oo lava foi i ou taimi sili ona faigata, e te lagona se ituaiga filemu fou. Ua e aoao e maua faamanuiaga sa ta’ua e Paulo ina ua ia tusia, “O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu” (Filipi 4:7).

Laasaga e Faatino

Alofa i isi; aloese mai le faamasino o isi; ia naunau e talia se valaauga o le Ekalesia ma ia totogi sefuluai ma taulaga

I aso ua mavae, afai sa e toaga i le lotu, atonu sa uunaia oe e le fefe i le faamasinoga a le Atua pe o manatu foi o isi tagata. Atonu sa e toaga ona o se manatu e faapea o se tiute. O le aso ua e iloaina ai o le auaunaga o se ala o le sau ia Keriso. O se ala e faaali atu ai le alofa i le Atua. E faaali ai se manaomia faifai pea mo Lona mana, ma le agaga faafetai mo Lana fesoasoani paia. Mafaufau pe o lou toaga i le Ekalesia o loo uunaia pea e le fefe po o le tiute po o se fua aliali o le natura o le toe fanaufouina o lou faatuatua ia Keriso.

Po o fea lava e te i ai, ia saili ni auala e auauna atu ai. Ia agavaa ma avanoa e auauna i se valaauga i le Ekalesia po o nisi itu. Ao e auauna i ou uso ma tuafafine ma aoao latou i le upu ma faataitaiga, o le a e faasoa atu ia i latou Lona soifua moni i lou olaga. (Tagai i le Mataio 25:40; Ioane 13:34–35; Ioane 15:15, Mosaea 2:17.)

Ia naunautai e fai mea e tatau ai mo faaleleiga

I le faia o le Laasaga 9, e tatau ona e aloese mai le lotovaivai pe afai e le talia lelei e isi au faatoesega, pe le talitonu foi ua e suia moni. O le faia o faaleleiga atonu e tele se taimi ma le onosai e manaomia ai. Tuu atu le avanoa i isi sei latou iloa ua ese le taimi lenei. O le taimi nei e te le o faia ni folafolaga noa; ua e ola e maua se faamagaloga atoatoa o ou vaivaiga o le tagofia o mea ua fai ma vaisu ma au amioga. E i ai lava le taimi e toe iloa ai lou le toe tagofia o mea ua fai ma vaisu ma le suiga i lau amio.

Suesue ma Malamalama

O mau o loo mulimuli mai ma saunoaga mai taitai o le Ekalesia atonu e fesoasoani ia te oe i le faia o le Laasaga 9. Faaaoga nei mau ma fesili mo manatunatuga loloto, suesuega ma tusitusiga. la faamaoni ma faapatino au tusitusiga.

Uunaia o isi mo le lelei

“Ua faapea mai le Agaga o le Atua ia te au: Ina poloai atu ia i lau fanau ia amiolelei, nei latou taitai ese loto o tagata e toatele i le malaia, o le mea lea ou te poloai atu ai ia te oe, lou atalii e, ma le mata’u i le Atua, ia e aloalosa i au amioletonu;

“la e liliu mai i le Atua ma lou manatu atoa, ma lou loto atoa, ma lou malosi atoa, ina ia e le toe taitaieseina loto o tagata ia amioleaga, ae sili ona e toe foi atu ia te’i latou ma tautau atu ou sese ma faaiu lena leaga na e faia” (Alema 39:12–13).

• O nisi o faamanuaga tele ua tatou faia i isi o le faatosinaina o latou ia latou tagofia foi ia mausa. la tusi e faatatau i tagata i lou olaga o e na e faatosinaina i lenei ala.

• O fea e te maua ai le lototele e fesagai ai ma nei tagata, e tusa ai ma aoaoga a Alema i nei fuaiupu?

Faatauanauina pe faamalosia

“O se fia sau, e mafai ona sau ma inu fua i le vai o le ola; a o se le fia sau, e le faatauanauina o ia, pe a oo foi i le aso gataaga, e toe tuuina atu ia te ia e tusa ma ana galuega” (Alema 42:27).

• Faatasi ai ma le tele o mafuaaga mamana e faia ai le Laasaga 9, e le tatau lava ona puea oe i ni faamatalaga po o pepelo e faapea e leai sau filifiliga. O le Polokalama o le Toe Faaleleia mai le Tagofia o mea ua fai ma vaisu o se polokalama e faatauanau, ae le o le faamalosia. Tusi pe o e lagona le tauanauina po o le faamalosia o oe ia faia le Laasaga 9. O a mafuaaga o le faatauanauina o lisiina i lenei fuaiupu?

Saunia e fetaiai ma le Atua

“O lou manao ia outou o mai, ae le toe faamaa’a o outou loto, aua faauta, o ona po nei, ma le aso lenei o lo outou olataga; o le mea foi lea, afai tou te salamo, ae le faamaa’a o outou loto, e faataunuuina loa ai ia te outou le ala sili o le togiola.

“Aua faauta, e tatau i tagata ona sauniuni i lenei olaga e fetaiai ma le Atua. loe, faauta, o le aso o lenei olaga, o le aso lea e tatau ona fai ai e tagata a latou galuega” (Alema 34:31–32).

• O a nisi mea e te ausia pe a faamaluluina lou loto ma alu e fai ni faaleleiga?

• E faapefea ona faatupuina lou naunau e faia faaleleiga pe a e iloa o loo e sauniuni foi e fetaiai ma le Atua?

Toaga i le Ekalesia

“[O atalii o Mosaea] ua latou malaga solo i le nuu uma … ua vilivilitai lava e faalelei mea leaga uma na latou faia i le ekalesia. Ua faaali atu foi a latou agasala uma, ma ua talai atu mea uma na latou vaaia, ua faamatala foi perofetaga ma tusi ia te i latou uma o e na fia faalogo ia te i latou” (Mosaea 27:35).

• E toatele tagata ua le toe o mai i le lotu ona o le tagofia o mea ua fai ma vaisu. Ua faaaoga e nisi tagata ia sese o isi e tauamiotonuina ai lo latou tau le o mai i le lotu. Tusi e uiga i ni o oe lava aafiaga i le toaga ai i Le Ekalesia a lesu Keriso o le Au Paia o Aso e Gata Ai.

• Na faapefea ona fesoasoani lou latalata atili i le Faaola e ala i le toe faaleleia o lou olaga ua e lagona ma mea ua e toe faatasia ai ma Lana Ekalesia?

• E faapefea ona avea le toaga i le Ekalesia ma fesoasoani ia te oe i le faia o faaleleiga ma toe faaleleia atoatoa?

Faaleleiga e faia ma le naunautai

“E tatau ona e toe aveina atu i le mea sili e te mafaia ai mea uma na gaoia, faatamaia po o le faaleagaina. O le toe faaleleiga e faia ma le naunautai o se faamaoniga mausali lea i le Alii ua e tautino e faia mea uma e te mafaia e te salamo ai” (Richard G. Scott, i le Conferene Report, Ape. 1995, 102; po o le Ensign, Me 1995, 76).

• Tusia pe faapefea ona avea le Laasaga 9 ma faamaoniga e le gata i le Alii ae faapea foi ia te oe ma isi, ua e tuuto atu i se olaga faamaulalo ma le faamaoni.

O vilivilitaiga o lou loto

“O le salamo ma faia poloaiga a le Alii o le a faamagaloina” (MFF 1:32).

• I le faia o faaleleiga atonu o le a lua feagai ma ni tagata o e o le a le faamagalo ia te oe. Atonu o loo maa’a pea o latou loto faasaga ia te oe, pe latou te le talitonuina ou faamoemoega. E faapefea ona fesoasoani lou iloa o loo malamalama le Alii i vilivilitaiga moni o lou loto, ma o le a Ia talia lau taulaga ia e salamo ma fai se faaleleiga, e tusa lava pe le malamalama i ai isi tagata?

O le mea e mafai ona faia e le Faaola mo oe

“E le mafai e tagata ona faamagalo a latou lava agasala; e le mafai ona latou faamamaina i latou lava mai taunuuga o a latou agasala. E mafai e tagata ona taofia le toe faia o agasala ma fai le mea tonu i le lumanai, ma o lea o a latou amioga e taliaina i luma o le Alii ma tatau ai mo le iloiloina. Ae o ai na te faaleleia mea sese na latou faia ia i latou lava ma isi, lea e foliga mai e faigata ia i latou ona lipeaina e i latou lava? O le togiola a lesu Keriso o le a faamamaina ai agasala a le ua salamo; e ui lava ina mumu ulaula ia agasala, o le a sinasina e pei o fulu mamoe. O le folafolaga lenei ua tuuina atu ia te outou” (Joseph F Smith, Gospel Doctrine, 5th ed. [1939], 98-99).

• A o e agai atu e faia faaleleiga, aua le lotovaivai i manatu e pei o le, “E le mafai lenei mea! E leai se mea e mafai ona ou faaleleia ai se mea sese ua ou faia i lenei tagata!” E ui lava atonu e sao lena mea, ae mafaufau i le mana o lesu Keriso e toe faaleleia na mea e le mafai ona e faaleleia. Tusi e uiga i le manaomia o le faatuatua e mafai e lesu Keriso ona fai le mea e le mafai ona e faia.

• O a ni ala e mafai ona e faaali atu ai i le Alii lou faatuatuaina o Ia? E faapefea ona e faateleina lena faatuatuaina?