Laasaga 7

Lotomaulalo

Mataupu Faavae Autu: Tagi atu ma le faamaulalo i le Tama Faalelagi e aveese ou vaivaiga.

Emanaomia i Laasaga uma le lotomaulalo, ae sili atu le matua faaalia manino i le Laasaga 7: Ia ole atu ma le faamaulalo i le Tama Faalelagi e aveese ou le atoatoa.” O le lotomaulalo sa tatou atiina ae i le Laasaga 6 sa aumaia ai i matou i o matou tulivae i le Laasaga 7 e ole atu i le Alii e aveese a matou mea sese. Ina ua matou oo atu i lenei tulaga, sa matou saunia e tatalo e aunoa ma se isi lava uunaiga, ae na o lo matou naunau ia matou tasi i le loto ma le mafaufau ma le Tama Faalelagi ma le Alii o Iesu Keriso. Sa lei toe faamalieina i matou i se suiga o le amio masani po o aga o le olaga. Sa iu ina matou saunia e tuu atu i le Atua e suia o matou natura moni.

O le Laasaga 7 sa tuuina mai ia i matou taitoatasi le gauai atoatoa atu i le Faaola, o lea sa le mafai ai e le toatele o i matou ona taofiofi le tagi leotele i o matou loto, e pei ona sa faia e Alema, “Iesu e, le Alo o le Atua ia e alofa mai ia te au,” (Alema 36:18). Sa faatumulia o matou loto i le salamo faamaoni, e le ona faapea sa matou tigaina, pe sa faatigaina foi nisi, ae ona sa matou matua faanoanoa lea e oo lava i le toe faaleleia, e lei mafai lava ona matou aveesea o matou faaletonu.

I le lagona o sina vaega o le alofa o le Atua, sa matou naunau loa e lafoai a matou agasala uma, e oo lava i faanaunauga uma i le agasala, ina ia mafai ona matou iloa lelei o Ia. Mulimuli ane, i lo matou lava ofo atu, ma o matou loto atoa, sa matou tuu atu atoa ai o matou agaga i le Atua ma ole atu ia te Ia e faamagalo i matou ma faia i matou i Lona faatusa. Sa iu ina matou iloatino e leai lava se isi igoa, leai se isi ala po o se mea, e mafai ona aumaia ia i matou le faamagaloga atoatoa o a matou agasala. Sa matou aioi atu i le Tama, e aunoa ma le toe taofia o se mea, ina ia Ona faamagalo i matou i lo matou faamaualuga uma, solitulafono, ma mea sese. Sa matou ole atu ina Ia auina mai Lona alofa tunoa ia i matou, ma ia ala mai ia te Ia ia mafai ai ona matou faatumauina lenei olaga fou.

Sa le’i amataina e le Alii lena suiga fou i o matou uiga uma, vagana ina ua matou faatagaina o Ia e faia faapea. O le Laasaga 7 o la matou faaiuga lea. Sa tatau ona matou faamaulaloina i matou lava ma le iloa lelei. Sa tatau ona matou faamatuu ese mea laiti uma o le faamalieina o le faamaualuga, ma ioe o a matou taumafaiga mo le laveaiina o i matou lava sa le’i taitai ona lava. Sa tatau ona matou lagona ma ola i le upu moni sa aoao mai e le Tupu o Peniamina—o tagata aisi i tatou uma i luma o le Atua ma le maua se faamoemoe o le faaolataga i a tatou lava taumafaiga sei vagana e ala mai i le agalelei ma le alofa tunoa o Iesu Keriso (tagai i le Mosaea 2:21; 4:19–20).

Sa faailogaina e le Laasaga 7 mo i matou taitoatasi le taimi na iu ina matou tosina atu ai e aunoa ma le faatuai i le upu moni faavavau o loo aoao mai i le Mosaea 16:4; “Ua faapea ona fano tagata uma; faauta foi, ana le faaolaina e le Atua lona nuu mai lo latou pau ma faafanoga, po ua fano i latou e faavavau.” Sa aoaoina i matou e o matou aafiaga o le uia o le Laasaga 7 sa matou le ‘alo ai mai le galuega sa ao ona matou faia. Sa tatau pea ona matou onosai ma “fetaomi atu i luma ma le faamaoni ia Keriso” (2 Nifae 31:20).

Matou te lei saoloto atoa mai le tuinanau i le agasala. Sa ao ona matou aoao e talia le olaga i luga o tuutuuga a le Atua, ma faatalitali mo Ona faamoemoega ma Lana taimi—e oo i le aveesea o o matou faaletonu. O le uia o le Laasaga 7, sa matou aoaoina ai e ola i le faamaulalo ma le onosai i le Atua lea foi na faaalia e Alema ma ona uso ina ua faamāmāina a latou avega ae lei aveeseina. “Ua latou gauai ma le loto fiafia ma le onosai i le finagalo atoa o le Atua.” (Mosaea 24:15). Sa i’u ina matou lafoai le manatu e faapea e mafai ona matou faaatoatoaina i matou lava, ma sa matou talia le upu moni, o loo finagalo le Atua ia matou manumalo i o matou vaivaiga i lenei olaga e ala i le o mai ia Keriso ma faaatoatoaina ia te Ia. Sa matou iloa o Lona alofa tunoa, na mafai ai ona matou tetee atu i mea le paia uma ma malamalama e le mafai ona oo mai le faaolataga i le na o lo matou lava malosi ae o Lona mana (tagai i le Moronae 10:32).

Ae, e oo mai Laasaga taitasi ma se lapataiga ma ua le ese ai le Laasaga 7. O i matou o e sa taliaina nei mataupu faavae e ao ona lapataia outou e le mafai ona outou faamoemoe e uia lenei Laasaga e aunoa ma le ositaulaga—ma e sa’o lava. I le Mataupu Faavae ma Feagaiga 59:8, ua poloai mai le Alii, “Ia e osia le taulaga i le Alii, lou Atua i le amiotonu, o le loto momomo ma le agaga maulalo lava lea.” O lenei taulaga o le aano lea o le Laasaga 7. E ui lava ina e lagona le tiga o lou lava toe fanaufouina, ia manatua, o Ona puapuaga, ae le o ou puapuaga, e faamautinoaina ai lou laveaiina mai le agasala. O lau taulaga ua na o se faamanatu faatauvaa, o Lana “taulaga sili mulimuli” sa fai ai ma ou sui (Alema 34:14).

A e tuu atu mea uma i aao o le Atua, ua iu ina e faia mea uma e te mafaia, ina ia maua ai Lana molimau e le mafaaseseina ua faamagaloina au agasala, ma o lou olaga ua tuanai, ua tuanai moni lava. E pei lava o tagata sa faaliliuina o le Tusi a Mamona, e mafai ona e tautino atu sa “asiasia outou i le mana ma le Agaga o le Atua ua i [ai] ia Iesu Keriso” (3 Nifae 7:21). Faatasi ai ma Alema, e mafai ona e alaga: “Ua le toe mafai ona ou manatua ou tiga; ioe, ua ou le toe atuatuvale i le manatu i au agasala. Ioe, ua maeu lava le olioli, ma le malamalama ofoofogia na a’u vaaia; ioe, na faatumuina lo’u agaga i le olioli matua tele, e tusa ma le tele o lo’u tiga!” (Alema 36:19–20).

Laasaga e Faatino

Saili mo le mana o le Togiola a le Faaola ina ia aoga i lou lava olaga e ala i le mafaufau loloto i tatalo o le faamanatuga

O se tasi o ituaiga faatinoga lelei o le mafaufau loloto, o le mafaufau i se fuaiupu po o se fasi fuaiupu mai se mau, ao e tatalo ia malamalama i lona uiga ma le faatatauga i lou lava olaga. Talu ai o i tatou taitoatasi e ao ona faia se feagaiga, lea o loo toe ta’ua i tatalo o le faamanatuga, e mafai ona e mafaufau loloto i ai.

I le mulimuli ai i le valaaulia a perofeta ina ia faatatau mau i lou olaga, atonu e te manao e faitau le Moronae 4:3 ma le 5:2 ma mafaufau ma le lotomaulalo i nei upu paia i lou lava leo: mo se faataitaiga, “Le Atua e, le Tama Faavavau, [ou] te faatoga atu ia te oe i le suafa o lou Alo, o Iesu Keriso, ia e faamanuiaina ma faapaiaina lenei areto i (lo’u agaga a o ou) tago i ai… ma tausi i ana poloaiga ua ia tuuina mai ia te [au], ina ia [ou] maua pea lona Agaga e faatasi ma [au].”

Tatalo ma le faamaulalo i le Atua ia faia mo oe mea e le mafai ona e faia mo oe lava

I le teuina i lou loto o se tatalo faigofie, e pei o le “Le Alii e, se a le mea e te finagalo i ai ou te faia?” po o le “Ia faia lou finagalo,” o le a faamanatu ai pea ia te oe lou faalagolago atoa atu i le Alii. O le alofa o le Atua, o oe mo Ia ma Ia mo oe, o le a fesoasoani e te fausia ai se mafutaga lea e mafai ai ona e avatu oe lava e aunoa ma se faatalitali. Sa e sailia lenei alofa i tausaga uma sa maileia ai oe i le tagofia o mea sa fai ma vaisu. I le Laasaga 7, o le a e maua ai se ala e maua ai le toafilemu a o e ulu atu i le “malologa o le Alii” (Moronae 7:3; tagai foi i le Alema 58:11; Ezra Taft Benson, “Jesus Christ—Gifts and Expectations,” Ensign, Tes. 1988, 2).

Suesue ma Malamalama

O mau nei ma saunoaga mai taitai o le Ekalesia e mafai ona fesoasoani ia te oe i le uia o le Laasaga 7. Ia faaaoga nei mau ma fesili mo manatunatuga loloto, suesuega ma tusitusiga. la faamaoni ma faapatino au tusitusiga.

Filifili e lotomaulalo

“E pei ona ou fai atu ia te outou, ona ua faamaulalo toai outou, ua faamanuiaina outou. Pe tou te le manatu ea ua sili le manuia o e ua faamaulalo a’ia’i ia i latou lava ona o le upu?” (Alema 32:14).

• O le toatele o i tatou sa o mai i fonotaga mo le toe faaleleia ma le atuatuvale, tuleia mai e taunuuga o lo tatou tagofia o mea ua fai ma vaisu. Sa faamalosia i tatou e faamaulalo. Ae peitai, o le lotomaulalo o loo faamatalaina i le Laasaga 7, e ese lona mafuaaga. E ofo mai. O le taunuuga o lau lava fililifiga e faamaulalo oe lava. Na faapefea ona suia ou lagona o le lotomaulalo talu mai ona e amata i le toe faaleleia?

Faatumulia i le olioli

“Na latou iloa foi i latou lava i o latou tuinanau, ua le tusa i latou ma le efuefu o le eleele. Ua alalaga i latou uma ma le leo e tasi, ua faapea atu: Aue! la alofa mai ma faaaoga le toto o Keriso, ina ia matou maua le faamagaloina o a matou agasala ma ia faamamaina o matou loto; aua ua latou faatuatua ia lesu Keriso, le Alo o le Atua, o Le na faia le lagi ma le lalolagi, atoa ma mea uma, o Le foi e afio mai i le fanauga a tagata.

“Ma ua oo ina ua uma ona latou fai atu nei upu, ua oo mai le Agaga o le Atua ia te i latou, ma ua faatumuina i latou i le olioli, ona ua maua le faamagaloina o a latou agasala, ma ua filemu i o latou loto fuatiaifo ona o lo latou faatuatua tele ia Iesu Keriso, o Le afio mai” (Mosaea 4:2–3).

• Sa faia e le nuu o le Tupu o Peniamina se ituaiga o tatalo lea tatou te faia a o tatou uia le Laasaga 7. Sa latou lagona le toafilemu ma le olioli ina ua oo ifo le Agaga o le Alii i o latou luga ma tuuina atu ia i latou le faamagaloga o a latou agasala. Toe manatunatu i ni aafiaga na oo ai ia te oe nei lagona. la tusi pe faapefea pe a avea nei lagona ma ituaiga olaga e te ola ai.

Talitonu i le Atua

“Ina faatuatua ia i le Atua, ma ia talitonu o loo soifua o ia, na ia faia foi mea uma ua i le lagi atoa ma le lalolagi; ia talitonu ua ia te ia le poto uma, ma le mana uma, i le lagi ma le lalolagi; ia talitonu foi ua le iloa e tagata mea uma e mafai ona silafia e le Atua.

“I le ma lea foi, ina talitonu ia e ao ina outou salamo ia outou agasala, ma lafoai ai, ma faamaulalo outou e outou lava i luma o le Atua ma ia faatoga atu i le faamaoni o le loto ia faamagaloina outou e ia. O lenei foi, afai ua outou talitonu i nei mea uma, ina outou faia ia.

“Ou te toe fai atu ia te outou,e pei ona ou muai fai atu, afai ua oo ina iloa e outou le mamalu o le Atua, afai foi ua outou iloa lona agalelei, ma ua tofotofo i lona alofa, ma ua maua le faamagaloina o a outou agasala, ua tumu ai o outou agaga i le olioli ua faapea ona tele, e faapea lava ona ou manao ina ia outou manatua, ma fatufatuai pea i o outou manatu le silisiliese o le Atua ma lo outou lava faatauvaa, o lona agalelei foi ma faapalepale pea ia te outou o tagata le aoga, ma ia faamaulaloina outou e outou lava, ia matua ifo lava i le faamaulalo ma valaau i le suafa o le Atua i aso fai soo, ia tutumau foi i le faatuatua i mea e oo mai na fetalaia mai i le fofoga o le agelu.

“…  Afai tou te faia nei mea, e olioli pea outou, e faatumuina foi outou i le alofa o le Atua, tou te taofi pea le faamagaloina o a outou agasala, e tutupu foi outou i le iloa lelei o le mamalu o Le na faia outou, ma le iloa lelei o mea ua tonu ma faamaoni” (Mosaea 4:9–12).

• Ia tusia ma le agaga tatalo se lisi o mea na fai mai ai le Tupu o Peniamina e ao ona tatou faia. E faapefea ona fesootai nei mea i le uia o le Laasaga 7?

• O a folafolaga e oo mai i le faia e pei ona faatonu mai e le Tupu o Peniamina? (Tagai i le fuaiupu mulimuli.)

• O a ni mea e suia o lou olaga pe a e mauaina nei folafolaga?

Usitaia o tulafono ma poloaiga

“Aua o le mea lenei sa foaiina mai ai le tulafono; o le mea lea ua mate ai le tulafono ia te i matou, ae faaolaina i matou ia Keriso ona o lo matou faatuatua, ae ui i lea, ua matou tausia le tulafono ona o poloaiga” (2 Nifae 25:25).

• Ua “faaolaina i tatou ia Keriso ona o lo tatou faatuatua” ia te Ia. O le a le uiga ua mate le tulafono ia i tatou? Aisea e faaauau ai ona tatou tausia tulafono pe usiusitai i poloaiga?

• O a ni ou lagona i le taimi nei i le tausia o tulafono?

• E faapefea ona avea le tausia o poloaiga o se faailoaga o lou alofa i le Atua?

O le alofa o le Atua

“A tatou faamuamua le Atua, o isi mea uma o le a fetaui lelei pe aveesea foi mai o tatou olaga. O lo tatou alofa i le Alii o le a pulea tautinoga mo lo tatou alofa, o manaoga i o tatou taimi, tuliloa ai mea tatou te fiafia i ai, ma le faatulagaga o mea e ave i ai la tatou faamuamua” (Ezra Taft Benson i le Conference Report, Ape. 1988, 3, po o le Ensign, Me 1988, 4)

• O le iloa o le alofa mutimutivale ma le agalelei o le Atua e oo mai nei, atonu ua amata ona e lagona ai le alofa o le Atua—alofa ia te la ma le alofa mai ia te la. Mafaufau ma tusi e uiga i soo se faatelega o le alofa ua e lagonaina a o e galue ai i Laasaga.

• E faapefea ona agavaa le Laasaga 7 e avea o se faatinoga aupito sili lea o lou alofa ua i ai nei?

Tauaveina i ou luga le suafa o Keriso

“O le na te faia nei mea, e maua o ia i le itu taumatau o le Atua, aua e iloa e ia le igoa e valaauina ai o ia, aua e valaauina o ia i le suafa o Kersio” (Mosaea 5:9).

• E toatele i tatou e manatu i le tauaveina o le suafa o Keriso i o tatou luga i tulaga o le papatisoga ma le faamanatuga, ma e sa’o lea. Mafaufau mo sina taimi pe o le a se uiga o le valaauina o oe i le suafa o Keriso ma avea Ona tulaga ma ou tulaga.

• O le a se mea e tatau ona e faia ina ia maua ai i le itu taumatau o le Atua? O le a le mea na e osifeagaiga e fai pe a papatisoina oe ma pe a e tago atu i le faamanatuga?

• la tusi e uiga i lagona na e oo i ai pe a e mafaufau i Lona naunau e avatu ia te oe Lona suafa po o le mamalu e faafesuiai ma au mea sese uma.

Faamatuu atu o ou vaivaiga

“O se tapuaiga e le manaomia le ositaulagaina o mea uma, e le i ai se mana e lava e maua ai le faatuatua e manaomia mo le ola ma le faaolataga” (Joseph Smith, comp., Lectures on Faith [1985], 69).

• O nisi e faitau i nei upu ma manatu o “mea uma” e faatatau i meatotino uma. E faapefea i le faamatuuina atu o ou vaivaiga uma i le Alii, ona faateleina lou malamalama i le uiga o le ositaulagaina o mea uma?