Laasaga 10

Tali Atu mo Oe Lava i Aso Uma

Mataupu Faavae Autu: Faaauau pea le suesuega o le olaga, ma afai ua e sese, ta’utino loa lava.

Eoo ane i le taimi e te oo mai ai i le Laasaga 10, ua e saunia mo se ituaiga olaga fou. O uluai Laasaga e 9 sa fesoasoani e te aoao ai se mamanu o le olaga e faavae i mataupu faavae faaleagaga. O nei mataupu faavae ua avea nei ma faavae e mafai ona e galue ai mo aso o totoe o lou olaga.

I le faia o uluai Laasaga e 9, sa e faaaogaina ai mataupu faavae o le talalelei—faatuatua i le Alii o Iesu Keriso ma le salamo. Sa e vaaia suiga faavavega i lou olaga. Sa e maua le alofa ma le faapalepale, ma sa e atiina ae se naunautaiga mo le filemu. O lou tuinanau i lou tagofia o mea ua fai ma vaisu ua toetoe a mou ese uma. A faaosoosoina oe, ua e matauina ua sili atu ona e aluese mai au mausa nai lo lou manao i ai. Ua e lagona le faamaulalo ma le faamemelo i mea ua faia e le Tama Faalelagi, e le mafai ona e faia na o oe.

O Laasaga mulimuli e 3 o le a fesoasoani e faatumau ai lou olaga fou faaleagaga, o lea e masani ona ta’ua ai o Laasaga o le puipuiga.

O le faia o se iloiloga o le tagata lava ia i le olaga atoa e le o se manatu fou. I le Tusi a Mamona, sa aoao mai Alema o le faatumauina o se suiga tele o le loto e manaomia ai se taumafaiga. Mai lea fuaiupu i lea fuaiupu, sa ia faailoa mai ai o se iloiloga faamaoni, ma le agaga tatalo e le tagata o ia lava ma le vave salamo e tatau ona avea o se vaega fai fai pea o le olaga (tagai i le Alema 5:14–30). Ina ia faatumauina mea ua e maua, e tatau ona e i ai i se tulaga malosi faaleagaga. E te faia lea i le faia o fesili suesue lea na fautuaina mai e Alema e uiga i ou lagona, manatu, faamoemoega ma amioga. O le a taofia oe mai le palasi atu i le faafitifiti, ma le faamalieina o oe lava, e ala i le faia o sau iloiloga faaletagata lava ia i aso taitasi.

E pei ona e aoaoina i Laasaga 4 ma le 5, o se faamaumauga e aofia ai na o au amioga e le lava e suia ai lou loto. E tatau foi ona iloilo ou manatu ma lagona. O lenei mataupu faavae e moni lava e pei ona i ai le Laasaga 10. Faaauau ona e tulimataia le faamaualuga i ona tulaga uma, ma tuu atu ma le faamaulalo ou vaivaiga i lou Tama Faalelagi, e pei ona sa e aoaoina e fai i Laasaga 6 ma le 7. A e lagona le popole, tuuaia o oe lava, le to’a lelei, fememeai, inoino, mafaufau i tuinanau o le tino, po o le atuatuvale i soo se itu, liliu vave atu i le Tama ma tuu atu ia te Ia e suia nei manatu i le toafilemu.

A e mafaufau ma le totoa i ou manatu ma lagona, e mafai ona e toe iloa soo se talitonuga le lelei o loo e taofia pea. Ole atu i lou Tama oi le Lagi e aveese ia talitonuga le lelei. O le faia o le Laasaga 10, o le a e le toe filifili ai e tau ta’uamiotonuina, tau faia se faamatalaga, po o le tuuaia o se mea po o se tasi. O lau sini o le tatala o lou loto ma taulai atu lou mafaufau i lesona sa aoao mai e le Faaola.

E to’atele tatou e mulimuli i le Laasaga 10 i le faia o faamaumauga i aso taitasi. A o fuafua lou aso, ia suesue ma le agaga tatalo ou faamoemoega. Ua tele naunau ea pe ua itiiti mea ua e faia? O e tausia ou manaoga autu faaleagaga, faalelagona, ma faaletino? O e auauna atu i isi?

Fesili ia te oe i fesili nei ma isi, ao e saili ia paleni ma toafilemu lou aso. I le gasologa o le aso, e mafai ona e vave taofia ni manatu le lelei po o lagona e tau faamatau e lofituina ai oe. Ia sili atu ona e mataalia i amioga tuai po o mamanu o mafaufauga i tulaga e sili ona atuatuvale.

E manatu nisi tagata o lenei ituaiga faamaumauga o se malologa puupuu. A o i ai i lea malologa puupuu, faaalu sina taimi ma faaaoga i le tulaga o e i ai i le taimi lava lena ia mataupu faavae taitasi ua e aoaoina i le mulimuli ai i Laasaga. O le a vave ona e manatua le tatau ai o le faalagolago i le Alii i au taumafaiga uma mo le toe faaleleia. E mafai ona e faapea ifo ia te oe i se taimi o faigata, “O le a se uiga vaivai o ia te au ua aliali mai ai? O le a se mea na ou faia ua tulai mai ai lenei faafitauli? E i ai se mea e mafai ona ou tau atu pe faia, e aunoa ma le faafoliga, o le a faapea ona taitai atu ai i se fofo faaaloalogia mo a’u ma le isi tagata? O le Alii o loo i ai le mana uma. O le a ou malolo ma faamoemoe atu ia te Ia.

Afai sa e faia se gaoioiga le lelei i se isi tagata, ia faia se faaleleiga i le vave e mafai ai. Tiai ese le faamaualuga, ma toe faamanatu ia te oe lava le faamatalaga moni lea, “Sa ou sese” e masani ona tutusa le taua i le faamaloloina o se mafutaga e pei o le fai atu “Ou te alofa ia te oe.”

Ae e te lei moe, iloilo lou aso atoa. Fesili ifo ia te oe po o e manaomia pea ona talanoa ma le alii e uiga i au amioga, mafaufauga, po o lagona le lelei. E faaopoopo atu i lou talanoa i le Alii, e mafai ona e talanoa i se faufautua, po o se uo i le polokalama, o se tasi e te talitonuina e faamaoni i ou manatu.

O le a faaauau pea ona e faia mea sese a o outou feoeoea’i ma isi, peitai o se tautinoga i le Laasaga 10 o se tautinoga e te talia tiutetauave mo le faia o ni mea sese. Afai e te iloiloina ou manatu ma amioga i aso taitasi ma foiaina, o manatu ma lagona le lelei o le a le toe faateleina seiloga ua faamatauina lou fulitua i ai. E te le toe ola toatasi na o oe mai le Alii po o isi. O le a e maua le malosi ma le faatuatua e feagai ai ma faigata ma manumalo ai. E mafai ona e olioli i lou alualu i luma ma talitonu o le faia soo ma le onosai, o le a mautinoa ai le faaauau pea o le toe faaleleia.

Laasaga e Faatino

Auai i faatalanoaga faaleperisitua o se vaega o lau tautinoga i le faia o se iloiloga faaletagata lava ia; faaauau ona faamalosia au fegalegaleaiga ma tagata o isi Ekalesia

E mafai e tatou uma ona manatua se taimi sa tatou fefefe ai e tilotilo faamaoni ia tatou lava amioga. O le taumafai e aloese mai na taimi, o se tasi lea o mafuaaga na faatapulaa ai e le toatele o tatou lo tatou aafia i le Ekalesia. E ui i lea, a o tatou agai i luma e ala i lenei polokalama o le faamaoni naunautai, e amata ona tatou malamalama i le taua o le faia o se iloiloga a le tagata lava ia.

Ua tatou le toe fefefe nei i avanoa mo le faia o se iloiloga faaletagata lava ia lea e oo mai i le toaga i le Ekalesia. Ua mafai ona tatou talisapaia le moni o le aoaoga lenei a Elder Joseph B. Wirthlin o le Korama a le Toasefululua.

“O faatalanoaga mo le agavaa, sauniga faamanatuga, auai i le malumalu, ma isi fonotaga a le Ekalesia, o vaega uma o le fuafuaga ua saunia e le Alii e aoaoina ai o tatou agaga, e fesoasoani ia i tatou e atiina ae se masani lelei o le siakiina e le aunoa o a tatou amioga ia tumau ai i le ala o le faatuatua. O le faia e le aunoa o siaki faaleagaga, o le a fesoasoani i lo tatou uia o auala faigata ma soo se auala o le olaga….

“… E mafai uma e i tatou … ona faamanuiaina e ala i le matua tilotilo ifo i o tatou loto i taimi o tapuaiga i le migao ma le tatalo ma fesili ifo ia i tatou lava i lenei fesili faigofie, ‘Pe o o’u faamaoni ea?’

“E sili atu ona mamana le aoga o le fesili pe afai tatou te matua faamaoni ia tatou tali ma pe afai o uunaia ai i tatou e faia ni faasaoga e ala i le salamo lea e faatumau ai tatou i le ala o le faatuatua” (i le Conference Report, Ape. 1997, 20; po o le Ensign, Me 1997, 17).

A o e auai i nei avanoa mo le toe faia o se iloiloga faaletagata lava ia, o le a e iloa ai lou tuputupu a’e i le alofa atu i uso ma tuafafine o le usoga a le Ekalesia.

Suesue ou manatu, upu, ma mea e fai i aso taitasi; ia vave ona faasa’o soo se mea sese

O le Laasaga 10 ua faatusa i le taliaina o le mea moni e faapea, e tatau ona faaauau ona e ola i mataupu faavae faaleagaga. Afai e te se ese mai ai, ia vave ona salamo ma ole atu loa i le Atua e toe aumai lou filemu e ala mai i Lona Agaga. O le faamaoni ma le faamaulalo e mafai ona faamalosia ai oe. O le a sili atu lou nofouta i le i ai o le Tama Faalelagi i lou olaga a o e ole atu ia te Ia e fesoasoani atu ia te oe ia tumau lou mama faaleagaga. O le a e a’oa’o e faataua le alualu i luma ma faamagalo le le atoatoa ia te oe lava ma isi. O le a mou ese lou mana’o e faatautee atu i soo se mea po o soo se tasi. E avea le toe iloiloina o lou lava tagata o se ala o le olaga a o e lafoai ese le fefe ma faatoilalo faaosoosoga e tasi le aso i le taimi.

Suesue ma Malamalama

Suesue mau o mulimuli mai ma saunoaga mai taitai o le Ekalesia. Faaaoga nei mau, saunoaga, ma fesili mo manatunatuga loloto, suesuega ma tusitusiga. Ia faamaoni ma faapatino.

Leoleo ou manatu, upu, ma mea e fai

“Afai tou te le leoleo ia te outou lava, ma o outou manatu, ma a outou upu, ma a outou galuega, ma tausi i poloaiga a le Atua, ma tutumau i le faatuatua i mea ua outou faalogoina e uiga i le afio mai o lo tatou Alii, e oo lava i le iuga o outou olaga, e fano lava outou. O lenei foi, le tagata e, ia manatua, ina ia e le fano” (Mosaea 4:30).

• Atonu e mata’utia pe tau faamata’u pe afai sa e le ano i mea sa e faia a o aveina se taavale. E faapefea ona fesoasoani le Laasaga 10 ia te oe ia e mataala ma mataalia i le mea o loo e agai i ai i le olaga?

• Tusi e uiga i lou lava mataalia. E faapefea ona fesoasoani le faia o se iloiloga faaletagata lava ia ia te oe e aloese ai mai le toe pau atu i le toe tagofia o mea ua fai ma vaisu (ma fano ai)?

Faamaulalo ma le pulea o le tagata o ia lava

“Amuia i latou o e faamaulaloina i latou lava, a o lei faamaulaloina toai i latou” (Alema 32:16).

• O le naunau e faateaese manatu le lelei a o lei mapuna ae o ni amioga faatiga o se ala o le faamaulaloina o oe lava e aunoa ma le faia toai. Ia tusi e uiga i lou naunau e faamaulaloina oe lava. Faataitai mo se aso le faateaese o manatu le lelei. O a ni faamanuiaga e oo mai ia te oe?

Ola i le taimi nei

“O le tele lava o le malamalama o se tagata, o le tele foi lena o lona sailia o le meaalofa o le salamo, ma o le malosi foi lea o lona taumafai e faasaoloto mai o ia lava mai agasala pe a faafia lava ona le atoatoa i le finagalo paia.… E faapea, o agasala a tagata e matatau i le Atua, ma e amiotonu e faaauau pea ona faamagaloina aua e fou i aso uma ma itula uma ona latou salamo ma sailia le Alii” (Bruce R. McConkie, Doctrinal New Testament Commentary, 3 vols. [1966–73], 3:342–43).

• O se tasi o aafiaga sili ona aoga—faalemafaufau, faalelagona ma faaleagaga—o le ola i mataupu faavae o loo faamatalaina i nei Laasaga, o lou aoao lea e ola i le taimi nei. E faapefea ona fesoasoani le Laasaga 10 ia te oe i lou taulimaina o le olaga i se faiga auauai o le tasi le itula i le taimi pe a tatau ai?

• E faapefea ona fesoasoani ia te oe le iloa e tau lava o lou ola i nei mataupu faavae i se faiga e faasolosolo malie e tasi le aso i le taimi?

Faaauau le salamo ma le faamagaloina

“Afai ua salamo i latou ma saili le faamagaloina o agasala ma le loto i ai, ua faamagaloina i latou” (Moronae 6:8).

• O le iloa e naunau le Alii e faamagalo oe i taimi uma e te salamo ai ma le manatu tonu i ai, e te maua ai le lototele e toe taumafai i taimi uma e te toilalo ai. Tusi po o le a lou manatu i le uiga o le salamo ma saili mo se faamagaloga ma le manatu tonu i ai.

Faaauau i lou tuputupu ae faaleagaga

“O lo’u manao ia outou faamaulalo, ma ia gauai ma le agamalu, ia ganagofie, ia tutumau i le onosai ma le faapalepale; ia faatatau mea uma” (Alema 7:23).

• O ai lava na ia faia le faaupuga tuai, “O le faia soo e faaatoatoaina ai” na te lei taua pe o le a le tele o le onosai e manaomia e faia ai pea. E faapefea e le faia o se iloiloga faaletagata lava ia ma le faia o faasa’oga i se aso taitasi ona faamautinoaina o le a faaauau pea ona e ola i le lotomaulalo ma lou atiina ae faaleagaga?

“Faauta, o aso e gata ai, … o i latou e o mai i lenei laueleele, atoa ma i latou e i ai i nisi nuu, e moni, i nuu uma o le lalolagi, faauta, e onana i latou i le amioletonu ma mea inosia uiga eseese uma lava…

“… Faauta, o outou uma o e fai amioletonu, ia outou faatuatuai ma ia outou ofo, aua tou te alalaga atu, tagi atu; ioe, e onana outou ae le o le uaina, e tautevateva outou ae le o le ’ava” (2 Nifae 27:1,4).

“Ina ua oo mai le po ua onana i latou i le ita, e pei lava ona onā le tagata i le uaina; ma ua latou toe momoe i luga o a latou pelu” (Eteru 15:22).

• I nei mau, o loo faamatalaina ai tagata ua onana ae le o le uaina. E masani ona ta’ua e tagata ua toe faaleleia mai le tagofia o mea ua fai ma vaisu ia lenei ituaiga tulaga o se “ona matutu” po o “se faaifo o lagona.” la tusi e uiga i soo se lagona o loo ia te oe e taofi mau ai i le ita po o isi lagona tiga.

• E faapefea ona fesoasoani le faia o se faamaumauga i faaiuga o aso taitasi ia te oe e faatoilalo ai lenei agaigai atu [i lagona tiga]?

Alualu i luma i le olaga atoa

“O loo ou lagonaina lava e faamalosi atu i le Au Paia o Aso e Gata Ai le manaomia o se faaaogaina faaiu o mataupu faavae o le Talalelei i o tatou olaga, amioga, ma upu ma mea uma tatou te faia; ma e manaomia ai le tagata atoa, le olaga atoa ia tuuto atu i le faaalualuina i luma ina ia mafai ai ona maua se malamalama i le upu moni e pei ona i ai ia Iesu Keriso” (Brigham Young, Discourses of Brigham Young, sel. John A. Widtsoe [1954], 11).

• O le faia o nei Laasaga e mafai ona faamatalaina moni o le “faaaogaina mulimuli” o mataupu faavae o le talalelei. E faapefea e le naunautai e iloiloina oe lava i aso taitasi i vaega uma—faatinoga, upu, manatu, lagona, ma talitonuga—ona fesoasoani ia te oe e tuuto ai oe lava ia alualu i luma i le olaga atoa?