15
Te u Loto Houngaʻia
Talateu maʻá e Faiakó
Ke ke mateuteu fakalaumālie ke akoʻi e lēsoni ko ʻení, kātaki ʻo lau mo fakalaulauloto ki he ngaahi meʻá ni:
Kuo fekauʻi mai ʻe he ʻEikí, “Ke ke fakafetaʻi ki he ʻEikí ko ho ʻOtua ʻi he ngaahi meʻa kotoa pē” (T&F 59:7). ʻOku totonu ke tau fakahaaʻi ʻetau houngaʻia ki he ʻOtuá ko e ngaahi tāpuaki lahi kuó Ne ʻomai maʻatautolú. ʻOku totonu foki ke tau fakamālō ki he ngaahi mātuʻá, kau faiakó, ngaahi kaumeʻá mo kinautolu ʻoku nau tokoniʻi kitautolu ʻi ha faʻahinga meʻa pē. (Vakai foki ki he Saame 100:3–4.)
Teuteú
-
Lau ʻa e Luke 17:11–19, pea teuteu ke fakamatalaʻi nounou ʻa e talanoa ʻo e kau kilia ʻe toko hongofulú.
-
ʻOmai ha tatau ʻo e Tohi Tapú. Fakaʻilongaʻi ʻa e tohi ʻa Luke 17:11–19 ke faingofua hoʻo huke ki aí.
Ngaahi ʻEkitivitī ke ako mei aí
Kamataʻaki ha ʻekitivitī fakatahataha. Ki ha ngaahi fakakaukau, vakai ki he peesi 3.
Lotu
Fakaafeʻi ha taha ʻo e fānaú ke ne fai ʻa e fua lotú.
Fakahinohino Fakatokāteline
Talaange ki he fānaú kuo ʻomai ʻe he Tamai Hēvaní kiate kitautolu ʻa e ngaahi tāpuaki lahi, hangē ko hotau sinó, ʻuluʻakaú mo e fanga monumanú, hotau ngaahi fāmilí mo e Siasí. Fakamatalaʻi ange te tau lava ʻo fakahaaʻi ʻetau ʻofa kiate Iá ʻaki ʻetau pehē “fakafetaʻi” pea te tau toe lava foki ʻo pehē “fakafetaʻi” ki hotau fāmilí mo e ngaahi kaungāmeʻá mo ha taha pē ʻoku failelei mai kiate kitautolu.
Talanoa ʻi he Folofolá
Fakaʻaliʻali ʻa e fakatātā ʻi he peesi 66. Tuhuʻi ange ʻa Sīsū mo e kakai ko ia naʻa nau puke lahí. Fakaava hake ʻa e Tohi Tapú kia Luke 17:11–19 pea talanoa ange ʻa e talanoa ʻo e kau kilia ʻe toko 10. ʻOku ʻoatu ha sīpinga ʻi lalo:
Naʻe ʻi ai ha kau tangata ʻe toko 10 naʻa nau puke lahi. Naʻe fakamoʻui kinautolu ʻe Sīsū mo ʻai ke nau sai (tuhu kia Sīsū ʻi he fakatātaá). Naʻa nau fuʻu fiefia hono kotoa (tuhu ki he kau kilia ʻi he fakatātaá). Ka ko e tangata pē ʻe taha naʻe lea “mālō ʻaupito” kia Sīsū (tuhu ki he tokotaha kilia naʻe houngaʻia ʻoku hā he fakatātaá). Te tau lava ʻo lea “mālō ʻaupito” (fakaafeʻi ʻa e fānau ke nau lea “mālō ʻaupito”).
Fakatātā
Fakaʻaliʻali ʻa e fakatātā ʻi he peesi 67. Talaange ki he fānaú ʻoku tau fakahaaʻi ʻetau ʻofa ki he Tamai Hēvaní ʻaki ʻetau fakamālō kiate Ia ʻi he ngaahi meʻa kotoa pē ʻokú Ne foaki maʻatautolú. Tuhu ki he taha ʻo e ngaahi fakatātaá pea fakaafeʻi ʻa e fānaú ke fakatātaaʻi ʻa e meʻa ko iá (hangē ko ha hiki honau nimá ki ʻolunga honau ʻulú ke faʻu ʻa e ʻato ʻo ha fale, ʻai ke hangē pē ʻoku nau toli fuaʻiʻakau mei ha fuʻu ʻakau ʻo kaí, ʻai ke hangē ʻokú ke tui suú mo e hā fua). Toutou fai ia ki he ngaahi fakatātā takitaha.
ʻOku ou fakafetaʻi koeʻuhí ko hoku fāmilí.
ʻOku ou fakafetaʻi koeʻuhí ko hoku valá.
ʻOku ou fakafetaʻi koeʻuhí ko hoku ʻapí.
ʻOku ou fakafetaʻi koeʻuhí ko e meʻakai ke kaí.
Hiva
Hivaʻi pe lau ʻa e ngaahi lea ki he veesi 1 mo e 2 ʻo e “Fakafetaʻi ʻe Tamai” (Tohi Hiva ʻa e Fānaú, 15) pea fakatātaaʻi hangē ko ia ʻoku hā atu ʻi laló. Fakaafeʻi ʻa e fānaú ke kau mo koe.
Fakafetaʻi ʻe Tamai te mau ʻoatú, (kūnimá)
He ʻokú Ne foaki mai e meʻa kotoa pē. (mafola atu ho nimá)
Mata mo e telinga, nima mo e vaʻe, (tuhu ki he mata, telinga, nima mo e vaʻe)
Vala ke tui, (tuhu ki he kofú) mo e meʻakai ke kai. (ʻai ke hangē pē ʻokú ke kaí)
Fakaʻosí
Kole ange ki he fānaú ke nau lea “fakafetaʻi.” Vahevahe nounou ʻa hoʻo ongoʻi houngaʻia ki he Tamai Hēvaní mo Sīsū Kalaisi.
Lotu
Fakaafeʻi ha taha ʻo e fānaú ke ne fai ʻa e lotu tukú.
Ngaahi ʻEkitivitī ke fili mei ai
Teuteú
-
Ki he ngaahi ʻekitivitī fakatātaá: ʻOmai ha ngaahi fakatātā ʻo e ngaahi meʻa ʻokú ke fakamālōʻiaʻí; te ke lava ʻo ngāueʻaki ʻa e ngaahi fakatātā ʻi he tohi lēsoni ko ʻení pe ʻi he ngaahi makasini ʻa e Siasí pe te ke tā pē haʻo fakatātā.
-
Ki he ʻekitivitī valivalí mo e vaʻinga fakatauhoá: ʻAi ha tatau ʻo e fakatātā ʻi he peesi 67 ki he fānau takitaha ke valivali. ʻOmai e fanga kiʻi kongokonga pepa iiki pe faʻahinga meʻa tatau mo ia ke ngāueʻaki ʻe he fānaú ki he vaʻinga fakatauhoá; ʻomai ke feʻunga mo e fānau takitaha ke nau taki fā ʻa e meʻa fakaʻilonga.
ʻEkitivitī Lau Maau
Talaange ki he fānaú ʻoku tau fakafetaʻi ki he Tamai Hēvaní koeʻuhí ko hotau sinó. Fakaafeʻi ʻa e fānaú ke nau tuʻu pea fai ʻa e ʻekitivitī lau maau ko ʻení fakataha mo koe. Toki faʻu pē hono fakatātaaʻí fakatatau ki he ngaahi leá.
Ala ki ho matá, ala ki ho ihú,
Ki ho telingá, ʻuluʻulu vaʻe ki hoʻo ʻalú.
Hiki ho nimá ke māʻolunga ho ʻulú,
Tuhu ki langi mo ke fakakaukaú.
ʻAi ho nimá ki ho ʻulú.
Fakalongolongo ʻi ho seá ʻi hoʻo tangutú.
Tuhu ki ho ngutú peá ke lea, “ʻOku ou fakafetaʻi koeʻuhí ko hoku ngutú.” Kole ki he fānaú ke nau angimui ki he leá mo fakatātaaʻi. Toe ʻai pē ki he matá, ihú, telingá, nimá mo e vaʻé. Fakaafeʻi ʻa e fānaú ke nau fokotuʻu mai ʻa e ngaahi meʻa ʻoku nau fakafetaʻi aí pea toe lau ʻa e ngaahi meʻa naʻa nau fokotuʻú.
Ngaahi Fakatātaá
Fakaʻaliʻali ki he fānaú ʻa e ngaahi fakatātā kuó ke ʻomaí pea fakamatala nounou ko e hā e ʻuhinga ʻokú ke fakamālō ai he ngaahi meʻa ko ʻení. Fakaafeʻi ʻa e fānaú ke nau talamai ha faʻahinga meʻa ʻoku nau fakamālō ai.
Valivali
ʻAi ʻa e fānaú ke nau valivali ha tatau ʻo e fakatātā ʻi he peesi 67. Lolotonga ʻenau valivalí, tuhu ki he ngaahi fakaikiiki ʻi he fakatātaá pea fakamatala ki he fānaú ʻa e meʻa ʻoku nau valivalí. Lau kiate kinautolu ʻa e ngaahi lea ʻi he fakatātaá.
Vaʻinga Fakatauhoá
ʻOange ki he fānau takitaha ʻa e pepa siʻisiʻi ʻe fā. Fakaʻaliʻali ʻa e fakatātā ʻi he peesi 67, tuhu ki he faka-tātā ʻo e fāmilí pea lau ʻa e fakamatalá ki he fānaú. Fakaafeʻi ʻa e fānaú ke ʻai ha meʻi pepa ʻi he fāmili ʻi heʻenau takitaha tatau. Fakaafeʻi kinautolu ke toe lau fakataha mo ko e ʻa e konga lea ʻi he fakatātaá. Toe fai ʻa e ʻekitivitií ki he ngaahi fakatātā kehé.