28
ʻOku Tāpuekina Au ʻe he Tamai Hēvaní ʻo Fakafou ʻi he lakanga Fakataulaʻeikí
Talateu Maʻá e Faiakó
Ke ke mateuteu fakalaumālie ke akoʻi e lēsoni ko ʻení, kātaki ʻo lau mo fakalaulauloto ki he ngaahi meʻá ni:
Ko e lakanga fakataulaʻeikí ko e mālohi mo e mafai ia ʻo e ʻOtuá. ʻOku foaki ʻe he ʻOtuá ʻa e mafai ko ʻení ki he tangata taʻu 12 pe motuʻa ange, ʻoku moʻui taau ko e mēmipa ʻo e Siasí, ʻa ia te nau lava ʻo ngāue ʻi Hono huafá ke tāpuakiʻi e niʻihi kehé. Ko e ngaahi ouau ʻo e ongoongoleleí, hangē ko e papitaisó mo e hilifakinimá, sākalamēnití mo e ngaahi meʻa kehe, ʻoku fakahoko ia ʻaki e mafai ʻo e lakanga fakataulaʻeikí (vakai, T&F 13; 20:73–79; 84:19–22). ʻOku ʻaonga ʻa e lakanga fakataulaʻeikí ki he kāingalotu kotoa ʻo e Siasí.
Teuteú
Fakaʻilongaʻi ʻa e ongo peesi 26 mo e 114 ʻi he tohi lēsoni ko ʻení ke faingofua hoʻo huke ki aí.
Ngaahi ʻEkitivitī Ke Ako Mei Aí
Kamataʻaki ha ʻekitivitī fakatahataha. Ki ha ngaahi fakakaukau, vakai ki he peesi 3.
Lotu
Fakaafeʻi ha taha ʻo e fānaú ke ne fai ʻa e fua lotú.
Fakahinohino Fakatokāteliné
Talaange ki he fānaú ko e lakanga fakataulaʻeikí ko e mālohi ia ʻo e ʻOtuá; ʻOku foaki ʻe he ʻOtuá ʻa e lakanga fakataulaʻeikí ki he tamaiki matuʻotuʻa angé mo e kau tangatá koeʻuhí ke nau lava ʻo tāpuakiʻi honau ngaahi fāmilí mo e niʻihi kehé. ʻAi ʻa e fānaú ke nau lea “lakanga fakataulaʻeiki.” (Fakatokangaʻi Ange: Lolotonga ʻa e lēsoni ko ʻení, ʻai ke ke ongoʻingofua ki he ngaahi ongo ʻa e fānau ʻi he nesilií ʻoku ʻikai ha tamai ʻi honau ngaahi ʻapí pe ʻoku ʻikai maʻu ʻe heʻenau ngaahi tamaí ʻa e lakanga fakataulaʻeikí.)
Ngaahi Fakatātā
Fakaʻaliʻali ʻa e fakatātā ʻoku ʻi he peesi 118 pea fakaafeʻi ʻa e fānaú ke ʻai ke hangē ʻoku nau fua ha pēpeé. Fakamatalaʻi ange ʻe lava ke tāpuakiʻi ʻa e pēpeé mo ʻoange hano hingoa ʻe he kau tangata ʻoku nau maʻu ʻa e lakanga fakataulaʻeikí. Fakaafeʻi ʻa e fānaú ke nau pehē “lakanga fakataulaʻeiki.”
Fakaʻaliʻali ʻa e fakatātā ʻoku ʻi he peesi 119 ʻo ha tāpuakiʻi ʻo e mahamahakí. Talaange ki he fānaú ʻoku lava ʻe he tokotaha ko ia ʻokú ne maʻu ʻa e lakanga fakataulaʻeikí ʻo tāpuakiʻi ʻa e niʻihi ʻoku puké koeʻuhí ke nau lava ʻo ongoʻi fiemālie ange. Huke ki he fakatātā ʻi he peesi 26. Tuhu kia Sīsū pea fakamatalaʻi ko e fakatātā ko ʻení ʻoku tāpuakiʻi ʻe Sīsū ʻa e tokotaha ʻoku kui. Fakaafeʻi ʻa e fānaú ke nau lea “lakanga fakataulaʻeiki.”
Fakaʻaliʻali ʻa e fakatātā ʻi he peesi 114. Fakamanatu ki he fānaú ʻoku tau maʻu ʻa e sākalamēnití ʻi he Sāpate takitaha. Fakamatalaʻi ange ʻoku teuteuʻi, tāpuakiʻi mo tufaki ia ʻe he niʻihi ʻoku nau maʻu ʻa e lakanga fakataulaʻeikí. Fakaafeʻi ʻa e fānaú ke nau lea “lakanga fakataulaʻeiki.”
Hiva
Fakaafeʻi ʻa e fānaú ke nau piki nima pea lue takai lolotonga ia hoʻo hivaʻi pe lau ʻa e ngaahi lea ko ʻení mei he “Leaʻaki Heni e ʻOfá” (Tohi Hiva ʻa e Fānaú, 102–03):
ʻOku hoko hoku ʻapí ko ha feituʻu ia ʻoku tāpuekina ʻe he mālohi ʻo e lakanga fakataulaʻeikí ʻi he houa kotoa pē.
Fakaʻosí
Vahevahe hoʻo fakamoʻoní ki hono tāpuekina kitautolu ʻe he Tamai Hēvaní ʻo fakafou ʻi he lakanga fakataulaʻeikí.
Lotu
Fakaafeʻi ha taha ʻo e fānaú ke ne fai ʻa e lotu tukú.
Ngaahi ʻEkitivitī Ke Fili Mei Aí
Teuteú
-
Ki he ʻekitivitī tokotaha fakaafe fakalangilangí: Aleaʻi ha tamai naʻá ne toki tāpuakiʻi ʻene pēpē kimuí ni mai ke ʻomai ʻene pēpeé ki he kalasi nesilií pea fakamatala fekauʻaki mo e meʻa kuó ne aʻusiá.
-
Ki he tohi fakatātaá: ʻAi ha tatau ʻo e fakatātā ʻoku ʻi he peesi 119. Valivali kapau ʻe fie maʻu. Kosi ʻi he laine kuo fakaʻilongaʻí pea pelu ʻi he laine motumotú.
Tāpuakiʻi ʻo e Pēpeē
Tāpuakiʻi ʻa e Mahamahakí
Sākalamēnití
ʻOku Tāpuakiʻi Au ʻe he Tamai Hēvaní ʻo Fakafou ʻi he Lakanga Fakataulaʻeikí
Ngaahi ʻEkitivitī Lau Māú
Lau ha niʻihi pe ko e kotoa ʻo e ngaahi ʻekitivitī lau maau ko ʻení pea fakaafeʻi ʻa e fānau ke kau atu mo koe. Hili ʻa e veesi takitaha, fakamanatu ki he fānaú ʻoku tāpuekina ʻe he lakanga fakataulaʻeikí ʻetau moʻuí.
Tāpuakiʻi ʻo e pēpē (fakaʻaliʻali ʻa e fakatata ʻoku hā ʻi he peesi 118):
Fuofua ʻe he Tamaí ʻa e pēpeé (ʻai ke hangē ʻoku fua ha pēpeé)
ʻO ne ongoʻi fiemālié
Fakahingoa mo tāpuakiʻí, ʻI he mālohi ʻo e lakanga fakataulaʻeikí.
ʻOkú Ne ʻofa hotau fāmilí! (kuku ho fatafatá)
Tāpuakiʻi ʻa e mahamahakí (tuhu ki he fakatātā ʻi he peesi 119):
He taimi ʻoku ou puke aí, ʻe lava ʻo tāpuakiʻi au (tuhu pē kiate koe)
ʻE he kau tangata maʻu lakanga fakataulaʻeiki angatonú.
ʻOku ou ongoʻi nonga mo maʻu ʻa e tuí (ʻai e nimá ki he fatafatá)
ʻO u ʻilo pau te u toe saí.
Sākalamēnití (fakaʻaliʻali ʻa e fakatātā ʻi he peesi 114):
ʻOku ou kai fakalongolongo ʻa e maá (ʻai ke hangē ʻoku kai maá)
Inu mo e vaí ke na ō fakatahá. (ʻai ke hangē ʻoku inu vai)
ʻOku ou kūnima mo fakakaukau kia Sīsū— (kūnima)
He ko e meʻa ia ʻoku totonú. (kamokamo e ʻulú)
[M. W. Verbica, “The Sacrament,” Friend, Feb. 1995, 17]
Fakaafe Fakalangilangi
Fakafeʻiloaki hoʻo fakaafe fakalangilangí ki he fānaú. Fakamatalaʻi kiate kinautolu ʻokú ne maʻu ʻa e lakanga fakataulaʻeikí pea ʻokú ne fakaʻaongaʻi hono lakanga fakataulaʻeikí ke tāpuakiʻi ʻene pēpeé. ʻEke ki he tamaí ʻa e ngaahi fehuʻi hangē ko e, “ʻOkú ke maʻu nai ʻa e lakanga fakataulaʻeikí?” “Ko e hā e hingoa hoʻo kiʻi pēpeé?” “Ko e hā e meʻa naʻá ke leaʻaki ʻi he taimi naʻá ke tāpuakiʻi ai hoʻo pēpeé?” “ʻE founga fēfē hoʻo fakaʻaongaʻi e lakanga fakataulaʻeikí ke tāpuakiʻi hoʻo pēpeé ʻi heʻene tupu ʻo lahí?”
Tohi Fakatātā
Fakaʻaliʻali ki he fānaú ʻa e tohi fakatātā kuó ke teuteuʻí. Toʻo ki ʻolunga ʻa e ʻuluaki takafí, lau ʻa e fakamatalá pea ʻai ʻa e fānaú ke lau fakataha ia mo koe. Toutou ʻai ki he takafi takitaha.
