22
ʻOku Akoʻi Au ʻe he Tohi ʻa Molomoná Fekauʻaki mo Sīsū Kalaisi
Talateu maʻá e Faiakó
Ke ke mateuteu fakalaumālie ke akoʻi e lēsoni ko ʻení, kātaki ʻo lau mo fakalaulauloto ki he ngaahi meʻá ni:
ʻOku hoko ʻa e Tohi ʻa Molomoná ko ha fakamoʻoni mālohi ʻo Sīsū Kalaisi. ʻOku ʻi ai e fakamoʻoni ʻa e kau palōfita ʻi he kuonga muʻá, ʻa ia naʻa nau kikiteʻi ʻEne hāʻele maí mo mahino ʻa Hono misioná. ʻOku toe ʻi ai foki mo e lekooti ʻo ʻEne ʻaʻahi ki he kakai ʻi ʻAmeliká ʻi he taimi nounou hili ʻEne Toetuʻú (vakai, 3 Nifai 11–27). Ko e taumuʻa lahi ʻo e Tohi ʻa Molomoná ke fakalotoʻi e kakaí kotoa “ko Sīsū ko e Kalaisí, ko e ʻOtua Taʻengatá, ʻokú Ne fakahā ia ʻe ia ki he ngaahi puleʻanga kotoa pē” (peesi talamuʻakí ʻo e Tohi ʻa Molomoná; toe vakai ki he 1 Nīfai 13:40–41; 2 Nīfai 25:26; 33:10–11).
Teuteú
-
Fakaʻilongaʻi ʻa e peesi 22, 94 mo e 126 ʻi he tohi lēsoni ko ʻení koeʻuhí ke faingofua hoʻo huke ki aí.
-
ʻOmai ha tatau ʻo e Tohi ʻa Molomoná.
Ngaahi ʻEkitivitī ke ako mei aí
Kamataʻaki ha ʻekitivitī fakatahataha. Ki ha ngaahi fakakaukau, vakai ki he peesi 3.
Lotu
Fakaafeʻi ha taha ʻo e fānaú ke ne fai ʻa e fua lotú.
Hiva
Hivaʻi ʻa e tau ʻo e “Fekumi, Fifili pea mo Lotu” (Tohi Hiva ʻa e Fānaú, 66) pea fai ʻa e fakatātā ʻoku hā atu ʻi laló. Fakaafeʻi ʻa e fānaú ke kau atu mo koe.
Kumi, (ʻai ke hangē ʻokú ke fakaava ha tohi) fifili, (tuhu ki ho ʻulú) [mo] lotu (kūnima)
[ʻA e ngaahi meʻa] kuopau ke [u] faí. (tuhu pē kiate koe)
Taki pea mo fakamoʻoniʻi ʻe he Laumālié, (ʻai e nimá ki he fatafatá)
[Te u ʻilo ai ʻoku moʻoni ʻa e folofolá]. (tuhu ki he ʻulú)
Ngaahi Fakatātaá
Puke ki ʻolunga ʻa e Tohi ʻa Molomoná. Talaange ki he fānaú, “Ko e Tohi ʻa Molomoná ʻeni. ʻOku akoʻi kitautolu ʻe he Tohi ʻa Molomoná fekauʻaki mo Sīsū.” Fakaafeʻi ʻa e fānaú ke nau lea “Tohi ʻa Molomona.” Fakaava ʻa e Tohi ʻa Molomoná pea tuku ia ʻi muʻa ʻiate koe.
Fakaʻaliʻali ʻa e fakatātā ʻo e ʻAloʻí (peesi 126 ʻi he tohi lēsoni ko ʻení). Ala ki he Tohi ʻa Molomoná pea talaange ki he fānaú ʻoku akoʻi ʻe he Tohi ʻa Molomoná naʻe haʻu ʻa Sīsū Kalaisi ki he māmaní.
Fakaʻaliʻali ʻa e fakatātā ʻo hono fakamoʻui ʻe Sīsū ʻa e Kau Nīfaí (peesi 94). Ala ki he Tohi ʻa Molomoná pea talaange ki he fānaú ʻoku akoʻi ʻe he Tohi ʻa Molomoná naʻe fakamoʻui ʻe Sīsū ʻa e kakai naʻe puké.
Fakaʻaliʻali ʻa e fakatātā ʻo e tāpuakiʻi ʻe Sīsū ʻa e fānau ʻa e Kau Nīfaí (peesi 22). Ala ki he Tohi ʻa Molomoná pea talaange ki he fānaú ʻoku akoʻi ʻe he Tohi ʻa Molomoná naʻe tāpuakiʻi ʻe Sīsū ʻa e fānaú.
Fakaʻosí
ʻAi ʻa e fānaú ke nau lea tahataha ʻaki ʻa e, “ʻOku akoʻi au ʻe he Tohi ʻa Molomoná ʻo kau kia Sīsū Kalaisi,” Talaange kiate kinautolu ʻokú ke ʻiloʻi ʻoku moʻoni ʻa e Tohi ʻa Molomoná.
Lotu
Fakaafeʻi ha taha ʻo e fānaú ke ne fai ʻa e lotu tukú.
Ngaahi ʻEkitivitī ke fili mei aí
Teuteú
-
Ki he kato vaʻingá: ʻAi ha tatau ʻo e fakatātā ʻoku hā ʻi he peesi 95. Kosi ʻi he laine motumotú. Faʻo ʻa e ngaahi fakatātaá ʻi ha tangai pe ʻaiʻangameʻa kehe.
ʻOku Akoʻi Au ʻe he Tohi ʻa Molomoná ʻo kau kia Sīsū Kalaisi
ʻOku akoʻi ʻe he Tohi ʻa Molomoná naʻe haʻu ʻa Sīsū ki he māmaní (vakai, ʻAlamā 7:10–12).
ʻOku akoʻi ʻe he Tohi ʻa Molomoná naʻe fakamoʻui ʻe Sīsū ʻa e mahakí (vakai, 3 Nīfai 17:7–10).
ʻOku akoʻi ʻe he Tohi ʻa Molomoná naʻe tāpuakiʻi ʻe Sīsū ʻa e fānaú (vakai, 3 Nīfai 17:21–24).
-
Ki he tohí: ʻAi ha tatau ʻo e peesi 95 maʻá e fānaú takitaha ke valivali.
ʻEkitivitī Lau Māú
Lau ʻa e ʻekitivitī lau maau ko ʻení pea fakaafeʻi ʻa e fānaú ke kau atu mo koe:
Lau ʻa e Tohi ʻa Molomoná. (kamataʻaki hono fakatahaʻi e nimá, pea fakaava hangē ha tohi)
Lau ia ʻi he ʻaho kotoá.
Kimuʻa pea kamata ke ke akó, (ala ki he ʻulú)
Lotu ke ʻoua naʻa ngaló. (kūnima)
[Terri Clark, “Read the Book of Mormon,” Friend, Mar. 2004, 11]
Kato Vaʻingá
Kole ki ha taha ʻo e fānaú ke fili ha fakatātā mei he kató pe ʻaiʻangameʻá. Lau ki he fānaú ʻa e fakamatala ʻoku ʻi he fakatātaá. Toe fai pē kae ʻoua kuo kau e tokotaha kotoa ʻoku fie kaú.
Tohi
Tuku ke valivali ʻe he fānaú kotoa ha tatau ʻo e fakatātā ʻi he peesi 95. Lolotonga ʻenau valivalí, talanoa ange kiate kinautolu ʻo kau ki he fakatātaá. Tuhu kia Sīsū ʻi he fakatātaá. ʻI he ʻosi ʻenau valivalí, peluki ʻi he laine motumotú ke faʻu ha tohi. Pea lau ʻa e tohí ki he fānaú.