16
Te u Lea “ʻOku ou Kole Fakamolemole Atu”
Talateu maʻá e Faiakó
Ke ke mateuteu fakalaumālie ke akoʻi e lēsoni ko ʻení, kātaki ʻo lau mo fakalaulauloto ki he ngaahi meʻá ni:
ʻI he taimi ʻoku tau fai ai ha meʻa ʻoku hala pe fai ha fehalākí, ʻoku totonu ke tau tala ko hotau foʻui pea feinga ke fakatonutonu ia (vakai ki he Sēmisi 5:16). ʻOku lava ʻe heʻetau holi ke loto fakatōkilalo mo kole fakamolemolé ʻo fakamolū e ngaahi loto pea teuteuʻi kitautolu ke haʻu kia Kalaisi (vakai 3 Nīfai 12:23–24).
Teuteú
-
Fakaʻilongaʻi ʻa e peesi 106 ʻi he tohi lēsoni ko ʻení ke faingofua hoʻo huke ki aí.
-
Lau ʻa e 1 Nīfai 17:7–8, 17–19, 49–55; 18:1. Mateuteu ke fakamatalaʻi nounou ʻa e talanoa ʻo Nīfai mo hono ngaahi tokouá ʻi heʻenau foʻu ha vaká.
Ngaahi ʻEkitivitī ke ako mei aí
Kamataʻaki ha ʻekitivitī fakatahataha. Ki ha ngaahi fakakaukau, vakai ki he peesi 3.
Lotu
Fakaafeʻi ha taha ʻo e fānaú ke ne fai ʻa e fua lotú.
Fakatātā
Fakaʻaliʻali ʻa e fakatātā ʻo Sīsū Kalaisí ʻi he peesi 106. Talaange ki he fānaú naʻe akoʻi mai ʻe Sīsū ʻa e founga ke tau fiefia aí. Fakamatalaʻi ange ko e leaʻaki e ngaahi lea leleí te ne lava ʻo ngaohi kitautolu ke tau fiefia pea te ne lava ʻo ngaohi mo e niʻihi kehé ke nau fiefia; ʻi he taimi ʻoku tau fai ai ha fehālākí pe fai ha meʻa ʻoku ʻikai leleí, ʻoku fie maʻu ke tau ngāueʻaki e ngaahi lea lelei ko ʻení: “ʻOku ou kole fakamolemole atu.” Fakaafeʻi ʻa e fānaú ke nau lea, “ʻOku ou kole fakamolemole atu.”
Hiva
Hivaʻi pe lau ʻa e fakalea ki he tau ʻo e “ʻOku ou Feinga ke Hangē ko Sīsuú” (Tohi Hiva ʻa e Fānaú, 40–41) pea fai ʻa e fakatātā ʻoku hā atu ʻi laló. Fakaafeʻi ʻa e fānaú ke kau mo koe.
Feʻofaʻaki hangē ko Sīsū. (kuku ho fatafatá pea māfulifuli)
Feinga ke fakahā [he meʻa kotoa pē]. (kamokamo e ʻulú)
[Fakahā] e ʻofa mo angamalū [ʻi hoʻo ngāue mo e fakakaukaú], (kuku ho fatafatá pea māfulifuli)
Akonaki ia ʻa Sīsū. (kamokamo e ʻulú)
Talanoa ʻi he Folofolá
Fakaʻaliʻali ʻa e fakatātā ʻo e foʻu ʻe Nīfai ha vaká (peesi 70) pea fai ʻa e talanoa ʻo Nīfai mo hono ngaahi tokouá ʻi heʻenau foʻu ha vaká. ʻOku ʻoatu ʻi lalo ha sīpinga:
Ko Nīfai ʻeni (tuhu kia Nīfai ʻi he lotomālie ʻo e fakatātaá). Naʻe fekau ʻe he ʻEikí kia Nīfai ke foʻu ha vaka. Ko e vaká ko ha fuʻu vaka lahi (tuhu ki he vaka ʻi he fakatātaá). Ko e ngaahi tokoua ʻeni ʻo Nīfaí (tuhu kiate kinautolu ʻi he fakatātaá). Ko e niʻihi ʻo kinautolu naʻa nau lea taʻeʻofa kia Nīfai pea ʻikai ke nau fie tokoni kiate ia ke foʻu ʻa e vaká. Naʻe loto mamahi ʻa Nīfai (ʻai ʻa e fānaú ke hangē pē ʻoku nau loto mamahí). Naʻe kole fakamolemole ki mui ange ʻa e ngaahi tokoua ʻo Nīfaí pea nau tokoni kiate ia ʻi hono foʻu e vaká. Pea naʻe toe fiefia ʻa e tokotaha kotoa pē (ʻai ʻa e fānaú ke hangē pē ʻoku nau fiefiá).
Fakamanatu ki he fānaú ko e taimi ʻoku tau pehē ai, “ʻOku ou kole fakamolemole atu,” te tau lava ʻo fiefia ai pea tokoniʻi e niʻihi kehé ke nau fiefia foki. Fakaafeʻi ʻa e fānaú ke nau lea ʻo pehē, “Oku ou kole fakamolemole atu.”
Fakatulamaʻi
ʻAi ʻa e fānaú ke hangē pē ʻoku nau tokoni kia Nīfai ʻi hono foʻu e vaká— tutuʻu e papá, fetuku ia ki he matātahí, tuki e faʻó ki he papá pea fokotuʻu e ngaahi laá. ʻAi e ngaahi ngaue, ongó mo ngaue holo ke tokoni ki hono fakakau mai e fānaú.
Fakaʻosí
Vahevahe ‘a hoʻo fakamoʻoní te tau lava ke fiefia ʻi he taimi ʻoku tau pehē ai, “ʻOku ou kole fakamolemole atu.”
Lotu
Fakaafeʻi ha taha ʻo e fānaú ke ne fai ʻa e lotu tukú.
Ngaahi ʻEkitivitī ke fili mei ai
Teuteú
-
Ki he vaʻinga mateʻi ʻo ha taha: ʻAi ha tatau ʻo e peesi 71 pea kosi ha taha ʻo e ngaahi siakalé. Valivali kapau ʻe fie maʻu. ʻOmai ʻa e holoholo ʻe tolu pe ko e konga tupenu iiki.
Te u Lava pē ke Fiefia ʻI heʻeku pehē, “ʻOku ou kole fakamolemole atu.”
-
Ki he ʻekitivitī vesa: ʻAi ha tatau pea kosi ʻa e ngaahi fuopotopoto ʻi he peesi 71 ke takitaha ʻa e fānaú. Tui ha meʻi filo pe afo ʻi ʻolunga ʻi he foʻi fuopotopoto takitaha ke ngaohi ha vesa pe kahoa maʻá e fānau takitaha.
Vaʻinga Mateʻi ʻo ha taha
Folahi ʻa e holoholo ʻe tolu ʻi he falikí. ʻAi ʻa e fānaú ke fakapuliki honau matá lolotonga hoʻo fūfuuʻi ʻa e fofonga naʻá ke kosí ʻi he taha ʻo e ngaahi holoholó. ʻAi ʻa e fānaú ke nau taufetongi ʻi hono huke ʻa e ngaahi holoholó kae ʻoua kuo nau maʻu ʻa e fofongá. Pea lau ʻa e fakamatalá kiate kinautolu pea fakaafeʻi ke nau angimui atu kiate koe. Toutou fai ʻa e vaʻingá kae ʻoua kuo ʻi ai ha faingamālie ʻo e tokotaha kotoa pē ʻokú ne fie maʻu ha faingamālié.
Ngaahi Talanoá
Fai ʻa e ngaahi talanoa faingofua ke tokoni ki he fānaú ke nau lea ʻo pehē, “ʻOku ou kole fakamolemole atu,” hangē ko e:
-
Ko ha kiʻi taʻahine naʻá ne toʻo ʻa e meʻavaʻinga ʻa hono kiʻi tuongaʻané. Naʻá ne lotomamahi (ʻai ʻa e fānaú ke pehē pē ʻoku nau fakafulofula). Peá ne pehē ange, “ʻOku ou kole fakamolemole atu” pea fakafoki ange ʻa e meʻavaʻingá (ʻai ʻa e fānaú ke nau lea, “ʻOku ou kole fakamolemole atu”). Naʻe fiefia hono kiʻi tuongaʻané! (ʻai ʻa e fānaú ke nau malimali).
-
Naʻe ʻi ai ha kiʻi tamasiʻi naʻe lele atu pē ʻo tau ʻi hono tuofefiné. Naʻe lotomamahi ʻa hono tuofefiné (ʻai ʻa e fānaú ke nau fakafulofula). Peá ne pehē ange leva, “ʻOku ou kole fakamolemole atu” (ʻai ʻa e fānaú ke nau lea, “ʻOku ou kole fakamolemole atu”). Naʻe fiefia hono tuofefiné! (ʻai ʻa e fānaú ke nau malimali).
Toutou fai pē ʻa e meʻa tatau ki he ngaahi ngaahi fakatātā kehé.
Vesá
ʻOange ha kiʻi vesa pe kahoa ki he fānau takitaha ke nau tui. Lau ʻa e ngaahi lea ʻi he fakatātaá kiate kinautolu.