Te u Papitaiso mo Hilifakinima

Talateu maʻá e Faiakó

Ke ke mateuteu fakalaumālie ke akoʻi e lēsoni ko ʻení, kātaki ʻo lau mo fakalaulauloto ki he ngaahi meʻá ni:

Naʻe papitaiso ʻa Sīsū Kalaisi ke fakahā “ki he Tamaí te Ne talangofua kiate Ia ʻi he tauhi ʻEne ngaahi fekaú” pea fokotuʻu ai ʻa e faʻifaʻitakiʻanga maʻa tautolu (vakai, 2 Nīfai 31:7, 9; vakai foki, Mātiu 3:13–17). ʻI he taimi ʻoku tau papitaiso aí, ʻoku tau fakahaaʻi foki ai ʻoku tau holi ke muimui ki he Fakamoʻuí pea talangofua ki Heʻene ngaahi fekaú. Hili e papitaiso ʻo Sīsū Kalaisí, “naʻe maliu hifo ʻa e Laumālie Māʻoniʻoní kiate ia” (2 Nīfai 31:8). Hili hotau papitaisó, ʻoku tau maʻu ʻa e meʻafoaki ʻo e Laumālie Māʻoniʻoní ʻo fakafou ʻi he ouau ʻo e hilifakinimá. ʻOku ʻuhinga ʻeni te tau lava ʻo maʻu ʻa e takaua ʻo e Laumālie Māʻoniʻoní kapau te tau tauhi ʻa e ngaahi fekaú.

Ngaahi ʻEkitivitī ke ako mei aí

Kamataʻaki ha ʻekitivitī fakatahataha. Ki ha ngaahi fakakaukau, vakai ki he peesi 3.

Lotu

Fakaafeʻi ha taha ʻo e fānaú ke ne fai ʻa e fua lotú.

Fakatātā

Fakaʻaliʻali ʻa e fakatātā ʻo e papitaiso ʻo Sīsū Kalaisí (peesi 110). Tuhu ki he ngaahi fakaikiiki ʻi he fakatātaá (Sīsū, ko e vaí, Sione Papitaiso mo e ngaahi alā meʻa ko iá). Fakamatalaʻi ange naʻe papitaiso ʻa Sīsū koeʻuhí he naʻá Ne ʻofa ʻi he Tamai Hēvaní pea naʻá Ne fie maʻu ke talangofua kiate Ia. Fakaafeʻi ʻa e fānaú ke nau lea fakataha mo koe ʻo pehē, “Sīsū” mo e “papitaiso”.

Maau

Tuhu ki he ngaahi konga kehekehe ʻo e fakatātaá lolotonga hoʻo lau ʻa e ngaahi lea ʻo e veesi ʻuluaki ʻo e hiva “Ko Hoku Papitaisó” (Tohi Hiva ʻa e Fānaú, 54–55). Fakaafeʻi ʻa e fānaú ke nau tuhu fakataha mo koe.

Ne hāʻele mai ʻa Sīsū kia Sione [Papitaiso], (tuhu kia Sīsū, pea kia Sione)
ʻI Siutea [he kuo hilí],
Papitaiso fakauku
ʻI he vai ko Soataní. (tuhu ki he vaí)

Mahalo te ke fie maʻu ke fakamatalaʻi ange ʻa e “fakaukú” ʻoku ʻuhinga ia naʻe ʻalu hifo ʻa Sīsū he loto vaí ʻi he taimi naʻá Ne papitaiso aí.

Fakatātā

Fakaʻaliʻali ʻa e fakatātā ʻo e kiʻi taʻahine ʻoku papitaisó (peesi 110) pea fakamatalaʻi e meʻa ʻoku faitatau ai e ongo fakatātaá. Talaange ki he fānaú te nau lava ʻo papitaiso, hangē ko Sīsuú, ʻi he taimi te nau taʻu valu aí. ʻAi e foʻi tuhu ʻe valu ki ʻolunga, taki fā e ongo nimá pea lau kinautolu. Toe lau pē pea fakaafeʻi ʻa e fānaú ke lau fakataha mo koe. Fakamamafaʻi ange ko e papitaisó ko e founga ia ʻe taha te tau lava ai ʻo muimui ʻia Sīsū; ʻi he taimi ʻoku tau papitaiso aí ʻoku tau fakahaaʻi ʻetau ʻofa ki he Tamai Hēvaní mo fie maʻu ke talangofua kiate Ia.

Ngaahi Fakatātaá

Fakaʻaliʻali ʻa e ngaahi fakatātā ʻoku ʻi he peesi 111. Talanoa ki he fānaú ʻo kau ki he meʻa ʻoku hoko ʻi he ngaahi fakatātaá. Fakamatalaʻi ange ko e ʻosi ko ia ʻetau papitaisó, ʻoku hilifakinima leva kitautolu. Fakaafeʻi ʻa e fānaú ke nau lea “hilifakinima.” Talaange kiate kinautolu ʻoku ʻuhinga ʻeni, ki he ʻai e nima ʻo e kau tangata ʻoku nau maʻu ʻa e lakanga fakataulaʻeikí ʻi hotau ʻulú ke foaki mai kiate kitautolu ʻa e meʻafoaki ʻo e Laumālie Māʻoniʻoní.

Te u Papitaiso

Te u Hilifakinima

Fakaʻosí

Fakaafeʻi ʻa e fānaú ke nau lea tahataha ʻaki ʻa e ngaahi foʻi lea ko ʻení fakataha mo koe, “Te u papitaiso mo hilifakinima.” Fakamatala nounou ki he fānaú ʻa e ongo naʻá ke maʻu ʻi he taimi naʻá ke papitaiso ai mo hilifakinimá.

Lotu

Fakaafeʻi ha taha ʻo e fānaú ke ne fai ʻa e lotu tukú.

Ngaahi ʻEkitivitī ke fili mei aí

Teuteú

Ki he ʻekitivitī folofolá: ʻOmai ha tatau ʻo e Tohi ʻa Molomoná. Fakaʻilongaʻi ʻa e 3 Nīfai 12:1 ke faingofua hoʻo huke ki aí.
Ki he vaʻinga mateʻi ʻo ha taha: ʻAi ha tatau ʻo e fakatātā ʻi he peesi 111 pea valivali kinautolu kapau ʻoku fie maʻu. Peluki ʻa e pēsí ke ʻasi ʻa e fakatatā ʻo e papitaisó ʻi he tafaʻaki ʻe taha pea ʻasi e fakatātā ʻo e hilifakinimá ʻi he tafaʻaki ʻe tahá.
Ki he ʻekitivitī valivalí: ʻAi ha tatau ʻo e fakatātā ʻi he peesi 111 ke valivali ʻe he fānaú.

Folofolá

Talaange ki he fānaú, ʻoku talamai ʻe Sīsū Kalaisi kiate kitautolu ʻi he folofolá, ʻokú Ne fie maʻu kitautolu ke tau papitaiso. Fakaava e Tohi ʻa Molomoná ki he 3 Nīfai 12:1 pea lau, “Naʻe folofola ʻa Sīsū, ʻTui kiate au pea papitaiso.’” Fakaafeʻi ʻa e fānaú ke nau toe lau tahataha fakataha mo koe ʻa e kupuʻi leá. Fakamanatu kiate kinautolu te nau lava ʻo papitaiso ʻi he taimi te nau taʻu valu aí.

Vaʻinga mateʻi ʻo ha taha

Fakaʻaliʻali ki he fānaú hoʻo tatau ʻo e fakatātā papitaisó, lau ʻa e fakamatalá pea fakaafeʻi ʻa e fānaú ke nau lea “papitaiso.” Fulihi ʻa e pēsí pea toe lau e meʻa tatau ki he fakatātā hilifakinimá.

Fūfuuʻi ʻa e fakatātaá ʻi ho tuʻá. Pea fakaʻaliʻali ki he fānaú ʻa e tafaʻaki ʻe taha ʻo e pēsí pea fehuʻi ange, “ʻOku papitaiso pe hilifakinima ʻa e kiʻi tamasiʻi ko ʻení?” Fakaafeʻi ʻa e fānaú ke tali fakataha mo koe. Fūfuuʻi ʻa e ngaahi fakatātaá ʻi ho tuʻá pea toe fai ʻa e ʻekitivitií, kehe pē ʻoku saiʻia ai e fānaú. ʻOku feʻunga pē ʻa e ʻekitivitī ko ʻení tautefito ki he fānau lalahi angé.

Valivalí

ʻAi ʻa e fānaú ke valivali ha tatau ʻo e ngaahi fakatātā ʻi he peesi 111. Lolotonga ʻenau valivalí, fakamanatu ange ʻa e ngaahi tefitoʻi moʻoni naʻe akoʻi ʻi he lēsoní. Fakamatalaʻi ange ʻa e fakaikiiki ʻo e fakatātaá, lau ʻa e ngaahi fakamatalá ki he fānaú pea fakamatalaʻi ange kiate kinautolu ʻa e meʻa ʻoku nau valivalí.