2
ʻOku ʻI ai ha Palani ʻa e Tamai Hēvaní Maʻaku
Talateu maʻá e Faiakó
Ke ke mateuteu fakalaumālie ke akoʻi e lēsoni ko ʻení, kātaki ʻo lau mo fakalaulauloto ki he ngaahi meʻá ni:
Naʻa tau nofo fakataha mo ʻetau Tamai Hēvaní ko e ngaahi laumālie ki muʻa pea toki fānauʻi mai kitautolú. Naʻe teuteuʻi ʻe he Tamai Hēvaní ha palani ʻa ia ʻokú Ne fakangofua kitautolu ke tau haʻu ki he māmaní ʻo maʻu ʻa e sino, kakano mo e hui ke tau hoko ʻo hangē ko Iá pea toe foki hake ki Hono ʻafioʻangá. ʻOku malava ia ke fakafou ʻi he Fakalelei naʻe fai ʻe Sīsū Kalaisí pea mo ʻetau talangofuá. Naʻe fili ʻa Sīsū Kalaisi ke hoko ko hotau Fakamoʻui. (Vakai, ʻĒpalahame 3:24–27; Ko e Ngaahi Tefito ʻo e Tui 1:3.)
Teuteú
Fakaʻilongaʻi ʻa e peesi 98 ʻi he tohi lēsoni ko ʻení ke faingofua haʻo toe huke ki aí.
Ngaahi ʻEkitivitī ke ako mei aí
Kamataʻaki ha ʻekitivitī fakatahataha. Ki ha ngaahi fakakaukau, vakai ki he peesi 3.
Lotu
Fakaafeʻi ha taha ʻo e fānaú ke ne fai ʻa e fua lotú.
Hivaʻi ha Talanoa
Ngāueʻaki ʻa e “Fānau Au ʻa e ʻOtua” (Tohi Hiva ʻa e Fānaú, 2–3) ke akoʻi ki he fānaú ʻa e niʻihi ʻo e ngaahi tefitoʻi meʻa fakaikiiki kau ki he palani ʻo e fakamoʻuí. Ko e ngaahi ʻuluʻi meʻa ʻena ko ha fokotuʻu:
Talaange ki he fānaú naʻa tau nofo fakataha mo ʻetau Tamai Hēvaní ki muʻa pea toki fānauʻi mai kitautolú.
Hivaʻi pe lau (fakaafeʻi e fānaú ke nau kau fakataha mo koe):
Fānau au ʻa e ʻOtua,
Kuó ne fekau mai.
Talaange ki he fānaú ʻoku ʻi ai ha palani ʻa e Tamai Hēvaní maʻatautolu. Naʻá Ne talamai kiate kitautolu ke tau haʻu ki he māmaní ke moʻui. Naʻa tau fuʻu fiefia ʻo tau kaikaila ai ʻi he fiefia. Fakaafeʻi ʻa e fānaú ke nau lea “Hooray!”
Fakaʻaliʻali ʻa e fakatātā ʻo ha fāmili ʻi he peesi 14. Talaange ki he fānaú naʻa tau haʻu ki he māmaní ke nofo fakataha mo ha fāmili ʻoku nau ʻofaʻi kitautolu. Fakaafeʻi e fānaú ke nau fepikinima pea nau feʻiloaki.
Hivaʻi pe lau:
Ke u haʻu ki he māmaní
Mo e ongomātuʻá [ʻofa mo angalelei.]
Talaange ki he fānaú, lolotonga ʻo ʻetau ʻi he māmaní, ʻoku fie maʻu kitautolu ʻe he Tamai Hēvaní ke tau fiefia mo muimui ki Heʻene ngaahi fekaú.
Hivaʻi pe lau:
Taki au, ʻeva mo au
[Tokoni] Ke u ʻilo ʻa e hala.
Fakaʻaliʻali ange ʻa e fakatātā ʻo Sīsū Kalaisi ʻi he peesi 98. Talaange ki he fānaú naʻe fili ʻe he Tamai Hēvaní ʻa Sīsū Kalaisi ke tokoni mai kiate kitautolu ke tau toe foki hake kiate Ia. Fakamatalaʻi, koeʻuhí ko Sīsū Kalaisi, te tau lava ʻo nofo fakataha mo e Tamai Hēvaní pea mo hotau ngaahi fāmilí ʻo taʻengata ʻo kapau te tau tauhi ʻa ʻEne ngaahi fekaú.
Hivaʻi pe lau:
Akoʻi au ke u fai lelei
Ke nofo mo Ia ha ʻaho.
Hivaʻi e foʻi hivá kotoa pea fakaʻaliʻali e ngaahi fakatātaá lolotonga ʻa hoʻo hivá:
Fānau au ʻa e ʻOtua,
Kuó Ne fekau mai,
Ke u haʻu ki he māmani (fakaʻaliʻali ʻa e fakatātā ʻo e fāmilí ʻi he peesi 14)
Mo e ongomātuʻa.
Taki au, ʻeva mo au,
[Tokoni] Ke u ʻilo ʻa e hala,
Akoʻi au ke u fai lelei (fakaʻaliʻali ʻa e fakatātā ʻo Sīsū ʻi he peesi 98)
Ke nofo mo Ia ha ʻaho.
Fakaʻosí
Vahevahe hoʻo fakamoʻoni ki he palani ʻa e Tamai Hēvaní maʻatautolú.
Lotu
Fakaafeʻi ha taha ʻo e fānaú ke ne fai ʻa e lotu tukú.
Ngaahi ʻEkitivitī ke fili mei aí
Teuteú
-
Maʻá e kato vaʻingá: Hiki ha tatau pea kosi ʻa e fakatātā ʻi he peesi 15. ʻOmai ha meʻa ke fūfuuʻi ai ʻa e ngaahi fakatātaá, ʻo hangē ko ha kiʻi tangai siʻisiʻi pe kato tupenu.
ʻOku ʻI ai ha Palani ʻa e Tamai Hēvaní Maʻaku
Fánau au ʻa e ʻOtua, kuó Ne fekau maí
Ke u haʻu ki he mámani mo e ongomātuʻa [angalelei mo ʻofa]
Akoʻi au ke u fai lelei ke nofo mo Ia ha ʻaho.
-
Ki he ‘ekitivitī valivalí: Hiki ha tatau ʻo e peesi 15 maʻá e fānaú kotoa. Kosi ʻa e ngaahi fakatātaá mo e ngaahi foʻi leá. ʻOmai ʻa e afo pe filo pea mo e tepi ke ngaohi ke faingofua ki he fānaú.
Kato vaʻinga (Bag Game)
Faʻo ʻa e ngaahi fakatātaá ki he kató. ʻAi ha taha ʻo e fānaú ke ne toʻo ha fakatātā ʻe taha mei he kató. Lau pe hivaʻi ʻa e fakamatalá pea ʻai e fānaú ke nau toe lau pe hivaʻi ʻa e leá fakataha mo koe. Toutou fai pē kae ʻoua kuo kau kotoa e tokotaha takitaha ʻoku fie kaú.
Valivalí
ʻAi ʻa e fānaú ke nau valivali ha tatau ʻo e ngaahi fakatātā ʻi he peesi 15 pea ʻoange ke nau ō mo ia ki honau ngaahi ʻapí ke fakaʻaliʻali ki heʻenau ngaahi mātuʻá ʻa e meʻa ne nau ako ʻi he nesilií. Kapau ʻoku ʻi ai hao kiʻi taimi, ngāueʻaki ʻa e afó pe filó mo e tepí ke ngaohi ha ngaahi telefoni ʻo hangē ko ʻene hā ko ia ʻi he fakatātā ʻi he tafaʻaki toʻomataʻú.
