4
ʻOku ʻOfa ʻa e Tamai Hēvaní mo Sīsū Kalaisi ʻIate Au
Talateu maʻá e Faiakó
Ke ke mateuteu fakalaumālie ke akoʻi ʻa e lēsoni ko ʻení, kātaki ʻo lau mo fakalaulauloto ki he ngaahi meʻá ni:
ʻOku maʻu ʻe he Tamai Hēvaní mo Sīsū Kalaisi ʻa e ʻofa haohaoa kiate kitautolu fakataautaha. Naʻá Na ʻofa ʻiate kitautolu kimuʻa pea tau toki haʻu ki he māmaní; ʻOkú Na kei ʻofa ʻiate kitautolu ʻi he taimí ni; pea he ʻikai pe liliu ʻEna ʻofa lahi fau ʻiate kitautolú. Naʻe fakahaaʻi ʻe he Fakamoʻuí ʻa ʻEne ʻofa lahí tau-tefito ki he fānau īkí, lolotonga ʻa ʻEne malanga ʻi he māmaní (vakai Mātiu 18:5, 10; Maʻake 10:13–16; 3 Nīfai 17:11–24).
Teuteú
-
Lau ʻa e 3 Nīfai 17:11–12, 21–24 pea mateuteu ke fakanounouʻi ʻa e talanoa ko ʻení ki he fānaú.
-
ʻOmai ha tatau ʻo e Tohi ʻa Molomoná.
Ngaahi ʻEkitivitī ke ako mei aí
Kamataʻaki ha ʻekitivitī fakatahataha. Ki ha ngaahi fakakaukau, vakai ki he peesi 3.
Lotu
Fakaafeʻi ha taha ʻo e fānaú ke ne fai ʻa e fua lotú.
Fakahinohino Fakatokāteline
Talaange ki he fānaú ʻokú ke ʻofa ʻiate kinautolu pea talanoa nounou ki ha niʻihi ‘oku ʻofa ʻiate kinautolú, hangē ko ʻenau mātuʻá, ngaahi tuongaʻané mo e tuofāfiné, ngaahi kuí mo hai fua. Pea fakamatalaʻi ange ʻoku ʻi ai mo ha toe toko ua kehe ʻokú Na ʻofa ʻiate kinautolu ʻo lahi ange ʻi ha toe taha—Tamai Hēvaní pea mo Sīsū Kalaisi. Talaange ki he fānaú, “ʻOku ʻafioʻi koe ʻe he Tamai Hēvaní mo Sīsū Kalaisi. ʻOkú Na ʻafioʻi ho hingoá pea ʻokú Na ʻofa ‘iate koe.” Tuhu ki he taha ʻo e fānaú peá ke talaange, “ʻOku ʻofa ʻa e Tamai Hēvaní mo Sīsū Kalaisi ʻia [hingoa ʻo e tamasiʻi pe taʻahiné].” Toutou fai ia ki he tokotaha kotoa.
Veesi ʻEkitivitī
Lau ʻa e veesi ʻekitivitī ko ʻení pea fakaafeʻi ʻa e fānaú ke kau fakataha mo koe:
ʻOku ʻafioʻi au ʻe he Tamai Hēvaní (tuhu kia koe)
Mo e meʻa ʻoku ou saiʻia ke faí.
ʻOkú Ne ʻafioʻi hoku hingoá mo e feituʻu ʻoku ou nofo aí. (faʻūtaha ho lou-hiʻinimá ke hangē ha falé)
ʻOku ou ʻiloʻi ʻokú Ne ʻofa foki ʻiate au. (kukuʻi ho fatafatá)
Talanoa ʻi he Folofolá
Fakaʻaliʻali ʻa e fakatātā ʻi he peesi 22. Talaange ki he fānaú ʻoku tau ako ʻi he folofolá ʻoku ʻofa ʻa Sīsū ʻi he fānau īkí. Fakaava hake ʻa e Tohi ʻa Molomoná pea fakamatalaʻi fakanounou ʻa e talanoa ʻo e tāpuakiʻi ʻe Sīsū ʻa e fānau iiki ʻa e Kau Nīfaí (3 Nīfai 17:11–12, 21–24). ʻOku ʻoatu ʻi lalo ha sīpinga:
Naʻe akoʻi ʻe Sīsū ʻa e kakaí (tuhu kia Sīsū ʻi he fakatātaá). Naʻá Ne kole kiate kinautolu ke ʻoange ʻenau fānau īkí kiate Ia (tuhu ki he fānau ʻi he fakatātaá). Naʻa nau tangutu ʻi he kelekelé takatakai ʻiate Ia pea naʻe tūʻulutui ʻa Sīsū ʻo lotu (ʻai ʻa e fānaú ke nau tūʻulutui pea punou honau ʻulú). Pea naʻá Ne tāpuakiʻi taha taha ʻa e tokotaha kotoa pē ʻi he fānaú. Naʻe fakahoko ʻeni ʻe Sīsū koeʻuhí ko ʻEne ʻofa ʻi he fānau īkí (ʻai ʻa e fānaú ke nau fefāʻofuaʻaki).
Hiva
Hivaʻi pe lau ʻa e ngaahi lea ko ʻení “ʻOku Ongo ʻa e ʻOfá” (Tohi Hiva ʻa e Fānaú, 42–43) pea fai ʻa e fakatātā ʻoku hā atu ʻi laló. Fakaafeʻi ʻa e fānaú ke kau fakataha mo koe.
Ongo ʻa e ʻofa ʻa e Fakamoʻuí (ʻai e ongo nimá ki he tafaʻaki fatafata toʻohemá)
[ʻI he kotoa ʻo e māmani ʻokú ne ʻātakaiʻi au. (mafao atu ho ongo nimá ke fālahi) …
Ongo ʻa e ʻofa ʻa e Fakamoʻuí, (ʻai e ongo nimá ki he tafaʻaki fatafata toʻohemá)
ʻI Heʻene ʻofa mai kiate aú. (tuhu kia koe)
Fakaʻosí
Vahevahe mo e fānaú ʻa hoʻo fakamoʻoní ʻoku ʻofa mai ʻa e Tamai Hēvaní mo Sīsū kiate kinautolu takitaha. ʻAi ʻa e fānaú ke nau toe lea tahataha ʻaki ʻa e kupuʻi lea ko e, “ʻOku ʻofa ʻa e Tamai Hēvaní mo Sīsū ʻiate au”.
Lotu
Fakaafeʻi ha taha ʻo e fānaú ke ne fai ʻa e lotu tukú.
Ngaahi ʻEkitivitī ke fili mei aí
Teuteú
-
Ki he ʻekitivitī sioʻatá: ʻOmai ha sioʻata siʻisiʻi ʻe lahi feʻunga ke sio ai e fānaú ki honau matá.
-
Ki he ʻekitivitī tā: ʻOmi ha fakatātā ʻe fā pe nima ʻo e ngaahi meʻa ʻoku tāpuekina ʻaki kitautolu ʻe he Tamai Hēvaní, hangē ko ha fāmili, ʻapi, ʻuluʻakau, folofolá mo e alā meʻa pehē. Te ke lava ʻo ngāueʻaki ʻa e ngaahi fakatātā mei he ngaahi makasini ʻa e Siasí, hiki ha tatau ʻo e ngaahi fakatātā mei he tohi ko ʻení pe ko e ngaahi fakatātā faingofua pē kuó ke tā.
-
Ki he ʻekitivitī valivalí: ʻAi ha tatau pea kosi ʻa e fakatātā ʻi he peesi 23 maʻá e tokotaha kotoa pē ʻi he fānaú ke nau valivali (foʻi fuopotopoto ʻe taha ki he toko taha takitaha). Tui ha kiʻi meʻi filo pe afo ʻi ʻolunga ʻi he foʻi fuopotopoto takitaha ke hangē ha kahoa.
ʻOku ʻOfa ʻa e Tamai Hēvaní mo Sīsū Kalaisi ʻIate Au
ʻEkitivitī Sioʻata
ʻAi ʻa e fānaú ke nau tangutu fakafuopotopoto. ʻUnu holo mo e sioʻatá ʻi he loto siakalé pea ʻai ke sio ʻa e fānaú kotoa ki honau matá. ʻI he sio ʻa e fānau takitaha ki he sioʻatá, kole ange ki he tokotaha ko iá ke ne leaʻaki hono hingoá (kapau ʻoku lava ʻe he fānaú). Pea lea ʻo pehē, “ʻOku ʻofa ʻa e Tamai Hēvaní mo Sīsū ʻia [hingoa ʻo e tamasiʻí pe taʻahiné].”
Ngaahi Fakatātā
Tuku ʻa e ngaahi fakatātā kuó ke ʻomaí ʻi he ngaahi feituʻu kehekehe ʻi he lokí. Talaange ki he fānaú kuo ʻomai ʻe he Tamai Hēvaní mo Sīsū Kalaisi kiate kitautolu ʻa e ngaahi tāpuaki lahi, koeʻuhí ʻokú Na ʻofa ʻiate kitautolu. Fakaafeʻi kinautolu ke nau lue fakataha mo koe ki he taha ʻo e ngaahi fakatātaá pea tokoniʻi kinautolu ke talamai e hingoa ʻo e tāpuaki ʻokú ne fakafofongaʻí. Fakaafeʻi kinautolu ke fakatātaaʻi ha meʻa ʻoku fekauʻaki mo e tāpuaki ko iá (ʻai ke pehē pē ʻokú ke lau folofola, ʻai ke hangē ha fuʻu ʻakaú mo e alā meʻa pehē). Toe fai pē meʻa tatau ki he ngaahi fakatātā kehé.
Veesi ʻEkitivitií
Toe lau ʻa e veesi ʻekitivitī ʻi he peesi 9.
Valivalí
ʻAi ʻa e fānaú ke nau valivali ʻa e ngaahi kahoa kuó ke teuteuʻi maʻanautolú. Lau kiate kinautolu ʻa e ngaahi lea ʻi he fakatātaá.