20
Te u Loto-ʻApasia
Talateu Maʻá e Faiakó
Ke ke mateuteu fakalaumālie ke akoʻi e lēsoni ko ʻení, kātaki ʻo lau mo fakalaulauloto ki he ngaahi meʻá ni:
ʻOku hoko ʻa e Loto ʻApasiá ko ha ʻulungāanga ia ʻo e fakaʻapaʻapa mo e ʻofa moʻoni ki he Tamai Hēvaní mo Sīsū Kalaisi. ʻOku mahulu ange ia ʻi he fakalongolongo mo tangutu maʻu lolotonga ha lēsoni, ka neongo ia ko ʻetau loto ʻapasiá ko e founga mahino ia ʻoku tau faʻa fai ʻi he lotú mo e ngaahi feituʻu toputapu kehé. ʻI heʻetau feinga ke tau loto ʻapasiá, te tau ongoʻi mālohi ange ai ʻa e tākiekina ʻa e Laumālie Māʻoniʻoní ʻi heʻetau moʻuí. (Vakai, T&F 63:64; 84:54; 109:21.)
Ngaahi ʻEkitivitī Ke Ako Mei Aí
Kamataʻaki ha ʻekitivitī fakatahataha. Ki ha ngaahi fakakaukau, vakai ki he peesi 3.
Lotu
Fakaafeʻi ha taha ʻo e fānaú ke ne fai ʻa e fua lotú.
Fakatātā
Fakaʻaliʻali ʻa e fakatātā ʻoku hā ʻi he peesi 86. Talaange ki he fānaú, ko e kiʻi fāmili ko ʻení ʻoku nau ʻi he lotú pea ʻoku nau loto ʻapasia. Fakaafeʻi ʻa e fānaú ke nau lea “loto ʻapasia.” Fakamatalaʻi ange ʻoku ʻuhinga ʻa e loto ʻapasiá ki he fakalaulauloto ki he Tamai Hēvaní pea mo Sīsū Kalaisi. Talaange ha ngaahi meʻa ʻoku fai ʻe he kiʻi fāmili ʻi he fakatātaá ke fakahaaʻi ai ʻoku nau loto ʻapasia.Taki e tokanga makehe ki he fānau ʻi he fakatātaá.
Akoako
Tokoni ke mahino ki he fānaú ko e taimi ko ia ʻoku tau haʻu ai ki he lotú, te tau lava ʻo fakahaaʻi ʻetau ʻofa ki he Tamai Hēvaní pea mo Sīsū ʻaki ʻetau loto ʻapasia. Fakamatalaʻi e ngaahi founga ʻe niʻihi ʻoku tau fakahaaʻi ai e loto ʻapasiá ʻi he lotú pea akoako hono fai kinautolú fakataha mo e fānaú. Hangē ko ʻení:
-
ʻOku tau talanoa leʻo siʻi. (akoako e talanoa leʻo siʻí)
-
ʻOku tau luelue fakalongolongo. (akoako e luelue fakalongolongó)
-
ʻOku tau tangutu fakalongolongo. (akoako e tangutu fakalongolongó)
-
ʻOku tau fakafanongo ki heʻetau faiakó. (ʻai e nima ke hangē ha ipú ʻo ʻai ki he telingá)
-
ʻOku tau fakakaukau kia Sīsū. (ala ki he ʻulú)
Hiva
Fakamatalaʻi ange ko e founga ʻe taha ke fakahā ai ʻetau loto ʻapasiá, ko e hivaʻi e ngaahi hiva fakalaumālié. Hivaʻi pe lau ʻa e ngaahi lea ki he hiva ko e “Te u Feinga Ke u ʻApasia” (Tohi Hiva ʻa e Fānaú, 13) pea fai e fakatātā ʻoku hā atu ʻi laló. Fakaafeʻi ʻa e fānaú ke kau atu mo koe.
ʻOku ou ʻofa ʻi heʻeku Tamai Hēvaní, (ʻai e nimá ki he fatafatá)
Pea ʻoku ou feinga ke (tuhu pē kiate koe)
Loto ʻapasia ʻi hono falé. (fakaʻūtaha e louhiʻinimá ke faʻu ha fale)
Pea te ne ofi kiate au. (kuku ho fatafatá)
Fakaʻosí
Fakamālō ki he fānaú ʻi heʻenau ʻapasiá. Fakamatalaʻi ange ʻoku hanga ʻe he meʻá ni ʻo tokoniʻi kitautolu mo kinautolu ʻi hotau ʻātakaí ke tau fakakaukau ki he Tamai Hēvaní mo Sīsū. Kole ange ki he fānaú ke nau lea, “Te u ʻApasia.” Fakaafeʻi kinautolu ke nau ʻapasia ʻi he ʻahó ni.
Lotu
Talaange ki he fānaú kuo taimi ke fai ʻa e lotu tukú. Fehuʻi ange, “ʻTe ke lava fēfē ke ʻapasia lolotonga ʻa e lotú?” Tokoni kiate kinautolu ke ako e kūnimá, punou honau ʻulú pea kuikui honau matá lolotonga ia hoʻo fai e lotú. Fakamanatu ki he fānaú ʻoku tokoni kiate kitautolu hono fai ʻení ke fakahā ai ki he Tamai Hēvaní mo Sīsū ʻoku tau ʻofa ʻiate Kinaua. Fakamālōʻiaʻi kinautolu ʻi heʻenau ʻapasiá.
Ngaahi ʻEkitivitī Ke Fili Mei Aí
Teuteú
-
Ki he ʻekitivitī tohi fakatātaá: ʻAi ha tatau ʻo e fakatātā ʻi he peesi 87; valivali kapau ʻe fie maʻu. Kosi ʻi he laine ʻoku fakaʻilongaʻí ke faʻu ʻa e tāpuni ʻe ua. Peluki atu ʻa e tāpuní ke fakapuliki ʻa e tā fakatātaá.
ʻOku ou kuikui pea punou mo hoku ʻulú
peá u kūnima lolotonga hono fai e lotú.
-
Ki he ʻekitivitī valivalí: ʻAi ha tatau ʻo e fakatātā ʻi he peesi 87 maʻá e fānaú ke nau valivali. Kosi ʻi he laine hokohokó ke faʻu ʻa e ngaahi tohi fakatātā maʻá e fānaú.
Tohi Fakatātaá
Puke ki ʻolunga ʻa e fakatātā naʻá ke teuteuʻí, ʻa ia ʻoku fakapuliki ʻa e fakatātaá ʻaki ʻa e ongo tāpuní. Talaange ki he fānaú te ke fakaʻaliʻali ange kiate kinautolu ʻa e ngaahi fakatātā ʻe niʻihi ʻa ia ʻokú ne fakahā mai kiate kitautolu ʻa e founga ke tau ʻapasia ai lolotonga ha lotu. Fakaava ʻa e tāpuni ki ʻolungá pea lau ʻa e ngaahi lea ʻoku ʻi loto ʻi he tāpuní. Fai ʻa e meʻa tatau ki he tāpuni ʻi laló. Toe fai ʻa e ʻekitivitií; fakaafeʻi ʻa e fānaú ʻi he taimí ni ke fakaangaanga e punou honau ʻulú, kuikui honau matá mo kūnima.
ʻEkitivitī Lau Māú
Lau ʻa e maau ko ʻení pea fakaafeʻi ʻa e fānaú ke kau fakataha mo koe:
Fakaava, tāpuniʻi kinautolu; (folahi mo kuku e nimá)
Fakaava, tāpuniʻi kinautolu; (folahi mo kuku e nimá)
Fai ha kiʻi pasipasi. (pasi e nimá)
Fakaava, tāpuniʻi kinautolu; (folahi mo kuku e nimá)
Fakaava, tāpuniʻi kinautolu; (folahi mo kuku e nimá)
Hili ʻi ho fungá kinautolu. (puke fakataha e nimá ʻi ho fungá)
Valivalí
ʻAi ʻa e fānaú ke nau valivali ha tatau ʻo e tohi fakatātā naʻá ke teuteu maʻa kinautolú.