3
Te u Lava ʻo Lotu ki he Tamai Hēvaní
Talateu maʻá e Faiakó
Ke ke mateuteu fakalaumālie ke akoʻi e lēsoni ko ʻení, kātaki ʻo lau mo fakalaulauloto ki he ngaahi meʻá ni:
Te tau lava ʻo fakataufolofola ki heʻetau Tamai Hēvaní ʻo fakafou ʻi he lotu. ʻOku tau talaange kiate Ia ʻoku tau ʻofa Ai, ʻoku tau fakamālō kiate Ia ko e ngaahi tāpuakí pea ʻoku tau kole ke tokoniʻi kitautolu pea mo e niʻihi kehe ʻoku faingataʻaʻiá. ʻOku tau fakaʻosi leva ʻetau lotú ʻi he huafa ʻo Sīsū Kalaisí. ʻOku hoko ʻa e lotú ko e taha ʻo e ngaahi tāpuaki maʻongoʻonga ʻoku tau maʻu lolotonga ʻetau ʻi he māmaní. (Vakai Mātiu 6:9–13; ʻAlamā 34:18–27; 3 Nīfai 18:19–21.)
Teuteú
-
ʻOmai ha fanga kiʻi meʻa iiki pe ngaahi fakatātā ʻa ia ʻoku nau fakafofongaʻi ha ngaahi meʻa ʻoku tau fakamālōʻia ai (hangē ko e vala, meʻakai, folofolá mo e ngaahi alā meʻa pehē) ʻi ha kato lahi. Tohiʻi ʻi he kató ʻa e “ʻOku Mau Fakamālō atu [ʻe ʻOtua]”. ʻOmai mo e kato kehe ʻoku ʻi ai e ngaahi meʻa mo e ngaahi fakatātā ʻokú ne fakafofongaʻi e ngaahi meʻa te tau lava ke kole ʻi ha lotu (hangē ko ha fāmili fiefia, sino mālohi, ʻofa mo e ngaahi alā meʻa pehē). Tohiʻi ʻi he kato ko ʻení “Kātaki ʻo Tāpuakiʻi Kimautolu.”
-
Fakaʻilongaʻi ʻa e peesi 106 ʻi he tohi lēsoni ko ʻení ke faingofua haʻo toe huke ki aí.
Ngaahi ʻEkitivitī ke ako mei aí
Kamataʻaki ha ʻekitivitī fakatahataha. Ki ha ngaahi fakakaukau, vakai ki he peesi 3.
Lotu
Fakaafeʻi ha taha ʻo e fānaú ke ne fai ʻa e fua lotú.
Ngaahi Fakatātaá
Fakaʻaliʻali ʻa e fakatātā ʻo e kiʻi tamasiʻi ko Sīsuú ʻi Heʻene lotú (peesi 18). Talaange ki he fānaú ko ha fakatātā ʻeni ʻo e lotu ʻa Sīsū ʻi Heʻene kei siʻí. Fakaʻaliʻali ʻa e fakatātā ʻo ha kiʻi tamasiʻi ʻoku lotu (peesi 18). Fakamatalaʻi ange ko e taimi ko ia ʻoku tau lotu aí ʻoku tau fakataufolofola ai ki he Tamai Hēvaní; ʻoku tau kamataʻaki ʻetau lea ʻo pehē, “ʻE Tamai Hēvani.” Fakaafeʻi ʻa e fānau ke nau lea, “ʻE Tamai Hēvani.”
Talaange ki he fānaú ʻoku hoko leva ʻetau fakamālō kiate Ia koeʻuhí ko hotau ngaahi tāpuakí. ʻAi ha taha ʻo e fānaú ke ne fili ha meʻa mei he kato ʻoku tohiʻi ai ʻa e “ʻOku Mau Fakamālō atu ki he ʻAfiona.” Leaʻaki e, “ʻOku Mau Fakamālō atu ki he ʻAfiona koeʻuhí ko ʻemau [hingoa ʻo e meʻa naʻe fili ʻe he kiʻi tamasiʻí pe taʻahiné].” Fakaafeʻi ʻa e fānaú ke nau lea, “ʻOku Mau Fakamālō atu ki he ʻAfiona”. Toutou fai e ʻekitivitií kae ʻoua kuo ʻosi kotoa e ngaahi nāunaú ʻi hono fili. Talaange leva ki he fānaú ko e hokó leva ʻoku tau kole ki he Tamai Hēvaní ha ngaahi tāpuaki pea toe fai ʻa e ʻekitivitií ʻaki ʻa e kato ʻoku tohiʻi ai ʻa e “Kātaki ʻo Tāpuakiʻi Kimautolu.” Fakaafeʻi ʻa e fānaú ke nau lea, “Kātaki ʻo tāpuakiʻi kimautolu.”
Fakaʻaliʻali ʻa e fakatātā ʻo Sīsū ʻi he peesi 106. Talaange ki he fānaú ʻoku tau fakaʻosi ʻetau lotú ʻaki ʻetau lea, “ʻI he huafa ʻo Sīsū Kalaisí, ʻemeni.” Fakaafeʻi ʻa e fānaú ke lea fakataha mo koe.
Veesi ʻEkitivitī
Toe lau ʻa e veesi ʻekitivitī ko ʻení pea fakaafeʻi ʻa e fānaú ke kau fakataha mo koe:
ʻOku ou kamata ʻaki ʻeku pehē “ʻE Tamai Hēvani”; (ʻai e foʻi tuhu ʻe taha ki ʻolunga—tauhi pē ke tuʻu maʻu e ʻulu tuhú ʻi he kotoa e ʻekitivitī lau māú)
ʻOku ou fakamālō kiate Ia ʻi he ngaahi tāpuaki kuó Ne foaki maí; (ʻai e foʻi tuhu fika uá ki ʻolunga)
Pea ʻi he loto fakatōkilalo ʻoku ou kole kiate Ia ʻa e ngaahi meʻa ʻoku ou fie maʻú, (ʻai e foʻi tuhu fika tolú ki ʻolunga)
ʻI he Huafa ʻo Sīsū Kalaisi, ʻEmeni. (ʻai ki ʻolunga e foʻi tuhu fika faá)
[“I Pray in Faith,” Children’s Songbook, 14]
Fakaʻosí
Fakamanatu ki he fānaú ko e taimi ʻoku nau lotu aí ʻoku nau fakataufolofola ai ki he Tamai Hēvaní. Fai hoʻo fakamoʻoní ʻoku fanongo mai ʻa e Tamai Hēvaní ki heʻetau ngaahi lotú.
Lotu
Fakaafeʻi ha taha ʻo e fānaú ke ne fai ʻa e fua lotú.
Ngaahi ʻEkitivitī ke fili mei aí
Teuteú
-
Ki he ʻekitivitī tohi ke huke: Paaki ʻa e tatau ʻo e fakatātā ʻi he peesi 19. Valivali kapau ʻoku fie maʻu. Ngaohi ha kiʻi tohi ke huke, ʻaki hano kosi ʻi he ngaahi laine kuo fakaʻilongaʻí pea pelu mālohi e ngaahi laine motumotú.
ʻOku ou kamataʻaki ʻa e lea, “Ko ʻemau Tamai ʻOku ʻi Hēvani.”
ʻOku ou fakamālō kiate Ia koeʻuhí ko e ngaahii tāpuakí.
ʻOku ou kolea kiate Ia ha ngaahi tāpuaki.
ʻI he huafa ʻo Sīsū Kalaisū, ʻemeni.
ʻOku Ou Lava ʻo Lotu ki he Tamai Hēvaní
-
Ki he talanoa he folofolá: Lau ʻa e tohi ʻa ʻInosi 1:1–8 pea mateuteu ke fakamatalaʻi nounou ʻa e talanoa maʻá e fānaú. ʻOmai ha tatau ʻo e Tohi ʻa Molomoná. Fakaʻilongaʻi ʻa e tohi ʻa ʻInosi vahe 1, ke faingofua haʻo toe huke ki ai.
-
Ki he ʻekitivitī valivalí: ʻAi ha tatau ʻo e fakatātā ʻi he peesi 19 ke valivali e fānaú kotoa. Kosi ʻi he ngaahi laine kuo fakaʻilongaʻi mālohí ki muʻa pea toki kamata ʻa e nesilií.
Tohi ke Huke
Toe fai ʻa e ngaahi fakahinohino ʻi he peesi 16 kau ki he meʻa ʻoku tau leaʻaki he taimi ʻoku tau lotu aí, ka ke ngāueʻaki ʻi he taimí ni ʻa e tohi ke huke naʻá ke teuteuʻí. ʻI he taimi te ke fakamatala ai ʻa e konga takitaha ʻo e lotú, toʻo hake e takafí pe fakaafeʻi ha taha ʻo e fānaú ke ne toʻo hake ʻa e takafí. Te ke toe lava pē foki ʻo ngāueʻaki ʻa e tohi ke huké lolotonga hoʻo toe fakahoko ʻa e ʻekitivitī lau maau ʻi he peesi 16. Te ke mei fie maʻu ke tauhi ʻa e tohi ke huké ke ke ngāueʻaki ʻi he kalasi nesilií ʻi he ngaahi uike ka hoko maí.
Talanoa ʻi he Folofolá
Fakaava ʻa e Tohi ʻa Molomoná ki he Tohi ʻa ʻĪnosi vahe 1 pea fai ki he fānaú ʻa e talanoa ʻo e lotu ʻa ʻĪnosí. Ko ha sīpinga ʻi lalo:
ʻI he ʻaho ʻe taha naʻe ʻalu ai ʻa ʻĪnosi ki he vaotaá (ʻai ʻa e fānaú ke hiki hake ki ʻolunga honau nimá ʻo ʻai ke hangē pē ha fuʻu ʻakaú) ke tuli manu (ʻai kinautolu ke hangē ʻoku nau fana ha foʻi ngahaú). Lolotonga ʻa ʻene ʻi he vaotaá, naʻá ne lotu ki he Tamai Hēvaní (ʻai ʻa e fānaú ke nau tūʻulutui pehē pē ʻoku nau lotu; fakaʻosi ʻa e talanoá lolotonga ʻoku nau kei tūʻulutuí). Naʻe tali ʻe he Tamai Hēvaní ʻa ʻene lotú pea naʻe fiefia ʻa ʻĪnosi. Naʻá ne ʻiloʻi kuo tāpuekina ia ʻe he Tamai Hēvaní.
Lea ʻaki, “Te u lava ʻo lotu ki he Tamai Hēvaní.” Fakaafeʻi ʻa e fānaú ke toutou leaʻaki fakataha mo koe, ha ngaahi foʻilea tahataha pē.
Valivali
ʻAi ʻa e fānau ke nau valivali ha tatau ʻo e fakatātā ʻi he peesi 19. Peluki ʻi he ngaahi foʻi laine motumotú ʻi he taimi te nau ʻosi aí.