25
ʻOku ou Kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui ní
Talateu maʻá e Faiakó
Ke ke mateuteu fakalaumālie ke akoʻi e lēsoni ko ʻení, kātaki ʻo lau mo fakalaulauloto ki he ngaahi meʻá ni:
ʻI he taimi naʻe ʻi he māmaní ai ʻa Sīsū Kalaisí, naʻá Ne fokotuʻu ʻa Hono Siasí. ʻI he hili ʻa e pekia ʻa Kalaisí mo e mate ʻa e Kau ʻAposetoló, naʻe mole ʻa e kakato ʻo e ongoongoleleí, pea naʻe ʻave ʻa e Siasi moʻoní mei māmani. Kuo toe fakafoki mai ʻa e kakato ʻo e ongoongoleleí ʻo fakafou mai ʻi he Palōfita ko Siosefa Sāmitá, pea mo e Siasi moʻoni ʻo Sīsū Kalaisí ʻoku toe ʻi he māmaní. (Vakai, T&F 1:15–30; Siosefa Sāmita—Hisitōlia 1:68–72.)
Teuteú
-
ʻOmai ha tatau ʻo e folofolá. Fakaʻilongaʻi ʻa e T&F 115:4 ke faingofua hoʻo huke ki aí.
-
ʻOmai ha fakatātā ʻo e Palesiteni lolotonga ʻo e Siasí, kapau ʻe maʻu.
Ngaahi ʻEkitivitī ke ako mei aí
Kamataʻaki ha ʻekitivitī fakatahataha. Ki ha ngaahi fakakaukau, vakai ki he peesi 3.
Lotu
Fakaafeʻi ha taha ʻo e fānaú ke ne fai ʻa e fua lotú.
Fakatātaá
Fakaʻaliʻali ʻa e fakatātā ʻi he peesi 106. Talaange ki he fānaú ko ha fakatātā ʻeni ʻo Sīsū Kalaisi pea ʻoku tau kau ki Hono Siasí. Tuhu ki he fakatātaá pea fehuʻi ange, “Ko hai ʻeni?”
Tali: “Sīsū Kalaisi.”
Folofolá
Talaange ki he fānaú naʻe talamai ʻe Sīsū ʻa e hingoa ʻo e Siasí ʻi he folofolá. Fakaava e folofolá pea lau ʻa e T&F 115:4: “He ʻe ui peheʻi ʻa hoku siasí ʻi he ngaahi ʻaho fakaʻosi, ʻio ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.” Fakaafeʻi ʻa e fānaú ke toe lau tahataha mo koe ʻa e hingoa ʻo e Siasí.
Puke ki ʻolunga hoʻo tatau ʻo e folofolá. Talaange ki he fānaú ʻoku talamai ʻe Sīsū e ngaahi meʻa ʻokú Ne fie maʻu ʻi he folofolá pea ʻi he Siasi ʻo Sīsū Kalaisí ʻoku tau maʻu ʻa e folofolá. ʻAi ʻa e fānaú ke folahi ʻo ʻai ki ʻolunga honau nimá ke hangē ʻoku nau lau folofolá. Fakaafeʻi kinautolu ke nau lea “ko e Siasi ʻo Sīsū Kalaisí.”
Fakamatalaʻi ange ʻoku folofola ʻa Sīsū ki Heʻene kau palōfitá pea ʻi he Siasi ʻo Sīsū Kalaisí ʻoku tau maʻu ʻa e palōfita. Fakaafeʻi ʻa e fānaú ke nau lea “ko e Siasi ʻo Sīsū Kalaisí.” Fakaʻaliʻali ha fakatātā ʻo e Palesiteni lolotonga ʻo e Siasí. Fakamatalaʻi ange ko hotau palōfita ia ʻi he ʻaho ní. Fakaafeʻi ʻa e fānaú ke nau leaʻaki fakataha mo koe hono hingoá.
Hiva
Fakaafeʻi ʻa e fānaú ke laka takai fakataha mo koe ʻi he lokí, lolotonga hoʻomou hivaʻi pe lau ʻa e ngaahi lea ko ʻení “Ko e Siasi ʻo Sīsū Kalaisí” (Tohi Hiva ʻa e Fānaú, 48):
ʻOku ou kau ki he Siasi ʻo Sīsū Kalaisi [ʻo e Kau Māʻoniʻoni ʻi he Ngaahi ʻAho Kimui Ní].
[ʻOku ou ʻiloʻi ko hai au].
[ʻOku ou ʻilo e palani ʻa e ʻOtuá].
[Te u muimui ʻiate Ia ʻi he tuí].
Fakaʻosí
Vahevahe nounou hoʻo fakamoʻoní, ʻoku tau kau ki he Siasi moʻoni ʻo Sīsū Kalaisí.
Lotu
Fakaafeʻi ha taha ʻo e fānaú ke ne fai ʻa e lotu tukú.
Ngaahi ʻEkitivitī ke fili mei aí
Teuteú
-
Ki he ʻekitivitī valivalí mo e fakatauhoá: ʻAi ha tatau ʻo e fakatātā ʻi he peesi 107 ke taki taha ʻa e fānaú ʻo valivali. ʻOmai ha ngaahi laʻipepa iiki pe ko ha meʻa tatau mo ia ke fakaʻaongaʻi ʻe he fānaú ko ha meʻa fakaʻilonga ki he vaʻinga fakatauhoá; ʻomai ke feʻunga ki he tokotaha takitaha ke ʻi ai haʻane fakaʻilonga ʻe tolu.
ʻOku ou Kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní
Ko e Siasi ʻo Sīsū Kalaisí ʻoku ʻi ai e kau palōfita.
Ko e Siasi ʻo Sīsū Kalaisí ʻoku ʻi ai e ngaahi folofola.
Valivalí
ʻAi ʻa e fānaú ke valivali ha tatau ʻo e peesi 107. Lolotonga ʻenau valivalí, toe fakamanatu ʻa e ngaahi tefitoʻi moʻoni naʻe akoʻi ʻi he lēsoní. Tuhu ki he ngaahi fakaikiiki ʻi he fakatātaá pea fakamatalaʻi ange ki he fānaú ʻa e meʻa ʻoku nau valivalí. Lau kiate kinautolu ʻa e ngaahi lea ʻoku ʻi he fakatātaá.
Vaʻinga Fakatauhoá
ʻOange ki he fānaú kotoa ha laʻipepa ʻe tolu. Fakaʻaliʻali ʻa e fakatātā ʻoku ʻasi ʻi he peesi 107. Tuhu ki he fakatātā ʻo Sīsuú pea pehē, “Ko ha fakatātā ʻeni ʻo Sīsū Kalaisi. ʻOku tau kau ki Hono Siasí.” Fakaafeʻi ʻa e fānaú ke tuku ha laʻipepa ʻi he tatau ʻo ʻenau fakatātā ʻo Sīsuú.
Pea tuhu ki he fakatātā ʻo e palōfitá pea lau ʻa e fakamatalá. ʻAi ʻa e fānaú ke nau lea “palōfita” pea tuku ha laʻipepa ʻi heʻenau fakatātaá. Toutou fai pē ki he fakatātā ʻo e folofolá. Pea ʻai ʻa e fānaú ke nau lau tahataha fakataha mo koe ʻa e, “ʻOku ou Kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”
Fakamanatu
Fili ha ʻekitivitī mei he lēsoni 23 pea taha mei he lēsoni 24, ke tokoni ki hono fakamanatu ʻe he fānaú ʻa e meʻa ne nau ako ki ai fekauʻaki mo e folofolá mo e kau palōfitá. ʻI he ʻosi hono fai ʻo e ngaahi ʻekitivitī ko ʻení, fakamanatu ki he fānaú ʻoku tau maʻu ʻa e ngaahi folofolá mo e kau palōfitá ʻi he Siasi ʻo Sīsū Kalaisí.