« ថ្ងៃទី ២០-២៦ ខែ មករា ៖ ‹ ហើយចិត្តនៃកូនចៅនឹងបានបង្វែរមករកពួកឪពុករបស់ពួកគេវិញ › ៖ គោលលទ្ធិ និងសេចក្តីសញ្ញា ២ ៖ យ៉ូសែប ស្ម៊ីធ—ប្រវត្តិ ១:២៧-៦៥ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្ដីសញ្ញា ឆ្នាំ ២០២៥( ឆ្នាំ ២០២៥ )

« គោលលទ្ធិ និងសេចក្តីសញ្ញា ២ ៖ យ៉ូសែប ស្ម៊ីធ—ប្រវត្តិ ១:២៧–៦៥ »ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥

រឿងលម្អិតដកស្រង់ពី He Called Me by Name ( ទ្រង់ហៅឈ្មោះខ្ញុំ ) ដោយ ម៉ៃឃល ម៉ម

ថ្ងៃទី ២០–២៦ ខែ មករា ៖ « ហើយចិត្តនៃកូនចៅនឹងបានបង្វែរមករកពួកឪពុករបស់ពួកគេវិញ »

គោលលទ្ធិ និងសេចក្តីសញ្ញា ២; យ៉ូសែប ស្ម៊ីធ—ប្រវត្តិ ១:២៧–៦៥

វាមានរយៈពេលបីឆ្នាំហើយតាំងពីព្រះជាព្រះវរបិតា និងព្រះរាជបុត្រាទ្រង់ គឺព្រះយេស៊ូវគ្រីស្ទ បានបង្ហាញអង្គទ្រង់ដល់ យ៉ូសែប ស្ម៊ីធ នៅក្នុងព្រៃ ប៉ុន្ដែ យ៉ូសែបមិនបានទទួលវិវរណៈបន្ថែមផ្សេងទៀតឡើយតាំងពីពេលនោះមក ។ លោកបានចាប់ផ្ដើមឆ្ងល់ថាតើព្រះអម្ចាស់មិនសព្វព្រះទ័យនឹងលោកឬ ។ ដូចជាយើងទាំងអស់គ្នាដែរ លោកបានធ្វើខុសហើយលោកបានមានអារម្មណ៍ថាត្រូវបានដាក់ទោសដោយសារកំហុសនោះ ។ ប៉ុន្ដែព្រះនៅតែមានកិច្ចការមួយឲ្យលោកធ្វើ ។ ហើយកិច្ចការដែល យ៉ូសែប ត្រូវបានហៅឲ្យធ្វើនោះគឺទាក់ទងទៅនឹងអ្វីដែលព្រះសុំឲ្យយើងធ្វើ ។ យ៉ូសែបនឹងនាំមកនូវព្រះគម្ពីរមរមន ចំណែកយើងត្រូវបានអញ្ជើញឲ្យចែកចាយសាររបស់វា ។ យ៉ូសែបនឹងទទួលបានកូនសោរបព្វជិតភាពដើម្បីបង្វែរចិត្តរបស់កូនៗទៅរកឪពុករបស់ពួកគេ ឥឡូវនេះយើងអាចទទួលបានពិធីបរិសុទ្ធសម្រាប់បុព្វការីជនរបស់យើងនៅក្នុងព្រះវិហារបរិសុទ្ធ ។ យ៉ូសែបត្រូវបានប្រាប់អំពីការព្យាករណ៍ដែលនឹងត្រូវបានបំពេញក្នុងពេលឆាប់ៗនេះ យើងត្រូវបានហៅឲ្យជួយបំពេញទំនាយទាំងនេះ ។ នៅពេលយើងចូលរួមក្នុងកិច្ចការរបស់ព្រះ យើងអាចរំពឹងថានឹងជួបឧបសគ្គព្រមទាំងការបៀតបៀនទៀតផងគឺដូចជាព្យាការីបានជួបដែរ ។ ប៉ុន្ដែយើងក៏អាចមានសេចក្ដីជំនឿថាព្រះអម្ចាស់នឹងយកយើងធ្វើជាឧបករណ៍ក្នុងព្រះហស្ដរបស់ទ្រង់ គឺដូចជាទ្រង់បានធ្វើជាមួយយ៉ូសែបផងដែរ ។

សូមមើលផងដែរ ពួកបរិសុទ្ធ, ១:២០–៤៨ ។

គំនិតសម្រាប់ការរៀនសូត្រនៅឯគេហដ្ឋាន និងនៅព្រះវិហារ

យ៉ូសែប ស៊្មីធ—ប្រវត្តិ ១:២៧–៣៣

ព្រះមានកិច្ចការមួយឲ្យខ្ញុំធ្វើ ។

វាជារឿងមួយដែលជឿថាព្រះមានកិច្ចការមួយសម្រាប់ យ៉ូសែប ស្ម៊ីធ ធ្វើ—យើងអាចក្រឡេកមើលជីវិតរបស់លោកឡើងវិញ ហើយមើលឃើញយ៉ាងច្បាស់អំពីអ្វីដែលលោកធ្វើបានសម្រេច ។ ប៉ុន្ដែតើបងប្អូនធ្លាប់គិតថាព្រះក៏មានកិច្ចការសម្រាប់បងប្អូនផងដែរទេ ? ពេលបងប្អូនអាន យ៉ូសែប ស្ម៊ីធ—ប្រវត្តិ ១:២៧-៣៣ សូមគិតថាតើកិច្ចការនោះអាចជាអ្វី ។ តើវារួមចំណែកយ៉ាងណាក្នុងការស្តារឡើងវិញនូវដំណឹងល្អរបស់ព្រះអង្គសង្គ្រោះដែលកំពុងបន្តនោះ ?

អែលឌើរ ហ្គែរី អ៊ី ស្ទីវ៉ែនសុន បានបង្រៀន ៖ « នៅពេលយើងមករកព្រះគ្រីស្ទ ហើយជួយអ្នកដទៃឲ្យធ្វើដូចគ្នា នោះយើងចូលរួមក្នុងកិច្ចការនៃសេចក្តីសង្រ្គោះ និងភាពតម្កើងឡើងរបស់ព្រះ ដែលផ្ដោតលើការទទួលខុសត្រូវដែលបានតែងតាំងមកពីព្រះ ។ … ការទទួលខុសត្រូវទាំងនេះគឺសាមញ្ញ មានការបំផុសគំនិត ការលើកទឹកចិត្ត និងអាចធ្វើបាន ។ វាមានដូចតទៅនេះ ៖

ការរស់នៅតាមដំណឹងល្អរបស់ព្រះយេស៊ូវគ្រីស្ទ
ការមើលថែដល់អ្នកខ្វះខាត
ការអញ្ជើញមនុស្សទាំងអស់ឲ្យទទួលយកដំណឹងល្អ
ការបង្រួបបង្រួមក្រុមគ្រួសារសម្រាប់ភាពអស់កល្ប » ( « សាមញ្ញ —និងស្រស់ស្អាត » លីអាហូណា ខែ វិច្ឆិកា ឆ្នាំ ២០២១ ទំព័រ ៤៧ ) ។

សូមពិចារណាអំពីបទពិសោធន៍ដែលបងប្អូនបានចូលរួមក្នុងទំនួលខុសត្រូវ ដែលបានតែងតាំងដ៏ទេវភាពនីមួយៗនេះ ។ តើព្រះអង្គសង្គ្រោះនឹងឲ្យបងប្អូនធ្វើអ្វីបន្ទាប់ទៀត ? មានទំព័រ Topics and Questions សម្រាប់ទំនួលខុសត្រូវនីមួយៗនេះ ( សូមមើល « តួនាទីរបស់យើងនៅក្នុងកិច្ចការនៃសេចក្ដីសង្គ្រោះ និងភាពតម្កើងឡើងរបស់ព្រះ » បណ្ណាល័យដំណឹងល្អ ) ។ បងប្អូនអាចស្វែងរកទំព័រទាំងនេះដើម្បីជួយបងប្អូនឆ្លើយសំណួរនេះ ។

ពេលខ្លះបងប្អូនប្រហែលជាមានអារម្មណ៍ថាព្រះអម្ចាស់មិនអាចប្រើបងប្អូនបានទេ ដោយសារតែកំហុសដែលបងប្អូនបានធ្វើ ។ តើយើងរៀនអ្វីខ្លះមកពីគំរូរបស់ យ៉ូសែប ស្ម៊ីធនៅក្នុង យ៉ូសែប ស៊្មីធ—ប្រវត្តិ ១:២៨-២៩ ? តើបងប្អូនអាចដឹងពី « ការឈរនៅចំពោះមុខ [ ព្រះ ] » របស់បងប្អូនដោយរបៀបណា ?

សួរសំណួរដែលលើកទឹកចិត្តឲ្យមានការពិភាក្សាដ៏មានន័យ ។ សំណួរដែលមានចម្លើយត្រឹមត្រូវលើសពីមួយអញ្ជើញសិស្សឲ្យឆ្លើយ ដោយផ្អែកទៅលើគំនិត អារម្មណ៍ និងបទពិសោធន៍របស់ពួកគេផ្ទាល់ ។ សំណួរនៅក្នុងគម្រោងនេះគឺជាគំរូនៃរឿងនេះ ។

សូមមើលផងដែរ « Youth Responsibility in the Work of Salvation » ( មានវីដេអូ ) នៅលើគេហទំព័រ ChurchofJesusChrist.org; « កិច្ចការនៃសេចក្តីសង្រ្គោះនិងភាពតម្កើងឡើង » ក្បួនខ្នាតទូទៅ ១.២ ។

យ៉ូសែប ស្ម៊ីធ—ប្រវត្តិ ១:៣៤–៤៧

តាមរយៈការស្ដារដំណឹងល្អរបស់ទ្រង់ឡើងវិញ ព្រះអង្គសង្គ្រោះបានបំពេញទំនាយពីបុរាណ ។

មរ៉ូណៃ បានលេចមកឯ យ៉ូសែប ស្ម៊ីធ ទ្រង់បានដកស្រង់ការព្យាករក្នុងព្រះគម្ពីរសញ្ញាចាស់ និងសញ្ញាថ្មីជាច្រើនដូចជា អេសាយ ១១; កិច្ចការ ៣:២២–២៣; និង យ៉ូអែល ២:២៨–៣២ ។ ពេលបងប្អូនអាន យ៉ូសែប ស្ម៊ីធ—ប្រវត្តិ ១:៣៤-៤៧ សូមគិតអំពីមូលហេតុដែលទំនាយទាំងនេះអាចមានសារៈសំខាន់សម្រាប់ យ៉ូសែប ដើម្បីដឹង ។ ហេតុអ្វីទំនាយទាំងនោះសំខាន់សម្រាប់អ្នកដើម្បីដឹង ?

អ្នកក៏អាចអាននូវអ្វីដែលអែលឌើរ ដេវីឌ អេ បែដណា បានបង្រៀនអំពីការបង្ហាញព្រះកាយលើកដំបូងរបស់ មរ៉ូណៃ ដល់យ៉ូសែប ស្ម៊ីធ នៅក្នុង « ដោយព្រះចេស្តានៃព្រះ ដោយសិរីល្អដ៏អស្ចារ្យ » ( លីអាហូណា ខែ វិច្ឆិកា ឆ្នាំ ២០២១ ទំព័រ ២៨ ) ។

សូមមើលផងដែរ « ទេវតាមកពីស្ថានលើ » ទំនុកតម្កើង ល.រ.៩ ។

យ៉ូសែប ស៊្មីធ—ប្រវត្តិ ១:៤៨–៦០

ព្រះនឹងរៀបចំខ្ញុំឲ្យធ្វើការនៅក្នុងនគររបស់ទ្រង់ ។

យ៉ូសែបមានអាយុត្រឹមតែ ១៧ ឆ្នាំ ប៉ុណ្ណោះពេលគាត់បានឃើញផ្ទាំងចំណារមាសជាលើកដំបូង ។ ទោះជាយ៉ាងណាក៏ដោយផ្ទាំងចំណារមាសទាំងនោះមិនបានប្រគល់ទៅឲ្យលោកទេ រហូតដល់បួនឆ្នាំក្រោយ ។ សូមអាន យ៉ូសែប ស្ម៊ីធ—ប្រវត្តិ ១:៤៨-៦០ ដោយស្វែងរកអ្វីដែលបានកើតឡើងក្នុងជីវិតរបស់ យ៉ូសែប ក្នុងអំឡុងពេលនោះ ។ តើអ្នកគិតថាព្រឹត្តិការណ៍ទាំងនេះបានរៀបចំលោក សម្រាប់កិច្ចការដែលព្រះបានហៅលោកឲ្យធ្វើយ៉ាងដូចម្ដេច ? តើអ្នកមានបទពិសោធន៍អ្វីខ្លះដែលអ្នកបានរៀបចំដើម្បីបម្រើព្រះ និងអ្នកដទៃ ? តើអ្នកកំពុងជួបប្រទះបទពិសោធន៍អ្វីខ្លះ ដែលអាចជួយអ្នកត្រៀមខ្លួនសម្រាប់ការបម្រើនាពេលអនាគត ?

គំនូរកូនភ្នំគូម៉ូរ៉ា នៅជិត ម៉ែនឆែស្ទើរ ញូវយ៉ក — កូនភ្នំគូម៉ូរ៉ា ដោយ អាល់ រ៉ោនស៍

គោលលទ្ធិ និងសេចក្ដីសញ្ញា ២

ព្រះអម្ចាស់បានបញ្ជូន អេលីយ៉ា ឲ្យមកដើម្បីបង្វែរដួងចិត្តរបស់ខ្ញុំឲ្យងាកទៅរកបុព្វការីជនរបស់ខ្ញុំ ។

តើពាក្យដូចជា « ដាក់ » « ចិត្ត » និង « បង្វែរ » នៅក្នុងកណ្ឌនេះបង្រៀនអ្វីខ្លះដល់បងប្អូនអំពីបេសកកម្មរបស់ អេលីយ៉ា និងពរជ័យនៃកូនសោបព្វជិតភាពដែលលោកបានស្ដារឡើងវិញ ? តើបងប្អូនបានមានអារម្មណ៍ថា ចិត្តរបស់បងប្អូនបានបង្វែរទៅរកបុព្វការីជនរបស់បងប្អូនដោយរបៀបណា ? សូមគិតអំពីរបៀបដែលបងប្អូនអាចដកពិសោធន៍អារម្មណ៍បែបនេះកាន់តែញឹកញាប់ ។ ការស្វែងរកបុព្វការីជនរបស់បងប្អូន និងការធ្វើពិធីបរិសុទ្ធនៅក្នុងព្រះវិហារបរិសុទ្ធគឺជាវិធីមួយ ( សូមមើលគេហទំព័រ FamilySearch.org ) ។ តើមានវិធីអ្វីខ្លះទៀតដែលបងប្អូនអាចគិតដល់ ?

សូមមើលផងដែរ គោលលទ្ធិ និងសេចក្ដីសញ្ញា ១១០:១៣-១៦ ហ្គើរីត ដបុលយូ ហ្គង « រីករាយជារៀងរហូត » លីអាហូណា ខែ វិច្ឆិកា ឆ្នាំ ២០២២ ទំព័រ ៨៣-៨៦ ។

សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

យ៉ូសែប ស៊្មីធ—ប្រវត្តិ ១:២៨-២៩

ខ្ញុំអាចប្រែចិត្ត និងបានអភ័យទោស ។

ពេលខ្លះយើងទាំងអស់គ្នាមានអារម្មណ៍ថា « [ យើង ] មានទោស ដោយព្រោះតែភាពទន់ខ្សោយ និងភាពមិនល្អឥតខ្ចោះ »ដូចយ៉ូសែប ស្ម៊ីធ ធ្លាប់មានអារម្មណ៍ដែរ ។ បងប្អូន និងកូនៗរបស់បងប្អូនអាចសិក្សា យ៉ូសែប ស្ម៊ីធ—ប្រវត្តិ ១:២៩ ជាមួយគ្នាដោយស្វែងរកអ្វីដែល យ៉ូសែប បានធ្វើនៅពេលលោកមានអារម្មណ៍បែបនោះ ។ តើយើងអាចរៀនអ្វីខ្លះមកពីគំរូរបស់ យ៉ូសែប ដែលអាចជួយយើងនៅពេលយើងធ្វើកំហុស ? តើហេតុអ្វីវាមានសារៈសំខាន់ដើម្បីដឹងថា យ៉ូសែប ត្រូវបានហៅដោយព្រះទោះជាលោកពុំល្អឥតខ្ចោះក្ដី ?

យ៉ូសែប ស៊្មីធ—ប្រវត្តិ ១:២៧-៥៤

ព្រះវរបិតាសួគ៌បានហៅ យ៉ូសែបស្ម៊ីធ ឲ្យជួយទ្រង់ធ្វើកិច្ចការរបស់ទ្រង់ ។

កូនៗរបស់បងប្អូនប្រហែលជារីករាយក្នុងការសម្តែងជា យ៉ូសែប ស្ម៊ីធ នៅពេលបងប្អូនប្រាប់ពីដំណើររឿងនៃការបង្ហាញព្រះកាយរបស់ មរ៉ូណៃ នៅក្នុង យ៉ូសែប ស្ម៊ីធ—ប្រវត្តិ ១:២៧-៥៤ ឬ « ជំពូកទី ៣ ៖ ទេវតាមរ៉ូណៃ និងផ្ទាំងចំណារមាស » ( នៅក្នុង ដំណើររឿងព្រះគម្ពីរគោលលទ្ធិ និងសេចក្តីសញ្ញា ១៣-១៧ ឬវីដេអូដែលត្រូវគ្នានៅក្នុងបណ្ណាល័យដំណឹងល្អ ) ។ ឧទាហរណ៍ ពួកគេអាចអោបដៃដូចជាពួកគេកំពុងអធិស្ឋាន ឬសម្តែងជាឡើងកូនភ្នំគូម៉ូរ៉ាជាដើម ។ បន្ទាប់មក បងប្អូនអាចសុំឲ្យពួកគេនិយាយអំពីអ្វីដែលព្រះបានហៅឲ្យ យ៉ូសែប ស្ម៊ីធ ធ្វើ និងជាលទ្ធផលយើងទទួលបានពរជ័យនោះ ។ ឧទាហរណ៍ តើយើងទទួលបានពរដោយសារ យ៉ូសែប ស្ម៊ីធ បានបកប្រែព្រះគម្ពីរមរមនដោយរបៀបណា ? តើកិច្ចការរបស់លោកបានជួយយើងឲ្យខិតកាន់តែជិតព្រះវរបិតាសួគ៌ និងព្រះយេស៊ូវគ្រីស្ទដោយរបៀបណា ?

ទេវតាមរ៉ូណៃយាងមកជួប យ៉ូសែប ស្ម៊ីធ ៖ ការរៀនអំពីគម្ពីរពិសិដ្ឋ

យ៉ូសែប និងអិមម៉ា ៖ ការធ្វើការរួមគ្នាដើម្បីនាំព្រះគម្ពីរមរមនមកដល់ពិភពលោក

គោលលទ្ធិ និងសេចក្ដីសញ្ញា ២

ព្រះវរបិតាសួគ៌ចង់ឲ្យក្រុមគ្រួសារបានផ្សារភ្ជាប់នៅក្នុងព្រះវិហារបរិសុទ្ធ ។

ប្រហែលជាបងប្អូន និងកូនៗរបស់បងប្អូននឹងរីករាយក្នុងការមើលរូបភាពមួយចំនួននៃគ្រួសាររបស់បងប្អូន បើអាចដាក់បញ្ចូលរូបភាពគ្រួសាររបស់បងប្អូននៅព្រះវិហារបរិសុទ្ធមួយចូល ( ឬសូមមើល សៀវភៅរូបភាពដំណឹងល្អ លេខ ១២០ ) ។ បន្ទាប់មកបងប្អូនអាចអាន គោលលទ្ធិ និងសេចក្ដីសញ្ញា ២ ហើយចែកចាយគំនិតគ្នាទៅវិញទៅមកអំពីមូលហេតុដែលយើងមានព្រះវិហារបរិសុទ្ធ និងមូលហេតុដែលព្រះវរបិតាសួគ៌ចង់ឲ្យក្រុមគ្រួសារនៅជាមួយគ្នាជារៀងរហូត ។ សូមពិចារណាច្រៀងបទ« ក្រុមគ្រួសារអាចនៅជាមួយគ្នាជានិរន្តរ » ( សៀវភៅចម្រៀងកុមារ ទំព័រ ១៨៧ ) ជាមួយគ្នា ។ តើចម្រៀងនេះប្រាប់ថាយើងអាចធ្វើអ្វីខ្លះ ដើម្បីបាននៅជាមួយក្រុមគ្រួសាររបស់យើងជារៀងរហូត ?

Young Couple Going to the Temple, English

គោលលទ្ធិ និងសេចក្ដីសញ្ញា ២

ការរៀនអំពីបុព្វការីជនរបស់ខ្ញុំអាចនាំអំណរដល់ខ្ញុំ ។

កុមារអាចរំភើបចិត្ត និងទទួលអារម្មណ៍អំណរអំពីពង្សប្រវត្តិផងដែរ ។ ដើម្បីជួយពួកគេ បងប្អូនអាចចែកចាយដំណើររឿង ឬរូបភាពរបស់បុព្វការីជនរបស់បងប្អូន ។ និយាយជាមួយកូនៗរបស់បងប្អូនអំពីជីវិតបុព្វការីជនរបស់ពួកគេកាលពីពួកលោកនៅជាកូនក្មេង ។ កូនៗរបស់បងប្អូនក៏អាចរីករាយនឹងសកម្មភាពពង្សប្រវត្តិមួយចំនួននៅលើគេហទំព័រ FamilySearch.org/discovery ផងដែរ ។

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

ទេវតាមរ៉ូណៃបង្ហាញដល់ យ៉ូសែប ស្ម៊ីធ កន្លែងដែលផ្ទាំងចំណារមាសត្រូវបានកប់ទុក — យ៉ូសែបទទួលផ្ទាំងចំណារមាស ដោយ ហ្គែរី អ៊ី ស្ម៊ីធ