“Хүчирхийлэл (Хэрэгтний хэрэгцээ),” Зөвлөгөө өгөх эх сурвалж (2020).
“Хүчирхийлэл (Хэрэгтний хэрэгцээ),” Зөвлөгөө өгөх эх сурвалж.
Хүчирхийлэл (Хэрэгтний хэрэгцээ)
Тусламжийн утас
Бишоп, салбарын ерөнхийлөгч, гадасны ерөнхийлөгчид хүчирхийллийн талаар олж мэдэх бүрдээ Сүмийн тусламжийн утас руу яаралтай залгах хэрэгтэй. Энэхүү эх сурвалж нь хохирогчдод туслах, тайлагнах шаардлагыг хангахад тусалдаг. Тусламжийн утасны дугаар болон нэмэлт мэдээллийг Тусламжийн утасны дугаарууд руу орж авна уу.
Сүмийн ямар ч удирдагч хүчирхийллийн мэдээллийг хэрэгсэхгүй өнгөрөхийг эсвэл гэмт хэргийн шинжтэй үйлдлийн талаар мэдээлэхгүй байхыг хувь хүнд хэзээ ч зөвлөх ёсгүй.
АНУ ба Канадад
Хэрэв бусад гишүүн хүчирхийллийн талаар мэдсэн бол хуулийн байгууллагад нэн даруй хандах ёстой. Тэд мөн хохирогчдод туслах, тайлагнах шаардлагыг хангахад чиглэсэн хүчирхийллийн тусламжийн утас руу залгах бишоп эсвэл гадасны ерөнхийлөгчтэйгөө зөвлөлдөх хэрэгтэй.
АНУ, Канадаас бусад улс оронд
Хүчирхийллийн талаар хэзээ хэрхэн мэдээлэх талаар мэдэж ав. Гадасны ерөнхийлөгч, бишоп нь тухайн улсад байдаг тусламжийн утас руу шууд залгаж, заавар зөвлөгөө авах хэрэгтэй. Тусламжийн утас байдаггүй орнуудад хүчирхийллийн талаар мэдсэн бишоп гадасны ерөнхийлөгчтэйгөө холбоо барих ёстой. Гадасны ерөнхийлөгч тухайн бүсийн албаны хуулийн зөвлөхөөс заавар зөвлөгөө авах болно (Ерөнхий гарын авлага: Есүс Христийн Хожмын Үеийн Гэгээнтнүүдийн Сүмд үйлчлэх нь (2020), 38.6.2.1, ChurchofJesusChrist.org). Бусад гишүүн хууль ёсны тайлагнах үүргээ биелүүлж, бишоптойгоо зөвлөлдөх хэрэгтэй.
Хүчирхийллийг тэвчих ёсгүй
Хүчирхийлэл нь бие махбод, сэтгэл санааны эсвэл бэлгийн замаар хохирол учруулах байдлаар бусадтай хүний ёсоос гадуур харьцаж эсвэл тэднийг дорд үзэж байгаа хэрэг юм. Сүмийн байр суурь бол аль ч хэлбэрийн хүчирхийллийг тэвчихгүй байх явдал бөгөөд хүчирхийлэл үйлдэгчид Бурханы өмнө буруутай. Хэн нэгэн хүчирхийллийн хэргээр шийтгэгдсэн эсэхээс үл хамааран гэмт хэрэгтнүүд Сүмийн сахилгын хурлаар орж, Сүмийн гишүүнчлэлээ алдаж болно (Матай 18:6; Марк 9:42; Лук 17:2-ыг үзнэ үү).
Хүчирхийллийн асуудалд Сүмийн гүйцэтгэдэг анхдагч үүргүүд бол 1) хүчирхийлэлд өртсөн хүмүүст нинжин сэтгэлээр, мэдрэмжтэй арга замаар туслах, 2) ирээдүйд хүчирхийлэлд өртөж болзошгүй хүмүүсийг хамгаалах явдал юм. Зарим төрлийн хүчирхийлэл бие махбодод хор хөнөөл учруулж болзошгүй боловч хүчирхийллийн бүх хэлбэр оюун ухаан, бодол санаанд нөлөөлдөг. Хүчирхийлэл ихэвчлэн итгэлийг үгүй хийдэг ба хохирогчид сандрал, эргэлзээ, үл итгэх байдал, гэм буруу, айдас төрүүлдэг.
Ихэнх тохиолдолд хүчирхийлэл үйлдэгч шийдвэрлэгдээгүй ноцтой гэм нүгэлтэй эсвэл сэтгэцийн эрүүл мэндийн асуудалтай байдаг бөгөөд өөрсдөө хүчирхийлэлд өртсөн байж болзошгүй юм. Зарим хэрэгтэн гэмшиж, нүглээ наманчлах хүсэл эрмэлзэлтэй, наманчлах үйл явцыг эхлүүлэхэд бэлэн байдаг. Зарим нь буруутай үйлдлээ үгүйсгэж, зан байдлаа ялихгүй зүйлд тооцож эсвэл хэн нэгнийг буруутгаж магадгүй. Гэмшиж, өөрчлөгдөхийг хүсэж байгаа эсэхийг үнэлж дүгнэх нь хэрэгтэнд туслах эхний алхам юм.
Зарим хүчирхийлэгч зальтай, нарийн аргатай, хуурмаг байж болох тул үйл явдлын хувилбар нь хохирогчийнхоос өөр байж болзошгүй. Бүх тохиолдолд хохирогчийн аюулгүй байдал, хамгаалалтыг эн түрүүнд анхаарч үзээрэй. Бишоп болон гадасны ерөнхийлөгчид аюулгүй байдлын төлөвлөгөөг боловсруулахдаа тусламжийн утас руу холбогдож, зөвлөлдөх хэрэгтэй.
Сүмийн удирдагчдыг хүчирхийлэлтэй холбоотой сэтгэцийн эрүүл мэндийн асуудалтай хувь хүнийг оношлох эсвэл эмчилгээ үзүүлэхийг дэмжиж, уриалдаггүй. Ихэнх хэрэгтэн мэргэжлийн хүмүүсээс тусламж хүсэх талаар бодож үзэх хэрэгтэй. Гэр бүлийн үйлчилгээний алба (байдаг бол) нь удирдагчдад зөвлөх, тэдний орон нутаг дахь эх сурвалжуудын талаар мэдээлэл өгөх боломжтой.
Хүчирхийлэл үйлдсэн эсэхийг шалгаж, ноцтой байдлынх нь талаар дүгнэлт гарсны дараа бишопууд Сүмийн дуудлага, ариун сүмийн эрхийн бичиг, бусад холбогдох асуултын талаарх удирдамжийг Ерөнхий гарын авлага: Есүс Христийн Хожмын Үеийн Гэгээнтнүүдийн Сүмд үйлчлэх нь (2020) гарын авлагаас үзнэ үү. Өсвөр насны хэрэгтнүүдийн гишүүнчлэлийг хязгаарлах асуудлыг авч үзэхдээ Ерөнхий гарын авлага, 32.7.7-г үзнэ үү.
Ойлгохыг эрэлхийл
Тухайн хүний асуудал, наманчлахад бэлэн байдал, учир шалтгаан зэргийг илүү сайн ойлгоход тань туслах дараахтай төстэй асуултуудыг тавихыг бодож үзээрэй.
-
Нөхцөл байдлыг ойлгоход минь та надад тусалж болох уу?
-
Наманчлах нь танд хэр чухал вэ?
-
Та хүчирхийлэгч хандлага, зан авирыг даван туулахын тулд сайн мэдээний зарчмуудыг хэрхэн ашиглаж байгаа вэ?
-
Өөрчлөгдөхийн тулд та юу хийхэд бэлэн байна вэ?
-
Таны наманчлах үйл явцад би хэрхэн тусалж чадах вэ?
-
Энэ хүчирхийллийн талаар миний мэдэх ёстой өөр зүйл байна уу?
Хувь хүнд тусал
Тухайн хүнд зөвлөхдөө дараах зөвлөмжийн заримыг ашиглах талаар бод. Үүнд:
Хүчирхийллийн зан байдлын өөрт болон гэр бүлд нөлөөлөх үр дагавар, тэр дундаа хүчирхийлэлтэй холбоотой сургаал, Сүмийн бодлогын талаар тухайн хүнтэй ярилц. (Дэлгэрэнгүй мэдээллийг Сүмийн бодлого ба сургаал дахь эх сурвалжаас уншина уу.)
Есүс Христ, Түүний Цагаатгалаар дамжуулан уг хүнд найдвар, эдгэрэл олж авахад тусал.
Бие махбодын хүчирхийлэл эсвэл хэл амаар доромжилсон тохиолдолд тухайн хүнд дараах хэцүү нөхцөл байдал, мэдрэмжид хариу үйлдэл үзүүлэх эрүүл, хүчирхийлэлгүй аргуудыг олж тогтооход тусал.
-
Жишээлбэл, алхах, гүнзгий амьсгалах, 100 хүртэл тоолох, төсөл дээр ажиллах зэргээр сэтгэл хөдлөлөө намжааж, ухамсартай хариу үйлдэл үзүүлэхэд хангалттай цаг хугацаа зарцуул.
-
Асуудлыг шүүмжлэлгүйгээр тайван хуваалц.
-
Бусдын бодол санаа, мэдрэмжийг анхаарч үзэхэд цаг зав гарга.
Гэр бүлийг дэмж
Хүчирхийлэл нь хувь хүнд төдийгүй гэр бүлийн гишүүдэд нөлөөлдөг. Тухайн хүний хань ижилд эсвэл гэр бүлд үзүүлэх нөлөөллийг тодорхойлж, эдгээр асуудалд анхаар. Хэрэгтэнд наманчлах үйл явцад нь туслах шаардлагатай байдаг боловч удирдагчдын гол анхаарал хэрэгтэнд туслахад чиглэж байвал хохирогчдод үл тоогдсон мэт санагддаг. Хохирогчтой байнга уулзаж, түүний хэрэгцээ хангагдаж байгаа эсэхийг шалгаарай.
Зөвлөмж эсвэл туслалцаа шаардлагатай байж болзошгүй гэр бүлийн гишүүдэд зориулсан орон нутгийн эх сурвалжууд эсвэл мэргэжлийн туслалцааг ашиглаарай.
Аврагч хэрхэн биечлэн эдгэрэхэд нь тусалж болохыг ойлгоход гэр бүлийн гишүүдэд тусал (Алма 7:11, Матай 11:28–30-ийг үзнэ үү).
Нөлөөлөлд өртөж болзошгүй гэр бүлийн бусад гишүүнд байнгын дэмжлэг үзүүл.
Гадас, тойргийн нөөц бололцоог ашигла
Нөхцөл байдлыг бусадтай ярилцахаас өмнө тухайн хүнээс зөвшөөрөл ав. Нууц хадгалах тухай болон хамгаалах үүрэгтэй холбоотой асуултууд гарах үед бишопууд хүчирхийллийн тусламжийн утастай холбогдож, зөвлөгөө авах хэрэгтэй.
Шаардлагатай тохиолдолд тухайн хүнд мэргэжлийн тусламж хүсэж, олж авахад туслаарай.
-
Сайн мэдээний зарчмуудтай нийцэх үйлчилгээ үзүүлдэг орон нутгийн эх сурвалжуудыг ашигла.
-
Өөр эх сурвалжууд эсвэл зөвлөгөөг авахын тулд орон нутгийн Гэр бүлийн үйлчилгээний эсвэл бүсийн албатай холбоо барих боломжтой.
Тойргийн зөвлөлийн хурал эсвэл өөр уулзалтаар хүчирхийллээс урьдчилан сэргийлэх, хариу арга хэмжээ авах талаар удирдагчдыг сургахад цаг зарцуулахын тулд бишоптой хамтран ажиллах тухай бодож үз.