Тойрог эсвэл салбарын дуудлагууд
Ижил хүйстэндээ татагдах

“Ижил хүйстэндээ татагдах,” Зөвлөгөө өгөх эх сурвалж (2020).

“Ижил хүйстэндээ татагдах,” Зөвлөгөө өгөх эх сурвалж.

Ижил хүйстэндээ татагдах

2:3

Зарим гишүүн ижил хүйстэндээ татагдаж эсвэл гей, лесби, бисексуал байж болно. Ариун Сүнсний удирдамжийг эрэлхийлж, ижил хүйстэндээ татагддаг эсвэл ижил хүйстэн гэдгээ мэдэрдэг Бурханы хүүхдүүдийн хэрэгцээний талаар сурч мэдэхэд цаг гаргаснаар энэрэх сэтгэл тань нэмэгдэж, туслах чадвар тань өснө.

Ижил хүйстэндээ татагдах юм уу бэлгийн чиг хандлагыг нь илэрхийлэгч нэршлийг (гей, лесби, бисексуал гэх мэт) ашиглахыг сонгох нь нүгэл биш бөгөөд Сүмийн бодлогыг зөрчдөггүй. Гей болон лесби гэх мэт үгс хүн бүрд өөр утга илэрхийлдэг. Ижил хүйстэн гэсэн тодорхойлолт нь та ижил хүйстэндээ татагддаг боловч энэ мэдрэмжийнхээ дагуу үйлдэхийг сонгодоггүй гэсэн утгатай байж болно. Энэ тэмдгээр тэд сэтгэл хөдлөл, биеийн байдал, хайр сэтгэл, бэлгийн чиг хандлага, улс төрийн байдлаа хэрхэн илэрхийлж байгааг нь тодорхойлж болно. Бэлгийн чиг хандлагын нэршлийг ашигладаг хүнийг ариун явдлын хуулийг зөрчиж байна гэж битгий бодоорой.

Ахлагч М.Рассэлл Баллард “Есүс Христийн Хожмын Үеийн Гэгээнтнүүдийн Сүм нь ‘ижил хүйстэндээ татагдах байдал нь олон хүний хувьд ээдрээтэй бодит зүйл байдаг гэдэгт итгэдэг. Сэтгэл татагдах нь нүгэл биш, харин хүслийнхээ дагуу үйлдэх нь нүгэл мөн. Хэдий хувь хүн ижил хүйстэндээ сэтгэл татагдах эсэхээ өөрөө сонгохгүй ч уг мэдрэмждээ хэрхэн хариу үйлдэл хийхээ сонгодог. Сүм хайрлаж, ойлгон, Бурханы бүх хүүхдэд мөн [ижил хүйстэндээ татагддаг хүүхдүүдэд] ч хүрч үйлчилдэг’” гэж хэлжээ (”Тайван байж намайг Бурхан гэдгийг мэд” “[Залуучуудад зориулсан Сүмийн Боловсролын Системийн онцгой цугларалт, 2014 оны 5-р сарын 4], broadcasts.ChurchofJesusChrist.org.)

Бурханы зарлигуудыг дагаж мөрддөг, ижил хүйстэндээ татагддаг хүмүүс Сүмийн дуудлага хүлээн авч, ариун сүмийн эрхийн бичигтэй болж, ариун сүмийн ёслолуудыг хүлээн авч болно.

Хувь хүнийг ижил хүйстэндээ татагддаг мэдрэмжээ илчилсний дараа таны хийж чадах хамгийн чухал зүйл бол тэднийг сонсох, тухтай байхад нь туслах явдал юм.

Ижил хүйстэндээ татагддаг тухай олон зарчим нь өөрийн хүйсэнд сэтгэл дундуур байх эмгэгтэй (жендер дисфоритой) эсвэл трансжендер гэж тогтоогдсон хүмүүст хамааралтай байдаг. Гэхдээ ижил хүйстэндээ татагдах, өөрийн хүйсэнд сэтгэл дундуур байх эмгэг (жендер дисфори) хоёр нь хоёр өөр зүйл юм. Өөрийн хүйсэнд сэтгэл дундуур байх эмгэгтэй (жендер дисфоритой) хүмүүс ижил хүйстэндээ татагддаг эсвэл татагдахгүй байж болдог ба ижил хүйстэндээ татагддаг хүмүүсийн дийлэнх нь хүйсээ солиулах хүсэлгүй байдаг.

Удирдагчид, багш нар, эцэг эх, хувь хүмүүст тустай байж болох ижил хүйстэндээ татагдах талаарх Сүмийн сургаал, асуулт, бусад мэдээллийг ChurchofJesusChrist.org дээрх Амьдралд туслах хэсэг болон Сайн мэдээний сэдвүүдээс үзнэ үү.

Ойлгохыг эрэлхийл

Ижил хүйстэндээ татагддаг хүмүүс эдгээр мэдрэмжээ ямар нэг байдлаар үйлдэл болгож үзээгүй ч өөрсдөд нь ичмээр эсвэл зохисгүй санагдаж магадгүй юм. Тэд эдгээр мэдрэмжээс болж өөрсдийг нь үл тоомсорлох вий гэж айж мөн өөрсдийн туршлагыг сайн мэдээний зарчмуудтай хэрхэн уялдуулахаа мэдэхгүй байж магадгүй.

Ижил хүйстэндээ татагддаг хүмүүст зөвлөгөө өгөхдөө эдгээр мэдрэмжийн талаар тантай ярилцах итгэл төрсөнд нь мөн зориг гаргаж буйд нь таларх. Бурханы хайрыг тэдэнд илэрхийл. Тэдэнд юу тохиолдож байгааг бүрэн ойлгохгүй байж магадгүй гэдгээ хүлээн зөвшөөр. Тэднийг хайрлаж, ойлгохыг хүсэж байгаагаа хэл. Сэтгэл санаа, сүнслэг байдлын хувьд дэмжлэг үзүүлэхэд бэлэн байгаагаа илэрхийл.

Нөхцөл байдлыг илүү сайн ойлгохын тулд дараах асуултуудыг тавих талаар бодож үз. Тусламж үзүүлэхийг эрэлхийл мөн хэт шалгаах, байцаахаас зайлсхийн болгоомжтой ханд.

  • Тохиолдсон зүйлийнхээ талаар надад дэлгэрэнгүй ярьж өгнө үү?

  • Эдгээр мэдрэмж таны амьдралд хэрхэн нөлөөлсөн бэ? Эдгээр нь таны найз нөхөд, гэр бүлийн амьдралд хэрхэн нөлөөлсөн бэ?

  • Би танд яаж туслах вэ?

  • Энэ тухай ярилцахаар надтай тогтмол уулзахыг хүсэж байна уу?

  • Чиг хандлага хүн бүрд өөр утгатай байдаг. Гей (эсвэл лесби, бисексуал, ижил хүйстэндээ татагддаг гэх мэт) гэдэг үг таны хувьд ямар утгатай вэ?

Хувь хүнд тусал

Та ижил хүйстэндээ татагддаг хүмүүстэй зөвлөлдөхдөө энэ асуудлын талаар төгс мэддэг байх шаардлагагүй. Ойлгох, туслах гэсэн хүсэл тань таныг хайрлах, сонсох удирдамжийг Сүнснээс хүлээн авах чадвартай болгоно.

Ижил хүйстэндээ татагдах нь тэдний мөнх бус амьдралын нэг хэсэг байж болохыг ойлгоход хүмүүст тусал. Гэхдээ эдгээр мэдрэмж тэдний Бурханы хүүхдүүд болох мөнхийн бөгөөд тэнгэрлэг мөн чанарыг өөрчлөхгүй.

  • Хувь хүний ​​давуу тал, авьяас, чадварыг таньж мэдэхэд тусал. Тэднийг Бурханы зорилгыг мэдэхийг эрэлхийлэн, Ариун Сүнсээр дамжуулан амьдралын тодорхой бөгөөд хувь хүний ​​чиглэлийг олж мэдэхэд урамшуул.

  • Хэрэв тухайн хүн ижил хүйстэнтэйгээ бэлгийн харьцаанд орсон бол Аврагч Есүс Христийн Цагаатгалаар дамжуулан наманчлан, өршөөгдөх талаар заа.

  • Хувь хүнийг ийм байдалд ганцааранг нь үлдээхгүйн тулд тогтмол зөвлөгөө өгч, дэмжлэг үзүүл.

  • Итгэл үнэмшлийнх нь хариуд ижил хүйстэндээ татагдах сонирхол нь буурна, арилна гэж амлахаас зайлсхий.

  • Гэрлэлтийг ижил хүйстэндээ татагдах сонирхлыг үгүй болгох эсвэл багасгах арга зам гэж зөвлөх ёсгүй.

Эрүүл амьдралын хэв маягийг хөгжүүлэх эсвэл хадгалахад анхаарлаа төвлөрүүлэхэд хувь хүнийг урь.

  • Ижил хүйстэндээ татагдах мэдрэмждээ итгэлийнхээ дагуу хариу үйлдэл үзүүлэхэд үүсэх эсвэл аль хэдийн үүссэн байж болох сүнслэг хүч чадлыг таньж мэд.

  • Дуудлага болон үйлчлэх бусад боломжоор дамжуулан гэр бүл, тойрогтоо чухал хувь нэмэр оруулах боломжийг эрэлхийлэхэд хувь хүнд тусал.

Итгэж болох хүмүүстэй эрүүл, бэлгийн амьдралтай холбоогүй, ижил хүйстэнтэйгээ харилцах харилцааг хөгжүүлэхэд хувь хүнийг уриал. Хувь хүнд дараах зүйлээр тусал. Үүнд:

  • Зорилго, ахиц дэвшлийн талаар тогтмол ярилцах итгэж болох зөвлөгч эсвэл найзыг хайж ол.

  • Итгэж болох хүмүүст ижил хүйстэндээ татагдах сонирхлоо илчил. Эдгээр мэдрэмжээ илчлэх нь ашиг тустай төдийгүй зарим хүнийг сэтгэлийн хямрал болон өөрийгөө гэмтээхээс хамгаалж чадна.

  • Итгэж болох гэр бүлийн гишүүд, найз нөхөд, хөрш, хамтран ажиллагсадтайгаа харилцаа холбоогоо бэхжүүлэхийг эрэлхийл.

Ижил хүйстэндээ татагддаг зарим хүн эдгээр мэдрэмжийнхээ дагуу үйлдэж, ариун явдлын хуулийг зөрчсөн байж магадгүй.

  • Хэрэв хүн порнограф үзэх, гар хангалга хийх, бэлгийн бусад зан үйл үйлдэх зэрэг ариун явдлын хуультай тохирохгүй үйлдэлтэйгээ тэмцдэг бол эдгээр бэрхшээлийг даван туулах хичээл зүтгэлийг нь дэмж. Порнографын асуудлаар тусламж авахын тулд ChurchofJesusChrist.org дээрх “Addressing Pornography” хэсгийг үзнэ үү.

  • Нүгэл үйлдэхэд хүргэдэг хамгийн нийтлэг нөхцөл байдлыг тодорхойл.

  • Эдгээр нөхцөл байдлын цаадах мэдрэмжийг ойлго (ганцаардах эсвэл үл тоомсорлогдох гэх мэт).

  • Өөр хариулт олоход нь хувь хүнд тусал.

Ижил хүйстэндээ татагддаг зарим хүн мэргэжлийн зөвлөхөөс зөвлөгөө авч болно. Эмчилгээ нь эрүүл амьдралын хэв маягийг бэхжүүлж өгдөг. Дараах зүйлсийг авч үзнэ үү. Үүнд:

  • Заримдаа хүмүүст өөрсдийгөө бодитоор харах нь хэцүү байдаг. Мэргэжлийн зөвлөгчөөс сайн мэдээний зарчимд нийцсэн ойлголт авснаар сэтгэл хямрал, түгшүүр, өөрийн эрхгүй үйлдэх зан үйл, хүчирхийллийн үр дагавар, бусад сэтгэл хөдлөлийн асуудал зэрэг амьдралын олон асуудалд тусалж чадна. Ахлагч Жэффри Р.Холландын тэмдэглэснээр, мэргэжлийн тусламж нь заримдаа сүнслэг тусламжийн нэгэн адил чухал ач холбогдолтой байдаг (”Хагарсан сав шиг,” 2013 оны 10-р сарын Ерөнхий чуулган, х. 46-г үзнэ үү).

  • Мэргэжлийн зөвлөхөөс ухаарал хүсэх нь хүч чадал, даруу байдлын шинж юм. Хэрэв хүн ийм тусламж эрэлхийлэхээр шийдсэн бол бусад нь түүний хүссэн үр дүнгээ тодорхойлох эрхийг хүндэтгэх ёстой. Сүм “хүн өөрөө өөрийгөө тодорхойлох”-ыг хүндэтгэх хандлагыг санал болгодог.

  • Өөрөөр хэлбэл, тухайн хүн хүссэн үр дүнгээ тодорхойлох эрхтэй бөгөөд эмч, зөвлөхүүд түүний хүслийг хүндэтгэх ёстой. Ижил хүйстэндээ татагддаг эсвэл гей гэж тодорхойлогдсон хүний ​​хувьд зөвлөгөө авах нь тухайн хүнд бэлгийн чиг хандлагадаа илүү эрүүл, сэтгэл хангалуун байдлаар хандах боломжийг олгоно. Гэсэн ч хүн бүр зөвлөгөө, эмчилгээ авах шаардлагатай биш байдаг.

  • Бэлгийн чиг хандлагын өөрчлөлт зарим хүнд тохиолддог, тохиолдож болох боловч мэргэжлийн эмчилгээ бэлгийн чиг хандлагыг өөрчилнө эсвэл өөрчлөх ёстой гэсэн таамаглал дээр төвлөрүүлэх нь ёс зүйгүй юм.

    Хэрэв боломжтой бол Гэр бүлийн үйлчилгээний албанд хандаж, мэдээлэл эсвэл зөвлөгөө аваарай.

Гэр бүлийг дэмж

Ижил хүйстэндээ татагдах нь хувь хүнд төдийгүй гэр бүлийн гишүүдэд нөлөөлдөг. Тухайн хүний гэр бүлд үзүүлэх нөлөөллийг тодорхойлж, эдгээр асуудалд анхаарахыг эрмэлз.

  • Гэр бүлийн гишүүдэд, тухайлбал эхнэр, нөхөрт цочирдох, гомдох, уурлах, урвах, гэм бурууг мэдрэх гэх мэт сэтгэл хөдлөлөө даван туулахад нь тусал.

  • Эцэг эх, эхнэр нөхөр, гэр бүлийн бусад гишүүнд өөрсдийгөө болон бусдыг буруутгахгүй байхад тусал, ингэснээр тэд гэр бүлийн харилцааг хөгжүүлэхэд илүү анхаарлаа хандуулна.

  • Гэр бүлийн гишүүдийг гэр бүлийн гишүүнээ хайрлах, түүнийг хүлээн зөвшөөрөхөд уриал.

  • Гэр бүлийн гишүүдийг шаардлагатай бол мэргэжлийн тусламж, зөвлөгөө авахад уриал.

  • ChurchofJesusChrist.org дээрх Сайн мэдээний сэдвүүд эсвэл Амьдралд туслах хэсэг гэх мэт Сүмийн эх сурвалжаас мэдээлэл авахад гэр бүлийн гишүүдийг уриал.

Гадас, тойргийн нөөц бололцоог ашигла

Тойргийн удирдагчид эсвэл итгэлтэй бусад хүнээс дэмжлэг, удирдамж, туслалцааг тасралтгүй үзүүлэхийг хүсэх талаар бодож үз. Нөхцөл байдлыг бусадтай ярилцахаас өмнө тухайн хүнээс зөвшөөрөл хүс.

Ижил хүйстэндээ татагдах мэдрэмжийг мэдэрдэг хүмүүст хэрхэн сайн туслахаа тодорхойл.

  • Бүх хүнд тухтай найрсаг байх, хайрлагдах орчныг бүрдүүл.

  • Асуудлыг тойргийн зөвлөлөөр юм уу тав дахь Ням гаргийн хичээл дээр хэлэлцэх талаар бодож үз. ChurchofJesusChrist.org дээрх Амьдралд туслах хэсэг болон Сайн мэдээний сэдвүүд дэх “Ижил хүйстэндээ татагдах нь” материалыг ашиглан хичээл эсвэл хэлэлцүүлэгт бэлтгэ.

  • Ижил хүйстэндээ татагдах сонирхлын талаар хэвшмэл ойлголт, цуу яриатай тэмц. Хэрэв танай тойрог эсвэл салбарын хүмүүс энэ асуудлын талаар сайн мэдээнд суурилсан ойлголтгүй байгаа бол ChurchofJesusChrist.org дээрх Амьдралд туслах хэсэг болон Сайн мэдээний сэдвүүд дэх “Ижил хүйстэндээ татагдах нь” хэсэгт хандуулаарай.

  • Ижил хүйстэндээ татагддаг хүмүүсийн хажууд байх нь ижил хүйстэндээ татагдана гэсэн үг биш бөгөөд ижил хүйстэндээ татагдах нь педофилийн эрсдэлийг нэмэгдүүлдэггүй гэдгийг ойлгоход хүмүүст тусал.

Сайн мэдээний зарчмын дагуу үйлчилгээ үзүүлдэг орон нутгийн зөвлөхүүд эсвэл онлайн эх сурвалжуудыг тодорхойл.

Боломжтой бол Гэр бүлийн үйлчилгээний албанд хандаж, эх сурвалжуудыг тодорхойл.