iVurevure
Ripotetaki ni Noqu Tubu Cake
Digia na itavi ka vakatovotovotaka na kena oqo.
DAUVEIVAKARAUTAKI: Eda na ripotetaka oqo na noda tubu cake. Robert, e rawa ni o tekivu?
ROBERT: Donu. Na imatai ni taro “Na cava au gadreva kina meu bularawati au cake kina vakalevu?” Vinaka, o ni kila vinaka na noqu bula—vakatuburi ni matavuvale kei na levu ni itavi—au gadreva kina e dua na cakacaka vinaka. Au gadreva dina meu bularawati au meu qarava kina na noqu matavuvale ka qarava vakavinaka na noqu veikacivi.
ROBERT: Na ikarua ni ka “Na isau cava au gadreva?” A vinaka sara na noda cakacakataka na noda tuvailavo. Eda na gadreva me vakaruataki na isau eda taura tiko oqo. Ka totoka tiko oqo; ena vinaka mai.
ROBERT: Tarava, “Na mataqali cakacaka cava e nimataka ena solia na mataqali isau o ya? Eda a marautaka e dua na cakacaka ena vakavakadewa. Au sa vosataka rawa tiko e rua na vosa ena gauna oqo. Ka veiraurau na auwa ni cakacaka oqo.
MEKALA: E tiko beka ena Lisi ni Cakacaka Vakadonui?
ROBERT: Io, e tiko kina. E gadrevi sara tiko vakalevu ka tubu totolo sara.
ROBERT: Vinaka “Na veituberi cava au na gadreva? E gadrevi meu vakavinakataka na noqu kila-ka vakavosa. Vakakina, meu na vulica talega na tekinolaji kei na kila vakabisinisi. Au sa raica talega niu gadreva meu vuli cakacaka me dua kina na noqu cakacaka.
KWAME: O sa raica e dua na koronivuli e cakava kece oqori?
ROBERT: Io! Na parokaramu kei na koronivuli oqo e rau tiko ena Lisi ni Koronivuli kei na Parokaramu Vakadonui. Au nuitaka tiko meu na taura na parokaramu ni Vakavakadewa Torocake e Lingua Celeri. E levu kina na cakacaka, vuli cakacaka vinaka, kei na isema e vinaka.
JANYA: Na cava na balavu ni parokaramu kei na isau ni vuli?
ROBERT: E rua na yabaki na parokaramu oka kina na vuli cakacaka. Au na rawa ni cakava ga ena bogi, meu tomana tikoga kina na noqu veikacivi. Eda na rawa ni sauma e veimama kau na gadreva meu dinau mai na LVV me saumi kina na kena vo.
DAUVEIVAKARAUTAKI: Rogorogo vinaka, Robert. E dua beka na ivakasala se taro?
ROBERT: Vinaka, keirau sa leqataka tiko vakaveiwatini na gauna keirau na yali tiko kina mai na matavuvale, vakabibi mai na noqu veikacivi. Ia keirau a tarogi iratou na gone ka veitokoni mai kina na tamata yadua. Oqo ena rawa me vakatolutaka na kequ isau.
DAUVEIVAKARAUTAKI: iTukutuku totoka. Dua beka na vakasama se ivakasala vei Robert?
JANYA: Era lako tu beka kina na basi kei na motoka me kauti iko ki koronivuli, ka sa tuvanaka beka na sala mo sauma kina na isau ni vuli?
ROBERT: Au na vodoka tiko e vica na basi niu lako ka lesu mai, isa e sega, au se bera ni cakacakataka na ilavo. Vinaka vakalevu na nanuma o ya.
KWAME: Au vakabauta ni ko na dauvakadewa vinaka. E totolo na nomu vakasama ka dau vosa matata. E rawa ni o vakavakadewa ni ko tiko e koronivuli mo kila vakavinaka cake kina?
ROBERT: Oqori e vakasama totoka. Dua beka e tiko vua e dua na vakasama vinaka?
Lesu ki na draunipepa 82
Na Vuli sa iDola ki na Veimadigi
Mo ni veitarataravi ena wilika na itukutuku oqo.
Lesu ki na draunipepa 84
Vuli ni Bula Dina
Me wilika oqo e cake e dua na lewe ni ilawalawa kei ira na vo ni ilawalawa mera raica na itukutuku ena draunipepa 85.
HEBRY B. EYRING
Na saumaki mai ki na kosipeli i Jisu Karisito ena kauta mai na gagadre ni vuli. … Sai koya na vua dina ni kena bulataki na kosipeli i Jisu Karisito. … Kevaka meda tomana tiko na noda vulica meda qarava vakavinaka cake na Kalou kei ira na luvena, sa qai dua na veivakalougatataki cecere sara. …
Na Turaga kei na Nona Lotu e dau vakayaloqaqataka meda vuli me tubu cake kina na noda gugumatua ni qaravi Koya kei ira na Luvena. Vei keda yadua, se cava ga na noda taledi, sa tu Vua na veiqaravi me da na solia yani. Kei na noda cakava vakavinaka ena oka tikoga kina na vuli, sega ni vakadua ga se vakaiyalayala, ia me tomani tikoga.
… Ni da masu, lolo, ka cakacaka kaukauwa, ena inaki meda qaravi Koya, ena rawa meda namaka na Nona loloma soliwale me yaco vei keda. … Sa kena ibalebale [oqo] ni da na vuli tikoga vakalevu ka tubucake na noda kila ni vakatauvatani kei na kena eda rawa ni cakava walega ena noda kaukauwa vakayago takiveiyaga. …
Sa dodonu meda vakaliuca taumada na noda vuli vakayalo. … Ni o vinakata mo vuli, e sega walega me baleta na bula vakayago oqo ia me baleta talega na bula tawamudu. Ni ko raica na dina oqori ena matamu vakayalo, ko na vakaliuca na vuli vakayalo ia e sega ni lailai na vuli vakayago. E dina, ko na cakacaka vakaukauwa cake baleta na nomu vuli vakayago mai na kena o na cakava rawa ke sega na rai vakayalo. …
… E kila tiko na Turaga na veika e gadreva vei iko mo cakava kei na veika o gadreva mo kila mo na cakava. Sa rawa kina ena nuidei mo namaka tiko ni sa vakarautaka tu o Koya na madigi ni veika mo vulica. …
Na noda vuli me kakua ni tarovi. … Na bula dina eda vakavakarau tiko sai koya na bula tawamudu. … Eda sa kila vakaidina ni Kalou, na Tamada Vakalomalagi, e gadreva meda bulataka na bula e tiko kina o Koya. Na ka ga eda kila ni ka dina eda na bula tiko kina ena gauna oqo ena lamata vata kei keda ena Tucaketale. Kei na veika kece ga eda sa vulica ena vakarabailevutaka na noda veiqaravi. …
Sa noqu masu ni ko na vakavinavinaka vakalevu vua na Qasenivuli iVakavuvuli, na noda iVakabula o Jisu Karisito. Sa noqu masu ko ni na vakila na veiqaravi cecere sa namaka tiko na Tamada Vakalomalagi meda cakava vei ira na Luvena ka raica rawa na madigi ni vuli sa vakarautaka tu o Koya vei kemuni. (“Real-Life Education,” New Era, Epe. 2009, 2-8)
Lesu ki na draunipepa 85
Vuli kei ira na Yalododonu Edaidai
Me wilika oqo e cake e dua na lewe ni ilawalawa kei ira na vo ni ilawalawa mera vakatovotovo volavola ena draunipepa 86.
DALLIN H. OAKS KEI KRISTEN M. OAKS
Oi keda na Yalododonu Edaidai eda vakabauta meda vuli. … Na noda vakabauta vakalotu e vakavulica vei keda me da vakasaqara na vuli ena Yalotabu ka sa noda itavi me da vakayagataka na kila ka oqo ki na nodra qaravi na kawa tamata kecega. … Ena rawa me dusimaki keda na Yalo i [Tamada Vakalomalagi] ka vaqaqacotaka na noda sasaga vuli ka vakarabailevutaka na noda gugumatua ka tugana rawa na ka dina. …
Na noda sasaga meda vuli me na semati ki na noda bula kilikili yadua me da dusimaki kina mai vua na Yalo Tabu. … Na ivalavala ca e vakavuna me lako laivi na Yalo ni Turaga, ni yaco oqori, ena takali na veivakararamataki cecere ni Yalotabu ka kataremoremo na rarama ni vuli. …
… Sa yalataki tu vei keda ena ivakatakila ni gauna oqo ni gauna eda rai matua tikoga ki na lagilagi ni Kalou, ka oka kina na noda bula kilikili, ena “rarama na yagomudou taucoko, ka sega na tikina sa butobuto; ia ko koya sa vakararamataki sa kila na ka kecega” (V&V 88:67). …
… Na veivutuni, e dau vakasavasavataka na noda ivalavala ca mai na solibula veisorovaki i Jisu Karisito, ka sa ikalawa bibi ni salatu ni vuli vei ira kece era vakasaqara na rarama kei na dina ena kaukauwa ni veivakavulici ni Yalo Tabu. …
E dodonu me da vakarautaka na veika eda ganita kei ira eda qaravi ira tiko ni da digitaka na veika me da vulica. E dodonu me tiko vei keda na kila ka e gadrevi raraba. Sa dodonu me vuli na tamata yadua me itataqomaki ka rawa ka kina.
Sa nuitaka tiko na Tamada Vakalomalagi me da digidigi ka vakauqeti me da vakadikevi keda kei na noda gugumatua ka digitaka na vuli me da na taura. … Wilika na nomu veivakalougatataki vakapeteriaki, vakasamataka na nomu kila kei na taledi, ka toso i liu. Kalawa yani, ena tadola na veikatuba. … Vua na Turaga, “sa veivuke na ka kecega [meda] vinaka kina” (Roma 8:28). …
Eda na buno me rawati na noda inakinaki, ia na noda buno oqo ena vuavuai vinaka me vakataka na noda vuli. Na kaukauwa eda sa mai rawata ena kena vorati rawa na bolebole ena tiko vata ga kei keda ena veigauna tawamudu. …
E ka bibi, ni sa noda ilesilesi me da tomana na noda vuli vakayalo ena noda vulica na ivolanikalou kei na veivola ni Lotu ka tiko ena soqoni ni lotu kei na valetabu. Na tugani ni vosa ni bula ena vakabulabulataki keda, ena vagumatuataki keda cake me da vakavulici ira eda lomana, ka vakarautaki keda ki na bula tawamudu.
Na inaki bibi ni dua na vuli o ya me da itubutubu ka italai vinaka ena matanitu vakalou. … Na vuli sa isolisoli ni Kalou; sa yavudei ni noda vakabauta ni da vakayagataka me ra qaravi kina na tani. “Vuli kei Ira na Yalododonu Edaidai,” Liaona, Epe. 2009, 26-31
Lesu ki na draunipepa 86