iVakamacala Taumada

Ena rawa beka ki na ilawalawa oqo me kauti au ki koronivuli?

E sega ni ka rawarawa me da rawata e dua na vuli, ia na ilawalawa oqo ni bula rawati koya ena vukei iko mo kila na sala vinaka duadua mo rawata kina na vuli o gadreva mo cakacaka vinaka kina. Ena bose vakailawalawa, o na vakadeitaka mo cakava eso na cakacaka digitaki, ka na soli vakasama ka vakayaloqaqataki iko na ilawalawa. Na inaki ni ilawalawa oqo e sega walega me vukei iko mo vakavakarau ka rawata na nomu vuli; ena vukei iko talega mo talairawarawa cake vakalevu ka vakabauta na Turaga ka ciqoma na Nona veivakalougatataki yalataki tiko me baleta mo bula rawati iko vakayago ka vakayalo.

Na cava mada na ilawalawa ni bula rawati koya?

Na ilawalawa ni bula rawati koya e duidui mai na vuqa na kalasi, lesoni, kei na vuli veituberi ni Lotu. E sega kina na qasenivuli, iliuliu, se dauveituberi. O ira na lewe ni ilawalawa oqo era vuli vata ka veitokoni ka veivakayaloqaqataki vakai ira yadua. Sa noda vakaikeda yadua na ilesilesi ni veika eda sa vakadeitaka, ka veivakasalataki vata me wali kina na leqa eso.

“E sega na leqa ena matavuvale, tabanalevu, se iteki ena sega ni rawa me wali kevaka eda na vakasaqara na kedra iwali ena sala ni Turaga ena noda veivakasalataki—veivakasalataki dina—vakai keda yadua.

M. Russell Ballard, Veivakasalataki kei na Noda Matabose, rev. ed. (2012), 4

Na cava era daucakava na lewe ni ilawalawa?

Ena bose, era dau veivakadeitaki na lewe ni ilawalawa mera cakacaka. E sega walega ni keimami vuli ia keimami cakava talega na veika me keimami bula rawati keimami kina. Keimami veivakadeitaki, veivukei me maroroi na veivakadeitaki oqori, ka ripotetaka na neimami tubu. Ena vuku ga ni cakacaka tiko na ilawalawa vaka-matabose, sa ka bibi me keimami dau tiko ena bose kei na kena gauna. Mo dau kauta tiko mai na ivola ni cakacaka oqo kei na ivola lailai Noqu Yavu: iVakavuvuli, Kila, iTovo kei na Noqu Sala ki na Bula rawati Au. Na bose yadua ena rua tiko na auwa. Na cakava na neimami veivakadeitaki ena taura tiko e dua se rua na auwa ena veisiga.

Na cava e dau cakava o dauveivakarautaki?

O ira na dauveivakarautaki era sega ni kenadau ni vuli se veivakavulici. Era sega ni liutaka se vakavulica na ilawalawa. Era veivuke tu ga ki na ilawalawa mera muria vakadodonu na veika sa volai tu ena ivola. Sa nona itavi ga o kenadau ni bula rawati koya me vakarautaka na bose ni ilawalawa; ia, era na dau lesi na lewe ni ilawalawa mera veivakarautaki ni oti e vica na macawa, ke gadrevi. Me baleta na ikuri ni vuli, raica na iDusidusi ni iLiuliu kei na kena vidio ena srs.lds.org

Sitivikiti ena Vakacavari ni Tabanivuli

O ira na lewe ni ilawalawa era dau tiko ena bose ka maroroya na nodra veivakadeitaki era na rawata mera ciqoma e dua na setivikiti ni bula rawati koya mai na LDS Business College. Raica na draunipepa 29 ena Noqu Yavu me baleta na veika e gadrevi.