iVurevure

Vakavakarau Vakayalo

Mo ni veitarataravi ena wilika na itukutuku oqo.

JULIE B. BECK

Na nomu rawata rawa, ciqoma, ka cakacakataka na ivakatakila ni tamata yadua sai koya na kila bibi duadua ena rawa ni tauri ena bula oqo. Na rawata na Yalo ni Turaga e tekivu ena kena gadrevi na Yalotabu ka vinakati kina e dua na ivakatagedegede ni bula kilikili.

Maroroi ni vunau, veivutuni, kei na vakavoui ni veiyalayalati a vakayacori ena papitaiso e veimuataki ki na veivakalougatataki ni na tiko vata ga kei keda na Yalo ni Turaga [raica na V&V 20:77]. Vakayacora ka maroroya na veiyalayalati ni valetabu e kuria talega na qaqaco vakayalo kei na kaukauwa …

E vuqa na isau ni taro dredre era na kune ena kena wiliki na ivolanikalou baleta na ivolanikalou sa veivuke ki na ivakatakila [raica na 2 Nifai 32:3]. Na veivakararamataki e kunei ena ivolanikalou e yaco ni toso tiko na gauna, sa ka bibi kina meda vakayagataka na noda gauna ena ivolanikalou ena veisiga.

Sa ka yaga bibi talega me tiko vata kei keda na Yalo ni Turaga (raica na 3 Nifai 19:24–33). O ira era vakasaqaqara veivuke vakaidina ena masu kei na vuli ivolanikalou sa dau tu ga vei ira na pepa kei na peni mera vola na taro kei na nanuma kei na vakasama.

Na ivakatakila e rawa ni yaco mai ena veiauwa kei na veigauna veitaravi ni da cakava tiko na ka dodonu. … Na ivakatakila ki na tamata yadua e solia vei keda na kila vinaka na ka meda cakava ena veisiga meda vakalevutaka kina na vakabauta kei na noda dui ivalavala dodonu, vaqaqacotaki ni matavuvale kei na itikotiko, ka vakasaqarai ira era gadreva tu na noda veivuke. Ena vuku ga ni ivakatakila ki na tamata yadua sa dauivurevure vakavoui ni kaukauwa, sa rawa meda vakila noda dromuci ena veivuke ena gauna mada ga ni lomolomora.

Sa tukuni tiko vei keda meda vakararavi ki na Yalotabu e muataki keda meda “kitaka na veika vinaka, yalomalumalumu ka lewa vakadodonu” (V&V 11:12). Sa tukuni talega vei keda ni Yalotabu ena vakararamataka na noda vakasama, vakasinaita na lomada ena reki, ka vukea meda kila na veika kecega meda na cakava (raica na V&V 11:13–14).

Ena yaco mai na ivakatakila yalataki ki na tamata yadua ni da kerea yani, vakavakarau kina, ka toso ki liu ena vakabauta, ka vakabauta tiko ni na sovaraki mai kivei keda. (“Vei Ira Talega na Vada Kau na Sovaraka na Yaloqu ena Gauna Koya,” Ensign kei na Liaona, Me 2010, 1011.

Lesu ki na draunipepa 101

Vakasaqara na Vulica ena Vakabauta.

Wilika taudua ga na itukutuku oqo se vata kei na dua na lewe ni ilawalawa. Wilika ka makataka ena nomu vakayagataka na vakasama e na draunipepa 104. Raicalesu nikua, ena macawa mai oqo, se ena vula mai qo. Ni ko cakava, o na nanuma tiko voleka ni veika kece o sa vulica.

DAVID A. BEDNAR

Cava na ibalebale me vakasaqarai kina na vuli ena vakabauta?

… Me vaka na luvena tagane kei na yalewa na Tamada Vakalomalagi, eda sa mai vakalougatataki ena isolisoli ni galala. … Me vaka ni da vuli tiko, sa dodonu vei iko kei au medaru cakacaka ka bulataka na vosa. … O iko beka kei au e daru mata e cakacaka ka vakasaqara na vuli ena vakabauta, se waraka me daru vakavulici se tukuni mai? … Meda sa qai maqusa kece yani ena kerekere, vakasaqaqara, ka tukituki [raica na 3 Nifai 14:7].

… Na vuli ena vakabauta e gadrevi kina na sasaga vakayalo, vakasama, kei na yago ka sega ni itavi me na vakawaleni tu ga. … Na vuli ena vakabauta e gadrevi kina na “yalo sa malumalumu ka talairawarawa” (V&V 64:34). Na vuli ena vakabauta sai koya na macala ni sa kauta yani na Yalo Tabu na kaukauwa ni vosa ni Kalou vua kei na loma ni yalo ni tamata. Na vuli ena vakabauta e sega ni rawa me vakadewataki maivei qasenivuli kivei gonenivuli … ia e dodonu vei gonenivuli me vakabauta ka cakava sara me rawa kina ni ciqoma na kila-ka baleti koya.

O cauravou Josefa Simici … a kila vinaka na ibalebale me vakasaqara na vuli ena vakabauta. … Sa vakarautaki koya vakavinaka sara me “kerekere ena vakabauta” [Jemesa 1:6] ka cakava sara. … Mo raica kina ni taro nei Josefa a sega walega ni rai vakatabakidua ki na veika e gadreva me kila ia ena veika talega e dodonu me cakava. … A kerea ena nona masu na lotu cava e dina. A taroga se lotu cava me na lewena. A gole o Josefa ki na veikau me vuli ena vakabauta. Sa guta sara ga me na cakava. …

Sa dina sara, ni dua vei ira na ibolebole ni bula oqo o ya na vakasaqara na vuli ena vakabauta. … E vakavulica o Josefa, “Na sala vinaka duadua ni kena rawati na ka dina kei na vuku o ya me kakua ni tarogi ena ivola, ia mo gole vua na Kalou ka masulaka, ka taura mai kina na veivakavulici vakalou” [History of the Church, 4:425]. …

… Na veika au kila sa yaco kina meu kila vinaka na isau ni taro mai vua e dua tale ena sega ni daunanumi tiko vakabalavu. … Ia na isau eda raica se taura mai na noda cakacaka ni vakabauta, sa dau yaco, me katoni tikoga ena bula taucoko. …

Na ilesilesi meda vakasaqara na vuli ena vakabauta sa noda dui itavi sara ga na tamata. … Na vuli ena vakabauta sa ka yaga sara ki na noda torocake vakayalo yadudua kei na kena tubu na Lotu. … E vuqa vei keda yadua sa via kania dina sara na ivalavala dodonu ka vakasinaiti ena Yalo Tabu [raica na 3 Nifai 12:6]—ka meda vakasaqara meda vuli ena vakabauta. (“Vakasaqara na Vuli ena Vakabauta,” Ensign, Sepi. 2007, 63–68 se Liaona, Sepi. 2007, 19–24

Lesu ki na draunipepa 106

iTaviqaravi ena iTikotiko: Au sa Vakarau Beka Meu Rawa-Ka e Koronivuli?

E gadrevi meda vakavakarau meda rawa-ka ena noda vuli se tuberi. Vakacavara vakataki iko na ilesilesi oqo. E rawa mo kerea eso mera soli vakasama mai.

Biuta e dua na naba ena mata ni itukutuku yadua, sa rawa me 1, 2, se 3. 1 = gadreva na cakacaka 2 =toso vinaka tiko 3 = totoka sara

Vola eso na vakasama ni kena rawa me vakatorocaketaki kina na vanua o ya.

Vakayaloqaqataki Iko Au sa rawa ni muataki au meu cakava na veika dredre. Au sa cakacaka ena veisiga ka sega e dua me tukuna tiko vei au.
Sala ni torocake:
Vakatulewa ni Cakacaka. E matata vinaka na noqu lalawa, kau sa vakadeitaka niu na rawata na noqu vuli.
Sala ni torocake:
Gadreva na Vuli. E taleitaka na lomaqu meu vuli, kau na sega ni vakatara na ibolebole eso me vakataotaki au.
Sala ni torocake:
Tuvatuvalaki. Au sa lewa ga na noqu bula. Au tuvanaka na noqu veisiga yadua kei na macawa, kau vakatara na Yalotabu me dusimaki au.
Sala ni torocake:
Veitokoni. Era tiko voliti au na tamata era na tokoni au, dusimaki au, ka lomani au. Ke sega, au na vakasaqarai ira era na tokoni au.
Sala ni torocake:
Lewai ni ilavo. Au sa rawa ni caka ilavo ka maroroya. Au na sauma na noqu bili ena kena gauna, oka kina na saumi lesu ni dinau ni LVV. Au na bula ga ena ka au rawata.
Sala ni torocake:

Na cava o sa vulica mai na veika sa sotavi oqo? Wasea vakalekaleka na nomu vakasama ki na nomu matavuvale se itokani.