Ko Hono Kamataʻí—Taimi Lōloa Tahá: Miniti ʻe 15

Fai ha fualotu.

Fakafeʻiloaki kimoutolu. Mou takitaha fakaʻaongaʻi ha miniti ʻe taha ʻo fakahā ho hingoá mo ha meʻa fekauʻaki mo koe.

ʻOku Talitali Lelei Kimoutolu ki Heʻetau Kulupu Moʻui Fakafalala Pē Kiate Kitá!

Lau:Ko e founga ki ha kumi ngāue ola leleí ko e:

Ngāue ʻi he Tui + Ngāue Mālohi + Ngāue Fakapotopoto = Lavameʻa

Te ke ako fakataha mo hoʻo kulupú, pea ʻi he fakahinohino ʻa e Laumālié, ki he ʻuhinga ʻoku hoko ai ʻa e tuí ko e fakavaʻe ʻo ha kumi ngāué, pea ʻe poleʻi ai koe ke ke ngāue mālohi. Te ke ako foki e ngaahi taukei ngāue ʻoku fie maʻu ki he ngāue fakapotopotó, hangē ko e fakafehokotaki ki he kakaí, fakahoa ho ngaahi taukei ngāué ki he ngaahi fiemaʻu ʻa e pule ngāué, ngaahi fakamatala tākiekina-mālohí, ngaahi naunau kuo tohí, taukei fakaʻinitaviú, mo ha ngaahi meʻa kehe. ʻI he kamataʻanga ʻo e fakataha kotoa pē, te mou toe vakaiʻi ai ha tefitoʻi moʻoni ʻo e ongoongoleleí ʻe lava ʻo tokoni ʻi he ngaahi tafaʻaki kotoa pē ʻo hoʻo moʻuí.

ʻOku Founga Fēfē Hono Fakahoko ʻEní?

Lau:ʻOku ngāue ʻa e ngaahi kulupu moʻui fakafalala pē kiate kitá ʻo hangē ha fakataha alēleá. ʻOku ʻikai ke ʻi ai ha faiako ia pe mataotao. Ka, te ke muimui pē ki he ngaahi naunaú ʻo hangē ko hono tohí. ʻI he fakahinohino ʻa e Laumālié, te mou fetokoniʻaki ʻo hangē ko ʻení:

Tokoni tatau pē ki he ngaahi fealēleaʻakí mo e ngaahi ʻekitivitií. ʻOku ʻikai totonu ke maʻu pē ʻe ha tokotaha ʻa e taimí ʻi he pōtalanoá, tautautefito ki he tokotaha tokoní.
Feʻofaʻaki mo fepoupouaki. Fakahaaʻi ʻokú ke mahuʻingaʻia, ʻeke ha ngaahi fehuʻi, mo ʻai ke mou feʻilongaki.
Vahevahe ha ngaahi fakamatala lelei mo ʻaonga.
Fakahoko mo tauhi ʻa e ngaahi tukupaá.

Naʻe akonaki ʻa ʻEletā M. Lāsolo Pālati ʻo pehē, “ʻOku ʻikai ke ʻi ai ha palopalema ia ʻi ha fāmili, uooti pe siteiki ʻe taʻe-malava ʻo fakaleleiʻi kapau te tau fekumi ki ai ʻi he founga ʻa e ʻEikí ʻi he fealēleaʻaki—ʻo fealēleaʻaki moʻoni—mo e niʻihi kehé” (Counseling with Our Councils, rev. ed. [2012], 4).

Mamataʻi:ʻOku maʻu ʻa e “Ko ʻEku Kulupu Moʻui Fakafalala Pē Kiate Kitá [My Self-Reliance Group” ʻi he srs.lds.org/videos. (ʻIkai ha vitiō? Hiki ki he “Ka ʻIkai ha Faiako, ʻE Founga Fēfē Haʻatau ʻIlo ʻa e Meʻa ke Faí?” ʻi he peesi 4.)

Aleaʻi:Ko e hā naʻá ne ʻai ʻa e kulupu ʻi he vitioó ke lavameʻá? Ko e hā te mou fai faka-kulupu ke mou maʻu ai ha aʻusia liliu moʻuí?

Ka ʻikai ha Faiako, ʻE Founga Fēfē Haʻatau ʻIlo ʻa e Meʻa ke Faí?

Lau:ʻOku faingofua pē. Muimui pē ki he naunaú. ʻOku konga ʻe ono ʻa e vahe kotoa pē ʻi he tohi ngāué:

Lipōtí: Fakamatalaʻi ʻa e fakalakalaka naʻá ke aʻusia ʻi he lolotonga ʻo e uiké ʻi hoʻo ngaahi tukupaá.
Fakavaʻé: Toe fakamanatu ha tefitoʻi moʻoni ʻo e ongoongoleleí ʻe fakaiku ki ha moʻui fakafalala fakalaumālie lahi ange kiate koe.
Akó: Ako fakahoko ha ngaahi pōtoʻi ngāue ʻe fakaiku ki ha tuʻunga moʻui fakafalala fakatuʻasino lahi ange kiate koe.
Fakalaulaulotó: Fakafanongo ki he Laumālie Māʻoniʻoní ke ne ʻoatu ha tataki fakalaumālie.
Tukupaá: Palōmesi ke ke ngāueʻi e ngaahi tukupā ʻe tokoni ki hoʻo fakalakalaká, he lolotonga ʻo e uiké.
Ngāué: Akoako fakahoko e meʻa naʻá ke akó, ʻi he lolotonga ʻo e uiké.

Founga Hono Fakaʻaongaʻi ʻo e Tohi Ngāue ko ʻEní

ʻI Hoʻo Vakai ki he Ngaahi Meʻá Ni, Muimui ki he Ngaahi Fakahinohino ko ʻEní.
Lau	Mamataʻi	Aleaʻi	Fakalaulauloto	ʻEkitivitií
Lau leʻolahi ʻe ha taha maʻá e kulupú fakakātoa.	Mamataʻi ʻe he kulupú kotoa ʻa e foʻi vitioó.	Fevahevaheʻaki ʻe he kau mēmipa ʻo e kulupú ʻa e ngaahi fakakaukaú ʻi ha miniti ʻe ua ki he fā.	Fakakaukauʻi, fakalaulauloto, mo tohi fakafoʻituitui ʻi ha miniti ʻe ua pe tolu.	Ngāue fakafoʻituitui ʻa e kau mēmipa ʻo e kulupú pe mo ha niʻihi kehe, ʻi ha vahaʻataimi pau.

Tohi Fakamoʻoni ʻo ʻene Kakató

Lau:ʻE lava ke maʻu ʻe he kau mēmipa ʻo e kulupú ʻoku nau ō ki he ngaahi fakatahaʻangá mo tauhi ʻenau ngaahi tukupaá, ha tohi fakamoʻoni ki he moʻui fakafalala pē kiate kitá mei he LDS Business College. Vakai, peesi 251.