Akó—Taimi Lōloa Tahá: Miniti ʻe 45
-
Lau:ʻOku muimui ʻa e kumi ngāue ola leleí ʻi he kiʻi founga faingofua ko ʻení:
Ngāue ʻi he Tui + Ngāue Mālohi + Ngāue Fakapotopoto = Lavameʻa
Kapau ʻe lava ke fakasiʻisiʻi e taimi naʻá ke fakamoleki ke maʻu ai ha ngāué ʻaki ha pēseti ʻe 90, te ke fie maʻu nai ia? Te ke lava. ʻI he vahe ko ʻení, ʻe poleʻi ai koe ke ke muimui ʻi he founga ko ʻení ke fakavaveʻi hoʻo kumi ngāué.
Kumi Ngāue ʻa Siuá
-
Lau:Naʻe ʻinitaviu ʻa Siua ki he lakanga ʻi he ABC Marketing. Naʻá ne pehē naʻe lelei ia pea naʻá ne fiefia he naʻá ne teuteu ki ai. ʻOku totonu ke ne maʻu ha fetuʻutaki meiate kinautolu he uiké ni. ʻOku fiefia, ka ʻoku ʻikai loto ke tāfataha pē ki he foʻi ngāue ko iá. Heiʻilo pe te ne maʻu ʻe ia e ngāue ko iá. ʻOku loto ke ne maʻu ha ngaahi ngāue lelei kehe ʻi he lahi tahá koeʻuhí ke vave ʻene maʻu ha ngāué, ka ʻe founga fēfē?
-
Aleaʻi:Ko e hā ha ngaahi founga te ke lava ai ʻo fakafehokotaki kia Siua?
-
Lau:ʻI ha ngaahi founga lahi, ʻoku hangē hoʻo kumi ngāué ko e fōneli ko ʻení. Ko ha ngāue lahi ia hono feingaʻi ke ʻilo e ngaahi meʻa angamaheni ʻo hono kumi ʻo ha ngaahi maʻuʻanga tokoní mo hono fakahoko ha ngaahi fetuʻutaki ke maʻu ai ha ngaahi tuʻuaki ngāue, ʻinitaviu mo ha ngaahi faingamālie ngāue. Ko e lahi ange ʻa e ngaahi maʻuʻanga tokoni mo e fetuʻutaki te ke fakahoko ʻaki hoʻo ngāue mālohí, ko e lahi ange ia e ngaahi ʻinitaviu mo e faingamālie ngāue te ke maʻú. Ka neongo ia, ʻoku ʻikai feʻunga ʻa e ngāue mālohi peé. ʻOku mahuʻinga foki ke ke ngāue fakapotopoto koeʻuhí ke iku e konga lahi taha ʻo hoʻo ngaahi fetuʻutakí ki ha ngaahi tuʻuaki ngāue, ngaahi ʻinitaviu mo ha ngaahi faingamālie ngāue.
1. Ngāue Mālohi: 15-10-2
-
Lau:ʻOku ʻi ai ha founga kumi ngāue kuo ʻosi fakamoʻoniʻi naʻe ui ko e 15-10-2 ʻa ia naʻe faʻa siʻisiʻi ange ai e taimi ʻoku fakamoleki ʻe he kakaí ke kumi ha ngāué mei he ʻaho ʻe 200 ki he ʻaho pē ʻe 20! ʻOku kau ai ha palani faingofua ki hoʻo kumi ngāue fakaʻahó.
-
Kumi ha ngaahi maʻuʻanga tokoni foʻou ʻe 15 ʻi he ʻaho kotoa pē.
-
Fakahoko ha fetuʻutaki ʻe 10 ʻi he ʻaho kotoa pē.
-
Fetaulaki tonu mo ha toko ua ʻo e ngaahi fetuʻutaki ko iá.
Manatuʻi, ko e maʻuʻanga tokoní ko ha faʻahinga fakamatala pe fetuʻutaki pē ia ʻe lava ke iku ki ha kumi ngāue lavameʻa. ʻE malava pē ke hoko ko ha tokotaha, feituʻu, pe ko ha meʻa.
Ko e fetuʻutakí ko ha faʻahinga founga fetuʻutaki fakangāue pē ia mo ha maʻuʻanga tokoni. ʻE malava ke hoko ia ko ha fakataha mata ki he mata mo ha tokotaha, tā telefoni, ʻīmeili, fakahū ha tohi kole ngāue pe tohi fakamatala aʻusia fakaako mo fakangāué, pe ʻoatu ha tohi vakaiʻi. Ko e lelei ange hoʻo ʻai ke fakataautaha hoʻo ngaahi fetuʻutakí, ko e vave ange ia hoʻo maʻu ha ngāué, ʻa ia ko e ʻuhinga ia ʻoku fie maʻu ai ke ke fakahoko ha fetuʻutaki mata ki he mata ʻe ua ʻi he ʻaho kotoa peé.
ʻE hanga ʻe he 15-10-2 ʻo fakasiʻisiʻi ʻaupito ʻa e taimi ʻokú ke kumi ngāue aí. Mahalo he ʻikai ngāue ʻa e 15-10-2 ki he tokotaha kotoa pē, ko ia ai, liliu ia ʻo fakatatau ki ho ngaahi tūkungá. Ki ha niʻihi, mahalo ʻe feʻunga ʻa e 10-8-2, naʻa mo e 7-7-2 mo honau taimi faingamālié. Ko e meʻa mahuʻingá ke ke ngāue ʻi he lahi taha te ke ala lavá ki hoʻo kumi ngāué. Ko e lahi ange ʻa e ngaahi maʻuʻanga tokoni mo e ngaahi fetuʻutaki ʻokú ke faʻo ki hoʻo fōnelí, ko e lahi ange ia e ngaahi ngāue te ke ʻiló, ngaahi ʻinitaviu, mo e ngaahi faingamālie ngāue te ke maʻú.
-
-
Fakalaulauloto:ʻE fēfē nai kiate koe haʻo maʻu vave ha ngāue? Te ke ngāue mālohi fēfē nai ke kumi ha ngāué?
2. Ngāue Fakapotopoto
-
Lau:Neongo ʻoku mahuʻinga ʻa e ngāue mālohí, ka he ʻikai ke ne malava ʻi ai pē ʻo fakavaveʻi hoʻo kumi ngāué. Kuo pau foki ke ke ngāue fakapotopoto.
ʻOku ngāue mālohi ʻa e kau kumi ngāue ola leleí ʻaki ʻenau tulifua ki ha ngaahi faingamālie ngāue lahi ʻi he taimi pē taha. ʻOku nau ngāue fakapotopoto ʻaki ʻenau kumi mo fetuʻutaki hangatonu ki he kakai te nau lava ʻo tokoniʻi kinautolu ke maʻu e ngaahi ngāue ko iá. ʻOku nau ngāue fakapotopoto foki ʻaki hono fakataautahaʻi ʻenau ngaahi founga kumi ngāué, hangē ko e Ko Au ʻi ha Sekoni ʻe 30 mo e ngaahi tohi aʻusia fakaako mo fakangāué, ki he ngāue takitaha.
Manatuʻi, ko e hā pē meʻa ʻokú ke fakahoko ʻi hoʻo kumi ngāué ko ia pē te ke maʻú.
-
- Aleaʻi:
-
Naʻe ngāue fakapotopoto fēfē ʻa Siuá?
-
ʻOkú ke pehē ko e hā hono vave hano maʻu ʻe Siua ha ngāue ʻi heʻene ngāue pehení?
-
-
Lau:ʻI he ngāue fakapotopoto ʻa Siuá, naʻe lava ai ke vave ange ʻene kumi ngāué, lavameʻá, mo aʻusia e taumuʻa fakaʻaho ʻo e 15-10-2. ʻI hoʻo kumi ngāué, fakatokangaʻi e founga ʻoku faʻa iku ai e ngāue fakapotopotó ki hono ikunaʻi ʻo e 15-10-2.
-
Aleaʻi:Vahevahe hoʻo palani ki he founga te ke ngāue fakapotopoto aí.
-
Lau:ʻOku ola lelei ange ʻa e ngāue fakapotopotó ʻi he ngāue mālohi peé. Manatuʻi maʻu pē naʻa mo e taimi ʻoku tau ngāue fakapotopoto aí, ʻoku ʻikai faʻa hoko ha ngaahi meʻa ia he taimi ʻe niʻihi. ʻE ʻi ai ha ngaahi taimi ʻe niʻihi he ʻikai ha ola lelei. Hokohoko atu e ngāue mālohi mo fakapotopotó, pea tui. ʻOku ʻafioʻi ʻe he ʻEikí ʻa e meʻa ʻokú ke fouá pea te Ne tāpuekina koe.
-
Aleaʻi:Ko e hā te ke lava ʻo fai ke ke kei ngāue mālohi mo fakapotopoto ai pē, naʻa mo e taimi ʻoku faingataʻa ai hoʻo kumi ngāué?
Fakaʻosí
-
Mamataʻi:“Rafael: Job in 6 Days! [Lafaele: Ngāue ʻi he ʻAho ʻe 6]” maʻu ʻi he srs.lds.org/videos. (ʻIkai ha vitiō? Lau ʻa e peesi 165.)
-
Aleaʻi:Ko e hā e ngaahi meʻa mahuʻinga taha naʻá ke ako mei he vahe ko ‘ení?
-
Lau:ʻOku muimui ʻa e kumi ngāue ola leleí ʻi he kiʻi founga faingofua ko ʻení:
Ngāue ʻi he Tui + Ngāue Mālohi + Ngāue Fakapotopoto = Lavameʻa
Kapau ʻokú ke loto ke siʻisiʻi ange e taimi ʻokú ke fakaʻaongaʻi he kumi ha ngāué, ngāue mālohi mo ngāue fakapotopoto leva. Kuo folofola ʻa e ʻEikí ʻo pehē, “ʻOku totonu ke femoʻuekina ʻa e tangatá ʻi he holi lahi ʻi ha ngāue lelei, pea fai ʻa e ngaahi meʻa lahi ko ʻenau fili tauʻatāina ʻanautolu pē … He ʻoku ʻiate kinautolu ʻa e mālohi, ʻa ia ʻoku nau hoko ai ko e niʻihi ke fili maʻanautolu.” Pea ʻoku ʻomi fakataha ʻa e fekaú ni mo ha talaʻofa: “Pea kapau ʻe fai ʻe he tangatá ʻa e ngāue lelei, he ʻikai teitei mole ʻa ʻenau totongí ” (T&F 58:27-28). Fakafonu hoʻo fōnelí ʻaki e ngaahi maʻuʻanga tokoní mo e ngaahi fetuʻutakí ki he lahi taha te ke ala lavá, pea ʻe tāpuekina koe.