Akó—Taimi Lōloa Tahá: Miniti ʻe 45
-
Lau:ʻOku muimui ʻa e kumi ngāue ola leleí ʻi he kiʻi founga faingofua ko ʻení:
Ngāue ʻi he Tui + Ngāue Mālohi + Ngāue Fakapotopoto = Lavameʻa
ʻI he vahe ko ʻení, te ke ako fekauʻaki mo e founga ʻoku fakaʻaongaʻi ai e ngaahi tefitoʻi moʻoni tatau ko ʻení ke lavameʻa ʻi he ngāué mo e founga ʻoku tokoni ai ʻa e ngāué ki hoʻo moʻui fakafalala pē kiate kitá.
Kumi Ngāue ʻa Siuá
-
Lau:Ngaahi ongoongo lelei! Naʻe fetuʻutaki ʻa Sūlia mei he ABC Marketing kia Siua ʻo foaki kiate ia ʻa e lakanga ʻi he Tafaʻaki Tokoni Fakatekinikalé. ʻOkú ne kamata ngāue ʻi he uiké ni. ʻOku fiefia ʻa Siua mo hono fāmilí! Ko ha sitepu mahuʻinga ia ki he moʻui fakafalala pē kiate kitá, ʻa ia ʻoku ʻiloʻi ʻe Siua ʻoku mahulu ange ʻi hano maʻu pē ha ngāué.
-
Aleaʻi:Ko e hā ha founga ʻoku felāveʻi ai ʻa e ngāué mo e moʻui fakafalala pē kiate kitá?
-
Lau:ʻOku akoʻi ʻe he folofolá, “He kuo ʻikai te mou aʻusia ki he potu ko iá ka ne taʻeʻoua ʻa e folofola ʻa Kalaisí mo e tui taʻe-fakaʻaloʻalongaua kiate ia, ʻo falala kakato ki he ngaahi lelei ʻaʻana ʻa ia ʻokú ne māfimafi ke fakamoʻuí” (2 Nīfai 31:19). Ne tau vakai ki he ngāue mālohi ʻa Siuá, ngāue ʻaki ʻo e tuí, pea naʻe tāpuekina ia ʻaki ha ngāue. Ka neongo ia, ʻoku ʻikai ʻuhinga hono maʻu ha ngāué ʻoku moʻui fakafalala ai e tokotaha ko iá kiate ia pē. ʻOku fie maʻu foki ke ke ngāue lelei ʻi hoʻo ngāueʻangá pea mahalo te ke vakai ai ki ha ngaahi taumuʻa ngāue ʻoku lelei angé. ʻE lava ke tokoni atu ʻa e Tamai Hēvaní ʻi he meʻá ni.
-
Aleaʻi:ʻE tāpuekina fēfē nai koe ʻe he Tamai Hēvaní ʻi hoʻo ngāueʻangá?
1. Hoko ko ha Tokotaha Ngāue Lelei
-
Lau:ʻE tokoni hoʻo hoko ko ha tokotaha ngāue leleí ke ke tauhi maʻu ai pē hoʻo ngāué, tupulaki, mo maʻu ha paʻanga lahi ange. ʻE lava ke tokoni ʻeni ke ke moʻui fakafalala ange ai kiate koe pē.
Neongo pe ʻokú ke ʻi he ngāueʻanga ʻokú ke saiʻia aí pe teʻeki aʻu ki ai, manatuʻi, ʻoku ʻi ai maʻu pē ha mahuʻinga mo ha pōtoʻi ngāue ʻe maʻu ʻi ha faʻahinga ngāueʻanga pē.
ʻOku vakai e kau ngāue leleí ki he ngāueʻanga kotoa pē ko ha faingamālie, neongo kapau ʻoku nau fie maʻu ha ngāue lelei ange. Feinga ke ʻoua naʻá ke liʻaki ha ngāue kae ʻoua kuó ke maʻu ha ngāueʻanga ʻe taha. ʻOku fie maʻu ke ke ngāue ka ke aʻusia ha faingamālie, pea ʻi hoʻo hoko ko ha tokotaha ngāue leleí te ke maʻu ai ha ngaahi faingamālie ʻoku lahi angé. ʻOku meimei ke fakaʻeiʻeiki e ngāue kotoa pē.
-
Aleaʻi:Ko e hā ʻoku totonu ai ke ke hoko ko ha tokotaha ngāue leleí, neongo pe ko e hā e faʻahinga ngāue ʻokú ke ʻi aí?
-
Mamataʻi:“Keep it Simple [ʻAi ke Mahinongofua],” maʻu ʻi he srs.lds.org/videos. (ʻIkai ha vitiō? Lau ʻa e peesi 182.)
2. Fokotuʻu ha Ngaahi Taumuʻa Ngāue
-
Lau:Ke ke moʻui fakafalala kiate koe peé, mahalo ʻe fie maʻu ke ke fakakaukau lahi ange ki hoʻo ngaahi taumuʻa ngāué.
-
Fakalaulauloto:ʻE tokoni nai hoʻo ngāue lolotongá (pe ko e ngāue ʻokú ke kumí) ke ke moʻui fakafalala ai kiate koe pē?
-
Lau:Kuó ke maʻu ʻeni ha fakakaukau fekauʻaki mo e tuʻunga ʻokú ke fie aʻusiá, te ke aʻusia fēfē ia? Ke ke tupulaki ʻi hoʻo ngāué, ʻe ala fie maʻu ke ke maʻu ha toe ngaahi taukei pe ako lahi ange. ʻE lava foki ke tokoni atu e ngaahi meʻa kuó ke ako fekauʻaki mo e kumi ngāué ʻi hoʻo ngaahi taumuʻa ngāué. ʻE tokoni kiate koe hono maʻu ha ngaahi maʻuʻanga tokoni mo hono fakahoko ha ngaahi fetuʻutakí ke ne fakafeʻungaʻi koe ki he ngaahi tuʻunga te ke ala fie maʻu ʻi he kahaʻú.
Kumi Ngāue ʻa Siuá
-
Lau:ʻOku fiefia ʻa Siua ke maʻu ha ngāue, ka ʻoku fie hoko ia ko ha tokotaha ngāue netiueka fakakomipiuta. ʻE tokoni ia ke ne maʻu ai ha paʻanga lahi ange mo toe moʻui fakafalala ange kiate ia. Ke tokoni kiate ia ke vakai ki he meʻa hoko ʻokú ne fie maʻú, naʻá ne fakaʻaongaʻi e meʻangāue ko ʻení.
|
Ngaahi Lakanga ʻOkú Ke Fie Maʻú |
Ngaahi Taukei mo e ʻIlo ʻOkú ke Fie Maʻú |
Ngaahi Founga ke Maʻu ai ʻa e Ngaahi Taukei Ngāué mo e ʻIló |
Ngaahi Sitepu Hokó |
|---|---|---|---|
|
|
|
|
-
Aleaʻi:ʻE tākiekina fēfē koe ʻi hoʻo foua e ngaahi sitepu hoko ko ʻení ke lahi ange ai hoʻo moʻui fakafalala kiate koe peé?
Fakaʻosí
-
Mamataʻi:“Growing [Fakatupulakí],” lava ke maʻu atu ʻi he srs.lds.org/videos. (ʻIkai ha vitiō? Lau ʻa e peesi 183.)
-
Aleaʻi:Ko e hā e ngaahi meʻa mahuʻinga taha naʻá ke ako mei he vahe ko ʻení?
-
Lau:Ko e founga ki ha kumi ngāue ola leleí ko e:
Ngāue ʻi he Tui + Ngāue Mālohi + Ngāue Fakapotopoto = Lavameʻa
ʻOku ʻaonga foki e ngaahi tefitoʻi moʻoni tatau ko ʻení ki he lavameʻa ʻi he ngāueʻangá. ʻOku ʻofa ʻa e ʻOtuá ʻiate koe mo finangalo ke ke moʻui fakafalala kiate koe pē. Fakahaaʻi hoʻo tuí ʻaki haʻo feinga ke hoko ko ha tokotaha ngāue lelei mo palani ki ha ngāueʻanga ʻe tokoni atu ke ke moʻui fakafalala ai kiate koe peé. Te Ne tāpuekina koe ʻi hoʻo ngāue mālohi mo ngāue ʻi he tuí.