Akó—Taimi Lōloa Tahá: Miniti ʻe 45
-
Lau:ʻOku muimui ʻa e kumi ngāue ola leleí ʻi he kiʻi founga faingofua ko ʻení:
Ngāue ʻi he Tui + Ngāue Mālohi + Ngāue Fakapotopoto = Lavameʻa
ʻI he vahe fakaʻosí, ne tau ako ai e ngaahi taukei fakaʻinitaviu ko ʻení:
-
Teuteu kimuʻa he ʻinitaviú.
-
Kamataʻi lelei ʻa e ʻinitaviú.
-
Fakaʻaongaʻi hoʻo Ko Au ʻi ha Sekoni ʻe 30.
-
Fakaʻaongaʻi ha ngaahi fakamatala tākiekina-mālohi.
ʻI he vahe ko ʻení, te tau ako ai ha ngaahi taukei fakaʻinitaviu kehe ke tokoni ke tau ngāue fakapotopoto.
-
Kumi Ngāue ʻa Siuá
-
Lau:Kuo ʻamanaki atu ʻa Siua ki ha ngaahi fehuʻi ʻe niʻihi pea kuó ne teuteu ha ngaahi fakamatala tākiekina-mālohi ʻe niʻihi ki heʻene ʻinitaviu ʻi he ABC Marketing. Kuó ne teuteu foki ha fakamatala Ko Au ʻi ha Sekoni ʻe 30 ke kamata lelei ʻaki ʻa e ʻinitaviú. ʻOku saiʻia ʻa Siua ke mateuteu ʻi he lelei taha te ne ala lavá mo pehē ke tā ki heʻene faʻētangata ko Tēvitá ʻo kole ki ai ha faleʻi fakaʻinitaviu.
Naʻe talaange ʻe Tēvita kia Siua ʻoku faʻa fehuʻi ʻe he fai ʻinitaviú ki he tokotaha kumi ngāué fekauʻaki mo hano vaivaiʻanga. Ko e taumuʻa ʻo e foʻi fehuʻi ko ʻení ke ʻoange ha ngaahi meʻa ʻe fie maʻu ke nau tokanga ki ai fekauʻaki mo e tokotaha kumi ngāué. Naʻá ne fokotuʻu ange ke ne ʻeke ha ngaahi fehuʻi ʻi he fakaʻosinga ʻo e ʻinitaviú mo ʻoange kia Siua ha faleʻi ki hono fakaʻosi lelei ʻo e ʻinitaviú.
-
Aleaʻi:Ko e hā hoʻo fakakaukau ki he faleʻi ʻa e Faʻētangata ko Tēvitá?
-
Lau:Ko e lahi ange hoʻo fakatupulaki hoʻo ngaahi taukei fakaʻinitaviú, ko e lahi ange ia hoʻo lavameʻá. Te ke ʻilo e lelei hoʻo ʻinitaviú ʻi he taimi te ke maʻu ai ha ngaahi faingamālie ngāué. Te tau ako mo akoako ʻi he vahé ni e ngaahi taukei fakaʻinitaviu ko ʻení:
-
Liliu e ngaahi meʻa ʻikai leleí ki ha ngaahi lelei.
-
Fai ha ngaahi fehuʻi.
-
Fakaʻosi lelei ʻa e ʻinitaviú.
1. Liliu e Ngaahi Meʻa ʻIkai Leleí ki ha Ngaahi Lelei.
-
Lau:Mahalo ʻe ʻi ai ha ngaahi hohaʻa ʻa e pule ngāué fekauʻaki mo hono fakangāueʻi koé. ʻE malava ke tupu ʻeni mei ho hisitōlia ngāué, pōtoʻi ngāué, taʻu motuʻá, pe ha ngaahi meʻa kehe pē. Te nau faʻa ʻeke atu ha ngaahi fehuʻi fekauʻaki mo e ngaahi meʻá ni ʻi ha ʻinitaviu. Hangē ko ʻení, ʻe malava ke nau ʻeke ha ngaahi fehuʻi peheni:
-
Ko e hā naʻá ke mavahe ai mei ho lakanga fakamuimuitahá?
-
Talamai angé fekauʻaki mo ha taimi naʻe ʻikai ke ke vā lelei ai mo hao kaungā-ngāue.
-
Ko e hā ha taha ʻo ho ngaahi vaivaiʻangá?
ʻI he taimi ʻokú ke fehangahangai ai mo e ngaahi fehuʻi pehení, feinga ke tali ia ʻi he faitotonu mo ha ngaahi lea fakamanakoa, sai tahá kapau ʻoku ʻi ai ha ngaahi sīpinga.
-
Kumi Ngāue ʻa Siuá
-
Lau:ʻOku fifili ʻa Siua pe ʻe hohaʻa ʻa e pule ngāué ʻi heʻene taʻu siʻí pea mahalo pē mo e ʻikai lahi ʻene pōtoʻi ngāué. Naʻá ne fakaʻaongaʻi e tēpile faingofua ko ʻení ke teuteuʻi ha tali.
|
Ngaahi Vaivaiʻangá |
Hohaʻa Moʻoni ʻa e Pule Ngāué |
Founga Ne u Ikunaʻi ai Iá (ʻE Ikunaʻi Ia) |
|---|---|---|
|
Kei taʻu siʻi |
Mahalo ʻoku siʻi ʻene ʻiló pe pōtoʻi ngāué |
Kuó u maʻu ha aʻusia taʻu ua ʻi hono fakahoko ʻo e ngaahi tokoni fakakomipiutá mo maʻu ha ngaahi tohi fakamoʻoni ako fakatekinikale. ʻI heʻeku ngāueʻanga fakaʻosi ko ha tokotaha tokoni fakatekinikalé, naʻá ku fokotuʻu ai ha meʻangāue faingofua ki hono ʻilo ʻo e ngaahi palopalemá ʻa ia ne u lava ai o maʻu vave mo fakaleleiʻi e ngaahi fiemaʻu Faka-Komipiuta ʻa ha kau kasitomā tokolahi ʻi he ʻaho kotoa pē. Ko hono olá, naʻá ku fakaleleiʻi ai ha ngaahi fiemaʻu tokoni ʻe 1,000 tupu ʻi ha taʻu ʻe ua, ʻo liunga ua ia he meʻa ne lava ʻe hoku ngaahi kaungā-ngāué ʻo faí. ʻOku ou maʻu ha loto-falala ʻe lava ke hoko ʻeku pōtoʻi ngāué mo e taukeí ko ha meʻa mahuʻinga ki hoʻomou kautahá. |
-
Aleaʻi:Ko e hā naʻá ke fakatokangaʻi fekauʻaki mo e founga naʻe tali ai ʻe Siua e meʻa ne hohaʻa ki ai e pule ngāué?
-
Lau:ʻI he lolotonga ʻo e uiké, vakai, peesi 214 ʻi he fakamatala fakalahí ki ha ngaahi akoako lahi ange fekauʻaki mo hono liliu ʻo e koví ki ha lelei.
2. Fai ha Ngaahi Fehuʻi
-
Lau:ʻE ʻi ai pē taimi ʻi he fakaʻosinga ʻo e ʻinitaviú, ʻe ʻeke atu ai pe ʻoku ʻi ai haʻo fehuʻi? ʻOku totonu ke ke ʻosi teuteu ha ngaahi fehuʻi ke tokoni atu ke ke maʻu ai ha fakamatala lahi ange pea mo fakahaaʻi hoʻo tokanga moʻoni ki he faingamālie ngāué. Ko ha ngaahi sīpinga ʻeni ʻe niʻihi:
-
ʻOku tokoni fēfē nai ʻa e lakanga ko ʻení ki he kautahá?
-
ʻOku fēfē nai ʻa e ako ki he lakanga ko ʻení?
-
Ko e hā nai hoʻo fakakaukau ki he kautahá ʻi ha taʻu ʻe nima mei heni?
ʻOua naʻá ke fehuʻi fekauʻaki mo e paʻangá, ngaahi lelei ʻoku maʻu mei he ngāué, pe taimi-tēpilé ʻi he tuʻunga ko ʻeni ʻo e ʻinitaviú. ʻOua naʻá ke talanoa fekauʻaki mo e ngaahi meʻá ni kae ʻoua kuo ʻohake ia ʻe he pule ngāué pe fokotuʻu atu ia. Ke ako lahi ange fekauʻaki mo e founga aleá, vakai, peesi 215–17 ʻiate koe pē ʻi he fakamatala fakalahi ʻi he uike ní.
-
3. Fakaʻosi Lelei ʻa e ʻInivatiú
-
Lau:ʻE malava ke hanga ʻe he meʻa naʻá ke lea ʻaki mo fakahoko ʻi he fakaʻosinga hoʻo ʻinitaviú ʻo ʻai e fai ʻinitaviú ke ne manatuʻi lelei hoʻomo fepōtalanoaʻakí. Muimui he ngaahi fakahinohino ko ʻení:
-
ʻI hoʻo tuʻu ke ʻalú, sio hangatonu ki hono fofongá, malimali, mo toe lulululu (kapau ʻoku lelei ʻeni ʻi homou anga fakafonuá).
-
Ui ʻaki e tokotaha fai ʻinitaviú hono hingoá.
-
Fakamālō ki he fai ʻinitaviú ko hono taimí mo ʻene tokangá.
-
Fakapapauʻi pe ko e hā e ngaahi sitepu hokó pea mo e founga ke vakaiʻi ai kinautolú. Te ke lava ʻo fehuʻi ange, “Ko e hā e ngaahi sitepu hokó, pea te u vakaiʻi fēfē nai ia?”
-
Fakahaaʻi hoʻo mahuʻingaʻiá ʻaki haʻo pehēange, “Naʻá ku fiefia ʻi heʻeta pōtalanoá mo ʻamanaki atu ke toe fanongo meiate koe,” pe “ʻOku ou maʻu ha loto falala te u lava ʻo fakahoko ha liliu heni.”
-
-
Aleaʻi:ʻE tokoni fēfē kiate koe hono fakahoko ʻo e ngaahi meʻá ni ke ke maʻu ai ha ngaahi ʻinitaviu leleí?
Fakaʻosí
-
Mamataʻi:“Amy Nails Her Interview [Lavaʻi Lelei ʻe ʻEma ʻEne ʻInitaviú],” maʻu ʻi he srs.lds.org/videos. (ʻIkai ha vitiō? Lau ʻa e peesi 126.)
-
Aleaʻi:Ko e hā e ngaahi meʻa mahuʻinga taha naʻá ke ako mei he vahe ko ʻení?
-
Lau:Kuó ke maʻu ʻeni ha ngaahi taukei fakaʻinitaviu lahi ke tokoni atu ke ke ngāue fakapotopoto.
Ngāue ʻi he Tui + Ngāue Mālohi + Ngāue Fakapotopoto = Lavameʻa
Kuo ʻosi talaʻofa ʻa e ʻEikí, “Kapau te mou mateuteu, ʻe ʻikai te mou manavahē” (T&F 38:30). Teuteu ʻaki haʻo lotua ha tokoni mo akoako ki he lahi taha te ke ala lavá.