Ngaahi Maʻuʻanga Tokoní
Ko e Mahuʻinga ʻo e Ngaahi Fakamatala Tākiekina-Mālohí
ʻOku vahevahe ʻe Tileni e founga naʻe tokoniʻi ai ia ʻe he ngaahi fakamatala tākiekina-mālohí ke ne ʻasi makehe ko e tokotaha totonu ia ke filí ʻi ha founga fili ke fakangāueʻi faingataʻa.
“Neongo kapau ʻoku ʻi ai haʻo ngāue, ʻoku lelei ke mou teuteu mo akoako hoʻomou ngaahi fakamatala tākiekina-mālohí. Naʻá ku ʻosi ʻilo pē ʻe tukuange au ʻi hono fakatokosiʻi ʻemau kau ngāué, ko ia ne kamata leva ʻeku kumi ngāué. Naʻá ku fakatokangaʻi ai ʻoku fie maʻu ke u foki ʻo fengāueʻaki mo e kakaí … kaekehe, ko ʻeku ngāué ʻoku kiʻi makehe ia, ka ʻoku ʻi ai pē mo ha niʻihi kehe ʻoku nau maʻu e ngaahi taukei mo e pōtoʻi ngāue tatau. Naʻá ku maʻu ha lakanga ʻatā ʻi he ʻinitanetí peá u teuteu leva ʻeku tohi kole ngāué mo e tohi aʻusia fakaako mo fakangāué. Naʻá ku ʻilo ʻe tokolahi ʻaupito e tohi kole ngāue ki aí, tautautefito pē koeʻuhí naʻe tuʻuaki e lakanga ko ʻení ʻi ha feituʻu ne lava ke sio ki ai e tokotaha kotoa pē. Kuó u ʻosi ako fekauʻaki mo e ngaahi fakamatala tākiekina-mālohí peá u ʻiloʻi ko e meʻa mahuʻingá ia. Neongo naʻe maʻu ʻe he niʻihi kehé ha ngaahi taukei tatau, ka naʻe ʻikai ke maʻu ʻe ha toe taha e ngaahi aʻusia pe lavameʻa ne u maʻú. Ne u faʻu ha tohi aʻusia fakaako mo fakangāue lelei ʻo fakatatau mo e ngaahi fiemaʻu ʻa e pule ngāué, peá u fakakau ai ha ngaahi sīpinga mo ha ngaahi lavameʻa mahuʻinga. Naʻe fetuʻutaki mai ʻa e pule ngāué ʻi ha ngaahi ʻaho siʻi pē mei hono fakahū ʻeku ngaahi tohi kole ngāué.
“Naʻe iku ʻo u foua ha ngaahi ʻinitaviu lahi—naʻe fai ha niʻihi ʻi he telefoní pea niʻihi ʻi ha talanoa vitiō. Naʻá ku teuteu ha ngaahi fakamatala tākiekina-mālohi ki he ngaahi fehuʻi ʻinitaviu naʻá ku ʻamanaki ki aí. Koeʻuhí naʻe ʻikai fakahoko mata ki he mata e ʻinitaviú, ne u lava ai ʻo fakaʻaongaʻi ʻeku ngaahi meʻa naʻe hikí. Naʻá ku ʻiloʻi naʻa nau ʻinitaviu foki mo ha niʻihi kehe, ko ia naʻe pau ke u feinga ke u makehe. Naʻe tokoni e ngaahi fakamatala tākiekina-mālohí ke fakamatalaʻi lelei au. Naʻe fakamoʻoniʻi ʻe he ngaahi fakamatala tākiekina-mālohí ko hai au. Ne nau fakamoʻoniʻi ʻoku ou loto fiemālie ke maʻu e ngāué pea fakahoko lelei ia. Naʻe ʻilo ʻe he pule ngāué te u ngāue lelei maʻanautolu koeʻuhí naʻá ku lava ʻo vahevahe ha ngaahi fakatātā mo ha ngaahi talanoa ʻo e taimi naʻá ku fakahoko ai e ngaahi meʻa tatau ʻi he kuohilí. Naʻá ku maʻu e ngāué! ʻOku ou ʻilo ko ʻeku fakamatala tākiekina-mālohí naʻe tupu mei ai e faikehekehé.”
Foki ki he peesi 67.