Ngaahi Maʻuʻanga Tokoní
Ko ha Mana Ia
ʻOku vahevahe ʻe Sione ʻa e meʻa naʻá ne ako ʻi heʻene fakaʻaongaʻi e founga lavameʻá ki heʻene kumi ngāué.
Ngāue ʻi he Tui + Ngāue Mālohi + Ngāue Fakapotopoto = Lavameʻa
“Naʻá ku maʻu ha ngāue lelei, pea naʻe lelei ʻeku fakahoko iá. Naʻe fiefia ʻeku pule ngāué ʻi he ngāue naʻá ku faí, pea naʻe faingofua ai ke u fakahoko ha ngāue lelei maʻana. Naʻá ku maʻu mo hoku uaifí ha ongo ʻofefine fakaʻofoʻofa mo ha pēpē ne kei feitamaʻi. Ki ha fāmili toki kamata foʻou, ne hangē kuo mau maʻu e meʻa kotoa ne mau fie maʻú, tautautefito ki ha kahaʻu ʻoku leleí.
“Pea puke leva hoku uaifí. Ne ma fakahoko homa lelei tahá pea faifai ʻo ma ʻilo ʻokú ne fie maʻu ha tokoni fakafaitoʻo ʻi ha maile ia ʻe 500 mei homau nofoʻangá. Ko ia ne mau hiki leva. Ne u fakapapauʻi ʻokú ne sai pē mo e fānaú peá u foki leva ki heʻeku ngāué kae ʻoua kuó u maʻu ha ngāue ofi ange ki he fāmilí. Ne ʻikai te u fakakaukau ʻe fuoloa; naʻe lelei ʻaupito hoku tuʻunga fakaako mo fakangāué pea kuo teʻeki ke u faingataʻaʻia ha kumi ngāue ʻi he kuohilí. Ne u maʻu ha loto falala te u lavaʻi toko taha ia, ka ʻi ha faʻahinga ʻuhinga, ne ʻikai ke u lava ʻo maʻu ha ngāue.
“Naʻe ʻalu mei he ngaahi uiké ki ha ngaahi māhina. Ne u ngāue ʻi ha kolo kehe ʻo kumi ngāue ki ha kolo ʻe taha, mo tokanga pē ki hoku uaifí mo e fāmilí. Ko ha feinga koto kulanoa ia. Ne u fie maʻu tokoni. Ne ʻikai ke u lavaʻi toko taha ia. Naʻá ku tafoki ki heʻeku Tamai ʻi he Langí. Naʻá ku ʻaukai mo lotu. Naʻe iku ʻeku kumi ngāué ki ha ngāue ʻi he tui. Naʻá ku ngāue mālohi ʻaupito, ʻo kole ki he ʻEikí ke tāpuekina au ʻi heʻeku feingá. Ka naʻe vave ʻeku fakatokangaʻi naʻe ʻikai feʻunga ʻa e ngāue mālohi peé. Naʻe fie maʻu ke u ngāue fakapotopoto ange. Naʻe ʻi ai ha ngaahi founga lelei ange ki he kumi ngāué—ngaahi taukei ngāue ne fie maʻu ke u ako mo fakatupulaki.
“ʻI heʻeku fakatahaʻi ʻeku tuí, ngāue mālohí, mo fakatupulaki e ngaahi taukei ngāué, naʻe lelei ange ʻa e ngaahi meʻá. Naʻe kamata ke u maʻu ha ngaahi ʻinitaviu pea maʻu ha ngāue lelei. Naʻe fuʻu faingataʻa ʻaupito ʻeku mamaʻo mei hoku fāmilí mo foua ha taimi faingataʻa peheé. Ka naʻe iku lelei ia, pea ne u ako lahi mei ai. Ko ha mana moʻoni ʻeni ki hoku fāmilí. ʻOku ou houngaʻia naʻá ku maʻu ʻa e aʻusia ko ʻení pea ʻoku ou houngaʻia ʻi he Tamai Hēvaní ʻi Heʻene tāpuekina au ʻi heʻeku feingá.”
Foki ki he peesi 13.