Akó—Taimi Lōloa Tahá: Miniti ʻe 45

tuʻunga

Lau:ʻOku muimui ʻa e kumi ngāue ola leleí ʻi he kiʻi founga faingofua ko ʻení:

Ngāue ʻi he Tui + Ngāue Mālohi + Ngāue Fakapotopoto = Lavameʻa

ʻOku tokoni e ngaahi taukei ʻinitaviú ke ke ngāue fakapotopoto ange. Koeʻuhí ko e mātuʻaki mahuʻinga ʻa e ngaahi ʻinitaviú, te tau fakaʻaongaʻi e vahe ʻe tolu hono hokó ke ako mo akoako ai e ngaahi taukei ʻinitaviú.

Kumi Ngāue ʻa Siuá

Lau:Ngaahi ongoongo lelei lahi ange. Naʻe fetuʻutaki ʻa Sūlia mei he ABC Marketing kia Siua hili ʻene maʻu ʻene tohi aʻusia fakaako mo fakangāué pea mo e tohi tala ngāué. Naʻá ne fakataimitēpileʻi ha ʻinitaviu mo ia ʻi ha ʻaho ʻe ua mei ai ki he ngāue ʻi he tafaʻaki maʻuʻanga tokoni fakatekinikalé. Kuo manavasiʻi maʻu pē ʻa Siua lolotonga e ngaahi ʻinitaviu ngāué pea hohaʻa pe ko e hā ha ngaahi fehuʻi ʻe ala ʻeke ange ʻe Sūlia. Naʻá ne fakapapauʻi naʻe ʻikai lelei ʻene ongo ʻinitaviu kimuʻá, ka ʻoku ʻikai ke ne fakapapauʻi pe ko e hā e meʻa ʻe lava ke ne fakaleleiʻí. ʻOku loto ʻa Siua ke mateuteu.

Aleaʻi:Ko e hā ha ngaahi founga te ke lava ai ʻo fakafehokotaki kia Siua?

Mamataʻi:“The Interview [Ko e ʻInitaviú],” maʻu ʻi he srs.lds.org/videos. (ʻIkai ha vitiō? Lau ʻa e peesi 109.)

video icon

Lau:ʻOku kau ʻa e ʻinitaviú ʻi he ngaahi sitepu fakaʻosi hono maʻu ha ngāué. Ko e taumuʻa ʻo ha ʻinitaviu ke maʻu ha faingamālie ngāue. Kuo talaʻofa ʻa e ʻEikí, “Kapau te mou mateuteu, ʻe ʻikai te mou manavahē” (T&F 38:30). Kapau te ke mateuteu lelei, te ke lava ʻo fetongi e manavasiʻí ʻaki ha loto-falala.

Te ke ako ʻi he vahe ko ʻení ke ke ngāue fakapotopoto ʻaki hono fakatupulaki e ngaahi taukei fakaʻinitaviu ko ʻení:

1. Teuteu kimuʻa he ʻinitaviú.

2. Kamataʻi lelei ʻa e ʻinitaviú.

3. Fakaʻaongaʻi hoʻo Ko Au ʻi ha Sekoni ʻe 30.

4. Fakaʻaongaʻi ha ngaahi fakamatala tākiekina-mālohi.

1. Teuteu Kimuʻa ʻi he ʻInitaviú

Lau:Meʻaní ʻe ʻikai lelei ke ʻilo e ngaahi fehuʻi ʻe ʻeke atu ʻi ha ʻinitaviu?

Te ke lava.

ʻOku ʻeke ʻe he tokolahi taha ʻo e kau fai ʻinitaviú ha ngaahi fehuʻi ʻinitaviu angamaheni mo ha ngaahi fehuʻi felāveʻi tonu mo e foʻi ngāué. Kuó ke ʻosi ʻilo e founga ke ʻilo ai e ngaahi fie maʻu ʻa e pule ngāué, koeʻuhí ke ke lava ʻo fakaʻaongaʻi e taukei ko iá ke ke ʻiloʻi e meʻa ʻe malava ke ʻeke atu ʻe he pule ngāué. Hangē ko ʻení, ʻoku ʻiloʻi fakapapau ʻe Siua ʻe fehuʻi ange fekauʻaki mo e talitali kakaí, fakaleleiʻi ʻo ha palopalemá, pea mo e fetuʻutaki fekauʻaki mo e ngaahi meʻa fakatekinikalé ʻi ha lea faingofua.

ʻEkitivitií _{(miniti ʻe 3)}

Vakai ki he fakamatala ngāue naʻá ke haʻu mo iá, pe fakakaukau ki he ngāue ʻokú ke fie maʻú. Hiki ha fehuʻi ʻe ua ʻokú ke pehē ʻe ala ʻeke atu ʻe ha tokotaha fai ʻinitaviu, pea vahevahe ia mo e kulupú.

1.

2.

2. Kamataʻi Lelei ʻa e ʻInitaviú

Lau:ʻI he taimi ʻoku kamata ai ha ʻinitaviu, ʻoku ʻi ai ha fanga kiʻi meʻa faingofua te ke lava ʻo fai ke ke ʻasi makehe ai ʻi he fuofua taimí. ʻI hoʻomou kulupú, mou taufetongi ʻi hono lau e lisi ʻi laló ʻo e ngaahi meʻa ke fakahoko mo e ngaahi meʻa ke ʻoua ʻe fakahokó.

Fakahoko	ʻOua Fakahoko
ʻAi ke kiʻi makehe ange hoʻo teuteú ʻi he tuʻunga teuteu ʻa e kautahá.	Tui vala noaʻia.
Aʻu ki ai ʻi ha miniti ʻe 5-10 kimuʻa.	Tōmui pe aʻu ki ai kimuʻa ʻi ha miniti ʻe 10 pe lahi ange.
Fakafōtunga lelei.	Fakafōtunga kovi.

ʻEkitivitií _{(miniti ʻe 3)}

Fakafehoanaki e ongo fakatātā ʻi laló. ʻI he ongo fakatātaá, ʻoku ʻi he tafaʻaki toʻohemá ha tokotaha ke ʻinitaviu. Aleaʻi fakakulupu pe ko e hā e faʻahinga fakafōtunga ʻoku tuku mai ʻe he tokotaha kumi ngāué ʻi he ongo fakatātaá takitaha.

ʻikai mateuteu ki he ʻinitaviú

mateuteu ki he ʻinitaviú

3. Fakaʻaongaʻi hoʻo Ko Au ʻi ha Sekoni ʻe 30

Lau:Ko e angamahení, ko e taha ʻo e ngaahi fehuʻi ʻinitaviu ʻe fua ʻeke atú ko e, “Fakamatala angé fekauʻaki mo koé.” Ko hono liliu ʻo e Ko Au ʻi ha Sekoni ʻe 30 ki ha tūkunga ʻinitaviú, ko ha tali lelei ia ki he fehuʻi ko ʻení. ʻOku kiʻi kehe ʻa e Ko Au ʻi ha Sekoni ʻe 30 ki ha ʻinitaviú. Hangē ko ʻení, ʻoku ʻikai faʻa fie maʻu ia ke ke fakaʻaongaʻi ho hingoá. Pea makehe mei he kole ki ha ngaahi fetuʻutaki ʻo hangē ko ia te ke fai ʻi haʻo fengāueʻaki mo e kakaí, ʻokú ke fakaʻosi ia ʻaki haʻo fakahaaʻi ange hoʻo fie ngāue ʻi he kautahá pe lakangá.

ʻEkitivitií _{(miniti ʻe 4)}

Tau lau leva ha sīpinga ʻe ua ʻo ha tali ʻa ha kakai ki he ʻuluaki fehuʻi ʻo e ʻinitaviú. Fili ʻa e ngaahi fatongiá pea fakatātaaʻi ʻa e ngaahi meʻá ni.

Ko e Sīpinga Koví

Fai ʻInitaviú: “Kimuʻa peá ta kamatá, kātaki ʻo kiʻi fakamatala mai angé fekauʻaki mo koé.”

Tokotaha Kumi Ngāué: “Sai, naʻá ku tupu hake ʻi Kenisesi ʻi ha fāmili tokolahi. Kuó u mali ʻeni pea maʻu ha fānau ʻe toko tolu mo ha kiʻi kulī. ʻOku mau manako he fefolauʻakí, pea ʻoku mau fakaʻaongaʻi homau taimí ʻi he lahi taha te mau lavá ke nofo ʻi he veʻe anovaí. Ne mau toki kumi pē ha vaka foʻou he taʻu kuo ʻosí. Naʻe kiʻi mamafa, ʻa ia ko ha ʻuhinga ia ʻe taha ʻoku ou kumi ngāue aí. ʻOku lahi ʻeku ngaahi aʻusia he fengāueʻaki mo e kakaí. ʻI he taʻu ʻe 20 kuohilí, naʻá ku kamata ngāue ʻi heʻeku taʻu 19 ko ha taha ngāue kānita ʻi ha pangikē. Ko ia naʻá ku kiʻi ako ai fekauʻaki mo e paʻangá mo e ngaahi meʻa fakapaʻangá. Hangē ko ʻení, naʻá ku ako ʻoku ʻikai puke ʻe he ngaahi pangikeé ia ʻete paʻangá; ka ʻoku nau ʻave pē ia pea toe nō atu ia ki tuʻa ke maʻu ha tupu. Kaekehe, naʻá ku ngāue ai ʻi ha ngaahi taʻu siʻi, peá u hū leva ki he ʻunivēsití. Naʻe ʻikai fuʻu sai ʻeku akó. ʻOku ʻikai ke u fuʻu saiʻia au he akó. Ne u maʻu ha ngāue ʻi he pisinisi fakamāketi haku kaungāmeʻa. Ko e lahi taha ʻeku ngāué he ngaahi meʻa fakaʻōfisí—hangē ko e tali telefoní, meilí, ngaahi fakatahá, ngaahi meʻa peheé. Ka ko e ngāue mo hoku ngaahi kaungāmeʻá naʻe ʻikai faʻa lelei ia, ko ia naʻá ku mavahe mei he ngāue ko iá ʻo kumi ha ngāue ne lelei angé. ʻOleva angé … Naʻá ku ngāue ʻi ha ngaahi feituʻu kehe, ka ʻoku ʻikai ke u lava ʻo manatuʻi honau ngaahi hingoá. ʻIo, ko e ngāue lelei taha naʻá ku ngāue aí ko ha lakanga talitali kakai naʻá ku lava ai ʻo ngāue mei ʻapi. Naʻe lava pē ke u ngāue ʻi hoku vala mohé, tali e telefoní, mo ngāue ʻi heʻeku komipiutá. Naʻe fuʻu sai ʻaupito. Kae kehe, ʻoku ou manako ke ngāue, pea ʻoku ou saiʻia he kakaí. Te u ngāue lelei maʻamoutolu.”

Ko e Sīpinga Leleí

Fai ʻInitaviú: “Kimuʻa peá ta kamatá, kātaki ʻo kiʻi fakamatala mai angé fekauʻaki mo koé.”

Tokotaha Kumi Ngāué: “Ko e konga lahi taha ʻo ʻeku ngāue maʻuʻanga moʻui he taʻu ʻeni ʻe 20 ko e ngāue ʻi he tafaʻaki ʻo e ngaahi meʻa fakapaʻangá mo e pangikeé. Naʻá ku kamata ko ha tokotaha ngāue ʻi he kānitá ʻi ha pangikē fakalotofonua peá u hiki mei ai ki he tafaʻaki fakapulé. Naʻá ku fakatokangaʻi ai e mahuʻinga ʻo e akó peá u fakakakato ha mataʻitohi ʻi he tafaʻaki ʻo e ngaahi meʻa fakapaʻangá. Naʻá ku poto ʻi hono puleʻi lelei ʻo e kakaí, ngaahi fakamolé, mo aʻusia e ngaahi taumuʻa fefakatauʻakí. Hangē ko ʻení, ʻi heʻeku ngāue fakamuimuí naʻá ku tokangaʻi ha vaʻa ʻo e kautahá naʻe tōlalo, pea ʻi loto ha māhina ʻe ono ne mau lakasi ʻemau ngaahi taumuʻa fefakatauʻakí. ʻOku ou saiʻia he lakanga ngāue ko ʻení koeʻuhí ʻoku ngali hangē ʻeni ha pole tataú.”

Aleaʻi:Ko e hā naʻe lelei ange ai ʻa e sīpinga hono uá?

ʻEkitivitií _{(miniti ʻe 4)}

Vakai ki he tohi fakamatala ngāue naʻá ke haʻu mo iá, pe fakakaukau ki he ngāue ʻokú ke fie maʻú. Fakakaukauloto ʻoku ʻi ai haʻo ʻinitaviu ʻi ha ʻaho pē ʻe ua ki he lakanga ko iá. ʻI he konga ʻoku ʻatā ʻi laló, hiki ai ha Ko au ʻi ha Sekoni ʻe 30 ko ha tali ki he kolé, “Fakamatala mai angé fekauʻaki mo koé.” Ngāue fakataha leva mo ho hoa ngāué ʻo vahevahe ia.

4. Fakaʻaongaʻi ha Ngaahi Fakamatala Tākiekina-Mālohi

Lau:ʻOku totonu ke fakaʻaongaʻi e ngaahi fakamatala tākiekina-mālohí ke tali e konga lahi ʻo e ngaahi fehuʻi ʻinitaviú. ʻOku manatua fuoloa mo nau ongo mālohi pea ʻe tokoni atu ke ke makehe ai ko e tokotaha totonu koe ke filí.

Manatuʻi ke muimui ʻi he founga ʻo e fakamatala tākiekina-mālohí:

founga ʻo e ngaahi fakamatala tākiekina-mālohí

ʻEkitivitií _{(miniti ʻe 4)}

Tau toe lau e ngaahi sīpinga ʻinitaviu ko ʻení mei he vahe 4. Fili ʻa e ngaahi fatongiá pea fakatātaaʻi ʻa e ngaahi meʻá ni.

Ko e Sīpinga ʻAvalisí

Fai ʻInitaviú: “Fakamatala angé ki ha taimi naʻá ke fakahoko ai ha ngāue talitali kakai lelei.”

Tokotaha Kumi Ngāue 2: “ʻOku mahuʻinga ʻaupito ʻa e ngāue talitali kakaí kiate au. Ko e kau kasitomaá ʻa e meʻa mahuʻinga ki heʻetau fakalakalaka maʻu peé. Kuó u ʻiloʻi maʻu pē, kapau ʻe tonu ʻetau fakafōtunga ki he kau kasitomaá, ʻe hokohoko atu leva ʻenau fengāueʻaki mo kitautolú. Kuó u maʻu ha ngaahi aʻusia lahi ʻi he ngāue talitali kakaí, pea ʻoku ou lelei ʻaupito ai. ʻOku loto e kau kasitomaá ke tau ongoʻi ʻenau ngaahi fiemaʻú mo nau ʻilo ʻoku tau fanongo ange. ʻOku mahuʻinga ke tau fai hotau lelei tahá ke tonu ʻetau ngāué ʻi he fuofua taimí pea fakatonutonu ʻetau ngāué ʻi he vave tahá ʻi haʻatau fai ha fehalaaki. ʻOku ou tui ki he kupuʻi lea ʻoku pehē, ʻoku tonu maʻu pē ʻa e kasitomaá.”

Ko e Sīpinga Leleí

Fai ʻʻInitaviú: “Talamai angé fekauʻaki mo ha taimi naʻá ke fakahoko ai ha ngāue talitali kakai lelei.”

Tokotaha Kumi Ngāue 3: “ʻOku ou taukei ʻaupito ʻi he ngāue tokoni ki he kau kasitomaá. Hangē ko ʻení, ʻi heʻeku ngāue he Falekoloa YZ, naʻe ʻi ai ha taimi ʻe taha ne ʻi ai haʻamau kasitomā fuoloa naʻe ʻikai maʻu e meʻa ia naʻá ne ʻotá (order). ʻI heʻene tā mai kiate aú, naʻá ne lotomamahi peá ne pehē te ne kaniseli ʻene pisinisi kotoa pē mo kimautolú. Naʻá ku tuku ha taimi ke u fanongo mo feinga ke mahino kiate au hono tūkungá, peá u ʻoange leva ha tali naʻe fakafiemālie kiate ia. Ko hono olá, ne ʻikai ngata pē ʻi heʻemau kei maʻu e kasitomaá ka naʻá ne fakalahi ʻaki ʻene ngaahi ʻota (order) ʻiate kimautolú ha pēseti ʻe 200. ʻOku ou maʻu ha loto falala te u lava ʻo fakaʻaongaʻi e ngaahi taukei talitali kakai tatau ko ʻení ke ngāue maʻamoutolu.”

Aleaʻi:Naʻe fakaʻaongaʻi fēfē ha fakamatala tākiekina-mālohí ke ne ʻai e sīpinga hono uá ke lelei angé?

ʻEkitivitií _{(miniti ʻe 6)}

Fakakaukauloto kuó ke tō atu eni ki he lotolotonga ʻo e ʻinitaviú. Hangehangē ʻe ʻeke atu ʻe he fai ʻinitaviú ha ngaahi fehuʻi ʻinitaviu angamaheni kehé. Hiki hoʻo fakamatala tākiekina-mālohi ki he fehuʻi takitaha ʻi laló.

Ko e hā ha taha ʻo ho ngaahi mālohingá?

Ko e hā hoʻo aʻusia fakapalōfesinale lelei tahá?

Ko e hā ʻoku totonu ai ke mau fakangāueʻi koé?

ʻEkitivitií _{(miniti ʻe 6)}

Mou lau fakakulupu e ngaahi fakahinohino kotoa pē, pea kamata leva ʻa e ʻekitivitií.

Sitepu 1: Tuʻu kotoa ki ʻolunga ʻo ʻunu ki ha feituʻu ʻoku ʻataá ke tau akoako fakahoko vave ai. ʻAi ke mou tautau toko ua ʻo fehangaaki.

Sitepu 2: ʻOku ʻeke ʻe he tokotaha ʻuluakí ha taha ʻo e ngaahi fehuʻi ʻe tolu mei he peesi 105.

Sitepu 3: ʻOku tali ʻe he tokotaha hono uá ʻa e fehuʻí ʻo fakaʻaongaʻi ha fakamatala tākiekina-mālohi.

Sitepu 4: Fakahoko ha feedback:

• Naʻe vahevahe nai ʻe he tokotahá ha sīpinga mo ha ola?

• Naʻe makehe nai kiate koe?

Sitepu 5: Mo fetongi leva ʻo toe fakahoko e meʻa tatau.

Sitepu 6: Mou fetongi hoa pea toe fakahoko tuʻo nima ʻa e ʻekitivitií.

Fakaʻosí

Aleaʻi:Ko e hā ha niʻihi ʻo e ngaahi meʻa mahuʻinga taha naʻá ke ako mei he vahe ko ʻení?

Lau:Kuo kamata ke ke ako ha ngaahi taukei fakaʻinitaviu ʻe tokoni atu ke ke ngāue fakapotopoto ai.

Ngāue ʻi he Tui + Ngāue Mālohi + Ngāue Fakapotopoto = Lavameʻa

Kapau ʻokú ke mateuteu, ʻoku ʻikai fie maʻu ia ke ke manavahē. Lotua ha tokoni, pea teuteu leva mo akoako ia ʻi he lahi taha te ke ala lavá. Te tau ako ha ngaahi taukei fakaʻinitaviu lahi ange ʻi he vahe hono hokó.