Ngaahi Maʻuʻanga Tokoní
ʻAi Ke Faingofua
Tau fanongo ki ha pule ngāue ʻe taha ʻi heʻene fakamatalaʻi ha ngaahi meʻa mahuʻinga ʻe niʻihi ʻo e hoko ko ha tokotaha ngāue leleí.
“ʻOku ou fakangāueʻi ha kakai he taʻu kotoa pē mo vakai ki heʻenau tupulaki ʻi he ngāué pe ko e hoko atu ʻenau moʻuí. Tuku muʻa ke u vahevahe atu e ngaahi meʻa angamaheni ʻoku mau fie maʻu mei heʻemau kau ngāué. ʻUluakí, ʻoku fie maʻu ke nau falalaʻanga. Uá, kuo pau ke nau fengāueʻaki lelei mo e niʻihi kehé. Pea tolú, ʻoku mau fie maʻu kinautolu ke nau tokoni. ʻI heʻenau fai e ngaahi meʻa iiki ʻe tolu ko ʻení, ʻoku makehe ʻaupito ai ʻenau lavameʻa mo kimautolú. Tuku ke u vahevahe atu ha aʻusia ko ha sīpinga.
“Ne mau toki fakangāueʻi ha toko ua ke na ngāue ʻi heni. Naʻe tatau pē hona tuʻunga ʻi he ngāué. Ne na kamata he taimi tatau pē. Kuo ngāue lelei maʻu pē ʻa e tokotaha ʻuluakí. ʻOku ʻikai teitei tōmui ki he ngāué, tātaaitaha haʻane tā puke mai, pea maau ʻene meʻa kotoa pē. ʻOku ʻikai toe fetongi ia ʻe he kakai kehé he ngāué. ʻOku feohi mo fengāueʻaki lelei mo e niʻihi kehé. Makehe mei aí, ʻoku ngāue lelei foki. ʻOku ʻikai ngata pē ʻi he lava lelei e ngāué, ka ʻokú ne toe kumi foki mo ha ngaahi meʻa kehe ke fai. Kuó ne ngāue ʻeni maʻamautolu ʻi ha ngaahi māhina siʻi, pea kuo mau ʻosi sio atu ki ha ngaahi lakanga ke hiki ki ai pe hiki ʻene vāhengá.
“ʻOku ʻikai fuʻu lelei ʻa e tokotaha hono uá. ʻOku tōmui mo kumi ʻuhinga maʻu pē, mei he puke ʻene fānaú ki he tōmui ʻi he pasí. Hangē ʻoku ʻikai lava ia ʻo ngāue fakamāú, pea pau leva ke fakaleleiʻi ʻe he niʻihi kehé ʻene ngaahi tōnounoú. Kuó u toe fakatokangaʻi foki ʻoku fakamoveuveu ʻi heʻene ʻi hení. Hangē ʻoku ʻikai lava ia ʻo ʻosiki e uiké taʻe kau ʻi ha faʻahinga taʻefemahinoʻakí. Kuo haʻu ʻeku kau ngāué kiate au ʻo lāunga mai fekauʻaki mo ha ngaahi meʻa naʻá ne lea ʻaki pe fai. ʻOku ʻikai ke u fie kau au he faʻahinga meʻa peheé. ʻOku ou fakaʻamu pē ʻe lava ʻo feohi lelei pe angalelei ange ʻi he ngāuéʻangá. Ko hono fakaʻosí, ʻoku ʻikai fuʻu ngāue lelei ia. Ko e koloa pē ke fai ʻene ngāué, ka he ʻikai ke u pehē ʻoku mau maʻu ha faʻahinga lelei mei heʻemau fakangāueʻi iá. ʻOku ou palani ke tukuange atu ia.
“ʻOku faingofua hono tauhi maʻu ha ngāué. ʻAi ke ke falalaʻanga, fakafaingofuaʻi e ngāue mo koé, pea ngāue lelei. Kapau te ke lava ʻo fai e ngaahi meʻa ko ʻení, mahalo te ke maʻu maʻu pē ha ngāue mo ha ngaahi faingamālie lahi ange ʻi he taimi te ke fie maʻu ai kinautolú.”
Foki ki he peesi 175.
Tupulakí
Ko e vahevahe ʻe ʻEniselā e meʻa ʻokú ne fai ke tupulaki ai ʻi he ngāueʻangá.
“Naʻá ku ngāue mālohi ke maʻu ʻa e ngāue ʻoku ou maʻú, pea ʻoku ou pehē ʻoku ou houngaʻia ai. Ko ha ngāueʻanga lelei ia ʻoku ou fiefia ai mo maʻu moʻui mei ai hoku fāmilí. ʻOku ou palani ke fakalakalaka ka ʻoku ou fie maʻu foki ke ngāue lelei he taimí ni. Ko ia ai, kuó u fakaʻaongaʻi ʻeku ngaahi taukei kumi ngāué ke fakatupulaki heni ʻi he ngāueʻangá. ʻOku fakaʻaiʻai au ʻe heʻeku ʻilo ʻoku kei lahi pē meʻa ke u akó, pea ʻi heʻeku aʻusia ʻeku ngaahi taumuʻa fakaʻahó ʻoku ou tupulaki ai ki ha ngaahi taumuʻa taimi lōloa. ʻOku ou loto ke u toe lelei ange ʻi he ʻaho kotoa pē.
“ʻOku ou fekumi maʻu pē ki ha founga ke u ngāue lelei ange ai. Ne u maʻu ha ngaahi maʻuʻanga tokoni ʻe niʻihi naʻe mātuʻaki tokoni ʻaupito, kau ai ha ngaahi tohi. Ka kuo hoko maʻu pē e kakaí ko ʻeku maʻuʻanga tokoni lelei tahá ia. Kuo loto vilitaki maʻu pē ha niʻihi ʻo hoku ngaahi kaungā-ngāué mo ha kau pule kehe ke nau tokoniʻi au. Ko e meʻa pē ke ke faí ko e kole, pea ko e tokolahi tahá ʻoku nau fiefia ke tokoniʻi koe ke ke lelei ange. Pea ʻokú ne ʻai kita ke te fie ngāue lelei ange ʻi he tuʻunga ne nau ʻamanaki mai ki aí.
“ʻOku hokohoko atu foki ʻeku feinga ke fengāueʻaki mo e kakaí. Ko e konga lahi ʻo e ngaahi lakanga ʻi heʻemau kautahá ʻoku fakafonu ia he ngaahi fakaongoongolelei hiki lakangá. Kuó u fakahoko ha ngaahi ʻinitaviu fakamatala mo ha niʻihi kehe heni ke ako lahi ange fekauʻaki mo honau ngaahi fatongiá mo maʻu ha faleʻi meiate kinautolu. Kuo tokoni ʻeni ke u fai ha ngaahi fetuʻutaki lelei mo ako ai ha ngaahi meʻa ne ʻikai ke u mei ʻiloʻi ʻe au. ʻOku ou ʻilo ʻoku ʻi ai ha faingamālie lelei ange ke fakakaukau mai ai e kakaí kiate au ʻo ka ʻi ai ha ngaahi lakanga ʻatā koeʻuhí ko ha ʻuhinga ʻe ua: ʻuluakí, ko ha tokotaha ngāue lelei au, pea uá, ʻoku nau ʻilo mo falala mai kiate au.
“ʻOku ou ʻilo foki ʻoku finangalo ʻa e Tamai Hēvaní ke u lavameʻa mo lava ʻo tupulaki. Naʻá Ne tāpuekina ʻaki au e ngāué ni, pea ʻoku ou ʻilo te Ne lava ʻo tokoniʻi au ʻi heʻeku ngāue mo feinga ke tupulakí.”
Foki ki he peesi 179.