Akó—Taimi Lōloa Tahá: Miniti ʻe 45

Lau:ʻOku muimui ʻa e kumi ngāue ola leleí ʻi he kiʻi founga faingofua ko ʻení:

Ngāue ʻi he Tui + Ngāue Mālohi + Ngāue Fakapotopoto = Lavameʻa

Naʻá ke ako ʻi he vahe kimuʻá ha taukei ke tokoni atu ke ke ngāue fakapotopoto: founga ke fakahoa ai hoʻo ngaahi taukeí ki he ngaahi fiemaʻu ʻa e pule ngāué. ʻI he vahe ko ʻení, te ke ako ai fekauʻaki mo ha taukei “ngāue fakapotopoto” ʻe taha: ngaahi fakamatala tākiekina-mālohí.

Kumi Ngāue ʻa Siuá

Lau:Kuo ʻilo ʻeni ʻe Siua ko ha tokotaha feʻunga ia ki he lakanga ʻi he tafaʻaki tokoni ʻa e ABC Marketing. Ka ʻokú ne ʻilo fakapapau ʻe ʻi ai mo ha kakai kehe ʻoku nau maʻu e ngaahi tuʻunga aʻusia tatau. Ko e meʻa naʻe tokoni kiate ia ke makehe ange aí ko ʻene ngaahi lavameʻá, ka ʻoku ʻikai ke ne fuʻu fakapapauʻi pe ʻe anga fēfē haʻane talanoa fekauʻaki mo ia. ʻOkú ne fifili ki he meʻa te ne lava ʻo fai ke ʻasi makehe ai ko e tokotaha totonu ia ke filí.

Aleaʻi:Ko e hā ha ngaahi founga te ke lava ai ʻo fakafehokotaki kia Siua?

1. Fakahoko ha Ngaahi Fakamatala Tākiekina-Mālohi

Lau:Ko e founga lelei taha ke fakahaaʻi ai ʻokú ke feʻunga mo e ngaahi fiemaʻu ʻa e pule ngāué ko ha fakamatala tākiekina-mālohi. ʻOku lave nounou e fakamatala tākiekina-mālohí ki hoʻo ngaahi pōtoʻi ngāue mo e ngaahi lavameʻa kimuʻá ʻaki hono vahevahe ha sīpinga pau mo hano ola. Fakakaukau ki ai ko ha fanga kiʻi talanoa nounou. ʻE malava ke maʻu ʻe he kakai kehé ha ngaahi tuʻunga aʻusia tatau, ka kuo ʻikai ha taha te ne fakahoko ha ngaahi meʻa tatau tofu pē mo koé. Ko ia, makehe mei ha lisi ʻo ha ngaahi meʻa ʻe lava ke vahevahe ʻe ha taha peé, fakaʻaongaʻi ha fakamatala tākiekina-mālohi.

ʻEkitivitií _{(miniti ʻe 4)}

Fili e ngaahi fatongiá pea fakatātaaʻi e ngaahi sīpinga ʻe tolu ko ʻení. ʻI hoʻo fai ʻení, fakakaukauloto hifo, “Ko hai ʻoku ʻasi makehe ko e tokotaha totonu ia ke filí?”

Ko e Sīpinga Koví

Fai ʻInitaviú: “Fakamatala angé ki ha taimi naʻá ke fakahoko ai ha ngāue talitali kakai lelei.”

Tokotaha Kumi Ngāue 1: “ʻOku ou saiʻia ʻaupito he ngāue talitali kakaí, pea ʻoku ou pehē ʻoku ou lelei ʻaupito ai. Tukukehe pē taimi ʻoku angakovi ai e kau kasitomaá. ʻOku ʻikai fie maʻu ia ke ngaahi peheʻi au. Tatali angé, ʻoku angakovi hoʻomou kau kasitomaá?”

Ko e Sīpinga ʻo e ʻAvalisí

Fai ʻInitaviú: “Fakamatala angé ki ha taimi naʻá ke fakahoko ai ha ngāue talitali kakai lelei.”

Tokotaha Kumi Ngāue 2: “ʻOku mahuʻinga ʻa e ngāue talitali kakaí kiate au. Ko e kau kasitomaá ʻa e meʻa mahuʻinga ki heʻetau fakalakalaka maʻu peé. Kuó u ʻiloʻi maʻu pē, kapau ʻe tonu ʻetau fakafōtunga ki he kau kasitomaá, ʻe hokohoko atu leva ʻenau fengāueʻaki mo kitautolú. Kuó u maʻu ha ngaahi aʻusia lahi ʻi he ngāue talitali kakaí, pea ʻoku ou lelei ʻaupito ai. ʻOku loto e kau kasitomaá ke tau ongoʻi ʻenau ngaahi fiemaʻú mo nau ʻilo ʻoku tau fanongo ange. ʻOku mahuʻinga ke tau fai hotau lelei tahá ke tonu ʻetau ngāué ʻi he fuofua taimí pea fakatonutonu ʻetau ngāué ʻi he vave tahá ʻi haʻatau fai ha fehalaaki. ʻOku ou tui ki he kupuʻi lea ʻoku pehē, ʻoku tonu maʻu pē ʻa e kasitomaá.”

Ko e Sīpinga Leleí

Fai ʻInitaviú: “Fakamatala angé ki ha taimi naʻá ke fakahoko ai ha ngāue talitali kakai lelei.”

Tokotaha Kumi Ngāue 3: “ʻOku ou taukei ʻaupito ʻi he ngāue talitali kakaí. Hangē ko ʻení, ʻi heʻeku ngāue he Falekoloa YZ, naʻe ʻi ai ha taimi ʻe taha ne ʻi ai haʻamau kasitomā fuoloa naʻe ʻikai maʻu e meʻa ia naʻá ne ʻotá (order). ʻI heʻene tā mai kiate aú, naʻá ne lotomamahi peá ne pehē te ne kaniseli ʻene pisinisi kotoa pē mo kimautolú. Naʻá ku tuku ha taimi ke u fanongo mo feinga ke mahino kiate au hono tūkungá, peá u ʻoatu leva ha tali naʻe lelei ki he kasitomaá. Ko hono olá, ne ʻikai ngata pē ʻi heʻemau kei maʻu e kasitomaá ka naʻá ne fakalahi ʻaki ʻene ngaahi ʻota (order) ʻiate kimautolú ha pēseti ʻe 200. ʻOku ou maʻu ha loto falala te u lava ʻo fakaʻaongaʻi e ngaahi taukei talitali kakai tatau ko ʻení ke ngāue maʻamoutolu.”

Aleaʻi:Ko e hā nai naʻe lelei taha ai e sīpinga hono tolú?

Lau:Naʻe fakaʻaongaʻi ʻe he tokotaha kumi ngāue hono tolú ha fakamatala tākiekina-mālohi, ʻa ia naʻe malava ai ke talanoa fekauʻaki mo ha meʻa naʻá ne fakahoko ʻi ha founga lelei, manatua fuoloa mo mātuʻaki makehe ʻaupito. Naʻe hangē ia ha kiʻi talanoa nounou mo moʻoní. Naʻe tokoni ia ki he tokotaha kumi ngāue hono tolú ke ʻasi makehe ko e tokotaha totonu ia ke filí.

2. Muimui ʻi he Founga Fakamatala Tākiekina-Mālohí

Lau:ʻOku muimui e ngaahi fakamatala tākiekina-mālohí ʻi ha founga faingofua ʻaupito:

ʻOku kau ʻi he ngaahi meʻa mahuʻinga ʻi ha fakamatala tākiekina-mālohi ʻa e fiemaʻu ko ia ke nounoú. ʻOku ʻikai totonu ke toe laka he sekoni ʻe 30 ki he 45 ha fakamatala tākiekina-mālohi.

Kumi Ngāue ʻa Siuá

Lau:Tau vakai angé ki ha fakamatala tākiekina-mālohi naʻe faʻu ʻe Siua hili ʻene toe vakaiʻi e fakamatala ngāue ki he ABC Marketing. Naʻá ne fakatokangaʻi ʻoku fie maʻu ʻe he pule ngāué ha tokotaha ʻoku sai ʻene ngaahi taukei ki hono fakaleleiʻi ha palopalemá. Fakatokangaʻi e founga naʻá ne fakaʻaongaʻi ai ia ke faʻu ʻaki ʻene fakamatala tākiekina-mālohí.

➀ “ʻOku ou lelei ʻaupito hono fakaleleiʻi ha palopalemá. ➁ Hangē ko ʻení, ʻi heʻeku ngāue he tafaʻaki tokoni fakatekinikale ʻa e IT World, naʻá ku faʻu ai ha kiʻi founga faingofua ke ʻilo e ngaahi palopalema fakatekinikale angamahení. ➂ Ko hono olá, naʻá ku lava ai ʻo fakaleleiʻi ʻi he taʻu ʻe uá ha ngaahi palopalema ne laka hake he 1,000, ʻo liunga ua ia he meʻa kuo fai ʻe heʻeku kaungā-ngāué. ➃ Te u lava ʻo fakaʻaongaʻi e taukei tatau ke ngāue maʻamoutolu.”

Aleaʻi:ʻE tokoni fēfē nai e fakamatala tākiekina-mālohi ʻa Siuá kiate ia ke ʻasi makehe ko e tokotaha totonu ia ke filí?

Lau:Ko ha ngaahi sīpinga kehe ʻeni ʻo ha ngaahi fakamatala tākiekina-mālohi ki ha tokotaha toki ʻosi ngāue fakafaifekau, tokotaha ʻoku ʻi ai haʻane kiʻi pisinisi, pea mo ha faʻē, ʻa ia ʻoku nau kumi ngāue kotoa. Ne nau fakaʻaongaʻi e ngaahi sitepu ʻe faá mo fakakau ha ngaahi fakaikiiki pau ke fakamālohia ʻenau ngaahi fakamatala tākiekina-mālohí. Taufetongi hono lau leʻolahi e fakamatala takitaha.

➀ Maʻu ha taukei pe pōtoʻi ngāue (“ʻOku ou … ,” “ʻOku ou lava … ,” pe “Kuó u …”)	➁ ʻOmi ha fakatātā (“Hangē ko ʻení …”)	➂ ʻOmi ha ola (“Ko hono olá …”)	➃ Fakahoa e taukeí ki he ngaahi fiemaʻu ʻa e pule ngāué
Faifekau ʻOsi Mai Te u lava ke langaki mo fakaʻaiʻai ʻa e timí.	Hangē ko ʻení, ʻi heʻeku hoko ko ha tokotaha ngāue tokoni taimi kakato ki hoku siasí, ne kole mai ke u taki ha timi ʻo ha kau ngāue tokoni ʻe toko valu naʻe ʻikai ke uouangataha pea ʻikai aʻusia ʻa e ngaahi taumuʻá. Naʻá ku fakatokangaʻi ʻa e ngaahi fiemaʻú peá u fokotuʻu ha ngaahi ako tukupau hokohoko mo e ngaahi tukupā ke tokoniʻi kinautolu ke nau fakalakalaka.	Ko hono olá, naʻe kamata ke lavameʻa e kulupú pea toe ope atu ʻi heʻenau ngaahi taumuʻá.	Te u lava ʻo tokoniʻi hoʻo ngaahi timí ke nau ngāue fakataha ke nau lavameʻa pea toe ope atu he ngaahi taumuʻá.
Tokotaha ʻAʻana ʻa e Kiʻi Pisinisi Siʻisiʻi Te u lava ʻo fakaleleiʻi e ngaahi palopalemá.	Hangē ko ʻení, ʻi heʻemau pisinisi fakafāmilí, ne mau fie maʻu ha founga ke muimuiʻi ʻaki e ngaahi fakamolé. Naʻá ku faʻu ha polokalama ke ne muimuiʻi mo ʻiloʻi ha kautaha ʻoku hulu tuʻa ʻenau ngaahi tohi moʻua ʻoku ʻomai kiate kimautolú.	Ko hono ola ʻo ʻeku polokalamá, ne u lava ai ʻo fakatonutonu ʻa e ngaahi moʻua ne hulu tuʻá pea fakahaofi ʻemau pisinisí ʻo laka hake he $5,000 he taʻu.	ʻOku ou ʻilo te u lava ʻo fakaʻaongaʻi ʻa e ngaahi taukei fakalelei-palopalema ko ʻení maʻau.
Faʻeé ʻOku mālohi ʻaupito ʻeku ngaahi taukei ʻi hono fokotuʻutuʻu ha meʻá.	Hangē ko ʻení, ʻi heʻeku hoko ko ha faʻeé,ʻoku ou fakafekauʻaki e ngaahi ngāue fakaakó mo e ngaahi ʻekitivitī ʻa ha fānau ʻe toko tolu. Kuó u ako ke u levaʻi lelei ʻemau ngaahi taimi-tēpilé.	Ko hono olá, ʻoku tātaaitaha pē ha ngalo ʻi heʻeku fānau haʻanau ngāue fakaako pe tōmui ki ha ʻekitivitī.	Te u lava ʻo fakaʻaongaʻi e ngaahi taukei ngāue maau ko ʻení ke fakapapauʻi he ʻikai te ke teitei liʻaki haʻo ʻapoinimeni.

ʻEkitivitií _{(miniti ʻe 5)}

Fakaʻaongaʻi ha ngaahi miniti siʻi mo fakaʻaongaʻi e saati ko ʻení ke faʻu ʻaki ha ngaahi fakamatala tākiekina-mālohi fakataautaha. Ngāue fakataha leva mo ho hoa ngāué ke vahevahe kinautolu.

Muimui ʻi he Foungá:

➀ Fakakau ha taukei pe pōtoʻi ngāue (“ʻOku ou … ,” “ʻOku ou lava … ,” pe “Kuó u …”)	➁ ʻOmi ha fakatātā (“Hangē ko ʻení …”)	➂ ʻOmi ha ola (“Ko hono olá …”)	➃ Fakahoa e taukeí ki he ngaahi fiemaʻu ʻa e pule ngāué

Aleaʻi:Ko e hā naʻá ke ako mei hono vahevahe hoʻo (ngaahi) fakamatala tākiekina-mālohí?

Lau:Ko e ngaahi fakamatala tākiekina-mālohí ko ha taukei kumi ngāue ia ʻe tokoni atu ke ke ngāue fakapotopoto ai. Te ke ʻilo ʻoku tonu hoʻo fakahoko iá kapau ʻoku iku hoʻo ngaahi fakamatala tākiekina-mālohí ki ha ngaahi faingamālie ngāue. ʻOku totonu ke iku e ngaahi fakamatala tākiekina-mālohi ʻi he ngaahi tohi tala ngāué ki ha ngaahi initaviu. ʻOku totonu ke iku e ngaahi fakamatala tākiekina-mālohi ʻi he ngaahi fetuʻutakí ki ha fakamatala ʻaonga pe ngaahi founga kumi ngāué. Pea ʻoku totonu ke iku e ngaahi fakamatala tākiekina-mālohi ʻi he ngaahi ʻinitaviú ki ha ngaahi faingamālie ngāue. Kapau ʻoku ʻikai ke ke maʻu e ngaahi olá ni, feinga ke fakatupulaki e taukei ko ʻení.

ʻE tokoni hoʻo akoako mo e niʻihi kehé mo hono maʻu ha feedback ke ke tupulaki ai. Tau kamata he taimí ni!

ʻEkitivitií _{(miniti ʻe 5)}

Step 1: Tuʻu kotoa ki ʻolunga pea vaeua ki ha foʻi laine ʻe ua ʻo fehangaaki.

Sitepu 2: Vahevahe ha taha ʻo hoʻo ngaahi fakamatala tākiekina-mālohí mo e tokotaha ʻokú mo fehangaakí.

Sitepu 3: Fevahevaheʻaki vave pē homou feedback:

• Ko e hā e taukei naʻe pehē ho hoá ʻokú ne maʻú?

• Ko e hā e sīpinga ho hoá?

• Ko e hā hono olá?

• Naʻe fakahoa fēfē ia ho hoá ki he ngaahi fiemaʻu ʻa e pule ngāué?

• Naʻe makehe nai ia kiate koe?

Sitepu 4: Mou tuʻu kotoa ʻi ha laine ʻe taha ʻunu leva ki he tokotaha hokó. ʻE vilo hake leva e tokotaha ʻi he ngataʻangá ki he kamataʻanga ʻo e lainé. He ʻikai ngaue e laine ʻe tahá. Toutou fakahoko e sitepu 1–3 kae ʻoua kuo mou vahevahe hoʻomou fakamatala tākiekina-mālohí mo e tokotaha kotoa pea maʻu mo ha feedback.

Aleaʻi:ʻE tokoni fēfē atu nai e ngaahi fakamatala tākiekina-mālohí ke ke ʻasi makehe ko e tokotaha totonu ia ke filí?

Fakaʻosí

Mamataʻi:“The Power of Power Statements [Ko e Mālohi ʻo e Ngaahi Fakamatala Tākiekina-Mālohí],” maʻu ʻi he srs.lds.org/videos. (ʻIkai ha vitiō? Lau ʻa e peesi 70.)

Aleaʻi:Ko e hā e ngaahi meʻa mahuʻinga taha naʻá ke ako mei he vahe ko ʻení?

Lau:ʻE hoko e ngaahi fakamatala tākiekina-mālohí ko e taukei kumi ngāue lelei taha ia te ke lava ʻo akó. Ko e kī ia ki he ngāue fakapotopotó.

Ngāue ʻi he Tui + Ngāue Mālohi + Ngāue Fakapotopoto = Lavameʻa

ʻE tokoni e fakamatala tākiekina-mālohí ke ke ʻasi makehe ai ko e tokotaha totonu ia ke filí ʻo laka ange ia ʻi ha toe meʻa te ke lava ʻo fai. Fakaʻaongaʻi kinautolu ʻi hoʻo tohi aʻusia fakaako mo fakangāué, ngaahi fetuʻutakí, mo e ngaahi ʻinitaviú. Akoako e taukei ko ʻení. Teuteu e ngaahi fakamatala tākiekina-mālohí ke lahi. Lotua e tokoni ʻa e Tamai Hēvaní, pea te ke aʻusia ha lavameʻa lahi ange.