Ngaahi Maʻuʻanga Tokoní
Ngaahi Tohi Lelei Angé
ʻOku vahevahe ʻe Mele e founga naʻe mahuʻinga ai hono fakaleleiʻi ʻene ngaahi tohí ki heʻene kumi ngāué.
“ʻI he taimi naʻá ku kumi ngāue aí, naʻá ku kumi hake pē ʻeku tohi aʻusia fakaako mo fakangāue motuʻá, tānaki ki ai ha niʻihi ʻo ʻeku ngaahi aʻusia foʻoú, peá u pehē kuo lelei ia. Kuo peesi ʻeni ʻe tolu ʻeku tohi aʻusia fakaako mo fakangāué pea fakafonu ʻaki ha ngaahi meʻa lelei kehekehe … naʻe ngali makehe ia. Pe hangē ko ʻeku fakakaukaú. Naʻe kamata ke u fakaʻaongaʻi ʻeku tohi aʻusia fakaako mo fakangāué ke tohi ki ha ngaahi ngāue kehekehe naʻá ku feʻunga mo ia. Naʻe ʻikai ke u maʻu ha tali ʻe taha. Naʻe ʻi ai ha meʻa ne mātuʻaki fehalaaki. Naʻá ku mei ngāue lelei ʻi ha faʻahinga ngāue pē, ka ko e hā ʻoku ʻikai ke nau fetuʻutaki mai aí? Naʻe faifai peá u pehē ʻoku ou fie maʻu ha tokoni. Naʻá ku lotua ha tokoni pea kamata fakahoko ha fanga kiʻi fekumi mo talanoa ki ha niʻihi kehe fekauʻaki mo e ngaahi tohi aʻusia fakaako mo fakangāué. Naʻá ku fakatokangaʻi leva naʻe ʻikai fuʻu sai e tohi aʻusia fakaako mo fakangāue naʻá ku pehē ʻoku fuʻu leleí pea mahalo naʻe ʻikai pē lau ia. Naʻe fakatupu loto-fakatōkilalo ia.
“Naʻá ku kamata fakaleleiʻi leva ia. Naʻe fie maʻu ki ai ha taimi mo ha ngāue lahi. Naʻe kamata ke u fakaleleiʻi ia ʻo fakatatau mo e ngāue takitaha, ʻai ke fakamanakoa hono laú pea fetongi ʻaki ʻeku ngaahi lisi fatongia taʻeolí ha ngaahi lavameʻa fakafiefia. Naʻe tokoni lahi ia ke u vakai ki ha ngaahi sīpinga tohi aʻusia fakaako mo fakangāue lelei pea feinga ke muimui he ngaahi sīpinga ko iá. Naʻá ku ʻilo te u aʻusia ha meʻa lelei ʻi he taimi naʻe kamata ai ke u maʻu ha ngaahi fetuʻutaki lahi ange ki ha ʻinitaviú. Naʻe faifai pea ola lelei kiate au e ngaahi tohí kae ʻikai ko e koví. Naʻe iku e ngaahi ʻinitaviu ko iá ki ha ngaahi faingamālie ngāue.
“Naʻe fie maʻu ke u loto-fakatōkilalo ʻaupito ke u ʻiloʻi ʻoku ou fie maʻu ha tokoni, ka ʻi he taimi pē ne u ʻiloʻi ai iá, naʻe tataki au ʻe he Tamai Hēvaní ki ha ngaahi maʻuʻanga tokoni. ʻOku ou kata ʻi heʻeku toe manatu atu ki heʻeku tohi aʻusia fakaako mo fakangāue motuʻá. ʻOku ou houngaʻia naʻá ku ako ha founga lelei ange. Naʻe tupu mei ai ha faikehekehe lahi ʻaupito kiate au.”
Foki ki he peesi 89.