Ngaahi Maʻuʻanga Tokoní

Lavaʻi Lelei ʻe ʻEma ʻEne ʻInitaviú

Tau lau e founga naʻe tokoni ai e teuteu mo e akoako ʻa ʻEmá ke ne fakahoko ha ʻinitaviu leleí.

“ʻI he ʻosi hoku mataʻitohí, naʻá ku fakakaukau ʻe vave hano maʻu haʻaku ngāue. Ka naʻe ʻikai. Naʻe teʻeki ʻosi ʻeku akó. Naʻe fie maʻu ke u ako e founga ke kumi ai ha ngāué. Ne u fakahoko leva ia—Naʻá ku ako e founga fengāueʻaki mo e kakaí. Naʻá ku ako e founga ke faʻu ai ʻeku tohi aʻusia fakaako mo fakangāué ke felāveʻi ange mo e ngaahi ngāue naʻá ku tohi ki aí. Pea naʻe pau ke u akoako ʻeku ngaahi taukei fakaʻinitaviú. Kuó u ilifia maʻu pē he ʻinitaviú, pea ʻi he taimi ʻoku ou ilifia aí, ʻoku nenu ʻeku leá pea ʻikai ke u toe fakakaukau lelei. Ko ia ne u fie teuteu ai ʻi he lahi taha te u ala lavá. Naʻe ʻave ʻe haku kaungāmeʻa ʻi he Siasí ʻeku fika fetuʻutakí ki ha pule ngāue ʻi ha ngāueʻanga fakalotofonua. Naʻe tā mai e pule ngāué mo fokotuʻu ha taimi ʻinitaviu. Naʻá ku fakamānava loloa mo toutou ako ʻeku ngaahi tali ki he fehuʻi takitaha ʻi muʻa ʻi he sioʻatá mo hoku ngaahi kaungāmeʻá ʻo fakaʻaongaʻi ʻeku Ko Au ʻi ha Sekoni ʻe 30, ngaahi fakamatala tākiekina-mālohí, mo hono liliu ʻo e ngaahi meʻa ʻikai leleí ki ha ngaahi leleí. Naʻá ku lotua foki ha loto-falala mo ha tokoni mei heʻeku Tamai Hēvaní.

“ʻI he hokosia hoku ʻaho ʻinitaviú, naʻá ku kei manavasiʻi pē, ka ne u ongoʻi mateuteu. Naʻá ku kiʻi teuteu lelei ange ʻi he vala ngāue angamahení peá u vave ki ai ʻaki ha miniti ʻe 7. Naʻe iku ʻo ʻinitaviu au ʻe ha timi ʻo e kau pule ngāué. Ne u kamata ʻa e ʻinitaviú ʻaki ʻeku Ko Au ʻi ha Sekoni ʻe 30, pea hokohoko atu ai pē mei ai. Naʻá ku mateuteu ki he meimei foʻi fehuʻi kotoa pē ne nau ʻeke maí. Naʻa mo e taimi ne nau ʻeke mai ai ha foʻi fehuʻi ne teʻeki ke u teuteu ki aí, ne u ʻosi maʻu pē ha meʻa ke u lea ʻaki koeʻuhí ne u ʻosi fuʻu feangai mo e ngaahi taukei fakaʻinitaviú. Naʻe hangē ʻa e ʻinitaviú ia ha fepōtalanoaʻakí, peá u ʻilo naʻe tokoniʻi au ʻe he Tamai Hēvaní. ʻI he ʻosi ʻa e ʻinitaviú, naʻá ku ʻilo ne u fakahoko lelei ia. Hili ha ngaahi ʻaho siʻi mei ai, ne u maʻu ʻa e ngāué. ʻOku ou ʻilo naʻe tokoniʻi au ʻe he mateuteu mo faʻa lotú ke u fakahoko ha ʻinitaviu lelei.”

Foki ki he peesi 123.