Сайн мэдээг судлах удирдамж

Ариун Сүнс

Бидний Тэнгэрлэг Эцэг, Есүс Христ хоёрын элч, гэрч

Тэнгэрлэг Эцэг таны хэн болохыг мэддэг гэдгийг ойлгосон эсвэл Есүс Христийн Цагаатгалд талархаж байсан цаг мөч тань таны бодолд орж ирж байна уу? Та амьд бошиглогчийг сонсож байхдаа түүний зааж буй зүйл үнэн гэдгийг мэдсэн үеэ санаж болох юм. Эсвэл судраас уншиж, хүчтэй мэдрэмж төрж байснаа санаж байж ч магад. Магадгүй ямар нэгэн аюулаас зайлсхийхэд хүргэсэн өдөөлтийг ялган таньж эсвэл хүнд хэцүү үед амар амгалан, тайтгарлыг мэдэрч байснаа санаж болох юм. Эдгээр нь бүгд Ариун Сүнсний илрэл юм. Бурхан хүүхдүүддээ тусламжийн мутраа сунган, Ариун Сүнсний нөлөө, хүчээр дамжуулан харилцдаг. Та Есүс Христийн Хожмын Үеийн Гэгээнтнүүдийн Сүмийн гишүүнээр батлуулснаар Ариун Сүнсний бэлгийг хүлээн авдаг. Таныг хайрладаг Тэнгэрлэг Эцэг Өөрийн элч Ариун Сүнсээр дамжуулан хайр, удирдамж, заавраа, заримдаа Өөрийн залруулгыг хүлээн авах боломжийг танд олгодог.

Ариун Сүнс гэж хэн бэ?

Ариун Сүнс бол Бурхан тэргүүтний гурав дахь гишүүн. Тэр бол мах хийгээд ясан биегүй сүнсэн хүн юм (Сургаал ба Гэрээ 130:22-ыг үзнэ үү). Ариун Сүнс нь бурханлаг биеийн шинж чанарыг агуулдаг бөгөөд түүнийг ихэвчлэн “Сүнс” гэж нэрлэдэг. Ариун Сүнсний “хүчийг” Бурханы бүх хүүхэд мэдрэх боломжтой. Баптисм хүртсэн хүмүүс Ариун Сүнсний “бэлгийг” буюу Ариун Сүнс үргэлж бидэнтэй хамт байна гэсэн амлалтыг хүлээн авдаг.

Сэдвийн тойм: Ариун Сүнс

Холбогдох сайн мэдээг судлах удирдамж: Бурхан тэргүүтэн, Ариун Сүнсний бэлэг, Хувийн илчлэл

1-р хэсэг

Ариун Сүнс таны хувьд үнэлж баршгүй адислал болж чадна

Ариун Сүнсний талаар илүү ихийг мэдэхийн хэрээр Ариун Сүнсний илрэлийг хүлээн авч, мэдрэх хүсэл тань өсөн нэмэгддэг. Өгөөмөр нутаг дахь ариун сүмд цугларсан нифайчууд Ариун Сүнс өөрсдөд нь өгөгдөхийг чин сэтгэлээсээ хүссэн (3 Нифай 19:8–9-ийг үзнэ үү). Ариун Сүнсийг буюу Их Эзэний Сүнсийг мэдрэх хүслээ нэмэгдүүлэхийн тулд хийж болох алхмууд бий (1 Нифай 13:37; 2 Нифай 31:12–13; Моронай 7:31–32; 8:26-г үзнэ үү). Ариун Сүнсийг Бурхан Эцэг, Есүс Христ хоёрын гэрч болж гэрчлэхээр мөн Тэднийг дагахад сүнслэгээр өдөөхийн тулд тан руу илгээсэн учраас энэ нь үнэлж баршгүй адислал юм (2 Нифай 31:18-ыг үзнэ үү).

Бодох зүйлс

• Ариун Сүнс таныг Бурханд ойртуулж болох хэд хэдэн арга замыг онцолсон зарим судрыг та үзэж болно. Ариун Сүнс

  • Эцэг, Хүүг гэрчилдэг (Иохан 15:26; 3 Нифай 11:32, 36-г үзнэ үү).

  • Ариусгаж, цэвэршүүлдэг (Алма 13:10–12; 3 Нифай 27:19–20; Моронай 6:4-ийг үзнэ үү).

  • Үнэнийг илчилж, гэрчилдэг (2 Нифай 32:4–5; Алма 5:46–47; Сургаал ба Гэрээ 8:2–3-ыг үзнэ үү).

  • Тайтгаруулдаг (Иохан 14:16–17, 26; Моронай 8:26; Сургаал ба Гэрээ 36:2-ыг үзнэ үү).

  • Амлалтын Ариун Сүнсний хувьд баталж, лацаддаг (Ефес 1:13–14; Сургаал ба Гэрээ 88:3–4; 132:7-г үзнэ үү).

• Ерөнхийлөгч Вилфорд Вүдрафф: “Хэрэв тантай хамт Ариун Сүнс байх юм бол, дэлхий дээрх ямар ч хүнд түүнээс илүү бэлэг, адислал, гэрчлэл гэж үгүй” гэж гэрчилжээ. Ариун Сүнсийг илүү тууштай мэдрэхийг эрэлхийлэх нэг чухал арга зам бол ариун ёслолоос зохистойгоор хүртэх явдал юм (Сургаал ба Гэрээ 20:77, 79-ийг үзнэ үү). Ариун Сүнс таны хувьд адислал болж байсан арга замуудыг жагсаан бичих талаар бодож үз. Та Ариун Сүнсний илрэлүүдийг илүү ихээр мэдрэхийн тулд юу хийж болох вэ?

• Та Сүнсний дуу хоолойг сонсож байсан эсэхээ бодож байсан уу? Ариун Сүнс танд хэрхэн мэдрэгдэж болохыг судлахын тулд та дараах судрын хэсгүүдийг уншиж болох юм. Үүнд: 1 Хаад 19:11–12; Лук 24:30–32; Галат 5:22–23; Хиламан 5:30; Сургаал ба Гэрээ 6:22–23; 8:2–3; 11:11–14.

Хамтдаа суралцах үйл ажиллагаа

• Найз нөхөд нь Ариун Сүнсээр хөтлөгдсөн тул ерөнхийлөгч Лорэнзо Снөү амьд гарч чаджээ. Teachings of Presidents of the Church: Lorenzo Snow дахь түүхийг уншаад, түүний найзууд яагаад Ариун Сүнсний удирдамжийг ялган таньж, дагаж чадсан тухай ярилц. Та хэзээ Ариун Сүнсний өдөөлт, мэдрэмжээр дамжуулсан бурханлаг хамгаалалт, тусламжийг хүлээн авч байсан бэ?

Илүү дэлгэрэнгүй судлах

• Гари Э.Стивэнсон, “Ариун Сүнс танд хэрхэн тусалдаг вэ?,” 2017 оны 4-р сарын Ерөнхий чуулган, 108–111

• Kevin R. Duncan, “The Sacred Roles of the Holy Ghost,” Ensign, Oct. 2014, 62–65

2-р хэсэг

Ариун Сүнс танд бүх зүйлийн үнэнийг мэдэхэд тусална

Бурхан Өөрийн бүх хүүхдийг Түүний аз жаргал, авралын төлөвлөгөөний талаарх үнэнийг мэдээсэй хэмээн хүсдэг. Ерөнхийлөгч Рассэлл М.Нэлсон дайсан “юу үнэн, юу үнэн биш хоёрын хоорондох зааг ялгааг бүдгэрүүлэхээр хичээж байгаа. Хурууны үзүүрээр л олчих боломжтой асар их мэдээллийн улмаас юу үнэн болохыг ялгахад улам хэцүү болж байна” хэмээн анхааруулжээ. Бурхан үнэнийг болон энэ нь хэрхэн баяр баясгаланг олж, мөнх амьдралд бэлтгэхэд тусалж болохыг тод томруун ойлгоосой хэмээн хүсдэг. Ариун Сүнс бол танд үнэний талаар зааж, гэрчилдэг Их Эзэний элч юм. Бошиглогч Моронайн зааснаар, “Ариун Сүнсний хүчээр та нар бүх зүйлийн үнэнийг мэдэж болно” (Моронай 10:5).

Бодох зүйлс

• Сүнсээр дамжуулан үнэнийг сурч мэдэх нэг арга зам бол бошиглогч, төлөөлөгчид Ариун Сүнсний нөлөөллөөр ярьдаг явдал юм (Сургаал ба Гэрээ 68:3–4-ийг үзнэ үү). Бошиглогч, төлөөлөгчдийн захиаснуудыг сонсож, анхаарал хандуулах нь яагаад чухал вэ? Их Эзэн мөн таныг Түүний ажлыг хийж байх үед үгсийг тань Ариун Сүнсээр хүчирхэгжүүлэхээ амласан (Сургаал ба Гэрээ 100:5–8-ыг үзнэ үү).

• Ахлагч Дэвид Ф.Эванс өөрийн хэлсэн “Бүх зүйлийн үнэн” гэх үгэндээ үнэнийг өөрөө олж мэдэх чухал арга замуудын талаар хуваалцсан. Та хэзээ Ариун Сүнснээс үнэнийг эрэлхийлэх энэ загварыг дагаж байсан бэ?

Хамтдаа суралцах үйл ажиллагаа

• Ерөнхий чуулганы захиаснуудыг сонсож, унших нь танд хэрхэн нөлөөлсөн тухай ярилцаж болно. Ерөнхийлөгч Рассэлл М.Нэлсон Ерөнхий чуулганы үеэр “Ариун Сүнсний тохинуулал” нь “Их Эзэний таныг сонсоосой хэмээн бэлдсэн зүйлсийг сонсоход” тусална гэж амласан. Танд Ерөнхий чуулганы захиаснуудыг сонсож, судлахдаа Ариун Сүнснээс суралцахад өөрийгөө бэлтгэх ямар арга замууд байна вэ?

Илүү дэлгэрэнгүй судлах

• Иохан 16:13–14; 1 Нифай 2:16–17; 2 Нифай 33:1

• Матиас Хэлд, “Мэдлэгийг Сүнсээр эрэлхийлэх нь,” 2019 оны 4-р сарын Ерөнхий чуулган, 36–38

Ариун Сүнсний талаарх бусад эх сурвалж

• Судар

• Ерөнхий чуулганы захиас

• Дуулал болон Хүүхдийн дууны ном

• Видео

• Хүүхдүүдэд зориулсан эх сурвалж

Эх сурвалж

1. Teachings of Presidents of the Church: Wilford Woodruff (2004), 49.

2. Teachings of Presidents of the Church: Lorenzo Snow (2012), 71–73.

3. Рассэлл М.Нэлсон, “Үнэн гэж юу вэ?” Лиахона, 2022 оны 11-р сар, 29.

4. Дэвид Ф.Эванс, “Бүх зүйлийн үнэн,” 2017 оны 10-р сарын Ерөнхий чуулган, 64–67

5. Рассэлл М.Нэлсон, “Цэвэр үнэн, цэвэр сургаал, цэвэр илчлэлт,” Лиахона, 2021 оны 11-р сар, 6–7.