Islamic (Moorish) Art, gikan sa Alhambra, Granada

Detalye sa Islamic Art, Alhambra, Granada, Spain

Pasiuna

Ang tumong niini nga pamphlet mao ang pagpaila sa mga Muslim (mga sumusunod sa Islam) ug sa mga Santos sa Ulahing mga Adlaw (mga miyembro sa Ang Simbahan ni Jesukristo sa mga Santos sa Ulahing mga Adlaw) ngadto sa matag usa.

Sa usa ka higayon nga ang mga katilingban ug relihiyoso nga mga tumutuo gusto ug nagkinahanglan og pagsinabtanay sa usag usa, kini nga pamphlet:

• Nagtimaan sa mahunahunaon nga paningkamot sa paghatag og maligdong ug pagkamatugtanon alang sa mga tumutuo nga mga Muslim ug mga Santos sa Ulahing mga Adlaw.

• Nagrepresentar og mga oras sa panagsultihanay ug pagtuon pinaagi sa relihiyoso nga mga eskolar ug sa uban, lakip sa mga Muslim gikan sa nagkadaiyang mga kaagi. Nakaamgo nga walay indibidwal nga eskolar o relihiyoso nga imam, o grupo sa mga eskolar o mga imam, ang makarepresentar sa tanan sa Islam.

• Dili mohubad sa Qur’an. Kini magtinguha sa pagsabot sa pipila ka Islamic nga mga doktrina ug mga praktis sumala sa gipasabot sa mga eskolar sa Muslim ug relihiyoso nga mga lider ug sa paghulagway niini nga mga doktrina sa positibo ug sa makabigon nga paagi.

• Naghulagway sa komon nga mga tema nga makita sa mga pagtuo ug mga praktis sa Islam ug sa mga Santos sa Ulahing mga Adlaw apan dili mohimo og mga paghukom kabahin niini nga mga pagtuo o mga praktis.

• Nagtinguha nga makahatag og pagsinabtanay sa usag usa samtang naglaom nga ang mga tawo magmapailubon ug pasensiyoso sa bisan unsa nga sayop ug dili mahiubos kon ang bisan unsa nga mga pulong o mga paningkamot wala motukma sa tumong niini.

Mga Acronym

SAW:Acronym alang sa Arabic nga hugpong sa mga pulong “mga pag-ampo ug kalinaw diha kaniya,” nga gigamit sa mga Muslim human sila molitok sa ngalan ni Propeta Muhammad.

AS:Acronym alang sa Arabic nga hugpong sa mga pulong “diha kaniya ang kalinaw,” nga gigamit sa mga Muslim human sila molitok sa ngalan sa mga propeta sama ni Abraham.

Ang Arabic nga sinulatan sa shahada nga pulong (ang deklarasyon sa pagtuo sa Muslim sa pagkausa sa Dios)

Ang shahada nga pulong nagpahayag nga walay laing dios gawas ni Allah, ug si Muhammad mao ang Iyang mensahero

Gigikanan sa Islam

Ang relihiyon sa Islam (nga nagpasabot nga “kalinaw ug pagtugyan ngadto sa Dios”) gibase sa pagpadayag gikan sa Dios ngadto ni Propeta Muhammad (mga pag-ampo ug kalinaw maanaa kaniya, SAW). Si Muhammad nagpuyo sa unsay Saudi Arabia karon gikan sa AD 570 hangtod 632. Ang tanang Muslim nagtuo sa Pagkausa sa Dios, ug ilang katungdanan isip Iyang mapainubsanon nga mga sulugoon sa pagsunod sa Iyang kabubut-on.

Ang Islam adunay duha ka dagkong eskwelahan sa hunahuna: Sunni ug Shi’a.

• Alang sa Sunni nga mga Muslim, ang lima ka haligi sa hugot nga pagtuo mao ang propesyon sa hugot nga pagtuo, pag-ampo, paghatag og limos, pagpuasa, ug sa pagbiyahe ngadto sa Mecca.

• Ang Shi’a nga mga Muslim uyon nga kining lima ka praktis makatabang sa mga Muslim nga mahinumdom sa Dios ug makahimo og managsama nga pagbati sa komunidad. Sila naghatag og gibug-aton sa labing importante nga mga pagtuo sa Islam—lakip sa Pagkausa sa Dios, mga anghel, balaan nga mga basahon, pagkapropeta, adlaw sa pagkabanhaw, ug balaan nga hustisya—nga mao usab ang magsilbi nga basehanan sa panaghiusa niini nga mga eskwelahan sa hunahuna.

Kini nga pamphlet nagpasabot sa pipila sa managsama nga mga pagtuo sa mga Muslim.

Sagrado nga Kakahoyan

Ang “Sagrado nga kakahoyan” sa estado sa New York diin si Joseph Smith nakadawat og pagpadayag gikan sa Dios

Gigikanan sa Ang Simbahan ni Jesukristo sa mga Santos sa Ulahing mga Adlaw

Ang mga Santos sa Ulahing mga Adlaw, usahay sayop nga gitawag og mga Mormon, nagmatuod sa ilang kaugalingon nga Kristiyano. Ang Simbahan ni Jesukristo sa mga Santos sa Ulahing mga Adlaw wala magagikan pinaagi sa makasaysayong kutay sa tradisyonal nga Kristiyanismo. Ang mga Santos sa Ulahing mga Adlaw nagtuo nga ang Simbahan ni Jesukristo, nga Iyang gitukod sa dihang Siya dinhi pa sa yuta, nawala human sa Iyang kamatayon ug sa kamatayon sa Iyang Apostoles.

Si Jesukristo mipahiuli sa Iyang Simbahan pinaagi sa pagpadayag ngadto ni Propeta Joseph Smith, kinsa nagpuyo sa Estados Unidos gikan sa AD 1805 hangtod 1844. Ang Simbahan pormal nga naorganisar didto sa estado sa New York niadtong 1830. Karon ang punoang buhatan niini anaa sa Siyudad sa Salt Lake, Utah. Ang mga miyembro sa Simbahan nagpuyo sa hapit tanang nasod.

Kini nga pamphlet maglatid sa pipila sa Kristohanong mga pagtuo sa mga Santos sa Ulahing mga Adlaw.

batan-on nga nag-istorya

Panagtambayayong sa mga Tinuhoan

Sa milabay nga 50 ka tuig, ang mga Muslim ug ang mga Santos sa Ulahing mga Adlaw nagtinabangay aron molampos sa nagkadaiyang mga tumong sa tibuok kalibotan aron sa paghatag og kahupayan sa kabos, pagpalig-on sa mga pamilya, ug pagtukod og maabagon nga mga komunidad.

Kini nga pamphlet sa mubo nagpresentar sa pipila sa mga pagtuo, mga mithi, ug mga estilo sa kinabuhi nga makapasayon niini nga maabagon nga mga paningkamot.