Pagtahod sa Usag Usa

Mga Muslim ug mga Santos sa Ulahing mga Adlaw nagpadayag og pagtahod sa usag usa alang sa mga pagtuo sa matag usa.

Mga Muslim

Ang Islam nagtudlo sa pagmahal sa ubang mga relihiyon, lakip ang Kristiyanismo. Imbis magtudlo sa mga Muslim sa pagkompetensya sa doktrina uban sa mga tawo sa laing mga tinuhoan, ang Qur’an nag-ingon sa “pagkompetensya sa usag usa diha sa pagkamatarong.” Sa kataposan kon ang tanan mobalik na ngadto sa Dios, Siya “mosulti kaninyo sa kamatuoran sa mga butang sa inyong mga kalainan” [“will tell you the truth in the matter of your differences”] (Qur’an 5:48; tan-awa usab sa 5:82).

Mga Santos sa Ulahing mga Adlaw

Ang mga Santos sa Ulahing mga Adlaw gitudloan sa pagpakita og pagtahod ug gugma alang sa mga tawo sa ubang mga tinuhoan. Niadtong 1978 ang Unang Kapangulohan sa Simbahan mipahayag: “Ang labing bantogan nga mga lider sa relihiyon sa kalibotan sama ni Muhammad … nakadawat … sa kahayag sa Dios. Ang moral nga mga kamatuoran gihatag ngadto kanila sa Dios aron sa paglamdag sa tibuok kanasoran ug sa pagdala og mas taas nga lebel nga pagsabot sa mga indibidwal.”