Propesyon sa Hugot nga Pagtuo diha sa Dios

Ang hugot nga pagtuo diha sa nakahibalo sa tanan ug makagagahom sa tanan nga Dios mao ang sukaranan nga pagtuo sa mga Muslim ug sa mga Santos sa Ulahing mga Adlaw. Ang duha mopadayag sa ilang hugot nga pagtuo diha sa Dios pinaagi sa hunahuna, pulong, ug aksiyon.

Mga Muslim

Ang mga Muslim nagtuo nga ang Makagagahom nga Dios—“Allah”—mao ang Tiglalang sa tanan nga anaa sa kalangitan ug sa yuta. Ang Dios mipadala og mga mensahero ug mga propeta aron sa paggiya ug pagdirekta sa katawhan. Aron mahimong usa ka Muslim, ang usa ka tawo kinahanglan gayod nga mopamatuod, “Walay laing dios gawas ni Allah, ug si Muhammad mao ang iyang mensahero.” Kining duha ka bahin sa propesyon sa hugot nga pagtuo (shahada) sa usa ka Dios naglakip sa pagtuo nga ang kaluwasan ug kalinaw makita sa pagsunod sa kabubut-on sa Dios sumala sa gipadayag sa Qur’an.

Mga Santos sa Ulahing mga Adlaw

Ang mga Santos sa Ulahing mga Adlaw nagtuo nga ang Dios—“Langitnong Amahan”—mao ang tinuod nga amahan sa tanang mga espiritu sa tawo. Siya nahigugma ug nag-atiman sa Iyang tanang mga anak. Ang pulong santos nagpasabot sa usa ka tawo kansang kinaiya nausab pinaagi sa pagkamasulundon ngadto sa Dios. Ang pagpakita sa mga Santos sa Ulahing mga Adlaw sa hugot nga pagtuo (pagpamatuod) mao ang usa ka personal nga kombiksiyon sa pagtuo sa Dios ug sa Iyang Anak, si Jesukristo, kansang Pag-ula ug Pagkabanhaw nakapahimo sa kaluwasan nga posible alang sa tanang katawhan.