Jesukristo

Ang mga Muslim ug ang mga Santos sa Ulahing mga Adlaw adunay daghang managsama nga mga pagtuo mahitungod ni Jesukristo (AS). Siya adunay importante nga tahas, bisan og lahi, sa duha ka grupo.

Ang mga Muslims ug ang mga Santos sa Ulahing mga Adlaw nagtuo sa milagroso nga pagkatawo ni Jesukristo (AS). Sila miila nga Siya usa ka mensahero sa Dios (“Pulong”) ug mitawag Kaniya nga ang Mesiyas o Al-Masih (ang “Usa nga Dinihogan”). Ang duha miila nga Siya mipahigayon og mga milagro panahon sa Iyang kinabuhi, ug ang duha midawat nga Siya makahimo og pangaliya alang sa matarong sa Adlaw sa Paghukom.

Mga Muslim

Ang mga Muslim miisip ni Jesukristo (AS) nga walay sala nga anak ni Maria, talagsaon nga adunay inahan apan walay amahan (tan-awa sa Qur’an 3:59). Siya usa ka propeta sa Dios apan dili anak sa Dios. Ang Dios milig-on kaniya uban sa Balaan nga Espiritu (tan-awa sa Qur’an 2:87). Siya nanagna sa pag-anhi ni Muhammad (SAW). Siya giluwas sa Dios sa wala pa ang iyang mga kaaway mopatay kaniya diha sa krus. Kadaghanan sa mga Muslim nagtuo nga si Jesus (AS) mobalik sa kataposan nga mga adlaw aron sa pagtabang sa pagpahiuli sa kalinaw ug hustisya sa yuta.

Mga Santos sa Ulahing mga Adlaw

Ang mga Santos sa Ulahing mga Adlaw miisip ni Jesukristo nga walay sala, ang Bugtong Anak sa Dios, natawo sa birhen nga si Maria. Ang Iyang pag-antos didto sa tanaman ug kamatayon sa krus nag-ula sa mga sala sa tanan nga modawat sa Iyang grasya. Siya mibuntog sa kamatayon ug sa ngadto-ngadto mihimo sa pagkabanhaw ug pagka-imortal sa tanang mga tawo (tan-awa sa Basahon ni Mormon, Alma 7:9–13). Ang kataposang mga adlaw Siya mobalik aron sa pagpahiluna sa usa ka libo ka tuig sa kalinaw. Dayon Siya mohukom sa tanang katawhan sumala sa ilang hugot nga pagtuo ug maayong mga binuhatan, ug pinaagi sa tinguha sa ilang mga kasingkasing.