Ang Tahas sa Kababayen-an

Ang mga Muslim ug ang mga Santos sa Ulahing mga Adlaw naghatag og bili sa kababayen-an ug sa ilang importante nga tahas sa katilingban ug diha sa panimalay.

Mga Muslim

Ang Islam nagtan-aw sa kalalakin-an ug kababayen-an nga patas ug katumbas nga mga tahas (tan-awa sa Qur’an 3:195), nga ang mga kababayen-an mao ang nag-unang dunay responsibilidad diha sa panimalay ug ang mga lalaki didto sa gawas. Ang kababayen-ang Muslim usab adunay prominente nga mga tahas sa pampublikong kinabuhi. Si Propeta Muhammad (SAW) nag-awhag og edukasyon: ang matag babaye nga Muslim adunay moral ug relihiyoso nga obligasyon sa pagpangita og kahibalo, pagpalambo sa iyang kaalam, pagpalapad sa iyang panglantaw, pag-ugmad sa iyang mga talento, ug paggamit sa iyang potensyal alang sa kaayohan sa iyang kalag ug sa iyang katilingban.

Mga Santos sa Ulahing mga Adlaw

Ang kataposan nga tumong sa teyolohiya sa Santos sa Ulahing mga Adlaw mao ang kahimayaan, o kinabuhing dayon sa pamilya uban sa Dios. Ang paghimo og lig-on, mahigugmaon nga mga relasyon sa pamilya mao ang prayoridad alang sa kababayen-an ug kalalakin-an (tan-aw sa “Ang Pamilya: Usa ka Pamahayag ngadto sa Kalibotan”). Ang pagkainahan usa ka balaan nga tawag sa pag-amuma sa mga anak sa Dios. Ang kababayen-an ug kalalakin-an maglihok isip patas nga managkauban diha sa pamilya, sa Simbahan, ug sa komunidad. Ang kababayen-an nga mga Santos sa Ulahing mga Adlaw giawhag sa pag-angkon og edukasyon ug pagpalambo sa ilang mga talento. Sila usab sakop sa Relief Society, usa ka tibuok kalibotan nga komunidad sa kapuangod ug pagserbisyo.