Pagtabang Niadtong Nanginahanglan

Ang mga Muslim ug ang mga Santos sa Ulahing mga Adlaw adunay managsama nga kombiksyon nga ang kapuangod pinaagi sa mga halad ug pagserbisyo sa uban usa ka importante nga bahin sa tinuod nga hugot nga pagtuo diha sa Dios.

Mga Muslim

Ang Qur’an nagtudlo, “Matarong siya kinsa … mohatag sa iyang bahandi, tungod sa gugma sa Dios, ngadto sa pamilya ug ngadto sa ilong tuwapos ug sa timawa ug sa magbabaklay ug ngadto niadtong kinsa mangayo … ug kinsa mobayad sa balayronon sa kabos” [“Righteous is he who … giveth his wealth, for love of God, to kinsfolk and to orphans and the needy and the wayfarer and to those who ask … and who payeth the poor due”] (Qur’an 2:177). Ang gugma nga putli—manggihatagon og serbisyo ngadto sa uban—gitudlo ngadto sa mga Muslim. Zakat usa ka obligado nga donasyon nga 2.5 porsiyento sa tinuig nga kinatibuk-ang kinitaan ngadto sa mga tawo nga nanginahanglan. Ang Shi’as mohatag usab og dugang nga 20 porsiyento sa bahandi nga naangkon gikan sa piho nga mga tinubdan (khums) sa pagsuporta sa buhat sa ilang relihiyon.

Ang Islamic nga mga organisasyon motabang sa kabos ug mga populasyon nga napugos sa pagbiya sa ilang pinuy-anan sa tibuok kalibotan pinaagi sa paghatag og suporta sa ekonomiya, medikal, ug edukasyon, kasagaran sa pagpakigtambayayong sa ubang relihiyoso nga mga organisasyon.

Ang mga boluntaryo nag-apud-apod og mga putos sa pagkaon ngadto sa mga trabahante atol sa iftar nga pagpangaon isip kabahin sa kalihokan sa kalooy sa Ramadan pinaagi sa lokal nga moske. istock.com/kertu_ee

Mga Santos sa Ulahing mga Adlaw

Ang mga Santos sa Ulahing mga Adlaw gitudloan nga “mohatag sa [ilang] kabtangan ngadto sa mga kabos, matag tawo sumala sa unsa ang anaa kaniya, ingon sa pagpakaon sa gigutom, pagsinina sa hubo, pagduaw sa mga masakiton ug pag-alagad sa ilang kahupayan, sa espirituhanon ug lawasnon, sumala sa ilang mga panginahanglan” (Basahon ni Mormon, Mosiah 4:26). Ang boluntaryo nga pagserbisyo ug mga halad nakatuman niini nga sugo. Ang mga Santos sa Ulahing mga Adlaw modonar usab og 10 porsiyento sa ilang kinitaan (ikapulo) sa pagsuporta sa buhat sa Simbahan.

Ang katumanan niining balaan nga sugo makita sa tibuok kalibotan nga makatawhanong mga paningkamot sa Ang Simbahan ni Jesukristo sa mga Santos sa Ulahing mga Adlaw ngadto sa tanang mga tawo bisan pa sa denominasyon, kaliwat, o pagtuo.