Mga Kasulatan

Alang sa mga Muslim ug mga Santos sa Ulahing mga Adlaw, ang pagpadayag nga gikan sa Dios pinagi sa mga mensahero isip kasulatan mao ang pundasyon alang sa pagkat-on sa kabubut-on sa Dios, pagtuman og mga pasalig, ug pag-apil sa matinud-anong pagsimba.

Mga Muslim

Ang mga Muslim nagtuo sa Qur’an nga pulong sa Dios ug ang Iyang kataposan nga pagpadayag ngadto sa katawhan. Ang Qur’an nagsulti sa kabubut-on sa Dios, nagtudlo unsaon nga magpabilin diha sa dalan nga makahatag og kaluwasan. Bisan og kini gipadayag labaw na sa 1,400 ka tuig ang milabay, ang mga pulong sa Arabic wala gayod mausab, nga maoy makapahimo niini nga lahi gikan sa ubang mga basahon sa kasulatan. Ang mga Muslim nagtuo usab sa mga kasulatan nga nag-una sa Qur’an: ang Torah ug ang Biblia (tan-awa sa Qur’an 3:3). Ang ikaduhang tinubdan sa giya mao ang mga panultihon ug ehemplo sa kinabuhi ni Propeta Muhammad (SAW), nga nailhan nga Sunnah.

Mga Santos sa Ulahing mga Adlaw

Ang mga Santos sa Ulahing mga Adlaw nagtuo sa duha ka basahon ang Balaan nga Biblia ug ang Basahon ni Mormon (usa ka rekord sa mga tawo sa Amerika gikan sa 600 BC hangtod AD 400) nga pulong sa Dios. Dugang nga mga kasulatan naglakip sa Doktrina ug mga Pakigsaad (mga pagpadayag nga gihatag ngadto ni Joseph Smith ug sa uban) ug ang Perlas nga Labing Bililhon (mga sinulat ni Abraham, Moises, ug Mateo, nga gipadayag ngadto ni Propeta Joseph Smith). Ang mga kasulatan nagpamatuod ni Jesukristo isip ang Manluluwas sa kalibotan ug nagpakita sa mga tawo unsaon sa pagpakabuhi aron nga sila makabalik ngadto sa Dios (tan-awa sa Balaan nga Biblia, Juan 5:39).