Pisikal nga Kahimsog

Ang mga Muslim ug ang mga Santos sa Ulahing mga Adlaw nagdasig og pisikal nga kahimsog ug espirituhanon nga paglambo pinaagi sa paglikay sa piho nga mga pagkaon ug mga substansiya.

Mga Muslim

Alang sa mga Muslim, ang Qur’an naglatid sa pagkaon nga halal (nagsubay sa balaod) o haram (wala magsubay sa balaod). Ang wala magsubay sa balaod nga mga pagkaon mao ang karning baboy, mga produkto nga may karning baboy, alkohol, ug bisan unsa nga substansiya nga makapausab sa lawas o hunahuna. Sa mao, daghang Muslim naglikay usab sa tabako. Ang pagkaon og karne madawat kon ang karne gisakripisyo sumala sa mga sumbanan sa kasulatan. Alang sa mga Muslim, kini nga mga balaod sa pagkaon giisip nga timailhan sa pag-atiman sa Dios ug pagpakabana alang sa ilang kaayohan.

Mga Santos sa Ulahing mga Adlaw

Alang sa mga Santos sa Ulahing mga Adlaw, ang moderno nga pagpadayag naghulagway sa piho nga mga praktis sa kahimsog ug sa gidili nga mga substansiya. Kining lagda sa kahimsog, gitawag nga ang “Pulong sa Kaalam,” nag-awhag og diyeta sa mga prutas ug mga lugas ug sa paggamit sa karne nga magdaginot. Ang mga Santos sa Ulahing mga Adlaw dili moggamit sa tabako, alkohol, tsa, kape, drugas o ubang mga substansiya nga makadaot sa lawas ug hunahuna. Sila nagtuo nga ang pagsunod niini nga balaod makahatag og daghang panalangin sa kahimsog ug dugang espirituhanon nga kahibalo.