« សេចក្ដីណែនាំអំពីប្រកាសដំណឹងល្អរបស់យើង » ប្រកាសដំណឹងល្អរបស់យើង ៖ មគ្គុទេសន៍ចែកចាយដំណឹងល្អនៃព្រះយេស៊ូវគ្រីស្ទ ( ឆ្នាំ ២០២៣ )

« សេចក្ដីណែនាំ » ប្រកាសដំណឹងល្អរបស់យើង

សេចក្ដីណែនាំអំពី ប្រកាសដំណឹងល្អរបស់យើង

ព្រះអម្ចាស់បង្គាប់ពួកអ្នកបម្រើរបស់ទ្រង់ « គឺដើម្បីផ្សាយដំណឹងល្អរបស់យើងដោយសារព្រះវិញ្ញាណ គឺព្រះដ៏ជាជំនួយដែលបានចាត់ឲ្យចេញទៅបង្រៀនពីសេចក្ដីពិត » ( គោលលទ្ធិ និង សេចក្ដីសញ្ញា ៥០:១៤ ) ។

ប្រកាសដំណឹងល្អរបស់យើង ត្រូវបានរៀបចំឡើងដើម្បីជួយអ្នកឲ្យបំពេញគោលបំណងរបស់អ្នកក្នុងនាមជាអ្នកផ្សព្វផ្សាយសាសនាម្នាក់ ។ វាផ្ដោតទៅលើកត្តាដ៏ចាំបាច់នៃកិច្ចការផ្សព្វផ្សាយសាសនា ។ វាមិនឆ្លើយនូវរាល់សំណួរ ឬផ្ដល់ការដឹកនាំរាល់ស្ថានភាពដែលអ្នកនឹងជួបប្រទះនោះទេ ។ ទោះជាយ៉ាងណា វាគឺជាធនធានដ៏សំខាន់មួយដើម្បីអ្នករីកចម្រើននៅក្នុងអំណាច និងសមត្ថភាពខាងវិញ្ញាណ ។ សូមសិក្សា ហើយអនុវត្តតាមគោលលទ្ធិ និងគោលការណ៍ទាំងឡាយនៃដំណឹងល្អដែលមាននៅក្នុងបទគម្ពីរ និងនៅក្នុងសៀវភៅនេះ ។

យ៉ូហាន បាទីស្ទ ជ្រមុជទឹកឲ្យព្រះយេស៊ូវគ្រីស្ទ

ប្រកាសដំណឹងល្អរបស់យើង ត្រូវបានរៀបចំឡើងតាមរបៀបដូចតទៅនេះ ៖

យល់អំពីគោលបំណងរបស់អ្នកក្នុងនាមជាអ្នកផ្សព្វផ្សាយសាសនាម្នាក់
- ជំពូកទី ១ ៖ បំពេញគោលបំណងជាអ្នកផ្សព្វផ្សាយសាសនារបស់អ្នក
រៀនសូត្រ និងបង្រៀនគោលលទ្ធិ
- ជំពូកទី ៣ ៖ សិក្សា និងបង្រៀនអំពីដំណឹងល្អនៃព្រះយេស៊ូវគ្រីស្ទ
រីកចម្រើននៅក្នុងការអភិវឌ្ឍខាងវិញ្ញាណ និងការប្រែចិត្តជឿផ្ទាល់ខ្លួន
កែលម្អសមត្ថភាពរបស់អ្នកដើម្បីអញ្ជើញ ហើយជួយមនុស្សទូទៅឲ្យទទួលដំណឹងល្អដែលបានស្ដារឡើងវិញ

សូមសិក្សាជំពូកទាំងនេះម្ដងហើយម្ដងទៀតក្នុងបេសកកម្មរបស់អ្នក ។ វាយតម្លៃកិច្ចការរបស់អ្នក ។ ដាក់គោលដៅ និងដាក់ផែនការដើម្បីសម្រេចវា ។ ពួកអ្នកផ្សព្វផ្សាយសាសនាដែលរៀបចំខ្លួនជាប្រចាំ ហើយកែលម្អជាទៀងទាត់នឹងផ្ដល់ពរជ័យដល់ជីវិតមនុស្សដែលពួកគេបង្រៀន និងបម្រើ ។ ពួកគេក៏នឹងទទួលពរជ័យនៅក្នុងជីវិតពួកគេផ្ទាល់ផងដែរ ។

ឱកាសសិក្សា និងការរៀនសូត្រ

ការសិក្សាដ៏មានប្រសិទ្ធភាពអំឡុងបេសកកម្មរបស់អ្នកនឹងជួយអ្នកឲ្យពង្រឹងទីបន្ទាល់អំពីដំណឹងល្អ ហើយប្រែក្លាយជាសិស្សកាន់តែស្មោះត្រង់របស់ព្រះយេស៊ូវគ្រីស្ទ ។

ការសិក្សាបទគម្ពីរ និង ប្រកាសដំណឹងល្អរបស់យើង នឹងជួយអ្នកបង្រៀនដោយអំណាចខាងវិញ្ញាណ ។ វាក៏នឹងជួយធ្វើឲ្យការបង្រៀនរបស់អ្នកទាក់ទងនឹងសេចក្ដីត្រូវការរបស់បុគ្គលទាំងឡាយដែរ ។

ឱកាសសម្រាប់ការសិក្សា និងការរៀនសូត្រដ៏សំខាន់រួមមាន ៖

ការសិក្សាផ្ទាល់ខ្លួន ។
ការសិក្សាជាមួយដៃគូ ។
ការផ្លាស់ប្ដូរដៃគូ ។
ការប្រជុំក្រុមប្រឹក្សាមណ្ឌល ។
សន្និសីទតំបន់ ។
ក្រុមប្រឹក្សាថ្នាក់ដឹកនាំបេសកកម្ម ( សម្រាប់ថ្នាក់ដឹកនាំបេសកកម្មវ័យក្មេង ) ។

កាលវិភាគផ្សព្វផ្សាយសាសនា រាល់ថ្ងៃរបស់អ្នក រួមមានពេលវេលាសម្រាប់ការសិក្សាផ្ទាល់ខ្លួន និងការសិក្សាជាមួយដៃគូ ។ សូមមើល បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ ២.៤ ដើម្បីទទួលបានព័ត៌មានអំពីកាលវិភាគប្រចាំថ្ងៃរបស់អ្នក ។

អ្វីដែលអ្នករៀនសូត្រនៅក្នុងការសិក្សាផ្ទាល់ខ្លួននឹងជួយអ្នកនៅក្នុងការសិក្សាជាដៃគូ និងឱកាសរៀនសូត្រផ្សេងទៀតដែលបានរៀបរាប់ខាងលើ ។ នៅក្នុងឱកាសទាំងនេះ អ្នក « បង្រៀនគ្នាទៅវិញទៅមកនូវគោលលទ្ធិនៃនគរ » ( គោលលទ្ធិ និង សេចក្តីសញ្ញា ៨៨:៧៧ ) ។

គំនិតដើម្បីកែលម្អការសិក្សារបស់អ្នកនៅក្នុង ប្រកាសដំណឹងល្អរបស់យើង

ប្រកាសដំណឹងល្អរបស់យើង មានដាក់បញ្ចូលគ្នានូវបទគម្ពីរ និងគោលការណ៍ទាំងឡាយនៃដំណឹងល្អ ដើម្បីជួយអ្នកឲ្យស្គាល់ព្រះអង្គសង្គ្រោះ និងដំណឹងល្អរបស់ទ្រង់ ។ វាមានគោលបំណងដើម្បីជួយអ្នកឲ្យចេះស្រឡាញ់បទគម្ពីរ ហើយកែលម្អការសិក្សាបទគម្ពីររបស់អ្នក ។ សូមសិក្សាសេចក្ដីយោងបទគម្ពីរនៅក្នុងជំពូកនីមួយៗក្នុងបេសកកម្មរបស់អ្នក ។

ជំពូកនីមួយៗនៅក្នុង ប្រកាសដំណឹងល្អរបស់យើង មានបញ្ចូលនូវគំនិត និងសកម្មភាពនានា ដើម្បីជួយអ្នកឲ្យសិក្សា ហើយអនុវត្តអ្វីដែលអ្នកកំពុងរៀនសូត្រ ។ សូមប្រើវានៅក្នុងការសិក្សាផ្ទាល់ខ្លួន និងជាដៃគូរបស់អ្នក ( សូមមើល បទដ្ឋានអ្នកផ្សព្វផ្សាយសាសនា ២.៤ ) ។ អ្នកក៏អាចប្រើវាអំឡុងការប្រជុំក្រុមប្រឹក្សាមណ្ឌល និងសន្និសីទតំបន់ផងដែរ ។ ការសិក្សារបស់អ្នកនឹងកាន់តែមានប្រសិទ្ធភាព នៅពេលអ្នករកឃើញវិធីអនុវត្តអ្វីដែលអ្នករៀន ។

វាគឺជាជំនួយដើម្បីមានផែនការមួយសម្រាប់ការសិក្សាផ្ទាល់ខ្លួនរបស់អ្នក ។ អ្នកអាចបង្កើតផែនការផ្ទាល់ខ្លួន ដើម្បីដាក់អាទិភាពគោលការណ៍ទាំងឡាយនៃដំណឹងល្អដែលអ្នកចង់យល់ដឹងឲ្យបានកាន់តែល្អប្រសើរ ។ អ្នកក៏អាចរៀបចំការសិក្សារបស់អ្នកក្នុងជំពូកទាំងឡាយនៅក្នុង ប្រកាសដំណឹងល្អរបស់យើង ផងដែរ ។ ឧទាហរណ៍ អ្នកអាចប្រើមេរៀននៅក្នុង ជំពូកទី ៣ ដើម្បីដឹកនាំការសិក្សារបស់អ្នកអំពីគោលលទ្ធិ និងគោលការណ៍ទាំងឡាយដែលអ្នកនឹងបង្រៀន ។ អ្នកចាំបាច់ត្រូវចេះមេរៀនទាំងនេះឲ្យល្អបំផុត ដើម្បីអ្នកអាចបង្រៀនដោយព្រះវិញ្ញាណតាមពាក្យសម្ដីរបស់អ្នកផ្ទាល់ ។

សូមធ្វើការកត់ចំណាំពេលអ្នកសិក្សា ។ សូមប្រើសៀវភៅកំណត់ហេតុជាក្រដាស ឬអេឡិចត្រូនិក ( ដូចជា បណ្ណាល័យដំណឹងល្អ ) ដើម្បីជួយអ្នកឲ្យយល់ដឹង ស្គាល់ច្បាស់ និងចងចាំនូវអ្វីដែលអ្នកកំពុងរៀន ។

សូមចាប់ផ្ដើមការសិក្សារបស់អ្នកដោយការអធិស្ឋានទូលសូមព្រះវិញ្ញាណបរិសុទ្ធ ដើម្បីជួយអ្នកឲ្យរៀន ។ ទ្រង់នឹងនាំយកចំណេះដឹង ការយល់ដឹង និងភាពជឿជាក់ដែលនឹងផ្ដល់ពរជ័យដល់ជីវិតរបស់អ្នក ហើយអនុញ្ញាតឲ្យអ្នកផ្ដល់ពរជ័យដល់មនុស្សដទៃទៀត ។ សូមបើកគំនិត និងដួងចិត្តរបស់អ្នកសម្រាប់ការបំផុសគំនិត និងការយល់ដឹងដែលអ្នកទទួលបានមកពីទ្រង់ ។ សូមកត់ត្រានូវការយល់ដឹងទាំងនេះនៅក្នុងសៀវភៅកំណត់ចំណាំរបស់អ្នក ។

សូមមើលសៀវភៅកំណត់ហេតុការសិក្សារបស់អ្នកជាទៀងទាត់ ដើម្បីចងចាំពីបទពិសោធន៍ខាងវិញ្ញាណ មើលឃើញពីការយល់ដឹងថ្មី ហើយទទួលស្គាល់នូវការរីកចម្រើនរបស់អ្នក ។

កម្មវិធីប្រកាសដំណឹងល្អរបស់យើង

សូមប្រើកម្មវិធីប្រកាសដំណឹងល្អរបស់យើង ដើម្បីជួយអ្នកអនុវត្តគោលការណ៍ទាំងឡាយដែលអ្នកកំពុងរៀន ។ កម្មវិធីនេះមាននៅលើឧបករណ៍ចល័តរបស់អ្នក ។ វាមានមុខងារដើម្បីជួយអ្នកឲ្យបំពេញគោលបំណងផ្សព្វផ្សាយសាសនារបស់អ្នកកាន់តែល្អប្រសើរ ។ មុខងារទាំងនេះរួមមាន ៖

ព័ត៌មានអំពីសេចក្ដីត្រូវការ និងការរីកចម្រើនរបស់មនុស្សដែលអ្នកកំពុងបង្រៀន ។
កន្លែងមួយដើម្បីកត់ត្រាការរីកចម្រើនរបស់អ្នកឆ្ពោះទៅរកគោលដៅដែលបានចង្អុលបង្ហាញ ។
ប្រតិទិនដើម្បីកត់ត្រាផែនការរបស់អ្នក និងដាក់កាលវិភាគសម្រាប់សកម្មភាពនានា ។
ផែនទីតំបន់របស់អ្នក និងព័ត៌មានសំខាន់ផ្សេងៗទៀត ដើម្បីជួយអ្នកសម្រេចគោលដៅរបស់អ្នក ។

ប្រកាសដំណឹងល្អរបស់យើង មានដាក់បញ្ចូលគ្នានូវគំនិតជាច្រើនសម្រាប់ការប្រើប្រាស់កម្មវិធីនេះ ដើម្បីជួយអ្នកស្វែងរក បង្រៀន និងជ្រមុជទឹកដល់មនុស្សទាំងឡាយ ។

ការប្រើប្រាស់ ប្រកាសដំណឹងល្អរបស់យើង ដោយសមាជិកសាសនាចក្រ

ប្រកាសដំណឹងល្អរបស់យើង គឺជាធនធានដ៏មានតម្លៃមួយពុំមែនសម្រាប់តែពួកអ្នកផ្សព្វផ្សាយសាសនានោះទេ ប៉ុន្តែក៏សម្រាប់សមាជិកសាសនាចក្រផងដែរ ។ ឧទាហរណ៍ ការសិក្សាវានឹងជួយសមាជិក ៖

រៀនសូត្រ ហើយបង្រៀនដំណឹងល្អនៃព្រះយេស៊ូវគ្រីស្ទ ( សូមសិក្សា ជំពូកទី ១, ២, ៣ និង ១០ ) ។
ឆ្លើយសំណួរដំណឹងល្អ ( សូមសិក្សា ជំពូកទី ៣ និង ៥ ) ។
យល់ដឹងកាន់តែច្រើនអំពីការស្វែងរក និងការពឹងផ្អែកលើព្រះវិញ្ញាណបរិសុទ្ធ ( សូមសិក្សា ជំពូកទី ៤ ) ។
យល់ដឹងអំពីអានុភាពនៃព្រះគម្ពីរមរមន ( សូមសិក្សា ជំពូកទី ៥ ) ។
ស្វែងរកគុណលក្ខណៈដូចជាព្រះគ្រីស្ទ ( សូមសិក្សា ជំពូកទី ៦ ) ។
បំពេញការទទួលខុសត្រូវខាងសេចក្ដីសញ្ញារបស់ពួកគេ ដើម្បីចែកចាយដំណឹងល្អ ដោយការរស់នៅតាមគោលការណ៍នៃសេចក្ដីស្រឡាញ់ ចែកចាយ និងអញ្ជើញ ( សូមសិក្សា ជំពូកទី ៩ និង ១៣ ) ។
ស្ថាបនាសាមគ្គីភាពជាមួយនឹងពួកអ្នកផ្សព្វផ្សាយសាសនាពេញម៉ោង ( សូមសិក្សា ជំពូកទី ១៣ ) ។

ការសិក្សា ប្រកាសដំណឹងល្អរបស់យើង—ជាពិសេសជំពូកទី ៣—នឹងមានប្រយោជន៍យ៉ាងជាក់លាក់ចំពោះយុវវ័យ និងរៀមច្បងដែលកំពុងរៀបចំខ្លួនចេញបម្រើបេសកកម្ម ។