« ជំពូកទី ៥ ៖ ប្រើអានុភាពនៃព្រះគម្ពីរមរមន » ប្រកាសដំណឹងល្អរបស់យើង ៖ មគ្គុទេសន៍ចែកចាយដំណឹងល្អនៃព្រះយេស៊ូវគ្រីស្ទ ( ឆ្នាំ ២០២៣ )

« ជំពូកទី ៥ » ប្រកាសដំណឹងល្អរបស់យើង

ជំពូកទី ៥

ប្រើឥទ្ធិពលនៃព្រះគម្ពីរមរមន

សូមពិចារណាការណ៍នេះ

តើព្រះគម្ពីរមរមនគឺជាមូលដ្ឋាននៃសាសនារបស់យើងយ៉ាងដូចម្តេច ?
ហេតុអ្វីបានជាព្រះគម្ពីរមរមនមានឥទ្ធិពលខ្លាំងក្នុងដំណើរនៃការប្រែចិត្តជឿ ?
តើព្រះគម្ពីរមរមនបង្រៀនអ្វីខ្លះអំពីព្រះយេស៊ូវគ្រីស្ទ ?
តើខ្ញុំអាចប្រើព្រះគម្ពីរមរមនដើម្បីជួយខ្លួនខ្ញុំ និងអ្នកដទៃឲ្យខិតជិតព្រះដោយរបៀបណា ?
តើព្រះគម្ពីរមរមនឆ្លើយតបនឹងសំណួរខាងព្រលឹងដោយរបៀបណា ?
តើខ្ញុំអាចជួយមនុស្សឲ្យអាន និងទទួលទីបន្ទាល់នៃព្រះគម្ពីរមរមនដោយរបៀបណា ?

ព្រះគម្ពីរមរមនត្រូវបានប្រមូលផ្ដុំជាមួយនឹងព្រះវិញ្ញាណ គឺជាប្រភពដ៏មានឥទ្ធិពលបំផុតរបស់អ្នកនៅក្នុងការផ្លាស់សាសនា ។ គម្ពីរនេះជាបញ្ជីបុរាណ ពិសិដ្ឋ ដែលបានសរសេរដើម្បីបញ្ចុះបញ្ចូលមនុស្សថាព្រះយេស៊ូវគឺជាព្រះគ្រីស្ទ ( សូមមើល ទំព័រចំណងជើងនៃព្រះគម្ពីរមរមន ) ។ ដូចដែលអនុចំណងជើងសរសេរថា ព្រះគម្ពីរមរមនគឺជា « សក្ខីបទមួយទៀតអំពីព្រះយេស៊ូវគ្រីស្ទ » ។ វាក៏ជាភស្ដុតាងដ៏គួរឲ្យចាប់អារម្មណ៍ផងដែរថា ព្រះបានហៅយ៉ូសែប ស្ម៊ីធ ឲ្យធ្វើជាព្យាការី ហើយបានស្ដារឡើងវិញនូវដំណឹងល្អនៃព្រះយេស៊ូវគ្រីស្ទតាមរយៈលោក ។

ព្រះគម្ពីរមរមនគឺជាមូលដ្ឋាននៃសាសនារបស់យើង ។

ព្យាការី យ៉ូសែប ស៊្មីធ បានប្រកាសថា « ព្រះគម្ពីរមរមនគឺជាមូលដ្ឋាននៃសាសនារបស់យើង » ( បុព្វកថានៃព្រះគម្ពីរមរមន ) ។ នៅឱកាសផ្សេងទៀតលោកបានមានប្រសាសន៍ថា ៖ « បើដកព្រះគម្ពីរមរមន និងវិវរណៈចេញ តើសាសនារបស់យើងនៅសល់អ្វីទៀត ? យើងគ្មានសល់អ្វីទេ » ( Teachings of Presidents of the Church: Joseph Smith [ ឆ្នាំ ២០០៧ ] ទំព័រ ១៩៦ ) ។

កំណោងទ្វារគឺជារចនាសម្ព័ន្ធស្ថាបត្យកម្មដ៏រឹងមាំដែលធ្វើពីបំណែករាងជ្រុងដុំៗដែលដាក់ត្រួតលើគ្នា ។ ដុំកណ្តាល ឬមូលដ្ឋាន ជាធម្មតាមានទំហំធំជាងដុំជ្រុងផ្សេងទៀត ហើយភ្ជាប់គ្នាឲ្យជាប់ ។

ប្រធាន អ៊ែសរ៉ា ថាហ្វ ប៊ែនសឹន បានមានប្រសាសន៍ថា ព្រះគម្ពីរមរមនគឺជាមូលដ្ឋាននៃសាសនារបស់យើង យ៉ាងហោចណាស់តាមរបៀបបីយ៉ាង ៖

សាក្សីអំពីព្រះគ្រីស្ទ ។ « ព្រះគម្ពីរមរមនគឺជាសិលាគន្លឹះក្នុងភាពជាសាក្សីរបស់យើងអំពីព្រះយេស៊ូវគ្រីស្ទ ដែលទ្រង់ផ្ទាល់ជាថ្មជ្រុងយ៉ាងឯកចំពោះអ្វីទាំងអស់ដែលយើងធ្វើ ។ វាធ្វើជាសាក្សីអំពីការពិតរបស់ទ្រង់ដោយអំណាច និងភាពច្បាស់លាស់ » ។

ភាពពេញលេញនៃគោលលទ្ធិ ។ « ព្រះអម្ចាស់ទ្រង់ផ្ទាល់បានមានព្រះបន្ទូលប្រកាសថា ព្រះគម្ពីរមរមនមាននូវ ‹ ភាពពោរពេញនៃដំណឹងល្អនៃព្រះយេស៊ូវគ្រីស្ទ › [ គោលលទ្ធិ និងសេចក្តីសញ្ញា ២០:៩; ២៧:៥ ] ។… នៅក្នុងព្រះគម្ពីរមរមន យើងនឹងរកឃើញភាពពេញលេញនៃ [ គោលលទ្ធិ ] ដែលតម្រូវឲ្យមានសម្រាប់សេចក្តីសង្រ្គោះរបស់យើង ។ ហើយ [ វាគឺ ] ត្រូវបានបង្រៀនយ៉ាងច្បាស់ និង សាមញ្ញ ម្ល៉ោះហើយសូម្បីតែកូនក្មេងក៏អាចរៀនពីរបៀបទាំងឡាយនៃសេចក្តីសង្គ្រោះ និង ភាពលើកតម្កើងបានដែរ » ។

មូលដ្ឋានគ្រឹះទីបន្ទាល់ ។ « ក៏ដូចជាកំណោងទ្រសំណង់បាក់ស្រុតនៅពេលមូលដ្ឋានគ្រឹះត្រូវបានដកចេញ ក៏ដូចគ្នានឹងការឈរឡើង ឬ ការធ្លាក់ចុះរបស់សាសនាចក្រដែរ គឺវាអាស្រ័យលើភាពពេញលេញនៃព្រះគម្ពីរមរមនយ៉ាងនោះដែរ ។… បើសិនព្រះគម្ពីរមរមនពិត…នោះបុគ្គលម្នាក់ត្រូវតែទទួលយកការប្រកាសអំពីការស្តារឡើងវិញ » ។ ( Teachings of Presidents of the Church: Ezra Taft Benson [ ឆ្នាំ ២០១៤ ] ទំព័រ ១២៩, ១៣១, ១២៨ ) ។

តាមរយៈការទទួលបានទីបន្ទាល់ថាព្រះគម្ពីរមរមនគឺជាព្រះបន្ទូលរបស់ព្រះ ហើយយ៉ូសែប ស៊្មីធ គឺជាព្យាការី ។ តាមរយៈលោកសិទ្ធិអំណាចបព្វជិតភាពរបស់ព្រះត្រូវបានស្តារឡើងវិញតាមរយៈពួកសារទូតពីស្ថានសួគ៌ ។ ព្រះក៏បានអនុញ្ញាតឲ្យយ៉ូសែបរៀបចំសាសនាចក្រនៃព្រះយេស៊ូវគ្រីស្ទឡើងផងដែរ ។ វិវរណៈបន្តនៅថ្ងៃនេះតាមរយៈព្យាការីដែលមានជីវិត ។

ព្រះគម្ពីរមរមនគឺជាការប្រែចិត្តជឿដ៏ចាំបាច់ផ្ទាល់ខ្លួន

ផ្នែកដ៏សំខាន់មួយនៃការប្រែចិត្តជឿ គឺជាការទទួលបានសាក្សីតាមរយៈព្រះចេស្តានៃព្រះវិញ្ញាណបរិសុទ្ធថា ព្រះគម្ពីរមរមនគឺជាព្រះគម្ពីរពិត ។ នៅពេលអ្នកអាន និងសិក្សាព្រះគម្ពីរនេះដោយស្មោះ អ្នកនឹងទទួលអារម្មណ៍ថា ពាក្យពេចន៍នៅក្នុងព្រះគម្ពីរនេះធ្វើឲ្យព្រលឹងអ្នករីកចម្រើន ។ ពាក្យពេចន៍នៅក្នុងគម្ពីរនេះនឹងបំភ្លឺការយល់ដឹងរបស់អ្នកអំពីជីវិត ផែនការរបស់ព្រះ និងអំពីព្រះយេស៊ូវគ្រីស្ទ ( សូមមើល អាលម៉ា ៣២:២៨ ) ។ សូមអធិស្ឋានអំពីគម្ពីរនេះដោយមានចេតនាពិត និងជំនឿលើព្រះគ្រីស្ទ ។ នៅពេលអ្នកធ្វើ នោះអ្នកនឹងទទួលបានសាក្សីតាមរយៈព្រះវិញ្ញាណបរិសុទ្ធថា ព្រះគម្ពីរនេះគឺជាព្រះបន្ទូលនៃព្រះ ( សូមមើល មរ៉ូណៃ ១០:៤–៥ ) ។

ទីបន្ទាល់ផ្ទាល់ខ្លួនរបស់អ្នកអំពីព្រះគម្ពីរមរមនអាចនាំទៅរកសេចក្តីជំនឿដ៏ជ្រាលជ្រៅ និងថិតថេរលើអំណាចរបស់វាដើម្បីជួយអ្នកដទៃឲ្យប្រែចិត្តជឿ ។ សូមជួយមនុស្សដែលអ្នកបង្រៀនស្គាល់ការបំភ្លឺដែលពួកគេទទួលអារម្មណ៍ នៅពេលពួកគេអានព្រះគម្ពីរនេះដោយស្មោះ ។ សូមបញ្ជាក់ពីសាក្សីអំពីព្រះយេស៊ូវគ្រីស្ទដ៏មានឥទ្ធិពលរបស់ព្រះគម្ពីរនេះ ។ សូមលើកទឹកចិត្តពួកគេឲ្យអធិស្ឋានដើម្បីទទួលសាក្សីផ្ទាល់ខ្លួនថាគម្ពីរនោះគឺពិត ។

ការលើកទឹកចិត្តមនុស្សឲ្យស្វែងរកសាក្សីពីព្រះវិញ្ញាណបរិសុទ្ធអំពីព្រះគម្ពីរមរមនគួរតែជាចំណុចសំខាន់នៃការបង្រៀនរបស់អ្នក ។ ព្រះគម្ពីរមរមនអាចផ្លាស់ប្តូរជីវិតរបស់ពួកគេជារៀងរហូត ។

សូមប្រើព្រះគម្ពីរមរមនដើម្បីបង្រៀនអំពីដំណឹងល្អនៃព្រះយេស៊ូវគ្រីស្ទ ។

ព្យាការីយ៉ូសែប ស្ម៊ីធ បានមានប្រសាសន៍ថា « ព្រះគម្ពីរមរមន [ គឺជា] គម្ពីរដ៏ត្រឹមត្រូវបំផុត ជាងគម្ពីរនានាទាំងអស់នៅលើផែនដីនេះ » ( បុព្វកថានៃព្រះគម្ពីរមរមន ) ។ ព្រះគម្ពីរនេះថ្លែងពីព្រះគ្រីស្ទ និងបង្រៀនគោលលទ្ធិរបស់ទ្រង់ច្បាស់ៗ ( សូមមើល នីហ្វៃទី២ ៣១; ៣២:១–៦; នីហ្វៃទី៣ ១១:៣១–៣៩; ២៧:១៣–២២ ) ។ ព្រះគម្ពីរនេះបង្រៀនពីភាពពេញលេញនៃដំណឹងល្អរបស់ទ្រង់ ។ គោលការណ៍ និងពិធីបរិសុទ្ធដំបូងនៃដំណឹងល្អ ដូចដែលបានបង្រៀននៅក្នុងព្រះគម្ពីរមរមន គឺជាផ្លូវទៅកាន់ជីវិតដ៏បរិបូរណ៍ ។

សូមប្រើព្រះគម្ពីរមរមនជាប្រភពចម្បងរបស់អ្នកសម្រាប់ការបង្រៀនដំណឹងល្អដែលបានស្ដារឡើងវិញ ។ តារាងខាងក្រោមរាយបញ្ជីពីសេចក្តីពិតមួយចំនួននៅក្នុងព្រះគម្ពីរមរមន ដែលអ្នកនឹងបង្រៀន ។

មេរៀនរបស់អ្នកផ្សព្វផ្សាយសាសនានៅក្នុងជំពូកទី ៣	គោលលទ្ធិ	សេចក្ដីយោង
មេរៀនរបស់អ្នកផ្សព្វផ្សាយសាសនានៅក្នុងជំពូកទី ៣ សារលិខិតនៃការស្ដារឡើងវិញនៃដំណឹងល្អនៃព្រះយេស៊ូវគ្រីស្ទ	គោលលទ្ធិ លក្ខណៈនៃព្រះ ការងារបម្រើ និងដង្វាយធួនរបស់ព្រះ ការធ្លាក់ ការស្ដារឡើងវិញ យ៉ូសែប ស្ម៊ីធ សិទ្ធិអំណាចបព្វជិតភាព	សេចក្ដីយោង នីហ្វៃទី១ ១២–១៤ នីហ្វៃទី២ ៣; ២៦–២៩ ម៉ូសាយ ២–៥
មេរៀនរបស់អ្នកផ្សព្វផ្សាយសាសនានៅក្នុងជំពូកទី ៣ ផែនការនៃសេចក្ដីសង្គ្រោះរបស់ព្រះវរបិតាសួគ៌	គោលលទ្ធិ « ផែនការដ៏មហិមានៃព្រះដ៏នៅអស់កល្បជានិច្ច » រួមទាំងការធ្លាក់របស់លោកអ័ដាម និងនាងអេវ៉ា ដង្វាយធួននៃព្រះយេស៊ូវគ្រីស្ទ ការរស់ឡើងវិញ និងការជំនុំជម្រះ	សេចក្ដីយោង នីហ្វៃទី២ ២; ៩ ម៉ូសាយ ៣; ១៥–១៦ អាលម៉ា ១២; ៣៤:៩; ៤០–៤២
មេរៀនរបស់អ្នកផ្សព្វផ្សាយសាសនានៅក្នុងជំពូកទី ៣ ដំណឹងល្អនៃព្រះយេស៊ូវគ្រីស្ទ	គោលលទ្ធិ សេចក្តីជំនឿលើព្រះគ្រីស្ទ ការប្រែចិត្ត ពិធីបុណ្យជ្រមុជទឹក អំណោយទាននៃព្រះវិញ្ញាណបរិសុទ្ធ និងការកាន់ខ្ជាប់ដរាបដល់ចុងបំផុត ។	សេចក្ដីយោង នីហ្វៃទី២ ៣១–៣២ នីហ្វៃទី៣ ១១; ២៧:១៣–២២
មេរៀនរបស់អ្នកផ្សព្វផ្សាយសាសនានៅក្នុងជំពូកទី ៣ ការក្លាយជាសិស្សរបស់ព្រះយេស៊ូវគ្រីស្ទពេញមួយជីវិត	គោលលទ្ធិ ពិធីបរិសុទ្ធដូចជាពិធីបុណ្យជ្រមុជទឹក ការតែងតាំងបព្វជិតភាព និងសាក្រាម៉ង់	សេចក្ដីយោង នីហ្វៃទី៣ ១១:២២–២៨; ១៨ មរ៉ូណៃ ២–៦

ការសិក្សាព្រះគម្ពីរ

តើព្រះអង្គសង្គ្រោះមានព្រះបន្ទូលអ្វីខ្លះអំពីព្រះគម្ពីរមរមន ?

ព្រះគម្ពីរមរមនថ្លែងទីបន្ទាល់អំពីព្រះគ្រីស្ទ

គោលបំណងចម្បងនៃព្រះគម្ពីរមរមនគឺដើម្បីថ្លែងទីបន្ទាល់អំពីព្រះយេស៊ូវគ្រីស្ទ ។ វាបញ្ជាក់ពីសេចក្តីពិតនៃព្រះជន្ម បេសកកម្ម ការមានព្រះជន្មរស់ឡើងវិញ និងព្រះចេស្តារបស់ទ្រង់ ។ វាបង្រៀនគោលលទ្ធិពិតអំពីព្រះគ្រីស្ទ និងដង្វាយធួនរបស់ទ្រង់ ។

ព្យាការីជាច្រើននាក់ដែលសំណេររបស់លោកត្រូវបានរក្សាទុកក្នុងព្រះគម្ពីរមរមនបានឃើញព្រះគ្រីស្ទដោយផ្ទាល់ ។ បងរបស់យ៉ារ៉េឌ នីហ្វៃ និងយ៉ាកុបបានឃើញព្រះគ្រីស្ទមុនជីវិតរមែងស្លាប់ ។ ហ្វូងមនុស្សជាច្រើនដែលមានវត្តមានអំឡុងពេលការងារបម្រើរបស់ព្រះអង្គសង្គ្រោះដល់ពួកសាសន៍នីហ្វៃ ( សូមមើល នីហ្វៃទី៣ ១១–២៨ ) ។ ក្រោយមក មរមន និងមរ៉ូណៃបានឃើញព្រះគ្រីស្ទដែលបានមានព្រះជន្មរស់ឡើងវិញ ( សូមមើល មរមន ១:១៥; អេធើរ ១២:៣៩ ) ។

នៅពេលមនុស្សអាន និងអធិស្ឋានអំពីព្រះគម្ពីរមរមន នោះពួកគេនឹងស្គាល់ព្រះអង្គសង្គ្រោះកាន់តែច្បាស់ ហើយទទួលបទពិសោធន៍ពីសេចក្តីស្រឡាញ់របស់ទ្រង់ ។ ទីបន្ទាល់របស់ពួកគេអំពីទ្រង់នឹងរីកចម្រើនឡើង ។ ពួកគេនឹងដឹងពីរបៀបមករកទ្រង់ ហើយបានសង្រ្គោះ ។ ( សូមមើល នីហ្វៃទី១ ១៥:១៤–១៥ ) ។

« ព្រះគម្ពីរមរមនផ្ដល់នូវការយល់ដឹងពេញលេញ ហើយមានអំណាចបំផុតអំពីដង្វាយធួនរបស់ព្រះយេស៊ូវគ្រីស្ទដែលអាចរកឃើញគ្រប់ទីកន្លែង ។ វាបង្រៀនអំពីអត្ថន័យពិតនៃការកើតជាថ្មី ។… យើងដឹងនូវហេតុផលដែលយើងនៅលើផែនដីនេះ ។ សេចក្ដីពិតទាំងនេះ និងសេចក្ដីពិតផ្សេងទៀតត្រូវបានបង្រៀនដោយមានការបញ្ចុះបញ្ចូលយ៉ាងមានអានុភាព នៅក្នុងព្រះគម្ពីរមរមនជាងគម្ពីរផ្សេងទៀត ។ អំណាចពេញលេញនៃដំណឹងល្អនៃព្រះយេស៊ូវគ្រីស្ទមាននៅក្នុងព្រះគម្ពីរមរមន » ( រ័សុល អិម ណិលសុន « The Book of Mormon: What Would Your Life Be Like without It? » Liahona ខែ វិច្ឆិកា ឆ្នាំ ២០១៧ ទំព័រ ៦២ ) ។

ការសិក្សាផ្ទាល់ខ្លួន

នៅក្នុងបេសកកម្មរបស់អ្នក សូមសរសេរចម្លើយចំពោះសំណួរខាងក្រោមនៅក្នុងសៀវភៅកំណត់ហេតុរបស់អ្នក ៖

តើអ្នកបានរៀនអ្វីខ្លះអំពីព្រះយេស៊ូវគ្រីស្ទចេញពីការសិក្សាព្រះគម្ពីរមរមន ?
តើការសិក្សាព្រះគម្ពីរមរមនបានមានឥទ្ធិពលលើទីបន្ទាល់របស់អ្នកពីព្រះយេស៊ូវគ្រីស្ទដោយរបៀបណា ?
តើអ្នកអាចប្រើព្រះគម្ពីរមរមនដើម្បីជួយដល់មនុស្សពង្រឹងទីបន្ទាល់របស់ពួកគេដោយរបៀបណា ?

ការសិក្សាព្រះគម្ពីរ

តើហេតុផលអ្វីខ្លះដែលព្យាការីក្នុងព្រះគម្ពីរមរមនបានឲ្យសរសេរកំណត់ត្រារបស់ពួកគេ ?

ការសិក្សាផ្ទាល់ខ្លួន ឬជាដៃគូ

ព្រះគម្ពីរមរមនគឺត្រូវបានសរសេរ « ដើម្បីជាការបរិវត្តន៍ដល់ [ មនុស្សទាំងអស់ ] ថា ព្រះយេស៊ូវ គឺជាព្រះគ្រីស្ទ » ( ទំព័រចំណងជើងនៃព្រះគម្ពីរមរមន ) ។ តារាងខាងក្រោមរាយបញ្ជីជំពូកព្រះគម្ពីរមរមនមួយចំនួនដែលថ្លែងទីបន្ទាល់អំពីជីវិត ការបង្រៀន និងការបម្រើរបស់ព្រះយេស៊ូវគ្រីស្ទ ។ សូមជ្រើសរើសវគ្គបទគម្ពីរដើម្បីសិក្សាពេញមួយបេសកកម្មរបស់អ្នក ។

លើសពីនេះ សូមគិតអំពីតម្រូវការរបស់មនុស្សដែលអ្នកកំពុងបង្រៀន ។ សូមដាក់ផែនការដើម្បីអានវគ្គបទគម្ពីរទាំងនេះមួយចំនួនជាមួយពួកគេ ដើម្បីពង្រឹងចំណេះដឹង និងទីបន្ទាល់អំពីព្រះអង្គសង្គ្រោះ ។

ទំព័រចំណងជើង និងសេចក្ដីណែនាំ	បង្ហាញគោលបំណងច្បាស់លាស់នៃព្រះគម្ពីរមរមន ។
នីហ្វៃទី១ ១០–១១	លីហៃ និងនីហ្វៃថ្លែងទីបន្ទាល់ពីព្រះអង្គសង្រ្គោះ ។
នីហ្វៃទី២ ២; ៩	លីហៃ និងយ៉ាកុប ថ្លែងទីបន្ទាល់អំពីព្រះយេស៊ូវគ្រីស្ទ និងដង្វាយធួនរបស់ទ្រង់ ។
នីហ្វៃទី២ ៣១–៣៣	នីហ្វៃបង្រៀនពីគោលលទ្ធិនៃព្រះគ្រីស្ទ ។
ម៉ូសាយ ២–៥	ស្តេចបេនយ៉ាមីនថ្លែងទីបន្ទាល់អំពីព្រះគ្រីស្ទ ។
អាលម៉ា ៥; ៧	អាលម៉ាថ្លែងទីបន្ទាល់អំពីព្រះអង្គសង្រ្គោះ ។
អាលម៉ា ៣៦	អាលម៉ាដកពិសោធន៍ព្រះចេស្ដាដ៏ធួនរបស់ព្រះ គ្រីស្ទ ។
នីហ្វៃទី៣ ៩–១០	ព្រះអង្គសង្រ្គោះអញ្ជើញមនុស្សឲ្យមករកទ្រង់ ។
នីហ្វៃទី៣ ១១–១៨	ព្រះអង្គសង្រ្គោះបង្រៀនពួកនីហ្វៃពីព្រះវរបិតា និងគោលលទ្ធិរបស់ទ្រង់ ។
នីហ្វៃទី៣ ២៧	ព្រះអង្គសង្គ្រោះបង្រៀនដំណឹងល្អរបស់ទ្រង់ ។
អេធើរ ១២	អេធើរ និងមរ៉ូណៃបង្រៀនថា សេចក្តីជំនឿលើព្រះយេស៊ូវគ្រីស្ទគឺជាគោលការណ៍នៃសកម្មភាព និងអំណាច ។
មរ៉ូណៃ ៧–៨	មរមនបង្រៀនពីសេចក្តីស្រឡាញ់ដ៏សុទ្ធសាធនៃព្រះគ្រីស្ទ និងដង្វាយធួនរបស់ទ្រង់ ។
មរ៉ូណៃ ១០	មរ៉ូណៃ អញ្ជើញមនុស្សទាំងអស់ឲ្យមករកព្រះយេស៊ូវគ្រីស្ទ ហើយបានឥតខ្ចោះនៅក្នុងទ្រង់ ។

ព្រះគម្ពីរមរមនជួយយើងឲ្យខិតទៅជិតព្រះ ។

ទាក់ទងនឹងការអានព្រះគម្ពីរមរមន ព្យាការីយ៉ូសែប ស្ម៊ីធ បានមានប្រសាសន៍ថា « បុគ្គលម្នាក់អាចចូលទៅជិតព្រះបាន ដោយសារធ្វើតាមសិក្ខាបទទាំងឡាយនៃគម្ពីរនេះជាជាងគម្ពីរដទៃទាំងអស់ » ( បុព្វកថានៃព្រះគម្ពីរមរមន ) ។ តាមរយៈការបង្រៀន និងការអញ្ជើញមនុស្សឲ្យរស់នៅតាមគោលការណ៍នៅក្នុងព្រះគម្ពីរមរមនយ៉ាងខ្ជាប់ខ្ជួន នោះអ្នកជួយពួកគេឲ្យអភិវឌ្ឍសេចក្តីជំនឿលើព្រះយេស៊ូវគ្រីស្ទ ហើយចូលទៅជិតព្រះកាន់តែខ្លាំង ។

ព្រះគម្ពីរមរមនបង្កើតទីបន្ទាល់ ហើយនាំឲ្យទទួលបានវិវរណៈផ្ទាល់ខ្លួន ។ សូមប្រើព្រះគម្ពីរមរមន ដើម្បីជួយមនុស្សឲ្យមានបទពិសោធន៍ខាងវិញ្ញាណ ជាពិសេសសាក្សីពីព្រះវិញ្ញាណបរិសុទ្ធថា ព្រះគម្ពីរនេះតែម្តងគឺជាព្រះបន្ទូលរបស់ព្រះ ។

ផ្តល់អាទិភាពដល់វគ្គបទគម្ពីរមរមន នៅពេលអ្នកបង្រៀន ។ ព្រះគម្ពីរនេះមានអំណាចបំប្លែងតាមរយៈព្រះវិញ្ញាណបរិសុទ្ធ ។ ពេលអ្នកបង្រៀនដំណឹងល្អដោយប្រើព្រះគម្ពីរមរមន នោះការបង្រៀនរបស់អ្នកនឹងមានអំណាច និងភាពច្បាស់លាស់នៅក្នុងចិត្ត និងគំនិត ។

ប្រធាន ហ្គរដុន ប៊ី ហ៊ិងគ្លី បានបង្រៀនថា « អស់អ្នកដែលបានអាន [ ព្រះគម្ពីរមរមន ] ដោយការអធិស្ឋាន ទោះពួកគេជាអ្នកមាន ឬក្រ មានការសិក្សា ឬគ្មានការសិក្សាក្តី ក៏បានរីកចម្រើននៅក្រោមអំណាចរបស់ព្រះគម្ពីរនេះដែរ » ។ លោកបានបង្រៀនបន្ថែមទៀតថា ៖

« បើគ្មានការបម្រុងទុក ខ្ញុំសូមសន្យានឹងបងប្អូនថា បើបងប្អូននឹងអានព្រះគម្ពីរមរមនប្រកបដោយការអធិស្ឋាន មិនថាបងប្អូនបានអានវាពីមុនមកប៉ុន្មានដងនោះទេ នោះនឹងមានព្រះវិញ្ញាណនៃព្រះអម្ចាស់កើតមាននៅក្នុងដួងចិត្តរបស់បងប្អូនយ៉ាងច្រើនដោយគ្មានលក្ខខណ្ឌ ។ វានឹងកើតមាននូវដំណោះស្រាយដ៏រឹងមាំមួយ ដើម្បីដើរដោយគោរពប្រតិបត្តិចំពោះបទបញ្ញត្តិរបស់ទ្រង់ ហើយនឹងកើតមានទីបន្ទាល់កាន់តែរឹងមាំអំពីព្រះរាជបុត្រានៃព្រះដ៏មានព្រះជន្មរស់ពិត » ( « The Power of the Book of Mormon » Ensign ខែ មិថុនា ឆ្នាំ ១៩៨៨ ទំព័រ ៦ ) ។

ព្រះគម្ពីរមរមន ដោះស្រាយសំណួរនៃព្រលឹង

ការអានព្រះគម្ពីរមរមនដោយមានការដឹកនាំពីព្រះវិញ្ញាណអាចជួយមនុស្សទទួលបានចម្លើយ ឬការយល់ដឹងចំពោះសំណួរផ្ទាល់ខ្លួនរបស់ពួកគេ—ឬសំណួរនៃព្រលឹង ។ សូមជួយមនុស្សឲ្យមើលឃើញពីរបៀបដែលការបង្រៀននៅក្នុងព្រះគម្ពីរមរមនដោះស្រាយបញ្ហាជីវិត ។

សំណួរទាំងនេះមួយចំនួនត្រូវបានរាយបញ្ជីខាងក្រោម រួមជាមួយនឹងឯកសារយោងនៃព្រះគម្ពីរមរមន ដែលនិយាយទៅកាន់ពួកគេ ។

តើពិតជាមានព្រះឬ ? តើព្រះជានរណា ? ( ម៉ូសាយ ៤:៩; អាលម៉ា ១៨:២៤–៤០; ២២:៤–២៣; ៣០:៤៤ )
តើព្រះស្គាល់ខ្ញុំ ហើយខ្វល់ខ្វាយពីខ្ញុំឬទេ ? តើខ្ញុំអាចទទួលអារម្មណ៍នៃសេចក្តីស្រឡាញ់របស់ទ្រង់ដោយរបៀបណា ? តើខ្ញុំអាចមានអារម្មណ៍កាន់តែខិតជិតនឹងទ្រង់ដោយរបៀបណា ? ( នីហ្វៃទី២ ២៦:២៤; ម៉ូសាយ ៤:៩–១២; អេណុស ១:១–១២; អាលម៉ា ១៨:៣២; មរ៉ូណៃ ១០:៣២–៣៣ )
តើគោលបំណងនៃជីវិតនេះគឺជាអ្វី ? ( នីហ្វៃទី២ ២:២៥; អាលម៉ា ៣៤:៣២ )
ហេតុអ្វីបានជាពេលខ្លះជីវិតមានការលំបាកខ្លាំងម៉្លេះ ? តើខ្ញុំអាចទទួលបានកម្លាំងនៅអំឡុងគ្រាដ៏លំបាកដោយរបៀបណា ? ( នីហ្វៃទី១ ១៧:៣; នីហ្វៃទី២ ៤:២០–២១; អាលម៉ា ៣៦:៣; អេធើរ ១២:២៧ )
តើខ្ញុំអាចរកបានសេចក្ដីសុខសាន្តក្នុងគ្រាដែលច្របូកច្របល់ដោយរបៀបណា ? ( ម៉ូសាយ ២៤:១៣–១៥; ហេលេមិន ៥:៤៧ )
តើខ្ញុំអាចកាន់តែសប្បាយចិត្តដោយរបៀបណា ? ( ម៉ូសាយ ២:៤១; អាលម៉ា ២២:១៥–១៦ )
តើខ្ញុំអាចធ្វើជាបុគ្គលដ៏ប្រសើរដោយរបៀបណា ? ( ម៉ូសាយ ២៦:៣០–៣១; អាលម៉ា ៥:១២–១៣; ៧:២៣–២៤; អេធើរ ១២:២៧ )
តើខ្ញុំអាចទទួលអារម្មណ៍នៃការអភ័យទោសរបស់ព្រះដោយរបៀបណា ? ( អេណុស ១:២–៨; អាលម៉ា ៣៦:១៧–២១ )
តើនឹងមានអ្វីកើតឡើង បន្ទាប់ពីខ្ញុំស្លាប់ទៅ ? ( នីហ្វៃទី២ ៩:៣–៦, ១១–១៣; អាលម៉ា ១១:៤២–៤៤; ៤០:១១ )

ព្រះគម្ពីរមរមនក៏ផ្តល់ការណែនាំអំពីសំណួរសំខាន់ៗផ្សេងទៀត ដូចជា ៖

តើខ្ញុំអាចរួមចំណែកដល់សុខុមាលភាពខាងវិញ្ញាណរបស់គ្រួសារខ្ញុំដោយរបៀបណា ? ( នីហ្វៃទី១ ១:១; ៨:៣៦–៣៨; ម៉ូសាយ ២:៥–៦; ៤:១៤–១៥; នីហ្វៃទី៣ ១៨:២១ )
តើខ្ញុំអាចជួយកូនរបស់ខ្ញុំស្ថាបនាកម្លាំងដើម្បីទប់ទល់នឹងការល្បួងដោយរបៀបណា ? ( នីហ្វៃទី១ ១៥:២៣–២៥; ហេលេមិន ៥:១២; នីហ្វៃទី៣ ១៨:១៥, ១៨–២១, ២៤–២៥ )
តើការគោរពតាមបទបញ្ញត្តិរបស់ព្រះអាចជួយខ្ញុំឲ្យមានជីវិតកាន់តែរីករាយ និងកាន់តែសម្បូរសប្បាយដោយរបៀបណា ? ( នីហ្វៃទី២ ២:២៥–២៨; ៤:៣៥; ម៉ូសាយ ២:៤១; នីហ្វៃទី៤ ១:១៥–១៨ )

« ពួកអ្នកផ្សព្វផ្សាយសាសនាត្រូវតែចេះពីរបៀបដើម្បីប្រើប្រាស់ព្រះគម្ពីរមរមនដើម្បីឆ្លើយតបសំណួររបស់ពួកគេផ្ទាល់ ដើម្បីពួកគេអាចប្រើព្រះគម្ពីរក្នុងការជួយអ្នកដទៃរៀនធ្វើដូចគ្នាយ៉ាងមានប្រសិទ្ធភាព ។… ពួកគេត្រូវតែធ្វើឲ្យកម្លាំងខាងក្នុងនៃព្រះគម្ពីរមរមនមានឥទ្ធិពលនៅក្នុងការបង្រៀនដំណឹងល្អដែលបានស្តារឡើងវិញ ដំបូង ដោយការអនុវត្តវានៅក្នុងជីវិតពួកគេផ្ទាល់ បន្ទាប់មកចែកចាយវាជាមួយអ្នកដែលពួកគេបង្រៀន » ( ដាល្លិន អេក អូក « ដំបូន្មានសម្រាប់ថ្នាក់ដឹកនាំបេសកកម្ម » សិក្ខាសាលាសម្រាប់ប្រធានបេសកកម្មថ្មី ថ្ងៃទី ២៥ ខែ មិថុនា ឆ្នាំ ២០២២ ) ។

ការសិក្សាផ្ទាល់ខ្លួន ឬជាដៃគូ

សូមរាយសំណួរអំពីព្រលឹងដែលអ្នកមាន ឬដែលអ្នកបានឮពីអ្នកដទៃ ។ សូមស្វែងរកខគម្ពីរនៅក្នុងព្រះគម្ពីរមរមន ដែលជួយឆ្លើយសំណួរទាំងនេះ ។ សូមសរសេរការយល់ឃើញ និងសេចក្ដីយោងព្រះគម្ពីរមរមននៅក្នុងសៀវភៅកំណត់ហេតុការសិក្សារបស់អ្នក ។ ប្រើវាដូចដែលអ្នកបង្រៀន ។

ព្រះគម្ពីរមរមន និងព្រះគម្ពីរប៊ីបគាំទ្រគ្នាទៅវិញទៅមក

ព្រះអម្ចាស់បានមានព្រះបន្ទូលថា « បង្រៀនគោលការណ៍ទាំងឡាយនៃដំណឹងល្អរបស់យើង ដែលមាននៅក្នុងព្រះគម្ពីរប៊ីប និងព្រះគម្ពីរមរមន គឺជាភាពពោរពេញនៃដំណឹងល្អ » ( គោលលទ្ធិ និងសេចក្តីសញ្ញា ៤២:១២ ) ។ ពួកបរិសុទ្ធ « យើងខ្ញុំជឿថា ព្រះគម្ពីរប៊ីបគឺជាព្រះបន្ទូលនៃព្រះ បើសិនជាបានបកប្រែត្រឹមត្រូវ » ( មាត្រានៃសេចក្ដីជំនឿ ១:៨; សូមមើលផងដែរ នីហ្វៃទី១ ១៣:២៩ ) ព្រះគម្ពីរប៊ីបគឺជាព្រះគម្ពីរដ៏ពិសិដ្ឋ ។ ព្រះគម្ពីរមរមនគឺជាដៃគូព្រះគម្ពីរដ៏ពិសិដ្ឋដែលមាននូវភាពពេញលេញនៃដំណឹងល្អនៃព្រះយេស៊ូវគ្រីស្ទ ។

ព្រះគម្ពីរប៊ីប និងព្រះគម្ពីរមរមនបំពេញ និងបន្ថែមខ្លឹមសារឲ្យគ្នាទៅវិញទៅមក ( សូមមើល អេសេគាល ៣៧:១៦–១៧; នីហ្វៃទី១ ១៣:៤០; មរមន ៧:៨–៩ ) ។ ព្រះគម្ពីរទាំងពីរក្បាលគឺជាការចងក្រងការបង្រៀនដែលកត់ត្រាដោយព្យាការីពីបុរាណ ។ ព្រះគម្ពីរប្រាប់អំពីអន្តរកម្មរបស់ព្រះជាមួយមនុស្សនៅអឌ្ឍគោលខាងកើតរាប់ពាន់ឆ្នាំ ។ ព្រះគម្ពីរមរមនប្រាប់អំពីអន្តរកម្មរបស់ព្រះជាមួយមនុស្សនៅក្នុងទ្វីបអាមេរិកបុរាណអស់រយៈពេលជាងមួយពាន់ឆ្នាំមកហើយ ។

សំខាន់បំផុតនោះគឺ ព្រះគម្ពីរប៊ីប និងព្រះគម្ពីរមរមនបំពេញគ្នាទៅវិញទៅមកក្នុងការធ្វើជាសាក្សីអំពីព្រះយេស៊ូវគ្រីស្ទ ។ ព្រះគម្ពីរប៊ីបផ្ដល់ដំណើររឿងអំពីកំណើតរបស់ព្រះអង្គសង្គ្រោះ ការងារបម្រើក្នុងជីវិតរមែងស្លាប់ និងដង្វាយធួន—រួមទាំងការសុគត និងការមានព្រះជន្មរស់ឡើងវិញរបស់ទ្រង់ ។ ព្រះគម្ពីរមរមនរួមមានការព្យាករណ៍អំពីកំណើត និងបេសកកម្មរបស់ព្រះអង្គសង្គ្រោះ ការបង្រៀនអំពីដង្វាយធួនរបស់ទ្រង់ និងដំណើររឿងអំពីការងារបម្រើរបស់ទ្រង់នៅអាមេរិក ។ ព្រះគម្ពីរមរមនបញ្ជាក់ និងពង្រីកទីបន្ទាល់នៃព្រះគម្ពីរប៊ីបថា ព្រះយេស៊ូវគឺជាព្រះរាជបុត្រាតែមួយរបស់ព្រះ និងជាព្រះអង្គសង្គ្រោះនៃពិភពលោក ។

ទាំងព្រះគម្ពីរប៊ីប និងព្រះគម្ពីរមរមនបង្រៀនពីក្រឹត្យវិន័យនៃសាក្សី ៖ « គ្រប់ការទាំងអស់នឹងបានសម្រេច ដោយនូវមាត់ស្មរបន្ទាល់ពីរ ឬបីនាក់ » ( កូរិនថូស ទី២ ១៣:១; សូមមើលផងដែរ នីហ្វៃទី២ ១១:២–៣ ) ។ ព្រះគម្ពីរទាំងពីរថ្លែងទីបន្ទាល់អំពីព្រះយេស៊ូវគ្រីស្ទស្របតាមក្រឹត្យវិន័យ ( សូមមើល នីហ្វៃទី២ ២៩:៨ ) ។

ការសិក្សាផ្ទាល់ខ្លួន ឬជាដៃគូ

សូមស្វែងរកឯកសារយោងលើប្រធានបទខាងក្រោមនៅក្នុងព្រះគម្ពីរមរមន និងព្រះគម្ពីរប៊ីប ។ ឧទាហរណ៍ត្រូវបានផ្តល់ឲ្យក្នុងវង់ក្រចកបន្ទាប់ពីប្រធានបទនីមួយៗ ។ សូមបន្ថែមប្រធានបទ និងអត្ថបទផ្ទាល់ខ្លួនរបស់អ្នក ។

ព្យាការីទាំងឡាយ ( យ៉ាកុប ៤:៤–៦; អេម៉ុស ៣:៧ )
ការក្បត់សាសនា ( នីហ្វៃទី២ ២៨; ធីម៉ូថេ ទី២ ៤:៣–៤ )
ការស្តារឡើងវិញ ( នីហ្វៃទី១ ១៣:៣៤–៤២; កិច្ចការ ៣:១៩–២១ )
យើងទាំងអស់គ្នាជាបុត្រាបុត្រីរបស់ព្រះ ( នីហ្វៃទី១ ១៧:៣៦; កិច្ចការ ១៧:២៩ )

សូមជួយមនុស្សអាន និងស្វែងយល់ពីព្រះគម្ពីរមរមន

អស់អ្នកដែលមិនបានអាន ឬយល់ដឹងពីព្រះគម្ពីរមរមននឹងមានការលំបាកក្នុងការទទួលសាក្សីថាព្រះគម្ពីរនេះគឺពិត ។ អ្នកអាចជួយពួកគេឲ្យយល់ពីព្រះគម្ពីរដោយការអានជាមួយពួកគេ ។ សូមអានកំឡុងពេលណាត់ជួបបង្រៀន កំឡុងពេលណាត់ជួបបន្ទាប់ ឬតាមរយៈបច្ចេកវិទ្យា ។ អ្នកក៏អាចរៀបចំឲ្យសមាជិកអានជាមួយពួកគេផងដែរ ។ ការមើលវីដេអូអំពីព្រះគម្ពីរមរមន ហើយបន្ទាប់មកអានជំពូកដែលទាក់ទង អាចមានប្រយោជន៍ខ្លាំងណាស់ ។

សូមអធិស្ឋានទូលសុំជំនួយនៅពេលអ្នកជ្រើសរើសអត្ថបទដែលដោះស្រាយកង្វល់ និងតម្រូវការរបស់មនុស្ស ។ អាន និងពិភាក្សាវគ្គបទគម្ពីរ ដូចជា នីហ្វៃទី១ ៣:៧ ឬ ម៉ូសាយ ២:១៧ ។ ក៏សូមអាន និងពិភាក្សាវគ្គបទគម្ពីរវែងៗ ឬជំពូកពេញលេញ ដូចជា នីហ្វៃទី២ ៣១, អាលម៉ា ៧ ឬ នីហ្វៃទី៣ ១៨ ។ សូមលើកទឹកចិត្តមនុស្សឲ្យអានព្រះគម្ពីរមរមនតាំងពីដើមដំបូង រួមទាំងទីបន្ទាល់អំពី ពួកសាក្សី បីនាក់ និង ពួកសាក្សីប្រាំបីនាក់ និង ទីបន្ទាល់នៃព្យាការីយ៉ូសែប ស្ម៊ីធ ។

សូមពិចារណាពីយោបល់ខាងក្រោមនេះ នៅពេលអ្នកអានព្រះគម្ពីរមរមនជាមួយអ្នករៀន ៖

សូមអធិស្ឋានពីមុនអាន ។ សូមទូលសុំជំនួយឲ្យមានការយល់ដឹង ។ សូមអធិស្ឋានឲ្យព្រះវិញ្ញាណបរិសុទ្ធនឹងធ្វើជាសាក្សីដល់ពួកគេថាព្រះគម្ពីរនេះគឺពិត ។
ប្តូរវេនគ្នាអាន ។ អានក្នុងកម្រិតល្បឿនដែលពួកគេមានទំនុកចិត្ត ។ ពន្យល់ពាក្យ និងឃ្លាដែលមិនធ្លាប់ស្គាល់ ។
ឈប់ម្តងម្កាលដើម្បីពិភាក្សាអំពីអ្វីដែលអ្នកបានអាន ។
ពន្យល់ពីសាវតារ និងបរិបទនៃវគ្គបទគម្ពីរនេះ ដូចជាអ្នកណាកំពុងនិយាយ ថាតើបុគ្គលនោះជាមនុស្សបែបណា និងស្ថានភាពបែបណា ។ ប្រសិនបើមានវីដេអូព្រះគម្ពីរមរមនដែលទាក់ទង សូមពិចារណាចាក់វីដេអូនោះ ។
សូមចង្អុលប្រាប់ពីសារលិខិតសំខាន់ៗឬគោលលទ្ធិដែលត្រូវរកមើល ។
ចែកចាយទីបន្ទាល់ និងការយល់ដឹងសមស្រប អារម្មណ៍ និងបទពិសោធន៍ផ្ទាល់ខ្លួនរបស់អ្នក ។
បង្រៀនគោលលទ្ធិពីប្រសាសន៍របស់ព្យាការីនៃព្រះគម្ពីរមរមនដោយផ្ទាល់ ។ ការណ៍នេះនឹងជួយមនុស្សឲ្យមានអារម្មណ៍ថាមានថាមពលខាងវិញ្ញាណពីព្រះគម្ពីរនេះ ។
ជួយមនុស្សឲ្យ « ប្រៀបធៀប » អ្វីដែលពួកគេបានអានទៅនឹងជីវិតរបស់ពួកគេផ្ទាល់ ( នីហ្វៃទី១ ១៩:២៣ ) ។ សូមជួយពួកគេឲ្យមើលឃើញពីរបៀបដែលបទគម្ពីរទាក់ទងនឹងពួកគេផ្ទាល់ ។

នៅពេលអ្នកអនុវត្តតាមគោលការណ៍ទាំងនេះ អ្នកនឹងជួយមនុស្សឲ្យអភិវឌ្ឍសមត្ថភាព និងបំណងចង់អានព្រះគម្ពីរមរមនដោយខ្លួនឯង ។ សូមបញ្ជាក់ថា ការអានព្រះគម្ពីរជារៀងរាល់ថ្ងៃគឺជាគន្លឹះមួយដើម្បីឈានទៅរកបុណ្យជ្រមុជទឹក និងការប្រែចិត្តជឿពេញមួយជីវិត ។

សូមពឹងផ្អែកលើសេចក្តីសន្យានៅក្នុង មរ៉ូណៃ ១០:៣–៥ ។ សូមលើកទឹកចិត្តមនុស្សឲ្យអានព្រះគម្ពីរមរមនដោយចិត្តស្មោះសរ ហើយអធិស្ឋានដោយស្មោះអស់ពីចិត្ត ដើម្បីដឹងថា ព្រះគម្ពីរនេះគឺពិត ។ សូមពន្យល់ថា ការអធិស្ឋានដោយស្មោះអស់ពីចិត្ត មានន័យថាស្ម័គ្រចិត្តធ្វើតាមចម្លើយដែលបានមកពីសាក្សីនៃព្រះវិញ្ញាណបរិសុទ្ធ ។ មនុស្សគ្រប់រូបដែលអាន និងអធិស្ឋានដោយស្មោះអស់ពីចិត្តអំពីព្រះគម្ពីរមរមន អាចដឹងអំពីភាពពិតរបស់ព្រះគម្ពីរនេះដោយព្រះចេស្ដានៃព្រះវិញ្ញាណបរិសុទ្ធ ។

អ្នកក៏គួរអនុវត្តតាមការសន្យានេះជាទៀងទាត់ ដើម្បីពង្រឹងទីបន្ទាល់ផ្ទាល់ខ្លួនរបស់អ្នកអំពីព្រះគម្ពីរមរមនផងដែរ ។ ទីបន្ទាល់របស់អ្នកនឹងផ្ដល់ឲ្យអ្នកនូវទំនុកចិត្តថា អស់អ្នកដែលអនុវត្តតាមការសន្យានេះនឹងទទួលបានសាក្សីថា ព្រះគម្ពីរនេះគឺជាព្រះបន្ទូលនៃព្រះ ។

សូមប្រើព្រះគម្ពីរមរមនក្នុងគ្រប់ទិដ្ឋភាពនៃការងាររបស់អ្នក ។

ព្រះគម្ពីរមរមនគឺជាធនធានដ៏មានអានុភាពបំផុតក្នុងការប្រែចិត្តជឿ ។ សូមប្រើព្រះគម្ពីរនេះជាប្រភពចម្បងរបស់អ្នកសម្រាប់ការបង្រៀនសេចក្ដីពិតដែលបានស្ដារឡើងវិញ ។ ប្រធាន រ័សុល អិម ណិលសុន បានមានប្រសាសន៍ ៖

« មានរឿងអស្ចារ្យមួយកើតឡើងពេលកូនម្នាក់របស់ព្រះស្វែងយល់ចង់ដឹងបន្ថែមទៀតអំពីទ្រង់ និងព្រះរាជបុត្រាស្ងួនភ្ញាទ្រង់ ។ គ្មានកន្លែងណាផ្សេងទៀតដែលសេចក្ដីពិតទាំងនោះបានបង្រៀនកាន់តែច្បាស់ ហើយកាន់តែពេញដោយអានុភាពជាងនៅក្នុងព្រះគម្ពីរមរមនឡើយ ។…

« នៅពេលខ្ញុំគិតអំពីព្រះគម្ពីរមរមន ខ្ញុំគិតអំពីពាក្យថា អំណាច ។ សេចក្ដីពិតនៃព្រះគម្ពីរមរមនមាននូវ អំណាច ដើម្បីព្យាបាល លួងលោម ស្ដារឡើងវិញ ជួយ ពង្រឹង លើកទឹកចិត្ត ហើយធ្វើឲ្យព្រលឹងយើងរីករាយ » ( « The Book of Mormon: What Would Your Life Be Like without It? » ៦១, ៦២ ) ។

នៅពេលអានព្រះគម្ពីរមរមនជាមួយមនុស្ស សូមចែកចាយទីបន្ទាល់របស់អ្នកអំពីអំណាចខាងវិញ្ញាណដែលអ្នកមានអារម្មណ៍ដូចដែលអ្នកបានអានព្រះគម្ពីរនេះ ។ សូមបញ្ជាក់ពីសារៈសំខាន់នៃសាក្សីរបស់ព្រះគម្ពីរនេះអំពីព្រះយេស៊ូវគ្រីស្ទ និងដង្វាយធួនរបស់ទ្រង់ ។ សូមចែកចាយសារលិខិតដែលអាចជួយមនុស្សឲ្យទទួលអារម្មណ៍នៃសេចក្ដីស្រឡាញ់របស់ព្រះអង្គសង្គ្រោះរបស់ពួកគេ ។ សូមជួយពួកគេមើលឃើញពីរបៀបដែលពួកគេអាចស្គាល់ព្រះអង្គសង្គ្រោះបានកាន់តែច្បាស់តាមរយៈទំព័រទាំងឡាយនៃព្រះគម្ពីរនេះ ។

សូមអានវគ្គបទគម្ពីរដែលនឹងលើកស្ទួយ ហើយពង្រឹងមនុស្ស ។ សូមផ្តោតលើតម្រូវការរបស់ពួកគេ ។ សូមចែកចាយឧទាហរណ៍អំពីរបៀបដែលការបង្រៀននៅក្នុងព្រះគម្ពីរមរមនអនុវត្តចំពោះជីវិតរបស់យើងសព្វថ្ងៃនេះ ។

ចងចាំការណ៍នេះ

ព្រះគម្ពីរមរមនគឺជាមូលដ្ឋានគ្រឹះក្នុងភាពជាសាក្សីរបស់យើង គោលលទ្ធិរបស់យើង និងទីបន្ទាល់របស់យើង ។
ព្រះគម្ពីរមរមនបង្រៀនយ៉ាងច្បាស់លាស់នូវគោលលទ្ធិដែលមាននៅក្នុងមេរៀនរបស់អ្នកផ្សព្វផ្សាយសាសនា ។
ព្រះគម្ពីរមរមនថ្លែងពីសំណួរនៃព្រលឹង ។
សូមអានព្រះគម្ពីរមរមនយ៉ាងខ្ជាប់ខ្ជួនជាមួយនឹងមនុស្សដែលអ្នកបង្រៀន ។ សូមជួយពួកគេអានដោយខ្លួនឯងជារៀងរាល់ថ្ងៃ ហើយអនុវត្តអ្វីដែលពួកគេរៀន ។
សូមទុកចិត្តលើការសន្យារបស់ព្រះអម្ចាស់ថា មនុស្សគ្រប់គ្នាដែលអាន និងអធិស្ឋានដោយមានចិត្តស្មោះសរអំពីព្រះគម្ពីរមរមន នឹងដឹងអំពីភាពពិតរបស់ព្រះគម្ពីរនេះ តាមរយៈព្រះចេស្ដានៃព្រះវិញ្ញាណបរិសុទ្ធ ។

គំនិតសម្រាប់ការសិក្សា និងការអនុវត្ត

ការសិក្សាផ្ទាល់ខ្លួន

សូមអាន នីហ្វៃទី២ ២; ៩; ៣០; ៣១; ៣២ ។ សូមគូសបញ្ជាក់រាល់ការយោងទៅព្រះយេស៊ូវគ្រីស្ទ ។ សូមធ្វើបញ្ជីឈ្មោះ និងចំណងជើងផ្សេងៗសម្រាប់ព្រះគ្រីស្ទនៅក្នុងជំពូកទាំងនេះ ។ សូមគូសសម្គាល់ព្រះបន្ទូលរបស់ទ្រង់ ។ សូមគូសចំណាំគុណលក្ខណៈ និងសកម្មភាពរបស់ទ្រង់ ។
នៅពេលអ្នកអានព្រះគម្ពីរមរមនជាប្រចាំថ្ងៃ សូមកត់ត្រានៅក្នុងសៀវភៅកំណត់ហេតុការសិក្សារបស់អ្នកអំពីវគ្គបទគម្ពីរដែលមានអត្ថន័យពិសេសសម្រាប់អ្នក ។ សូមសរសេរពីរបៀបដែលអ្នកនឹងអនុវត្តវានៅក្នុងជីវិតរបស់អ្នក ។
សូមសរសេរនៅក្នុងសៀវភៅកំណត់ហេតុការសិក្សារបស់អ្នកអំពីអារម្មណ៍របស់អ្នក នៅពេលអ្នកទទួលបានសាក្សីខាងវិញ្ញាណដំបូងថា ព្រះគម្ពីរមរមនគឺពិត ។
សូមសរសេរសំណួរបីខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ។ ពេញមួយបេសកកម្មរបស់អ្នក សូមបន្ថែមចម្លើយចំពោះសំណួរទាំងនេះ ។
- តើជីវិតរបស់ខ្ញុំនឹងទៅជាយ៉ាងណា បើគ្មានព្រះគម្ពីរមរមននោះ ?
- តើមានអ្វីខ្លះដែលខ្ញុំមិន ដឹង បើគ្មានព្រះគម្ពីរមរមននោះ ?
- តើខ្ញុំនឹងមិន មាន អ្វីទៅបើគ្មានព្រះគម្ពីរមរមននោះ ?
សូមអាន ទេសនកថានៅលើភ្នំនៅក្នុង ម៉ាថាយ ៥–៧ និងទេសនកថារបស់ព្រះគ្រីស្ទនៅក្នុងព្រះវិហារបរិសុទ្ធនៅក្នុង នីហ្វៃទី៣ ១២–១៤ ។ តើការអានការណ៍នេះជាមួយគ្នាជួយអ្នកឲ្យយល់កាន់តែច្បាស់អំពីការបង្រៀនរបស់ព្រះអង្គសង្គ្រោះដោយរបៀបណា ?
សូមសិក្សាឧទាហរណ៍នីមួយៗនៅក្នុងព្រះគម្ពីរមរមនដែលយោងនរណាម្នាក់ដែលកំពុងអធិស្ឋាន ។ នៅក្នុងសៀវភៅកំណត់ហេតុការសិក្សារបស់អ្នក សូមសរសេរអ្វីដែលអ្នករៀនចេញពីព្រះគម្ពីរមរមនអំពីការអធិស្ឋាន ។
ចេញពីក្បាលជំពូកនៃ ម៉ូសាយ ១១–១៦ សូមសរសេរសេចក្តីសង្ខេបមួយអំពីអ័ប៊ីណាដៃ ។ បន្ទាប់មកអានជំពូកទាំងនេះ ហើយពង្រីកសេចក្តីសង្ខេបរបស់អ្នក ។
ចេញពីក្បាលជំពូកនៃ ម៉ូសាយ ២–៥ សរសេរសេចក្តីសង្ខេបពីអ្វីដែលស្តេចបេនយ៉ាមីនបានបង្រៀន ។ បន្ទាប់មកអានជំពូកទាំងនេះ ហើយពង្រីកសេចក្តីសង្ខេបរបស់អ្នក ។

ការសិក្សាជាមួយដៃគូ និងការផ្លាស់ប្តូរដៃគូ

សូមអានវគ្គបទគម្ពីរមរមនជាមួយគ្នា ។ ចែកចាយអ្វីដែលអ្នកបានរៀន និងទទួលអារម្មណ៍ ។ សូមពិភាក្សាពីអ្វីដែលអ្នកនឹងអនុវត្តវានៅក្នុងជីវិតរបស់អ្នក ។
សូមអាន អាលម៉ា ២៦ និង ២៩ ជាមួយគ្នា ។ សូមចែកចាយពីចំណាប់អារម្មណ៍របស់អ្នកអំពីបេសកកម្មរបស់អ្នក ។ សូមសរសេរគំនិតរបស់អ្នកនៅក្នុងសៀវភៅកំណត់ហេតុការសិក្សារបស់អ្នក ។
សូមអាន អាលម៉ា ៣៧:៩ ហើយពិភាក្សាអំពីសារៈសំខាន់នៃបទគម្ពីរចំពោះអាំម៉ូន និងអ្នកផ្សព្វផ្សាយសាសនាបងប្អូនរបស់លោក ។ សូមស្វែងរកឯកសារយោងដែលពិពណ៌នាអំពីរបៀបដែលពួកគាត់ប្រើបទគម្ពីរ ។
សូមអាន អាលម៉ា ១១–១៤ ដោយម្នាក់ក្នុងចំណោមអ្នកធ្វើជា អាលម៉ា ឬ អាមូលេក និងម្នាក់ទៀតទទួលធ្វើជាអ្នកទិតៀន ។ សូមពិភាក្សាពីរបៀបដែលពួកអ្នកផ្សព្វផ្សាយសាសនាទាំងនេះបានឆ្លើយតបចំពោះសំណួរពិបាកៗ ។

ក្រុមប្រឹក្សាមណ្ឌល សន្និសីទហ្សូន និងក្រុមប្រឹក្សាថ្នាក់ដឹកនាំបេសកកម្ម

សូមអនុវត្តដោយប្រើព្រះគម្ពីរមរមននៅក្នុងរបៀបនីមួយៗដែលបានរៀបរាប់នៅក្នុងចំណងជើងធំនៃជំពូកនេះ ។
សូមរាយសំណួរដែលមនុស្សអ្នកកំពុងបង្រៀនបានលើកឡើង ។ សូមពន្យល់គ្នាទៅវិញទៅមកអំពីរបៀបដែលអ្នកនឹងឆ្លើយតបនឹងសំណួរទាំងនេះដោយប្រើព្រះគម្ពីរមរមន ។
សូមអានវគ្គបទគម្ពីរមរមនជាមួយគ្នា ។ សូមចែកចាយចំណេះដឹង អារម្មណ៍ និងទីបន្ទាល់ ។
សូមអនុវត្តប្រើប្រាស់ព្រះគម្ពីរមរមនដើម្បីបញ្ជាក់សារលិខិតនៃការស្តារឡើងវិញនេះ ។
សូមអញ្ជើញពួកអ្នកផ្សព្វផ្សាយសាសនាឲ្យចែកចាយបទពិសោធន៍ដែលព្រះគម្ពីរមរមនបានជួយពួកគេ និងអ្នកដែលពួកគេបានបង្រៀននៅក្នុងដំណើរការនៃការប្រែចិត្តជឿ ។
សូមឲ្យពួកអ្នកផ្សព្វផ្សាយសាសនាចែកចាយព្រះគម្ពីរមរមនដែលពួកគេចូលចិត្ត ដែលជួយឆ្លើយសំណួរនៃព្រលឹង ។
សូមអញ្ជើញសមាជិកម្នាក់ដែលជាអ្នកប្រែចិត្តជឿចែកចាយតួនាទីនៃព្រះគម្ពីរមរមនក្នុងការប្រែចិត្តជឿរបស់គាត់ ឬនាង ។

ថ្នាក់ដឹកនាំបេសកកម្ម និងទីប្រឹក្សាបេសកកម្ម

សូមបង្រៀនពួកអ្នកផ្សព្វផ្សាយសាសនាពីរបៀបប្រើព្រះគម្ពីរមរមន ដើម្បីបញ្ជាក់ពីភាពពិតនៃសារលិខិតនៃការស្ដារឡើងវិញ ។
សូមអាន នីហ្វៃទី១ ១ ជាមួយនឹងពួកអ្នកផ្សព្វផ្សាយសាសនា ហើយប្រៀបធៀបវាជាមួយនឹងបទពិសោធន៍របស់ យ៉ូសែប ស្ម៊ីធ ។
សូមឲ្យព្រះគម្ពីរមរមនដែលមានក្របស្ដើងដល់ពួកអ្នកផ្សព្វផ្សាយសាសនា ។ សូមអញ្ជើញពួកគេឲ្យអាន និងគូសចំណាំគម្ពីរនេះពីរដងក្នុងអំឡុងពេលផ្ទេរតំបន់ពីរ ឬបីបន្ទាប់ទៀត ។
- នៅពេលអានលើកដំបូង សុំពួកគេឲ្យគូសចំណាំអ្វីគ្រប់យ៉ាងដែលនិយាយអំពី ឬថ្លែងទីបន្ទាល់អំពីព្រះយេស៊ូវគ្រីស្ទ ។
- នៅពេលអានលើកទីពីរ សុំពួកគេឲ្យគូសចំណាំគោលលទ្ធិ និងគោលការណ៍នៃដំណឹងល្អ ។
សូមឲ្យពួកអ្នកផ្សព្វផ្សាយសាសនាចែកចាយអ្វីដែលពួកគេបានរៀន និងមានអារម្មណ៍ ។ អែលឌើរ រ៉ូណល អេ រ៉ាសបាន បានពិពណ៌នាអំពីរបៀបដែលការអានព្រះគម្ពីរមរមនតាមរបៀបនេះបានមានឥទ្ធិពលដល់លោកក្នុងនាមជាអ្នកផ្សព្វផ្សាយសាសនា ៖

« ការអានរបស់ខ្ញុំសំខាន់ជាងការគ្រាន់តែគូសចំណាំខគម្ពីរទៅទៀត ។ រាល់លើកដែលខ្ញុំអានព្រះគម្ពីរមរមន ពីដើមដល់ចប់ ខ្ញុំបានពេញដោយក្ដីស្រឡាញ់ដ៏ខ្លាំងចំពោះព្រះអម្ចាស់ ។ ខ្ញុំទទួលអារម្មណ៍ចាក់ឫសយ៉ាងជ្រៅនូវសាក្សីនៃសេចក្ដីពិតចំពោះការបង្រៀនរបស់ទ្រង់ និងរបៀបដែលវាអនុវត្តចំពោះ ‹ ថ្ងៃនេះ › ។ ចំណងជើងពិតជាត្រូវជាមួយនឹងព្រះគម្ពីរណាស់ ៖ ‹ សក្ខីបទមួយទៀតអំពីព្រះយេស៊ូវគ្រីស្ទ › ។ តាមរយៈការសិក្សា និងសាក្សីខាងវិញ្ញាណដែលខ្ញុំបានទទួល នោះខ្ញុំបានក្លាយជាអ្នកផ្សព្វផ្សាយសាសនាព្រះគម្ពីរមរមន និងជាសិស្សរបស់ព្រះយេស៊ូវគ្រីស្ទម្នាក់ » ( « This Day » Liahona ខែ វិច្ឆិកា ឆ្នាំ ២០២២ ទំព័រ ២៥ ) ។

សូមអញ្ជើញពួកអ្នកផ្សព្វផ្សាយសាសនាចែកចាយជាមួយអ្នកនូវព្រះគម្ពីរមរមន ដែលមានសារៈសំខាន់ក្នុងជីវិតរបស់ពួកគេ ។
សូមស្វែងរកសំណួរនៃព្រលឹងសម្រាប់មនុស្សនៅក្នុងបេសកកម្មរបស់អ្នក ។ សូមអញ្ជើញពួកអ្នកផ្សព្វផ្សាយសាសនាឲ្យស្វែងរកខគម្ពីរនៅក្នុងព្រះគម្ពីរមរមន ដែលជួយឆ្លើយសំណួរទាំងនេះ ។