« ជំពូកទី ១ ៖ បំពេញគោលបំណងជាអ្នកផ្សព្វផ្សាយសាសនារបស់អ្នក » ប្រកាសដំណឹងល្អរបស់យើង ៖ មគ្គុទេសន៍ចែកចាយដំណឹងល្អនៃព្រះយេស៊ូវគ្រីស្ទ ( ឆ្នាំ ២០២៣ )

« ជំពូកទី ១ » ប្រកាសដំណឹងល្អរបស់យើង

ដាន់ ចូនស៍ គឺជាអ្នកផ្សព្វផ្សាយសាសនាដ៏អស្ចារ្យម្នាក់នៅគ្រាកាន់កាប់ត្រួតត្រានេះ ដែលធ្វើការផ្សព្វផ្សាយដំណឹងល្អនៅប្រទេសវេលស៍ ។

ជំពូកទី ១

បំពេញគោលបំណងជាអ្នកផ្សព្វផ្សាយសាសនារបស់អ្នក

គោលបំណងរបស់អ្នក ៖ អញ្ជើញមនុស្សដទៃមកកាន់ព្រះគ្រីស្ទ ដោយការជួយពួកគេឲ្យទទួលយកដំណឹងល្អដែលបានស្ដារឡើងវិញ តាមរយៈសេចក្ដីជំនឿនៅលើព្រះយេស៊ូវគ្រីស្ទ និងដង្វាយធួនរបស់ទ្រង់ ការប្រែចិត្ត ពិធីបុណ្យជ្រមុជទឹក ការទទួលអំណោយទាននៃព្រះវិញ្ញាណបរិសុទ្ធ និងការកាន់ខ្ជាប់ដរាបដល់ចុងបំផុត ។

សូមពិចារណាការណ៍នេះ

តើអ្វីទៅដែលជាគោលបំណងរបស់ខ្ញុំក្នុងនាមជាអ្នកផ្សព្វផ្សាយសាសនាមួយរូប ?
តើសិទ្ធិអំណាច និងអំណាចអ្វីដែលមកជាមួយនឹងការហៅរបស់ខ្ញុំនេះ ?
តើខ្ញុំពឹងផ្អែក ស្គាល់ និងបង្រៀនដោយព្រះវិញ្ញាណតាមរបៀបណា ?
តើដំណឹងល្អនៃព្រះយេស៊ូវគ្រីស្ទគឺជាអ្វី ?
តើសារលិខិតនៃការស្តារឡើងវិញគឺជាអ្វី ? ហេតុអ្វីវាសំខាន់ម្ល៉េះ ?
តើអ្វីជាការទទួលខុសត្រូវរបស់ខ្ញុំក្នុងការបង្កើត និងស្ថាបនាសាសនាចក្រនៃព្រះយេស៊ូវគ្រីស្ទ ?
តើខ្ញុំនឹងដឹងថាខ្ញុំជាអ្នកផ្សព្វផ្សាយសាសនាដែលជោគជ័យដោយរបៀបណា ?

សិទ្ធិអំណាចរបស់អ្នកដើម្បីបង្រៀនដំណឹងល្អនៃព្រះយេស៊ូវគ្រីស្ទដែលបានស្តារឡើងវិញ

មនុស្សជាច្រើននៅជុំវិញអ្នក ។ អ្នកជួបពួកគេតាមផ្លូវ និងធ្វើដំណើរឆ្លងកាត់ពួកគេ ។ អ្នកទៅសួរសុខទុក្ខពួកគេនៅផ្ទះរបស់ពួកគេ និងភ្ជាប់ទំនាក់ទំនងជាមួយពួកគេតាមអនឡាញ ។ ពួកគេទំាងអស់គ្នាគឺជាបុត្រាបុត្រីនៃព្រះ—ដែលជាបងប្អូនប្រុសស្រីរបស់អ្នក ។ ព្រះស្រឡាញ់ពួកគេ ដូចជាទ្រង់ស្រឡាញ់អ្នកផងដែរ ។

មនុស្សជាច្រើនក្នុងចំណោមមនុស្សទាំងនេះកំពុងតែស្វែងរកគោលបំណងក្នុងជីវិត ។ ពួកគេព្រួយបារម្ភពីអនាគត និងក្រុមគ្រួសាររបស់ពួកគេ ។ ពួកគេត្រូវការញាណនៃកម្មសិទ្ធិ ដែលមកពីការដឹងថា ពួកគេជាបុត្រាបុត្រីរបស់ព្រះ និងជាសមាជិកនៃគ្រួសារដ៏អស់កល្បជានិច្ចរបស់ទ្រង់ ។ ពួកគេចង់ទទួលបានអារម្មណ៍ថាមានសុវត្ថិភាពនៅក្នុងពិភពលោកនៃការផ្លាស់ប្តូរតម្លៃនេះ ។ ពួកគេប្រាថ្នាចង់បាន « សេចក្ដីសុខសាន្តនៅនាលោកិយនេះ និងជីវិតដ៏នៅអស់កល្បជានិច្ចនៅបរលោក » ( គោលលទ្ធិ និងសេចក្តីសញ្ញា ៥៩:២៣ ) ។

មនុស្សជាច្រើនគឺ « ហើយជាពួកអ្នកដែលលាក់ពីសេចក្ដីពិត ពីព្រោះពួកគេមិនដឹងជាទៅរកសេចក្ដីពិតឯណាទេ » ( គោលលទ្ធិ និងសេចក្តីសញ្ញា ១២៣:១២ ) ។ ដំណឹងល្អនៃព្រះយេស៊ូវគ្រីស្ទដែលបានស្តារឡើងវិញតាមរយៈព្យាការីយ៉ូសែប ស្ម៊ីធ ផ្ដល់នូវសេចក្តីពិតដ៏នៅអស់កល្បជានិច្ច ។ សេចក្តីពិតនេះដោះស្រាយតម្រូវការខាងវិញ្ញាណរបស់មនុស្ស និងជួយពួកគេបំពេញនូវសេចក្តីប្រាថ្នាដ៏ស៊ីជម្រៅបំផុតរបស់ពួកគេ ។

ក្នុងនាមជាអ្នកតំណាងដែលមានសិទ្ធិអំណាចរបស់ព្រះយេស៊ូវគ្រីស្ទ អ្នកបង្រៀនថា « សេចក្ដីប្រោសលោះនឹងមកដោយ និងតាមរយៈព្រះមែស៊ីដ៏បរិសុទ្ធ » ( នីហ្វៃទី២ ២:៦ ) ។ អ្នកអញ្ជើញមនុស្សឲ្យមករកព្រះគ្រីស្ទ ដើម្បីបានប្រែចិត្តជឿលើទ្រង់ និងដំណឹងល្អដែលបានស្ដារឡើងវិញរបស់ទ្រង់ ។ នៅពេលពួកគេទទួលយកការអញ្ជើញរបស់អ្នក ពួកគេនឹងកាន់តែមានសុភមង្គល ក្តីសង្ឃឹម សេចក្តីសុខសាន្ត និងគោលបំណង ។

ដើម្បីមករកព្រះអង្គសង្គ្រោះ មនុស្សត្រូវមានសេចក្តីជំនឿលើទ្រង់ ។ អ្នកអាចជួយពួកគេអភិវឌ្ឍសេចក្ដីជំនឿនេះដូចជាអ្នកដែរ ៖

បង្រៀនពួកគេអំពីដំណឹងល្អនៃព្រះយេស៊ូវគ្រីស្ទដែលបានស្ដារឡើងវិញ ហើយថ្លែងទីបន្ទាល់អំពីសេចក្តីពិតនៃដំណឹងល្អ ។
សូមអញ្ជើញពួកគេឲ្យតាំងចិត្តរស់នៅស្របតាមការបង្រៀននេះ ។
តាមដាន និងជួយពួកគេធ្វើតាមការតាំងចិត្តដែលពួកគេធ្វើ ។
ជួយពួកគេឲ្យមានបទពិសោធន៍ដែលពួកគេទទួលអារម្មណ៍ពីឥទ្ធិពលនៃព្រះវិញ្ញាណបរិសុទ្ធ ( សូមមើល នីហ្វៃទី១ ១០:១៧–១៩ ) ។

សេចក្តីជំនឿលើព្រះយេស៊ូវគ្រីស្ទ នឹងដឹកនាំមនុស្សឲ្យប្រែចិត្ត ។ តាមរយៈការធួនសម្រាប់អំពើបាបរបស់យើង ព្រះយេស៊ូវធ្វើឲ្យការប្រែចិត្តអាចធ្វើទៅបាន ។ នៅពេលមនុស្សប្រែចិត្ត ពួកគេនឹងបានស្អាតពីអំពើបាប ហើយកាន់តែខិតទៅជិតព្រះវរបិតាសួគ៌ និងព្រះយេស៊ូវគ្រីស្ទ ។ ពួកគេនឹងដកពិសោធន៍នូវអំណរ និងសេចក្តីសុខសាន្តនៃការទទួលបានការអភ័យទោស ។

ការប្រែចិត្តរៀបចំមនុស្សធ្វើសេចក្តីសញ្ញានៃពិធីបុណ្យជ្រមុជទឹក និងអំណោយទាននៃព្រះវិញ្ញាណបរិសុទ្ធ ។ « ចូរមករកយើង » ព្រះអង្គសង្រ្គោះបានមានព្រះបន្ទូល « ហើយទទួលបុណ្យជ្រមុជទឹកដោយនូវនាមយើងចុះ ប្រយោជន៍ឲ្យអ្នករាល់គ្នាអាចបានញែកចេញជាបរិសុទ្ធ ដោយការទទួលនូវព្រះវិញ្ញាណបរិសុទ្ធ ប្រយោជន៍ឲ្យអ្នករាល់គ្នាអាចឈរដោយគ្មានទោសនៅចំពោះយើងនៅថ្ងៃចុងក្រោយបង្អស់ » ( នីហ្វៃទី៣ ២៧:២០ ) ។

នៅពេលការយល់ដឹង និងទីបន្ទាល់របស់អ្នកអំពីព្រះអង្គសង្គ្រោះ និង ដង្វាយធួនរបស់ទ្រង់រីកចម្រើន នោះបំណងប្រាថ្នារបស់អ្នកដើម្បីចែកចាយដំណឹងល្អនឹងកើនឡើងផងដែរ ។ អ្នកនឹងមានអារម្មណ៍ដូចជាលីហៃបានមាន « ការសំខាន់បំផុត ដើម្បីធ្វើឲ្យការណ៍ទាំងនេះបានដឹងដល់បណ្ដាជននៅលើផែនដី » ( នីហ្វៃទី២ ២:៨ ) ។

ការនិមិត្តពីដើមឈើជីវិត — ដើមឈើជីវិត ដោយ អាវ៉ុន អូកឃឺសុន

ការសិក្សាផ្ទាល់ខ្លួន ឬជាដៃគូ

សូមពិនិត្យមើលរូបភាពដែលភ្ជាប់មកជាមួយ នៅពេលអ្នកសិក្សាការនិមិត្តនៃដើមឈើជីវិត នីហ្វៃទី១ ៨ និង ១១ ។

តើដើមឈើជីវិតនៅក្នុងការនិមិត្តនេះតំណាងឲ្យអ្វី ? ( សូមមើល នីហ្វៃទី១ ១១:២១–២៣ ) ។
តើលីហៃបានមានបំណងប្រាថ្នាអ្វី បន្ទាប់ពីលោកបានទទួលទានផ្លែឈើនេះ ? ( សូមមើល នីហ្វៃទី១ ៨:១០–១៨ ) ។
ក្នុងការនិមិត្តនេះ តើមនុស្សត្រូវធ្វើអ្វីដើម្បីទទួលទានផ្លែឈើនេះ ? តើយើងត្រូវធ្វើអ្វីខ្លះដើម្បីទទួលពរជ័យទាំងអស់នៃដង្វាយធួនរបស់ព្រះអង្គសង្រ្គោះ ? តើការតាំងចិត្ត និងសេចក្ដីសញ្ញាជួយយើងទទួលយកពរជ័យទាំងនេះតាមរបៀបណាខ្លះ ?
តើអ្នកអាចជួយអ្នកដទៃឲ្យទទួលទានផលផ្លែនៃដំណឹងល្អដោយរបៀបណា ?

សិទ្ធិអំណាច និងអំណាចនៃការហៅរបស់អ្នក

អ្នកត្រូវបានហៅ និងញែកចេញដើម្បី « [ ប្រកាស ] ដំណឹងដ៏រីករាយនៃសេចក្ដីអំណរដ៏ធំ គឺជាដំណឹងល្អដ៏អស់កល្បអស់កាលជានិច្ច » ( គោលលទ្ធិ និងសេចក្តីសញ្ញា ៧៩:១ ) ។ ដូចពួកបុត្រារបស់ម៉ូសាយដែរ អ្នកអាចបង្រៀនដោយមានសិទ្ធិអំណាច និងព្រះចេស្ដានៃព្រះ ( សូមមើល អាលម៉ា ១៧:២–៣ ) ។

នៅក្រោមការដឹកនាំរបស់ព្រះគ្រីស្ទ សិទ្ធិអំណាចក្នុងការប្រកាសដំណឹងល្អត្រូវបានស្ដារឡើងវិញតាមរយៈព្យាការី យ៉ូសែប ស្ម៊ីធ ។ ពេលអ្នកត្រូវបានញែកចេញជាអ្នកផ្សព្វផ្សាយសាសនា អ្នកបានទទួលសិទ្ធិអំណាចនេះ ។ ការហៅនេះមាននូវសិទ្ធិ អភ័យឯកសិទ្ធិ និងការទទួលខុសត្រូវដើម្បីតំណាងឲ្យព្រះអម្ចាស់ ហើយបង្រៀនដំណឹងល្អរបស់ទ្រង់ ។

សិទ្ធិអំណាចនេះមាននូវការទទួលខុសត្រូវក្នុងការរស់នៅដោយមានភាពស័ក្តិសមនឹងការហៅរបស់អ្នក ។ សូមចាត់ទុកការញែកចេញរបស់អ្នកឲ្យពិតប្រាកដ ។ សូមនៅឲ្យឆ្ងាយពីអំពើបាប និងពីអ្វីដែលឃោរឃៅ ឬអសុរោះ ។ សូមនៅឲ្យឆ្ងាយពីរបៀប និងការគិតរបស់ពិភពលោក ។ សូមធ្វើតាមបទដ្ឋាននៅក្នុង បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ ។ ក្នុងនាមជាអ្នកតំណាងរបស់ព្រះអម្ចាស់ សូម « ធ្វើជាគំរូដល់ពួកអ្នកជឿ » ( ធីម៉ូថេទី១ ៤:១២ ) ។ សូមគោរពព្រះនាមព្រះយេស៊ូវគ្រីស្ទ ទាំងទង្វើ និងទាំងពាក្យសម្ដីរបស់អ្នក ។

បន្ថែមពីលើសិទ្ធិអំណាច អ្នកត្រូវការអំណាចខាងវិញ្ញាណដើម្បីបំពេញការហៅរបស់អ្នក ។ ព្រះប្រទានអំណាចខាងវិញ្ញាណ នៅពេលអ្នកខិតខំពង្រឹងទីបន្ទាល់របស់អ្នកអំពីទ្រង់ ព្រះយេស៊ូវគ្រីស្ទ និងសេចក្ដីពិតនៃដំណឹងល្អដែលអ្នកបង្រៀនដោយជាប់លាប់ ។ ទ្រង់ប្រទានអំណាចខាងវិញ្ញាណនៅពេលអ្នកអធិស្ឋាន សិក្សាព្រះគម្ពីរ និងស្វែងរកដើម្បីបំពេញគោលបំណងជាអ្នកផ្សព្វផ្សាយសាសនារបស់អ្នក ។ ទ្រង់ប្រទានអំណាចខាងវិញ្ញាណ នៅពេលអ្នកខិតខំរក្សាបទបញ្ញត្តិរបស់ទ្រង់ និងសេចក្ដីសញ្ញាដែលអ្នកបានធ្វើ ពេលអ្នកបានទទួលពិធីបរិសុទ្ធនៃសេចក្ដីសង្គ្រោះ ( សូមមើល គោលលទ្ធិ និងសេចក្តីសញ្ញា ៣៥:២៤ ) ។

អំណាចខាងវិញ្ញាណអាចសម្តែងឲ្យឃើញកាលណាអ្នក ៖

ប្រើព្រះគម្ពីរដើម្បីបង្រៀនមនុស្ស បង្កើនការយល់ដឹងរបស់ពួកគេឲ្យកាន់តែស៊ីជម្រៅអំពីសេចក្ដីពិតនៃដំណឹងល្អ និងជួយពួកគេមើលពីរបៀបដែលសេចក្ដីពិតទាំងនេះអនុវត្តចំពោះជីវិតរបស់ពួកគេ ( សូមមើល នីហ្វៃទី១ ១៩:២៣; អាលម៉ា ២៦:១៣; ៣១:៥ ) ។
ទទួលបានការណែនាំពីព្រះវិញ្ញាណអំពីអ្វីដែលព្រះអម្ចាស់ចង់ឲ្យអ្នកនិយាយ ( សូមមើល គោលលទ្ធិ និងសេចក្តីសញ្ញា ៨៤:៨៥ ) ។
ទទួលការណែនាំពីព្រះវិញ្ញាណអំពីកន្លែងដែលត្រូវទៅ និងអ្វីដែលត្រូវធ្វើ ( សូមមើល គោលលទ្ធិ និងសេចក្តីសញ្ញា ២៨:១៥; ៣១:១១; ៧៥:២៦–២៧ ) ។
ឲ្យការបង្រៀន និងទីបន្ទាល់របស់អ្នកបញ្ជាក់ដោយសាក្សីនៃព្រះវិញ្ញាណ ( សូមមើល នីហ្វៃទី២ ៣៣:១; គោលលទ្ធិ និងសេចក្តីសញ្ញា ១០០:៥–៨ ) ។
ចូលរួមក្នុងពិធីបរិសុទ្ធនៃសេចក្ដីសង្គ្រោះ ( សូមមើល គោលលទ្ធិ និងសេចក្តីសញ្ញា ៨៤:១៩–២០ ) ។
ផ្តល់ពរជ័យបព្វជិតភាព បើអ្នកជាអ្នកអែលឌើរ ( សូមមើល យ៉ាកុប ៥:១៤–១៥ ) ។
អធិស្ឋានជាមួយ និងសម្រាប់មនុស្សដែលអ្នកធ្វើការជាមួយ ( សូមមើល អាលម៉ា ៦:៦; ៨:១៨–២២; ១០:៧–១១; ៣១:២៦–៣៥; គោលលទ្ធិ និងសេចក្តីសញ្ញា ៧៥:១៩ ) ។
បង្ហាញសេចក្តីស្រឡាញ់ និងការដឹងគុណចំពោះព្រះអម្ចាស់ គ្រួសាររបស់អ្នក ពួកអ្នកផ្សព្វផ្សាយសាសនាដទៃទៀត និងមនុស្សដែលអ្នកបម្រើ ( សូមមើល គោលលទ្ធិ និងសេចក្តីសញ្ញា ៥៩:៧; ៧៨:១៩ ) ។

ការសិក្សាព្រះគម្ពីរ

តើអ្នកទទួលបាន និងពង្រឹងទីបន្ទាល់មួយដោយរបៀបណា ?

តើអ្នកទទួលអំណាចខាងវិញ្ញាណតាមរបៀបណា ?

ការសិក្សាផ្ទាល់ខ្លួន

សូមពិនិត្យមើល ហើយជញ្ជឹងគិតពីសេចក្ដីសញ្ញាខាងក្រោមដែលអ្នកបានធ្វើជាមួយនឹងព្រះ ។ សូមសិក្សាពរជ័យដែលព្រះបានសន្យាចំពោះអ្នកដែលរក្សាសេចក្ដីសញ្ញាទាំងនេះ ។ សូមជញ្ជឹងគិតពីពរជ័យដែលអ្នកបានទទួលដោយរក្សាសេចក្តីសញ្ញាទាំងនេះ ។ សូមកត់ត្រាចំណាប់អារម្មណ៍របស់អ្នកនៅក្នុងសៀវភៅកំណត់ហេតុការសិក្សារបស់អ្នក ។

ពិធីបុណ្យជ្រមុជទឹក និងពិធីបញ្ជាក់

សូមស្ម័គ្រចិត្តដើម្បីលើកដាក់មកលើខ្លួនអ្នកនូវព្រះនាមនៃព្រះយេស៊ូវគ្រីស្ទ ។
គោរពព្រះបញ្ញត្តិទាំងឡាយរបស់ព្រះ ។
បម្រើព្រះ និងអ្នកដទៃ ។
កាន់ខ្ជាប់ដរាបដល់ចុងបំផុត ។
( សូមមើល នីហ្វៃទី២ ៣១:៦–១៣; ម៉ូសាយ ១៨:៨–១០,១៣; គោលលទ្ធិ និងសេចក្តីសញ្ញា ២០:៣៧ ) ។

ពិធីបរិសុទ្ធបព្វជិតភាព ( សម្រាប់ពួកអែលឌើរ )

ចូរស្មោះត្រង់
តម្កើងការហៅរបស់អ្នក ។
សូមយកចិត្តទុកដាក់ចំពោះពាក្យសម្តីនៃជីវិតដ៏នៅអស់កល្បជានិច្ច ។
( សូមមើល គោលលទ្ធិ និងសេចក្តីសញ្ញា ៨៤:៣៣–៤០ ) ។

អំណោយទានពិសិដ្ឋនៃព្រះវិហារបរិសុទ្ធ

រស់នៅតាមក្រឹត្យវិន័យនៃការគោរពប្រតិបត្តិ ។
គោរពតាមក្រឹត្យវិន័យនៃការពលិកម្ម ។
គោរពតាមក្រឹត្យវិន័យនៃដំណឹងល្អនៃព្រះយេស៊ូវគ្រីស្ទ ។
គោរពតាមក្រឹត្យវិន័យនៃបរិសុទ្ធភាព ។
គោរពតាមក្រឹត្យវិន័យនៃការថ្វាយ ។
( សូមមើល ក្បួនខ្នាតទូទៅ ២៧.២ ) ។

ការសិក្សាផ្ទាល់ខ្លួន ឬជាដៃគូ

សូមអាន យ៉ូហាន ១៥:១–១៦ ។ តើព្រះគ្រីស្ទជាដើមទំពាំងបាយជូរដោយរបៀបណា ? តើអ្នកជាមែកនៃដើមទំពាំងបាយជូរនោះដោយរបៀបណា ? តើការញែកចេញរបស់អ្នកទាក់ទងនឹងទំនាក់ទំនងនេះដោយរបៀបណា ?

សូមអានវិញ្ញាបនបត្របញ្ជាក់នៃការងារបម្រើរបស់អ្នក ។ សូមកត់ត្រាអារម្មណ៍ និងគំនិតរបស់អ្នកអំពីអ្វីដែលអ្នកអាន ។ រាល់ពេលអ្នកសិក្សាជំពូកនេះ សូមពិចារណាអំពីដំណើរការនេះឡើងវិញ ។ សូមចំណាំពីរបៀបដែលអារម្មណ៍របស់អ្នកផ្លាស់ប្តូរតាមពេលវេលា ។

ការសិក្សាផ្ទាល់ខ្លួន

សូមសិក្សា គោលលទ្ធិ និងសេចក្តីសញ្ញា ១០៩:១៣–១៥, ២១–៣០, ៣៨–៣៩, ៥៥–៥៧ ។ ខគម្ពីរទាំងនេះគឺជាសម្រង់ចេញពីការអធិស្ឋានឧទ្ទិសឆ្លងព្រះវិហារបរិសុទ្ធ ខឺតឡង់ ដ៏បំផុសគំនិតរបស់ព្យាការីយ៉ូសែប ស្ម៊ីធ ។

សូមសរសេរបញ្ជីពរជ័យមួយដែលយ៉ូសែប ស្ម៊ីធបានស្នើសុំសម្រាប់ពួកអ្នកស្មោះត្រង់ដែលបានទទួលអំណោយទានពិសិដ្ឋនៅក្នុងដំណាក់ដ៏បរិសុទ្ធរបស់ព្រះអម្ចាស់ ។ តើអ្នកមានអារម្មណ៍យ៉ាងណាអំពីពរជ័យទាំងនេះ ?

សូមស្វែងរកឲ្យមានព្រះវិញ្ញាណបរិសុទ្ធគង់នៅជាមួយអ្នក

អ្នកបានទទួលអំណោយទាននៃព្រះវិញ្ញាណបរិសុទ្ធ នៅពេលអ្នកត្រូវបានបញ្ជាក់ថាជាសមាជិកនៃសាសនាចក្រ ។ ក្នុងនាមជាអ្នកផ្សព្វផ្សាយសាសនា—ហើយពេញមួយជីវិតរបស់អ្នក—តម្រូវការដ៏ធំបំផុតមួយរបស់អ្នកគឺត្រូវមានព្រះវិញ្ញាណបរិសុទ្ធនៅជាមួយអ្នក ( សូមមើល នីហ្វៃទី១ ១០:១៧; នីហ្វៃទី៣ ១៩:៩ ) ។ ព្រះវិញ្ញាណបរិសុទ្ធគឺជាសមាជិកទីបីនៃក្រុមព្រះ ។

ព្រះវិញ្ញាណបរិសុទ្ធដឹកនាំ បង្រៀន និងលួងលោមអ្នក ។ ទ្រង់សម្អាត និងញែកអ្នកចេញជាបរិសុទ្ធ ។ ព្រះវិញ្ញាណបរិសុទ្ធថ្លែងទីបន្ទាល់អំពីសេចក្តីពិត និងថ្លែងជាសាក្សីពីព្រះវរបិតា និងព្រះរាជបុត្រា ។ ទ្រង់នាំមកនូវការប្រែចិត្តជឿរបស់អ្នក និងការប្រែចិត្តជឿរបស់អស់អ្នកដែលអ្នកបង្រៀន ។ ( សូមមើល នីហ្វៃទី៣ ២៧:២០; ២៨:១១; អេធើរ ១២:៤១; មរ៉ូណៃ ៨:២៦; ១០:៥; យ៉ូហាន ១៥:២៦ ) ។

ព្រះវិញ្ញាណបរិសុទ្ធ « នឹងបង្ហាញដល់អ្នកនូវគ្រប់អ្វីទាំងអស់ដែលអ្នកត្រូវធ្វើ » ( នីហ្វៃទី២ ៣២:៥ ) ។ ទ្រង់នឹងតម្កើងសមត្ថភាព និងការបម្រើរបស់អ្នកឲ្យលើសពីអ្វីដែលអ្នកអាចធ្វើបានដោយខ្លួនអ្នកផ្ទាល់ ។

ការស្វែងរកដើម្បីមានព្រះវិញ្ញាណបរិសុទ្ធគង់នៅជាមួយអ្នកគួរតែជាបំណងប្រាថ្នាដ៏ស្មោះស្ម័គ្របំផុតមួយរបស់អ្នក ។ អ្នកនឹងស្គាល់ភាពជាដៃគូរបស់អ្នកកាលណាអ្នក ៖

អធិស្ឋាន ( សូមមើល គោលលទ្ធិ និងសេចក្តីសញ្ញា ៤២:១៤ ) ។
ថែរក្សាព្រះបន្ទូលរបស់ព្រះ ( សូមមើល គោលលទ្ធិ និងសេចក្តីសញ្ញា ១១:២១; ៨៤:៨៥ ) ។
ជម្រះចិត្តរបស់អ្នកឲ្យបានបរិសុទ្ធ ( សូមមើល គោលលទ្ធិ និងសេចក្តីសញ្ញា ១១២:២៨ ) ។
រក្សាបទបញ្ញត្តិទាំងឡាយ ( សូមមើល គោលលទ្ធិ និងសេចក្តីសញ្ញា ១៣០:២០–២១ ) ។
ទទួលទានសាក្រាម៉ង់រាល់សប្តាហ៍ ( សូមមើល មរ៉ូណៃ ៤–៥; គោលលទ្ធិ និងសេចក្តីសញ្ញា ២០:៧៧, ៧៩ ) ។

« ខ្ញុំសូមអង្វរបងប្អូនឲ្យបង្កើនសមត្ថភាពខាងវិញ្ញាណរបស់បងប្អូនដើម្បីទទួលបានវិវរណៈ ។… សូមជ្រើសធ្វើកិច្ចការខាងវិញ្ញាណដែលបានតម្រូវឲ្យធ្វើ ដើម្បីរីករាយនឹងអំណោយទាននៃព្រះវិញ្ញាណបរិសុទ្ធ ហើយស្ដាប់ឮព្រះសូរសៀងនៃព្រះវិញ្ញាណឲ្យបានញឹកញាប់ ហើយកាន់តែច្បាស់ » ( Revelation for the Church, Revelation for Our Lives » Liahona ខែ ឧសភា ឆ្នាំ ២០១៨ ទំព័រ ៩៦ ) ។

ការរៀនស្គាល់ព្រះវិញ្ញាណ

អ្នកនឹងបំពេញគោលបំណងផ្សព្វផ្សាយសាសនារបស់អ្នកកាន់តែល្អ នៅពេលអ្នករៀនស្គាល់ និងធ្វើតាមការណែនាំពីព្រះវិញ្ញាណបរិសុទ្ធ ។ ជាធម្មតា ព្រះវិញ្ញាណប្រាស្រ័យទាក់ទងដោយស្ងាត់ស្ងៀម តាមរយៈអារម្មណ៍ និងគំនិតរបស់អ្នក ។ សូមពលិកម្មខ្លួនអ្នកដើម្បីស្វែងរក ស្គាល់ និងធ្វើតាមការបំផុសគំនិតដ៏ប្រពៃទាំងនេះ ។ វាកើតឡើងតាមរបៀបជាច្រើន ( សូមមើល ជំពូកទី ៤ សូមមើលផងដែរ គោលលទ្ធិ និងសេចក្តីសញ្ញា ៨:២–៣; ១១:១២–១៤; កាឡាទី ៥:២២–២៣ ) ។

បង្រៀនដោយព្រះវិញ្ញាណ

ដំណឹងល្អនៃព្រះយេស៊ូវគ្រីស្ទគឺជា « ព្រះ‌ចេស្តានៃព្រះ សម្រាប់នឹងជួយសង្គ្រោះដល់អស់អ្នកណាដែលជឿ » ( រ៉ូម ១:១៦ ) ។ ដោយសារហេតុផលនោះ សារលិខិតនៃការស្ដារឡើងវិញនៃដំណឹងល្អចាំបាច់ត្រូវបង្រៀនដោយព្រះចេស្ដាដ៏ទេវភាព—ព្រះចេស្ដានៃព្រះវិញ្ញាណបរិសុទ្ធ ។

ព្រះអម្ចាស់បានមានព្រះបន្ទូលថា « ព្រះវិញ្ញាណត្រូវបានប្រទានដល់អ្នក ដោយពាក្យអធិស្ឋាននៃសេចក្ដីជំនឿ ហើយបើសិនជាអ្នករាល់គ្នាមិនបានទទួលព្រះវិញ្ញាណទេ នោះអ្នករាល់គ្នានឹងមិនត្រូវបង្រៀនឡើយ » ( គោលលទ្ធិ និងសេចក្តីសញ្ញា ៤២:១៤; សូមមើលផងដែរ ៥០:១៣–១៤, ១៧–២២ ) ។ នៅពេលអ្នកបង្រៀនដោយព្រះចេស្ដានៃព្រះវិញ្ញាណបរិសុទ្ធ ទ្រង់នឹង ៖

បង្រៀនអ្នកនូវសេចក្ដីពិត ហើយនាំយកគោលលទ្ធិដែលអ្នកបានសិក្សាដល់ការចងចាំរបស់អ្នក ( សូមមើល យ៉ូហាន ១៤:២៦ ) ។
ប្រទានឲ្យអ្នកនូវពាក្យដើម្បីនិយាយនៅពេលដែលអ្នកត្រូវការនិយាយ ( សូមមើល គោលលទ្ធិ និងសេចក្តីសញ្ញា ៨៤:៨៥ ) ។
ដាក់សារលិខិតរបស់អ្នកទៅក្នុងចិត្តមនុស្សដែលអ្នកបង្រៀន ( សូមមើល នីហ្វៃទី២ ៣៣:១ ) ។
ជួយអ្នក—និងអ្នកដែលទទួលដោយព្រះវិញ្ញាណ—ដើម្បីយល់គ្នាទៅវិញទៅមក ហើយត្រូវបានស្អាងឡើង ហើយរីករាយជាមួយគ្នា ( សូមមើល គោលលទ្ធិ និងសេចក្តីសញ្ញា ៥០:១៧–២២ ) ។
សូមថ្លែងទីបន្ទាល់អំពីភាពពិតនៃសារលិខិតរបស់អ្នក ហើយបញ្ជាក់ពាក្យសម្តីរបស់អ្នកចំពោះអ្នកដែលទទួលអ្នក ( សូមមើល គោលលទ្ធិ និងសេចក្តីសញ្ញា ១០០:៥–៨ ) ។

ព្រះអម្ចាស់នឹងប្រទានពរអ្នកយ៉ាងបរិបូរណ៍ នៅពេលអ្នកស្វែងរក ពឹងផ្អែក និងបង្រៀនដោយព្រះវិញ្ញាណបរិសុទ្ធ ( សូមមើល ជំពូកទី ៤ និង ១០ ) ។

ដំណឹងល្អរបស់ព្រះគ្រីស្ទ និងគោលលទ្ធិរបស់ព្រះគ្រីស្ទ

ដំណឹងល្អនៃព្រះយេស៊ូវគ្រីស្ទឲ្យនិយមន័យទាំងសារលិខិត និងគោលបំណងរបស់អ្នក ។ វាផ្តល់ទាំង « អ្វី » និង « ហេតុអ្វី » នៃការបម្រើជាអ្នកផ្សព្វផ្សាយសាសនារបស់អ្នក ។ ដំណឹងល្អរបស់ទ្រង់រួមបញ្ចូលទាំងគោលលទ្ធិ គោលការណ៍ ក្រឹត្យវិន័យ បទបញ្ញត្តិ ពិធីបរិសុទ្ធ និងសេចក្ដីសញ្ញាទាំងអស់ដែលចាំបាច់សម្រាប់សេចក្ដីសង្គ្រោះ និងភាពតម្កើងឡើង ។

សារលិខិតនៃដំណឹងល្អគឺថា យើងអាចទទួលបានការសង្គ្រោះ ការប្រោសលោះនៃព្រះចេស្ដានៃព្រះយេស៊ូវគ្រីស្ទ ដោយអនុវត្តសេចក្តីជំនឿលើទ្រង់ ប្រែចិត្ត ទទួលបុណ្យជ្រមុជទឹក ទទួលអំណោយទាននៃព្រះវិញ្ញាណបរិសុទ្ធ ហើយកាន់ខ្ជាប់ដរាបដល់ចុងបំផុត ( សូមមើល នីហ្វៃទី៣ ២៧:១៣–២២ ) ។

ការណ៍នេះត្រូវបានស្គាល់ផងដែរថាជាគោលលទ្ធិរបស់ព្រះគ្រីស្ទ ។ ការរស់នៅតាមគោលលទ្ធិនេះ គឺជារបៀបដែលយើងមករកព្រះគ្រីស្ទ ហើយបានសង្រ្គោះ ( សូមមើល នីហ្វៃទី១ ១៥:១៤ ) ។ ការណ៍នេះត្រូវបានបង្រៀនយ៉ាងមានអានុភាពនៅក្នុងព្រះគម្ពីរមរមន ( សូមមើល នីហ្វៃទី២ ៣១; ៣២:១–៦; នីហ្វៃទី៣ ១១:៣១–៤០ ) ។ គោលបំណងរបស់អ្នកគឺដើម្បីជួយមនុស្សឲ្យមករកព្រះគ្រីស្ទដោយជួយពួកគេឲ្យរស់នៅតាមគោលលទ្ធិរបស់ទ្រង់ ។

« សូមប្រកាសគោលការណ៍ទីមួយនៃដំណឹងល្អ—ប្រកាសវាម្ដងហើយម្ដងទៀត បងប្អូននឹងឃើញថា ពីមួយថ្ងៃទៅមួយថ្ងៃ គំនិតថ្មី និងពន្លឺបន្ថែមទៀតទាក់ទងនឹងគោលការណ៍ទាំងនេះនឹងត្រូវបានបើកសម្ដែងទៅកាន់បងប្អូន ។ បងប្អូនអាចពង្រីកគោលការណ៍ទាំងនោះ ដើម្បីយល់វាឲ្យកាន់តែច្បាស់ ។ បន្ទាប់មក បងប្អូននឹងអាចធ្វើឲ្យអ្នកដែលបងប្អូនបង្រៀន យល់វាកាន់តែច្បាស់បន្ថែមទៀត » ( ហៃរុម ស៊្មីធ នៅក្នុង History ឆ្នាំ ១៨៣៨–១៨៥៦ volume E-1 [ ថ្ងៃទី ១ ខែ កក្កដា ឆ្នាំ ១៨៤៣–ថ្ងៃទី ៣០ ខែ មេសា ឆ្នាំ ១៨៤៤ ] ឆ្នាំ ១៩៩៤ នៅលើគេហទំព័រ josephsmithpapers.org ) ។

ការសិក្សាព្រះគម្ពីរ

តើបទគម្ពីរ និងការប្រកាសខាងក្រោមបង្រៀនអ្វីខ្លះអំពីដំណឹងល្អនៃព្រះយេស៊ូវគ្រីស្ទ និងគោលលទ្ធិរបស់ព្រះគ្រីស្ទ ? សូមកត់ចំណាំនៅក្នុងសៀវភៅសិក្សារបស់អ្នកដើម្បីជួយអ្នកយល់ និងចងចាំ ។

សេចក្ដីជំនឿលើព្រះយេស៊ូវគ្រីស្ទ

សេចក្តីជំនឿគឺជាគ្រឹះសម្រាប់គោលការណ៍នៃដំណឹងល្អផ្សេងទៀតទាំងអស់ ។ សេចក្តីជំនឿគឺជាគោលការណ៍នៃសកម្មភាព និងអំណាច ។

សេចក្ដីជំនឿរបស់យើងត្រូវតែផ្ដោតសំខាន់ទៅលើព្រះយេស៊ូវគ្រីស្ទ សម្រាប់នាំជនណាម្នាក់ទៅរកសេចក្ដីសង្គ្រោះ ។ ព្រះអង្គសង្រ្គោះបានបង្រៀនថា « ដ្បិតព្រះទ្រង់ស្រឡាញ់មនុស្សលោកដល់ម្ល៉េះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រា នោះមិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ » ( យ៉ូហាន ៣:១៦ ) ។

សេចក្តីជំនឿលើព្រះយេស៊ូវគ្រីស្ទ រួមបញ្ចូលទាំងការជឿថាទ្រង់ជាព្រះរាជបុត្រាតែមួយរបស់ព្រះ ។ វាជាការទុកចិត្តទ្រង់ជាព្រះអង្គសង្គ្រោះ និងជាព្រះប្រោសលោះរបស់យើង ( សូមមើល ម៉ូសាយ ៣:១៧; អាលម៉ា ៤:៦–១០; អាលម៉ា ៥:៧–១៥ ) ។ វាគឺជាការមានទំនុកចិត្តទាំងស្រុងលើទ្រង់ និងព្រះបន្ទូល ការបង្រៀន និងការសន្យារបស់ទ្រង់ ។ សេចក្តីជំនឿរបស់យើងលើព្រះគ្រីស្ទរីកចម្រើន នៅពេលយើងធ្វើតាមការបង្រៀន និងគំរូរបស់ទ្រង់ដោយមានគោលបំណងអស់ពីដួងចិត្ត ( សូមមើល នីហ្វៃទី២ ៣១:៦–១៣; នីហ្វៃទី៣ ២៧:២១–២២ ) ។

ក្នុងនាមជាអ្នកផ្សព្វផ្សាយសាសនា សូមជួយមនុស្សឲ្យធ្វើ និងរក្សាការតាំងចិត្តដែលស្ថាបនាសេចក្ដីជំនឿរបស់ពួកគេលើព្រះយេស៊ូវគ្រីស្ទ ។ ការតាំងចិត្តទាំងនេះរៀបចំពួកគេឲ្យទទួលពិធីបរិសុទ្ធ ហើយធ្វើ និងរក្សាសេចក្ដីសញ្ញាដ៏ពិសិដ្ឋជាមួយព្រះ ។

ការប្រែចិត្ត

សេចក្តីជំនឿលើព្រះយេស៊ូវគ្រីស្ទ នាំយើងឲ្យប្រែចិត្ត ( សូមមើល ហេលេមិន ១៤:១៣ ) ។ ការប្រែចិត្ត គឺជាដំណើរការនៃការងាកទៅរកព្រះ ហើយងាកចេញពីអំពើបាប ។ នៅពេលយើងប្រែចិត្ត សកម្មភាព បំណងប្រាថ្នា និងគំនិតរបស់យើងផ្លាស់ប្តូរស្របតាមព្រះឆន្ទៈរបស់ព្រះ ។

តាមរយៈការពលិកម្មធួនរបស់ទ្រង់ ព្រះអង្គសង្គ្រោះបានបង់ថ្លៃសម្រាប់អំពើបាបរបស់យើង ( សូមមើល ម៉ូសាយ ១៥:៩; អាលម៉ា ៣៤:១៥–១៧ ) ។ នៅពេលយើងប្រែចិត្ត យើងអាចត្រូវបានអភ័យទោសដោយសារព្រះយេស៊ូវគ្រីស្ទ និងពលិកម្មរបស់ទ្រង់ ដ្បិតទ្រង់ទាមទារសិទ្ធិនៃសេចក្តីមេត្តាករុណារបស់ទ្រង់សម្រាប់អ្នកដែលមានទោស ( សូមមើល មរ៉ូណៃ ៧:២៧–២៨ ) ។ នៅក្នុងប្រសាសន៍របស់ព្យាការីលីហៃ « សេចក្ដីប្រោសលោះនឹងមកដោយ… បុណ្យគុណ និងសេចក្ដីមេត្តាករុណា និងព្រះគុណនៃព្រះមែស៊ីដ៏បរិសុទ្ធ » ( នីហ្វៃទី២ ២:៦, ៨ ) ។

ការប្រែចិត្តគឺលើសពីការអនុវត្តនូវការឲ្យឃើញនូវអានុភាពក្នុងការផ្លាស់ប្តូរអាកប្បកិរិយា ឬយកឈ្នះលើភាពទន់ខ្សោយទៅទៀត ។ ការប្រែចិត្តគឺជាការងាកទៅរកព្រះគ្រីស្ទដោយស្មោះ ដែលផ្តល់ឲ្យយើងនូវអំណាចដើម្បីទទួលបទពិសោធន៍ « ការផ្លាស់ប្ដូរដ៏ធំ » នៅក្នុងដួងចិត្តរបស់យើង ( សូមមើល អាលម៉ា ៥:១២–១៤ ) ។ វារួមបញ្ចូលទាំងការបន្ទាបខ្លួនធ្វើតាមព្រះវិញ្ញាណ និងការចុះចូលតាមព្រះហឫទ័យរបស់ព្រះ ។ នៅពេលយើងប្រែចិត្ត យើងបង្កើនការតាំងចិត្តរបស់យើងដើម្បីបម្រើព្រះ ហើយគោរពតាមបទបញ្ញត្តិរបស់ទ្រង់ ។ យើងកើតជាថ្មីខាងវិញ្ញាណនៅក្នុងព្រះគ្រីស្ទ ។

ការប្រែចិត្តគឺជាគោលការណ៍វិជ្ជមានដែលនាំមកនូវអំណរ និងសេចក្តីសុខសាន្ត ។ វានាំយើង « ទៅកាន់ព្រះចេស្ដានៃព្រះដ៏ប្រោសលោះ ឲ្យបានដល់សេចក្ដីសង្គ្រោះព្រលឹង [ របស់យើង ] » ( ហេលេមិន ៥:១១ ) ។

ចូរក្លាហាន និងពេញដោយក្តីស្រឡាញ់ក្នុងការជួយមនុស្សឲ្យយល់ពីមូលហេតុដែលពួកគេគួរតែប្រែចិត្ត ។ តាមរយៈការអញ្ជើញមនុស្សដែលអ្នកបង្រៀនឲ្យធ្វើការតាំងចិត្ត នោះអ្នកអញ្ជើញពួកគេឲ្យប្រែចិត្ត ហើយអ្នកផ្តល់ក្តីសង្ឃឹមដល់ពួកគេ ។

ការសិក្សាព្រះគម្ពីរ

តើអ្នកអាចរៀនអ្វីខ្លះពីបទគម្ពីរខាងក្រោមនេះអំពីការប្រកាសពីការប្រែចិត្ត ?

ពិធីបុណ្យជ្រមុជទឹក

សេចក្តីជំនឿលើព្រះយេស៊ូវគ្រីស្ទ និងការប្រែចិត្ត រៀបចំយើងដើម្បីទទួលពិធីបរិសុទ្ធនៃពិធីបុណ្យជ្រមុជទឹក ។ « ផលដំបូងនៃការប្រែចិត្ត គឺការជ្រមុជទឹក » ( មរ៉ូណៃ ៨:២៥ ) ។ យើងចូលទៅកាន់ទ្វារនៃជីវិតដ៏នៅអស់កល្បជានិច្ច នៅពេលដែលយើងទទួលបុណ្យជ្រមុជទឹកដោយការពន្លិចពីអ្នកដែលមានសិទ្ធិអំណាចពីព្រះ ។

នៅពេលយើងទទួលបុណ្យជ្រមុជទឹក យើងចុះសេចក្តីសញ្ញាមួយជាមួយព្រះ ។ នៅពេលយើងរក្សាសេចក្តីសញ្ញានេះ ព្រះសន្យាថានឹងប្រទានដល់យើងនូវភាពជាដៃគូនៃព្រះវិញ្ញាណបរិសុទ្ធ អត់ទោសដល់អំពើបាបរបស់យើង ហើយប្រទានដល់យើងនូវសមាជិកភាពនៅក្នុងសាសនាចក្រនៃព្រះយេស៊ូវគ្រីស្ទ ( សូមមើល គោលលទ្ធិ និងសេចក្តីសញ្ញា ២០:៧៧, ៧៩; មរ៉ូណៃ ៦:៤ ) ។ យើងបានប្រមូលគ្នាទៅរកព្រះអម្ចាស់ ហើយបានកើតជាថ្មីខាងវិញ្ញាណតាមរយៈពិធីបរិសុទ្ធដ៏រីករាយ និងពេញដោយក្តីសង្ឃឹមនេះ ។

ការជ្រមុជទឹក និងការបញ្ជាក់ដល់អ្នកដែលអ្នកបង្រៀនគឺសំខាន់សម្រាប់គោលបំណងរបស់អ្នក ។ សូមជួយពួកគេឲ្យយល់ថា ដើម្បីមានលក្ខណៈសម្បត្តិគ្រប់គ្រាន់ដើម្បីទទួលពិធីបុណ្យជ្រមុជទឹក ពួកគេត្រូវបំពេញតាមលក្ខខណ្ឌនៅក្នុង គោលលទ្ធិ និងសេចក្តីសញ្ញា ២០:៣៧ ។

ការសិក្សាជាមួយដៃគូ

សូមស្រាវជ្រាវខគម្ពីរដូចតទៅនេះ ៖

ដោយផ្អែកលើការសិក្សាខគម្ពីរខាងលើរបស់អ្នក សូមធ្វើបញ្ជីសរសេរចំនួនពីរ ៖

លក្ខណៈសម្បត្តិដើម្បីទទួលបុណ្យជ្រមុជទឹក
សេចក្ដីសញ្ញាដែលបានធ្វើនៅពិធីបុណ្យជ្រមុជទឹក ។

សូមពិភាក្សាជាមួយដៃគូរបស់អ្នកអំពីរបៀបបង្រៀនការណ៍នេះដល់អ្នកដទៃ ។

ពិធីបញ្ជាក់ និងអំណោយទាននៃព្រះវិញ្ញាណបរិសុទ្ធ

ពិធីបុណ្យជ្រមុជទឹកមានពីរផ្នែក ៖ គឺពិធីបុណ្យជ្រមុជទឹកដោយទឹក និងពិធីបុណ្យជ្រមុជទឹកដោយព្រះវិញ្ញាណ ។ បន្ទាប់ពីយើងទទួលពិធីបុណ្យជ្រមុជទឹកដោយទឹក នោះពិធីបុណ្យជ្រមុជទឹកពេញលេញ នៅពេលយើងត្រូវបានបញ្ជាក់ដោយការដាក់ដៃដោយអ្នកដែលមានសិទ្ធិអំណាចពីព្រះ ។ តាមរយៈពិធីបញ្ជាក់នេះ យើងអាចទទួលបានអំណោយទាននៃព្រះវិញ្ញាណបរិសុទ្ធ និងការផ្ដាច់បាបរបស់យើង ។

ព្យាការីយ៉ូសែប ស្មីធបានបង្រៀនថា ៖« ពិធីបុណ្យជ្រមុជទឹកដោយទឹកគឺជាពិធីបុណ្យជ្រមុជទឹកតែពាក់កណ្ដាល ហើយវាពុំល្អទេបើគ្មានពាក់កណ្ដាលទៀត—ដែលជាពិធីបុណ្យជ្រមុជទឹកដោយព្រះវិញ្ញាណបរិសុទ្ធ » ( Teachings of Presidents of the Church: Joseph Smith [ ឆ្នាំ ២០០៧ ] ទំព័រ ៩៥ ) ។

អាលម៉ាបានបង្រៀនថា « មនុស្សលោកទាំងអស់…ត្រូវតែកើតម្ដងទៀតឡើយ មែនហើយ គឺកើតមកពីព្រះ ផ្លាស់ប្រែពីស្ថានភាពខាងរូបកាយ និងខាងការធ្លាក់ទៅកាន់ស្ថានភាពនៃសេចក្ដីសុចរិតវិញ ដោយបានព្រះទ្រង់ប្រោសលោះ នោះនឹងក្លាយទៅជាបុត្រាបុត្រីរបស់ទ្រង់ ។ ម្ល៉ោះហើយ ពួកគេក្លាយទៅជាសត្វលោកថ្មី » ( ម៉ូសាយ ២៧:២៥, ២៦ ) ។

សម្រាប់ការប្រែចិត្ត ពិធីបុណ្យជ្រមុជទឹកដោយទឹក និងដោយព្រះវិញ្ញាណ គឺជាការកើតខាងវិញ្ញាណជាថ្មី ។

ការសិក្សាព្រះគម្ពីរ

តើពរជ័យនៃការមានអំណោយទាននៃព្រះវិញ្ញាណបរិសុទ្ធមានអ្វីខ្លះ ?

ហេតុអ្វីយើងចង់បានអំណោយទាននៃព្រះវិញ្ញាណបរិសុទ្ធ ?

ការកាន់ខ្ជាប់ដរាបដល់ចុងបំផុត

ការធ្វើតាមព្រះយេស៊ូវគ្រីស្ទគឺជាការតាំងចិត្តពេញមួយជីវិត ។ យើងកាន់ខ្ជាប់ដរាបដល់ចុងបំផុត នៅពេលយើងបន្តពេញមួយជីវិតរបស់យើង ដើម្បីអនុវត្តសេចក្តីជំនឿលើព្រះគ្រីស្ទ ប្រែចិត្តជារៀងរាល់ថ្ងៃ ទទួលពិធីបរិសុទ្ធ និងសេចក្តីសញ្ញាទាំងអស់នៃដំណឹងល្អ រក្សាសេចក្តីសញ្ញាទាំងនោះ ហើយមានដៃគូនៃព្រះវិញ្ញាណបរិសុទ្ធ ។ ការណ៍នេះរួមទាំងការរំឭកសេចក្តីសញ្ញាដែលយើងបានធ្វើឡើងវិញ ដោយការទទួលទាននៃសាក្រាម៉ង់ ។

ព្រះអម្ចាស់ជាអ្នកគង្វាលខ្ញុំ ដោយ យង់សុង គិម

ដំណឹងល្អ—ជាផ្លូវត្រឡប់ទៅរកព្រះវរបិតាសួគ៌របស់យើង

ដំណឹងល្អនៃព្រះយេស៊ូវគ្រីស្ទអាចផ្លាស់ប្តូររបៀបដែលយើងរស់នៅ និងសក្ដានុពលរបស់យើង ។ គោលការណ៍របស់ដំណឹងល្អមិនគ្រាន់តែជាជំហានដែលយើងដកពិសោធន៍តែម្តងក្នុងជីវិតរបស់យើងនោះទេ ។ នៅពេលដែលយើងបន្តធ្វើវាពេញមួយជីវិត នោះវានាំឲ្យយើងខិតទៅជិតព្រះ ហើយក្លាយជាគំរូនៃការរស់នៅដ៏មានតម្លៃកាន់តែខ្លាំងឡើង ។ វានាំមកនូវសេចក្តីសុខសាន្ត ការព្យាបាល និងការអភ័យទោស ។ វាក៏កំណត់ផ្លូវដែលព្រះវរបិតាសួគ៌របស់យើងបានប្រទានឲ្យយើងដើម្បីទទួលបានជីវិតដ៏នៅអស់កល្បជានិច្ចជាមួយទ្រង់ ។

ដំណឹងល្អនៃព្រះយេស៊ូវគ្រីស្ទ ណែនាំពីរបៀបដែលអ្នកធ្វើការក្នុងនាមជាអ្នកផ្សព្វផ្សាយសាសនា ។ វាក៏ផ្តោតលើការខិតខំប្រឹងប្រែងរបស់អ្នកផងដែរ ។ សូមជួយមនុស្សឲ្យទទួលបានសេចក្ដីជំនឿលើព្រះយេស៊ូវគ្រីស្ទឲ្យឈានដល់ការប្រែចិត្ត ( សូមមើល អាលម៉ា ៣៤:១៥–១៧ ) ។ បង្រៀន និងថ្លែងទីបន្ទាល់ពីភាពពេញលេញនៃដំណឹងល្អនៃព្រះយេស៊ូវគ្រីស្ទ និងសិទ្ធិអំណាចនៃបព្វជិតភាពត្រូវបានស្ដារឡើងវិញ ។ អញ្ជើញមនុស្សឲ្យទទួលបុណ្យជ្រមុជទឹក ហើយរស់នៅតាមការបង្រៀនរបស់ព្រះអង្គសង្គ្រោះ ។

ដំណឹងល្អនៃព្រះយេស៊ូវគ្រីស្ទផ្ដល់ពរដល់បុត្រាបុត្រីទាំងអស់របស់ព្រះ

ដំណឹងល្អនៃព្រះយេស៊ូវគ្រីស្ទគឺសម្រាប់បុត្រាបុត្រីទាំងអស់របស់ព្រះ ។ បទគម្ពីរបង្រៀនថា « មនុស្សទាំងអស់… ដូចគ្នា » នៅចំពោះព្រះ ។ ទ្រង់អញ្ជើញ « យើងទាំងអស់គ្នាឲ្យមករកទ្រង់ ហើយទទួលទាននូវសេចក្ដីល្អសប្បុរសរបស់ទ្រង់ ហើយទ្រង់ពុំបដិសេធអ្នកណាម្នាក់ ដែលមករកទ្រង់ឡើយ » ( នីហ្វៃទី២ ២៦:៣៣ ) ។

ដំណឹងល្អផ្ដល់ពរដល់យើងពេញមួយជីវិតរមែងស្លាប់របស់យើង និងពេញមួយជីវិតដ៏នៅអស់កល្បជានិច្ច ។ យើងទំនងជារីករាយបំផុត—ទាំងជាបុគ្គលម្នាក់ៗ និងជាក្រុមគ្រួសារ—នៅពេលយើងរស់នៅតាមការបង្រៀនរបស់ព្រះយេស៊ូវគ្រីស្ទ ( សូមមើល ម៉ូសាយ ២:៤១; “ក្រុមគ្រួសារ ៖ ការប្រកាសដល់ពិភពលោក » នៅលើគេហទំព័រ ChurchofJesusChrist.org ) ។ ការរស់នៅតាមដំណឹងល្អធ្វើឲ្យអំណររបស់យើងកាន់តែស៊ីជម្រៅ បំផុសគំនិតរបស់យើង និងពង្រឹងទំនាក់ទំនងរបស់យើង ។

សារលិខិតដ៏អស្ចារ្យមួយនៃដំណឹងល្អដែលបានស្ដារឡើងវិញគឺថា យើងទាំងអស់គ្នាជាផ្នែកនៃគ្រួសាររបស់ព្រះ ។ យើងគឺជាបុត្រាបុត្រីស្ងួនភ្ញារបស់ទ្រង់ ។ មិនថាស្ថានភាពគ្រួសាររបស់យើងនៅលើផែនដីយ៉ាងណានោះទេ យើងម្នាក់ៗគឺជាសមាជិកនៃគ្រួសាររបស់ព្រះ ។

ផ្នែកដ៏អស្ចារ្យមួយទៀតនៃសារលិខិតរបស់យើងគឺថា គ្រួសារអាចរួបរួមគ្នាសម្រាប់ភាពអស់កល្បជានិច្ច ។ ក្រុមគ្រួសារគឺត្រូវបានតែងតាំងឡើងដោយព្រះ ។ ពួកព្យាការីសម័យចុងក្រោយបានបង្រៀនថា ៖

« ផែនការនៃសុភមង្គលដ៏ទេវភាព [ របស់ព្រះវរបិតាសួគ៌ ] នេះ ផ្តល់លទ្ធភាពដល់ទំនាក់ទំនងក្រុមគ្រួសារចេះតែបន្តមានរហូតហួសពីសេចក្តីស្លាប់ ។ « ពិធីបរិសុទ្ធនិងសេចក្ដីសញ្ញាដ៏ពិសិដ្ឋទាំងប៉ុន្មានដែលមាននៅក្នុងព្រះវិហារបរិសុទ្ធធ្វើឲ្យបុគ្គលម្នាក់ៗអាចវិលត្រឡប់ទៅវត្តមាននៃព្រះវិញ ហើយធ្វើឲ្យគ្រួសារបានរួបរួមជួបជុំគ្នានៅអស់កល្បជានិច្ច » ( « ក្រុមគ្រួសារ ៖ ការប្រកាសដល់ពិភពលោក » ) ។

ឱកាសដើម្បីរៀបអាពាហ៍ពិពាហ៍ ឬឱកាសដើម្បីមានទំនាក់ទំនងគ្រួសារដែលពេញដោយក្ដីស្រឡាញ់របស់មនុស្សជាច្រើនគឺមានកម្រិត ។ មនុស្សជាច្រើនបានជួបប្រទះនឹងការលែងលះ និងស្ថានភាពគ្រួសារដ៏លំបាកផ្សេងទៀត ។ ទោះជាយ៉ាងណាក៏ដោយ ដំណឹងល្អផ្ដល់ពរដល់យើងម្នាក់ៗដោយមិនគិតពីស្ថានភាពគ្រួសាររបស់យើងឡើយ ។ នៅពេលយើងស្មោះត្រង់ ព្រះនឹងប្រទានផ្លូវសម្រាប់យើងដើម្បីទទួលបានពរជ័យនៃគ្រួសារដែលពេញដោយក្តីស្រឡាញ់ មិនថាក្នុងជីវិតនេះ ឬក្នុងជីវិតខាងមុខនោះទេ ( សូមមើល ម៉ូសាយ ២:៤១ ) ។

សារលិខិតនៃការស្ដារឡើងវិញ ៖ គឺជាគ្រឹះនៃសេចក្តីជំនឿ

មិនថាអ្នកបម្រើនៅទីណា ឬអ្នកបង្រៀនអ្នកណានោះទេ សូមផ្តោតការបង្រៀនរបស់អ្នកលើព្រះយេស៊ូវគ្រីស្ទ និងការស្ដារឡើងវិញនៃដំណឹងល្អរបស់ទ្រង់ ។ នៅពេលអ្នកសិក្សាគោលលទ្ធិនៅក្នុងមេរៀនអ្នកផ្សព្វផ្សាយសាសនា អ្នកនឹងឃើញថា យើងមានសារលិខិតមួយ ៖ ព្រះយេស៊ូវគឺជាព្រះគ្រីស្ទ ជាព្រះអង្គសង្គ្រោះ និងជាព្រះប្រោសលោះរបស់យើង ។ តាមរយៈព្យាការីសម័យទំនើប ព្រះវរបិតាសួគ៌បានស្ដារចំណេះដឹងអំពីផែនការរបស់ទ្រង់សម្រាប់សេចក្ដីសង្គ្រោះរបស់យើង ។ ផែនការនេះផ្ដោតទៅលើព្រះយេស៊ូវគ្រីស្ទ ។ តាមរយៈការពលិកម្មដ៏ធួនរបស់ទ្រង់ ព្រះអង្គសង្គ្រោះធ្វើឲ្យយើងទាំងអស់គ្នាអាចត្រូវបានសង្គ្រោះពីអំពើបាប និងសេចក្តីស្លាប់ ហើយត្រឡប់ទៅរកព្រះវរបិតាសួគ៌វិញ ។

ជួយមនុស្សដែលអ្នកបង្រៀនយល់ដូចខាងក្រោម ៖

ព្រះពិតជាព្រះវរបិតារបស់យើងដែលគង់នៅស្ថានសួគ៌ ។ ទ្រង់ស្រឡាញ់យើងដោយឥតខ្ចោះ ។ មនុស្សគ្រប់រូបនៅលើផែនដីគឺជាបុត្ររបស់ព្រះ និងជាសមាជិកនៃគ្រួសាររបស់ទ្រង់ ។
ព្រះវរបិតាសួគ៌បានប្រទានផែនការមួយសម្រាប់យើងដើម្បីទទួលបានភាពអមតៈ និងជីវិតដ៏នៅអស់កល្បជានិច្ច ដែលជាពរជ័យដ៏មហិមាបំផុតរបស់ទ្រង់ ( សូមមើល ម៉ូសាយ ១:៣៩ ) ។ យើងមកផែនដីដើម្បីរៀន រីកចម្រើន និងរៀបចំខ្លួនដើម្បីទទួលភាពពេញលេញនៃពរជ័យរបស់ទ្រង់ ។
ដោយជាផ្នែកនៃផែនការរបស់ទ្រង់ ព្រះវរបិតាសួគ៌បានប្រទានបទបញ្ញត្តិដើម្បីដឹកនាំយើងក្នុងអំឡុងពេលជីវិតនេះ ហើយជួយយើងត្រឡប់ទៅកាន់ទ្រង់វិញ ( សូមមើល ឧទាហរណ៍ និក្ខមនំ ២០:៣–១៧ ) ។
នៅក្នុងជីវិតនេះ យើងទាំងអស់គ្នាមានបាប ហើយយើងទាំងអស់គ្នានឹងស្លាប់ ។ ដោយសារតែសេចក្តីស្រឡាញ់របស់ព្រះវរបិតាសួគ៌ចំពោះពួកយើង នោះទ្រង់បានបញ្ជូនព្រះរាជបុត្រារបស់ទ្រង់ គឺព្រះយេស៊ូវគ្រីស្ទឲ្យមកប្រោសលោះយើងពីអំពើបាប និងសេចក្តីស្លាប់ ។
ដោយសារការពលិកម្មធួនរបស់ព្រះយេស៊ូវ យើងអាចត្រូវបានស្អាតពីអំពើបាបរបស់យើង នៅពេលយើងប្រែចិត្ត ហើយទទួលបុណ្យជ្រមុជទឹក និងពិធីបញ្ជាក់ ។ ការណ៍នេះនាំមកនូវសេចក្តីសុខសាន្តដល់យើង ហើយវាធ្វើឲ្យយើងអាចត្រឡប់ទៅកាន់វត្តមានរបស់ព្រះវិញ ហើយទទួលបានភាពពេញលេញនៃអំណរ ។
ដោយសារការមានព្រះជន្មរស់ឡើងវិញរបស់ព្រះយេស៊ូវ យើងទាំងអស់គ្នានឹងរស់ឡើងវិញបន្ទាប់ពីសេចក្តីស្លាប់ ។ ការណ៍នេះមានន័យថា វិញ្ញាណ និងរូបកាយរបស់មនុស្សម្នាក់ៗនឹងបានរួបរួមគ្នាឡើងវិញ ហើយរស់នៅជារៀងរហូត ។
នៅក្នុងប្រវត្តិសាស្ត្រព្រះគម្ពីរប៊ីបទាំងមូល ព្រះអម្ចាស់បានបើកសម្តែងដំណឹងល្អរបស់ទ្រង់ ហើយរៀបចំសាសនាចក្ររបស់ទ្រង់តាមរយៈព្យាការី ។ ម្តងហើយម្តងទៀត មនុស្សភាគច្រើនបានបដិសេធដំណឹងល្អ ។ គំរូនៃការឃ្លាតឆ្ងាយពីដំណឹងល្អ និងតម្រូវការដើម្បីស្ដារឡើងវិញវាបានចាប់ផ្ដើមនៅសម័យព្រះគម្ពីរសញ្ញាចាស់ ។
បន្ទាប់ពីការសុគត និងការមានព្រះជន្មរស់ឡើងវិញរបស់ព្រះអង្គសង្គ្រោះ ពួកសាវករបស់ទ្រង់បានដឹកនាំសាសនាចក្រមួយរយៈ ។ នៅទីបំផុត ពួកគេបានស្លាប់ សិទ្ធិអំណាចបព្វជិតភាពត្រូវបានបាត់បង់ ហើយមានការប្រាកចាកផ្សេងទៀតចេញពីការបង្រៀនរបស់ព្រះអង្គសង្គ្រោះ ។ មនុស្សបានផ្លាស់ប្តូរគោលលទ្ធិ និងពិធីបរិសុទ្ធទាំងឡាយ ។
ដំណឹងល្អនៃព្រះយេស៊ូវគ្រីស្ទត្រូវបានស្តារឡើងវិញដោយព្រះវរបិតាសួគ៌តាមរយៈព្យាការីយ៉ូសែប ស្ម៊ីធ ។ ព្រះជាព្រះវរបិតាសួគ៌ និងព្រះយេស៊ូវគ្រីស្ទបានយាងមកជួបយ៉ូសែប នៅនិទាឃរដូវនាឆ្នាំ ១៨២០ ។ ក្រោយមក យ៉ូសែប ស៊្មីធ បានទទួលសិទ្ធិអំណាចបព្វជិតភាព ហើយត្រូវបានដឹកនាំឲ្យរៀបចំសាសនាចក្រនៃព្រះយេស៊ូវគ្រីស្ទម្តងទៀតនៅលើផែនដី ។

សូមបង្រៀនថា សាសនាចក្រនៃព្រះយេស៊ូវគ្រីស្ទមិនមែនជាសាសនាផ្សេងនោះទេ ។ ហើយក៏មិនមែនជាព្រះវិហាររបស់ជនជាតិអាមេរិកកាំងដែរ ។ ផ្ទុយទៅវិញ សាសនាចក្រនេះគឺជាការស្តារឡើងវិញនៃ « ភាពពោរពេញនៃដំណឹងល្អ » របស់ព្រះយេស៊ូវគ្រីស្ទ ( គោលលទ្ធិ និងសេចក្តីសញ្ញា ១:២៣ ) ។ វានឹងមិនយកចេញពីផែនដីនេះម្តងទៀតនោះទេ ។

ព្រះគម្ពីរមរមន ៖ សក្ខីបទមួយទៀតអំពីព្រះយេស៊ូវគ្រីស្ទ ថ្លែងជាសាក្សីអំពីព្រះយេស៊ូវគ្រីស្ទ និងបេសកកម្មដ៏ទេវភាពរបស់ទ្រង់ជាព្រះអង្គសង្គ្រោះនៃពិភពលោក ។ វាក៏ជាសាក្សីដ៏មានអានុភាពថា ព្រះយេស៊ូវគ្រីស្ទបានស្ដារដំណឹងល្អ និងសាសនាចក្ររបស់ទ្រង់ឡើងវិញ តាមរយៈព្យាការី យ៉ូសែប ស្ម៊ីធ ។ សូមអញ្ជើញ និងជួយមនុស្សឲ្យអានព្រះគម្ពីរមរមន ហើយអធិស្ឋានអំពីសារលិខិតដែលមានក្នុងព្រះគម្ពីរនេះ ។

សូមជឿជាក់លើការសន្យាដ៏អស្ចារ្យ មរ៉ូណៃ ១០:៣–៥ ។ សូមលើកទឹកចិត្តមនុស្សឲ្យទូលសួរដល់ព្រះដោយស្មោះសរ និងស្មោះអស់ពីចិត្តថាតើព្រះគម្ពីរមរមនជាព្រះបន្ទូលរបស់ព្រះ ឬអត់ ។ ការអធិស្ឋានដោយស្មោះអស់ពីចិត្តមានន័យថាស្ម័គ្រចិត្តធ្វើតាមចម្លើយដែលបានមកពីសាក្សីនៃព្រះវិញ្ញាណបរិសុទ្ធ ។ សាក្សីនោះក្លាយជាមូលដ្ឋានគ្រឹះនៃសេចក្ដីជំនឿរបស់មនុស្សម្នាក់ថា ព្រះគ្រីស្ទបានស្ដារសាសនាចក្ររបស់ទ្រង់ឡើងវិញ ។ ជួយអ្នកដែលអ្នកបង្រៀនឲ្យស្វែងរកការបញ្ជាក់នោះពីព្រះវិញ្ញាណ ។

ការសិក្សាព្រះគម្ពីរ

តើអ្នកគួរប្រើព្រះគម្ពីរមរមនក្នុងកិច្ចការផ្សព្វផ្សាយសាសនាដោយរបៀបណា ?

នីហ្វៃទី១ ១៣:៣៩
នីហ្វៃទី២ ២៩:៨–១០
មរ៉ូណៃ ១០:៣–៥
គោលលទ្ធិ និងសេចក្តីសញ្ញា ២០:៥–១៦; ៤២:១២–១៤
បុព្វកថានៃព្រះគម្ពីរមរមន កថាខណ្ឌពីរចុងក្រោយ
សូមមើលផងដែរ ប្រកាសដំណឹងល្អរបស់យើង ជំពូកទី ៥

ការសិក្សាផ្ទាល់ខ្លួន

សូមស្រមៃថា អ្នកនឹងសរសេរកថាខណ្ឌអំពីសារលិខិតនៃការស្ដារឡើងវិញនៅលើប្រព័ន្ធផ្សព្វផ្សាយសង្គម ឬសម្រាប់សារព័ត៌មានក្នុងស្រុកមួយ ។ នៅក្នុងសៀវភៅកំណត់ហេតុការសិក្សារបស់អ្នក សូមសរសេរចំណងជើងដែលពិពណ៌នាអំពីសារលិខិតដ៏សំខាន់ ។ បន្ទាប់មក សូមកត់ត្រាគំនិត និងអារម្មណ៍របស់អ្នកអំពីសារលិខិតនេះ ។ សូមរួមបញ្ចូលពីរបៀបដែលការយល់ដឹងកាន់តែច្បាស់បានផ្លាស់ប្តូររបៀបរស់នៅរបស់អ្នក និងរបៀបដែលអ្នកមើលពិភពលោកជុំវិញអ្នក ។

បង្កើត និងស្ថាបនាសាសនាចក្រ

នៅពេលព្រះយេស៊ូវគ្រីស្ទបានស្ដារសាសនាចក្ររបស់ទ្រង់ឡើងវិញ ទ្រង់បានណែនាំព្យាការី យ៉ូសែប ស្ម៊ីធ និងអ្នកដទៃទៀតឲ្យ « តាំង » វា និង « ស្ថាបនា [ វា ] ឡើង » ( គោលលទ្ធិ និងសេចក្តីសញ្ញា ៣១:៧; ៣៩:១៣ ) ។ សាសនាចក្របានស្ថាបនាឡើង និងសាងសង់ នៅពេលមនុស្សដែលមានទីបន្ទាល់បានទទួលពិធីបុណ្យជ្រមុជទឹក និងបានបញ្ជាក់ រក្សាសេចក្ដីសញ្ញារបស់ពួកគេ រៀបចំខ្លួនទៅព្រះវិហារបរិសុទ្ធ ហើយជួយពង្រឹងវួដ ឬសាខារបស់ពួកគេ ។

ក្នុងនាមជាអ្នកផ្សព្វផ្សាយសាសនា អ្នកជួយបង្កើត និងស្ថាបនាសាសនាចក្ររបស់ព្រះអង្គសង្គ្រោះ ។ មានមធ្យោបាយមួយចំនួនដែលអ្នកអាចធ្វើការណ៍នេះបាន ។ អ្នកអាចគាំទ្រសមាជិក នៅពេលពួកគេចែកចាយដំណឹងល្អតាមរយៈគោលការណ៍នៃការពេញដោយក្តីស្រឡាញ់ ការចែកចាយ និងការអញ្ជើញ ( សូមមើល ក្បួនខ្នាតទូទៅ ២៣.១ ) ។ អ្នកអាចជួយមនុស្សឲ្យទទួលពិធីបុណ្យជ្រមុជទឹក ហើយរីកចម្រើនក្នុងសេចក្ដីជំនឿរបស់ពួកគេ ។ អ្នកអាចជួយសមាជិកថ្មីសម្របខ្លួនទៅនឹងជីវិតថ្មីរបស់ពួកគេ ហើយបន្តរីកចម្រើនខាងវិញ្ញាណ ។ អ្នកក៏អាចជួយសមាជិកដែលត្រឡប់មកសកម្មឡើងវិញឲ្យពង្រឹងសេចក្តីជំនឿរបស់ពួកគេនៅលើព្រះយេស៊ូវគ្រីស្ទ ។

ទីបន្ទាល់ និងសេចក្ដីជំនឿរបស់សមាជិកថ្មី និងសមាជិកដែលត្រឡប់មកសកម្មឡើងវិញរីកចម្រើននៅពេលពួកគេដកពិសោធន៍នឹងដំណឹងល្អដែលដំណើរការក្នុងជីវិតរបស់ពួកគេ ។ ដើម្បីជួយនាំឲ្យមានរឿងនេះកើតឡើង វាជាការសំខាន់ដែលពួកគេ ៖

មានមិត្តភក្តិដែលជាសមាជិកសាសនាចក្រ ។
ត្រូវបានផ្តល់ឲ្យនូវការទទួលខុសត្រូវក្នុងសាសនាចក្រ ។
ត្រូវបានចិញ្ចឹមបីបាច់ដោយព្រះបន្ទូលរបស់ព្រះ ។

( សូមមើល ហ្គរដុន ប៊ី ហ៊ិងគ្លី « Converts and Young Men » Ensign ខែ ឧសភា ឆ្នាំ ១៩៩៧ ទំព័រ ៤៧ ) ។

ពួកអ្នកផ្សព្វផ្សាយសាសនា ថ្នាក់ដឹកនាំក្នុងតំបន់ និងសមាជិកសាសនាចក្រផ្សេងទៀតគួរតែរីករាយទទួលយកឱកាសដើម្បីបីបាច់ និងពង្រឹងសមាជិកថ្មី និងសមាជិកដែលត្រឡប់មកសកម្មឡើងវិញ ។ ការបម្រើនេះជួយ « ដើម្បីរក្សាពួកគេឲ្យនៅក្នុងផ្លូវត្រូវ » ( មរ៉ូណៃ ៦:៤ ) ។

សូមទៅចុះឡើងធ្វើការល្អ

អំឡុងពេលនៃការងារបម្រើក្នុងព្រះជន្មរមែងស្លាប់របស់ទ្រង់ ព្រះអង្គសង្គ្រោះបានបម្រើអ្នកដទៃ ។ ទ្រង់បានយាង « ចុះឡើងធ្វើកិច្ចការល្អ » និង « ប្រកាសដំណឹងល្អ » ( កិច្ចការ ១០:៣៨; ម៉ាថាយ ៤:២៣ ) ។ ពេលអ្នកធ្វើតាមគំរូរបស់ទ្រង់ អ្នកនឹងរកឃើញមនុស្សដែលអ្នកអាចបម្រើ ហើយអ្នកណានឹងទទួលអ្នក ។

តាមរយៈការបម្រើ អ្នកបំពេញតាមបទបញ្ញត្តិដ៏ធំពីរដើម្បីស្រឡាញ់ព្រះ និងស្រឡាញ់អ្នកជិតខាងរបស់អ្នក ( សូមមើល ម៉ាថាយ ២២:៣៦–៤០; ២៥:៤០; ម៉ូសាយ ២:១៧ ) ។ តាមរយៈការបម្រើ អ្នកនិងអ្នកដទៃអាចនឹងរួបរួមគ្នាក្នុងរបៀបដ៏មានឥទ្ធិពល និងបំផុសគំនិត ។

ក្នុងនាមជាអ្នកផ្សព្វផ្សាយសាសនា អ្នកផ្ដល់ ការបម្រើ ដែលបានដាក់ផែនការរាល់សប្តាហ៍ ( សូមមើល បទដ្ឋានរបស់អ្នកផ្សព្វផ្សាយសាសនា ២.៧ និង ៧.២ ដើម្បីទទួលបានព័ត៌មាន និងគោលការណ៍ណែនាំ ) ។ ក្រោមការដឹកនាំរបស់ប្រធានបេសកកម្មរបស់អ្នក អ្នកអាចស្វែងរកឱកាសដើម្បីបម្រើក្នុងសហគមន៍តាមរយៈ JustServe ( តាមដែលវាបានអនុម័ត ) និងកិច្ចការផ្នែកមនុស្សធម៌ និងគ្រោះមហន្តរាយរបស់សាសនាចក្រ ។

ជារៀងរាល់ថ្ងៃពេញមួយថ្ងៃ សូមអធិស្ឋាន និងស្វែងរកឱកាសដែល មិនបានដាក់ផែនការ ដើម្បីធ្វើការល្អ ។ សូមស្តាប់ព្រះវិញ្ញាណ ដើម្បីស្គាល់ឱកាសដើម្បីធ្វើសកម្មភាពសប្បុរសតូចៗដែលអ្នកអាចផ្តល់ជូន ។

« តើអ្នកចង់សប្បាយចិត្តទេ ? » បំភ្លេចខ្លួនឯង ហើយខិតខំក្នុងបុព្វហេតុដ៏អស្ចារ្យនេះ ។ ផ្តល់ការខិតខំប្រឹងប្រែងរបស់អ្នកដើម្បីជួយមនុស្ស ។ … ចូរខិតខំ ចម្រើនកម្លាំងដល់អ្នកដែលក្បាលជង្គង់ញ័រ លើកដៃដល់អ្នកដែលរោយ ។ រស់នៅតាមដំណឹងល្អនៃព្រះយេស៊ូវគ្រីស្ទ » ( ហ្គរដុន ប៊ី ហ៊ិងគ្លី Teachings of Presidents of the Church: Gordon B. Hinckley [ ឆ្នាំ ២០១៦ ] ទំព័រ ២០៩ ) ។

ការសិក្សាព្រះគម្ពីរ

តើអ្វីជាតួនាទីនៃការបម្រើក្នុងព្រះជន្មរបស់ព្រះអង្គសង្គ្រោះ ?

តើអ្វីជាតួនាទីនៃការបម្រើក្នុងបេសកកម្មរបស់អាំម៉ូន និងអើរ៉ុន ?

អាលម៉ា ១៧:១៩–២៥; ១៨:៨–១០; ២២:៣

តើព្រះអម្ចាស់បង្គាប់ឲ្យអ្នកធ្វើអ្វីខ្លះ ?

នីហ្វៃទី៣ ២៧:២១

អ្នកផ្សព្វផ្សាយដ៏ជោគជ័យ

ភាពជោគជ័យរបស់អ្នកក្នុងនាមជាអ្នកផ្សព្វផ្សាយសាសនាត្រូវបានកំណត់ជាចម្បងដោយបំណងប្រាថ្នា និងការតាំងចិត្តរបស់អ្នកក្នុងការស្វែងរក បង្រៀន ធ្វើពិធីបុណ្យជ្រមុជទឹក និងបញ្ជាក់អ្នកប្រែចិត្តជឿ និងដើម្បីជួយពួកគេឲ្យក្លាយជាសិស្សដ៏ស្មោះត្រង់របស់ព្រះគ្រីស្ទ និងសមាជិកនៃសាសនាចក្ររបស់ទ្រង់ ( សូមមើល អាលម៉ា ៤១:៣ ) ។

ភាពជោគជ័យរបស់‏អ្នកមិនបានកំណត់ដោយចំនួនមនុស្សដែលអ្នកបង្រៀន ឬជួយឲ្យទទួលពិធីបុណ្យជ្រមុជទឹកនោះទេ ។ ក៏មិនកំណត់ដោយការមានតំណែងជាអ្នកដឹកនាំដែរ ។

ភាពជោគជ័យរបស់អ្នកមិនអាស្រ័យលើរបៀបដែលអ្នកដទៃជ្រើសរើសឆ្លើយតបនឹងអ្នក ការអញ្ជើញរបស់អ្នក ឬទង្វើសប្បុរសធម៌របស់អ្នកនោះទេ ។ មនុស្សមានសិទ្ធិជ្រើសរើសថាតើត្រូវទទួលសារលិខិតនៃដំណឹងល្អឬអត់ ។ ការទទួលខុសត្រូវរបស់អ្នកគឺត្រូវបង្រៀនយ៉ាងច្បាស់លាស់ និងមានអានុភាព ដើម្បីឲ្យពួកគេអាចធ្វើការជ្រើសរើសត្រឹមត្រូវដែលនឹងផ្តល់ពរដល់ពួកគេ ។

សូមគិតអំពីរឿងប្រៀបប្រដូចរបស់ព្រះអង្គសង្គ្រោះអំពីប្រាក់នៅក្នុង ម៉ាថាយ ២៥:១៤–២៨ ។ ចៅហ្វាយដែលតំណាងឲ្យព្រះអម្ចាស់បានសរសើរអ្នកបម្រើដ៏ស្មោះត្រង់របស់ទ្រង់ទាំងពីរនាក់ ទោះបីជាទំហំនៃដង្វាយរបស់ពួកគេខុសគ្នាក៏ដោយ ( សូមមើល ម៉ាថាយ ២៥:២១, ២៣ ) ។ ទ្រង់ក៏បានប្រទានរង្វាន់ដល់ពួកគេទាំងពីរដូចគ្នា ដោយអញ្ជើញពួកគេឲ្យចូលក្នុង « ប្រកបដោយសេចក្ដីអំណររបស់ចៅហ្វាយ » ដោយសារពួកគេបានលើកតម្កើងនូវអ្វីដែលពួកគេត្រូវបានប្រទានឲ្យ ។

ព្រះបានប្រទានឲ្យអ្នកនូវទេពកោសល្យ និងអំណោយទានដើម្បីប្រើក្នុងការបម្រើរបស់ទ្រង់ ។ ទេពកោសល្យ និងអំណោយទានរបស់អ្នកគឺខុសពីទេពកោសល្យ និងអំណោយទានរបស់អ្នកដទៃ ។ សូមដឹងថាចំណុចទាំងអស់នេះមានសារៈសំខាន់ រួមទាំងអ្វីដែលមើលមិនឃើញផងដែរ ។ នៅពេលអ្នកថ្វាយទេពកោសល្យ និងអំណោយទានរបស់អ្នកដល់ទ្រង់ ទ្រង់នឹងលើកតម្កើងពួកគេ ហើយធ្វើការអស្ចារ្យជាមួយនឹងអ្វីដែលអ្នកផ្តល់ជូន ។

សូមចៀសវាងការប្រៀបធៀបខ្លួនអ្នកទៅនឹងអ្នកផ្សព្វផ្សាយសាសនាផ្សេងទៀត ហើយចៀសវាងការវាស់លទ្ធផលសំបកក្រៅនៃកិច្ចខិតខំប្រឹងប្រែងរបស់អ្នកជាមួយនឹងកិច្ចខិតខំប្រឹងប្រែងរបស់ពួកគេ ។ ការប្រៀបធៀបជាធម្មតានាំទៅរកលទ្ធផលអវិជ្ជមាន ដូចជាការបាក់ទឹកចិត្ត ឬមោទនភាព ។ ការប្រៀបធៀបក៏ច្រើនតែនាំឲ្យយល់ខុសផងដែរ ។ អ្វីដែលព្រះអម្ចាស់ចង់បានគឺកិច្ចខិតខំប្រឹងប្រែងអស់ពីលទ្ធភាពរបស់អ្នក—សម្រាប់អ្នកដើម្បី « បម្រើទ្រង់ ឲ្យអស់ ពីចិត្ត អស់ពីពលំ អស់ពីគំនិត ហើយអស់ពីកម្លាំង » ( គោលលទ្ធិ និងសេចក្តីសញ្ញា ៤:២ បានបញ្ជាក់ន័យបន្ថែម ) ។

អ្នកអាចនឹងសោកស្តាយ ប្រសិនបើមនុស្សមិនទាន់ទទួលយកដំណឹងល្អនៅឡើយ ។ ពេលខ្លះអ្នកអាចមានអារម្មណ៍បាក់ទឹកចិត្ត ។ សូម្បីតែអ្នកផ្សព្វផ្សាយសាសនា និងព្យាការីដ៏អស្ចារ្យនៅក្នុងព្រះគម្ពីរក៏ជួនកាលមានអារម្មណ៍ធ្លាក់ទឹកចិត្តដែរ ( សូមមើល នីហ្វៃទី២:១៧–១៩; អាលម៉ា ២៦:២៧ ) ។ នៅគ្រាបែបនេះ សូមធ្វើតាមគំរូរបស់នីហ្វៃដោយងាកទៅរកព្រះអម្ចាស់ ដាក់ទីទុកចិត្តរបស់អ្នកទៅលើទ្រង់ អធិស្ឋានទូលសុំកម្លាំង និងការចងចាំពីសេចក្តីល្អដែលទ្រង់បានធ្វើសម្រាប់អ្នក ( សូមមើល នីហ្វៃទី២ ៤:១៦–៣៥ ) ។

អ្នកផ្សព្វផ្សាយសាសនាពីរនាក់កំពុងអធិស្ឋាន

នៅពេលដែលអ្នកងាកទៅរកព្រះអម្ចាស់នៅគ្រាដែលលំបាក ទ្រង់បានសន្យាថា « អញនៅជាមួយនឹងឯង កុំឲ្យស្រយុតចិត្តឲ្យសោះ ពីព្រោះអញជាព្រះនៃឯង អញនឹងចម្រើនកំឡាំងដល់ឯង » ( អេសាយ ៤១:១០ ) ។ តាមរយៈការអនុវត្តសេចក្តីជំនឿលើព្រះគ្រីស្ទ អ្នកអាចស្វែងរកសេចក្តីសុខសាន្ត និងការធានាឡើងវិញអំពីការខិតខំរបស់អ្នក ។ សេចក្តីជំនឿនឹងជួយអ្នកឲ្យឈានទៅមុខ ហើយបន្តក្នុងបំណងប្រាថ្នាដ៏សុចរិត ។

សូមបន្តផ្តោតលើការតាំងចិត្តរបស់អ្នកចំពោះព្រះគ្រីស្ទ និងគោលបំណងជាអ្នកផ្សព្វផ្សាយសាសនារបស់អ្នក—មិនមែនលទ្ធផលសំបកក្រៅនោះទេ ។ លទ្ធផលទាំងនេះច្រើនតែមិនបង្ហាញឲ្យឃើញភ្លាមៗនោះទេ ។ ទន្ទឹមនឹងនេះ សូមរក្សាការរំពឹងទុករបស់អ្នកឲ្យខ្ពស់ដោយមិនគិតពីបញ្ហាប្រឈមដែលអ្នកឆ្លងកាត់ឡើយ ។ ការរំពឹងទុកខ្ពស់នឹងបង្កើនប្រសិទ្ធភាពរបស់អ្នក បំណងប្រាថ្នារបស់អ្នក និងសមត្ថភាពរបស់អ្នកក្នុងការធ្វើតាមព្រះវិញ្ញាណ ។

របៀបមួយចំនួនដែលអ្នកអាចវាយតម្លៃការតាំងចិត្តរបស់អ្នកចំពោះព្រះអម្ចាស់ និងការខិតខំរបស់អ្នកដើម្បីធ្វើជាអ្នកផ្សព្វផ្សាយសាសនាដែលប្រកបដោយភាពជោគជ័យត្រូវបានរៀបរាប់ដូចខាងក្រោមនេះ ។

ស្វែងរកធ្វើជាសិស្សរបស់ព្រះយេស៊ូវគ្រីស្ទដោយស្មោះត្រង់ ដោយរៀនអំពីទ្រង់ ហើយកែលម្អបន្តិចម្តងៗ ( សូមមើល យ៉ូហាន ៨:៣១; នីហ្វៃទី២ ២៨:៣០ ) ។
សូមស្វែងរកលក្ខណៈដូចព្រះគ្រីស្ទ ( សូមមើល ពេត្រុស ទី២ ១:២–៩; គោលលទ្ធិ និងសេចក្តីសញ្ញា ៤:៥–៦ ) ។
ស្រឡាញ់មនុស្សដោយស្មោះសរ ហើយធ្វើឲ្យអស់ពីសមត្ថភាពជារៀងរាល់ថ្ងៃ ដើម្បីនាំព្រលឹងមករកព្រះគ្រីស្ទ ( សូមមើល កូរិនថូសទី១ ១៣; មរ៉ូណៃ ៧:៤៥–៤៨ ) ។
សូមអញ្ជើញ និងជួយមនុស្សឲ្យធ្វើ និងរក្សាការតាំងចិត្តដែលស្ថាបនាសេចក្តីជំនឿរបស់ពួកគេលើព្រះអង្គសង្គ្រោះ ។
សូមសិក្សាព្រះគម្ពីរ ហើយអធិស្ឋានដោយអស់ពីចិត្តដើម្បីថ្លែងអំណរគុណ ហើយទូលសុំជំនួយពីព្រះ ( សូមមើល យ៉ូហាន ៥:៣៩; នីហ្វៃទី២ ៣២:៣; អេណុស ១:៤; អាលម៉ា ៣៧:៣៧; គោលលទ្ធិ និងសេចក្តីសញ្ញា ២៦:១ ) ។
សូមគោរពប្រតិបត្តិតាមព្រះបញ្ញត្តិរបស់ព្រះ ហើយគោរពតាមបទដ្ឋានរបស់អ្នកផ្សព្វផ្សាយសាសនា ( សូមមើល គោលលទ្ធិ និងសេចក្ដីសញ្ញា ៣៥:២៤ ) ។
សូមរស់នៅដូចនេះ ដើម្បីឲ្យព្រះវិញ្ញាណអាចដឹកនាំអ្នកនៅកន្លែងដែលត្រូវទៅ អ្វីដែលត្រូវធ្វើ និងអ្វីដែលត្រូវនិយាយ ( សូមមើល គោលលទ្ធិ និងសេចក្តីសញ្ញា ១៨:១៨; ៤២:១៤ ) ។
សូមដាក់គោលដៅ រៀបចំផែនការ និងធ្វើការដើម្បីបំពេញអី្វៗទាំងនេះដោយការអធិស្ឋាន ( សូមមើល លូកា ១៤:២៨; គោលលទ្ធិ និងសេចក្តីសញ្ញា ៨៨:១១៩ ) ។
ស្ថាបនា និងពង្រឹងវួដ ឬសាខាដែលអ្នកត្រូវបានចាត់តាំង ( សូមមើល គោលលទ្ធិ និងសេចក្តីសញ្ញា ១៨:៥ ) ។
សូមទៅចុះឡើងធ្វើការល្អ និងបម្រើមនុស្សគ្រប់ឱកាស មិនថាពួកគេទទួលយកសារលិខិតរបស់អ្នកឬអត់នោះទេ ( សូមមើល កិច្ចការ ១០:៣៨ ) ។

នៅពេលអ្នកធ្វើអស់ពីសមត្ថភាពរបស់អ្នក នោះអ្នកប្រហែលនៅតែមានការខកបំណង ប៉ុន្តែអ្នកមិនត្រូវខកបំណងលើខ្លួនរបស់អ្នកទេ ។ អ្នកអាចមានអារម្មណ៍ធានាថា ព្រះអម្ចាស់សព្វព្រះហឫទ័យ នៅពេលដែលអ្នកទទួលអារម្មណ៍ថា ព្រះវិញ្ញាណបរិសុទ្ធធ្វើកិច្ចការទ្រង់តាមរយៈអ្នក ។

ការសិក្សាព្រះគម្ពីរ

តើពួកអ្នកបម្រើរបស់ព្រះអម្ចាស់មានអារម្មណ៍យ៉ាងណាចំពោះកិច្ចការនោះ ? តើពួកអ្នកបម្រើរបស់ព្រះអម្ចាស់មានឥទ្ធិពលលើអ្នកដែលពួកគេបម្រើដោយរបៀបណា ? តើអ្នកមានអារម្មណ៍យ៉ាងណាចំពោះកិច្ចការនេះ ?

ការសិក្សាផ្ទាល់ខ្លួន

សូមអាន ហេលេមិន ១០:១–៥ និង នីហ្វៃទី៣ ៧:១៧–១៨ ។ តើព្រះអម្ចាស់មានព្រះទ័យយ៉ាងណាចំពោះអ្នកផ្សព្វផ្សាយសាសនាទាំងនេះ និងការបម្រើរបស់ពួកគេ ?
សូមគិតអំពីកិច្ចខិតខំប្រឹងប្រែងផ្សព្វផ្សាយសាសនារបស់អ័ប៊ីណាដៃ និងអាំម៉ូន ( សូមមើល ម៉ូសាយ ១១–១៨; អាលម៉ា ១៧–២០; ២៣–២៤ ) ។ ហេតុអ្វីព្រះអម្ចាស់ទទួលអ្នកផ្សព្វផ្សាយសាសនាទាំងពីររូបនេះទោះបីជាលទ្ធផលភ្លាមៗនៃការខិតខំរបស់ពួកគេខុសគ្នាក៏ដោយ ?
សូមកត់ត្រាអ្វីដែលអ្នករៀននៅក្នុងសៀវភៅកំណត់ហេតុការសិក្សារបស់អ្នក ។

ចងចាំការណ៍នេះ

គោលបំណងរបស់អ្នកគឺដើម្បីអញ្ជើញមនុស្សដទៃមកកាន់ព្រះគ្រីស្ទ ដោយការជួយពួកគេឲ្យទទួលយកដំណឹងល្អដែលបានស្ដារឡើងវិញ តាមរយៈសេចក្ដីជំនឿនៅលើព្រះយេស៊ូវគ្រីស្ទ និងដង្វាយធួនរបស់ទ្រង់ ការប្រែចិត្ត ពិធីបុណ្យជ្រមុជទឹក ការទទួលអំណោយទាននៃព្រះវិញ្ញាណបរិសុទ្ធ និងការកាន់ខ្ជាប់ដរាបដល់ចុងបំផុត ។
ការហៅរបស់អ្នកផ្តល់ឲ្យអ្នកនូវសិទ្ធិអំណាច ការរក្សាសេចក្តីសញ្ញារបស់អ្នកផ្តល់អំណាចដល់អ្នក ។
សូមបង្រៀនគោលការណ៍ និងពិធីបរិសុទ្ធដំបូងទាំងឡាយនៃដំណឹងល្អនៃព្រះយេស៊ូវគ្រីស្ទ ។
សូមអញ្ជើញ និងជួយមនុស្សឲ្យធ្វើ និងរក្សាការតាំងចិត្តដែលស្ថាបនាសេចក្តីជំនឿរបស់ពួកគេលើព្រះអង្គសង្គ្រោះ ។
ដំណឹងល្អនៃព្រះយេស៊ូវគ្រីស្ទផ្ដល់ពរដល់បុត្រាបុត្រីទាំងអស់របស់ព្រះ ។
ដំណឹងល្អនៃព្រះយេស៊ូវគ្រីស្ទត្រូវបានស្តារឡើងវិញតាមរយៈព្យាការី យ៉ូសែប ស្ម៊ីធ ។ ព្រះគម្ពីរមរមនអាចជួយមនុស្សឲ្យទទួលបានទីបន្ទាល់អំពីរឿងនេះ ។
ជោគជ័យរបស់អ្នកគឺត្រូវបានកំណត់ជាចម្បងដោយ បំណងប្រាថ្នា និង ការតាំងចិត្ត របស់អ្នកដើម្បីស្វែងរក បង្រៀន ធ្វើពិធីបុណ្យជ្រមុជទឹក និងធ្វើពិធីបញ្ជាក់ដល់អ្នកប្រែចិត្តជឿទាំងឡាយ ។

គំនិតសម្រាប់ការសិក្សា និងការអនុវត្ត

ការសិក្សាផ្ទាល់ខ្លួន

សូមពិចារណាអំពីអត្ថន័យនៃការបញ្ចេញសំឡេងព្រមាន ( សូមមើល យ៉ាកុប ៣:១២; គោលលទ្ធិ និងសេចក្តីសញ្ញា ១:៤; ៣៨:៤១; ៦៣:៥៧–៥៨; ៨៨:៨១; ១១២:៥; អេសេគាល ៣:១៧–២១; ៣៣:១–១២ ) ។ សូមសរសេរជាពាក្យសម្តីផ្ទាល់ខ្លួនរបស់អ្នកនូវអត្ថន័យ និងរបៀបដែលអ្នកអាចធ្វើវា ។
សូមពិចារណាអំពីព្រឹត្តិការណ៍នៅក្នុងជីវិតរបស់អ្នក ដែលបានពង្រឹងទីបន្ទាល់របស់អ្នកអំពីយ៉ូសែប ស្ម៊ីធ និងការស្ដារឡើងវិញ ។ កត់ត្រាចំណាប់អារម្មណ៍របស់អ្នក ។

ការសិក្សាជាមួយដៃគូ និងការផ្លាស់ប្តូរដៃគូ

សូមជ្រើសរើសពួកអ្នកផ្សព្វផ្សាយសាសនាដ៏អស្ចារ្យម្នាក់ខាងក្រោម ហើយអានបទគម្ពីរដែលបានរាយបញ្ជី ។ នៅពេលអ្នកអាន សូមពិភាក្សាអំពីរបៀបដែលអ្នកផ្សព្វផ្សាយសាសនានេះ (១) បានយល់ ហើយប្តេជ្ញាចិត្តខ្លួនឯងចំពោះការហៅរបស់គាត់ (២) បានបង្ហាញពីអាកប្បកិរិយា និងបំណងប្រាថ្នារបស់គាត់ដើម្បីធ្វើការងារនេះ ហើយ (៣) បានជួយអ្នកដទៃឲ្យទទួលយកដំណឹងល្អ ។
- អាលម៉ា ( ម៉ូសាយ ១៨ )
- អាំម៉ូន និងអើរ៉ុន និងពួកបុត្រាដទៃទៀតរបស់ម៉ូសាយ ( អាលម៉ា ១៧–២២; ២៣:១–៦; ២៦ )
- នីហ្វៃ និងលីហៃ ( ហេលេមិន ៥ )
- ពេត្រុស ( កិច្ចការ ២ )
- ប៉ុល ( កិច្ចការ ១៦ )
សូមជ្រើសរើសទំនុកតម្កើងពីរអំពីការស្ដារឡើងវិញនៃដំណឹងល្អ ។ សូមអាន ឬច្រៀងទំនុកតម្កើង ។ សូមពិភាក្សាអំពីអត្ថន័យនៃពាក្យទាំងនេះ ។

ក្រុមប្រឹក្សាមណ្ឌល សន្និសីទហ្សូន និងក្រុមប្រឹក្សាថ្នាក់ដឹកនាំបេសកកម្ម

សូមអញ្ជើញអ្នកប្រែចិត្តជឿថ្មីៗពីរ ឬបីនាក់ ឲ្យចែកចាយបទពិសោធន៍នៃការប្រែចិត្តជឿរបស់ពួកគេ ។ តើពួកគេមានអារម្មណ៍យ៉ាងណាចំពោះពួកអ្នកផ្សព្វផ្សាយសាសនា ? តើពួកគេមានអារម្មណ៍យ៉ាងណាចំពោះអ្វីដែលពួកអ្នកផ្សព្វផ្សាយសាសនាបានបង្រៀន ? តើអ្វីបានជួយពួកគេរក្សាការតាំងចិត្ត ? តើអ្វីដែលមានឥទ្ធិពលខ្លាំងបំផុតចំពោះការប្រែចិត្តជឿរបស់ពួកគេ ?
នៅប៉ុន្មានថ្ងៃមុនការប្រជុំ សូមចាត់តាំងពួកអ្នកផ្សព្វផ្សាយសាសនាជាច្រើននាក់ឲ្យជញ្ជឹងគិតអំពីសំណួរដែលបានជ្រើសរើសពី « សូមពិចារណាការណ៍នេះ » នៅខាងដើមជំពូកនេះ ។ សុំឲ្យអ្នកផ្សព្វផ្សាយសាសនាម្នាក់ៗរៀបចំសុន្ទរកថាពីរទៅបីនាទីពីសំណួរដែលបានចាត់តាំង ។ ក្នុងអំឡុងពេលនៃក្រុមប្រឹក្សាមណ្ឌល ឬសន្និសីទតំបន់ សូមអញ្ជើញពួកអ្នកផ្សព្វផ្សាយសាសនាឲ្យថ្លែងសុន្ទរកថារបស់ពួកគេ ។ បន្ទាប់ពីការពិភាក្សានេះ សូមពិភាក្សាអំពីអ្វីដែលបានរៀន និងរបៀបដែលវាអាចត្រូវបានប្រើក្នុងកិច្ចការផ្សព្វផ្សាយសាសនា ។
សូមបំបែកពួកអ្នកផ្សព្វផ្សាយសាសនាជាបួនក្រុម ។ សូមឲ្យក្រុមនីមួយៗរាយបញ្ជីសេចក្ដីពិត សេចក្ដីសញ្ញា និងពិធីបរិសុទ្ធជាច្រើនឲ្យអស់ពីលទ្ធភាពដែលពួកគេអាចធ្វើបាន ដែលត្រូវបានស្ដារឡើងវិញ និងបានបើកសម្ដែងតាមរយៈព្យាការី យ៉ូសែប ស្ម៊ីធ ។ សូមឲ្យក្រុមនីមួយៗចែកចាយបញ្ជីរបស់ពួកគេ ។ សូមអញ្ជើញពួកអ្នកផ្សព្វផ្សាយសាសនាចែកចាយពីរបៀបដែលសេចក្តីពិតណាមួយដែលបានបង្ហាញតាមរយៈការស្ដារឡើងវិញបានមានឥទ្ធិពលលើជីវិតរបស់ពួកគេ ។
សូមពិភាក្សាពីអត្ថន័យនៃការធ្វើជាអ្នកផ្សព្វផ្សាយសាសនាដែលប្រកបដោយភាពជោគជ័យ ។ សូមអញ្ជើញពួកអ្នកផ្សព្វផ្សាយសាសនាឲ្យផ្តល់ឧទាហរណ៍ជាក់លាក់នានា ។

ថ្នាក់ដឹកនាំបេសកកម្ម និងទីប្រឹក្សាបេសកកម្ម

ក្នុងអំឡុងពេលសម្ភាសន៍ ឬក្នុងការសន្ទនាជាមួយនឹងពួកអ្នកផ្សព្វផ្សាយសាសនា សូមឲ្យពួកគេចែកចាយជាមួយអ្នកជាប្រចាំ ៖
- ទីបន្ទាល់របស់ពួកគេអំពីព្រះយេស៊ូវគ្រីស្ទ ។
- ទីបន្ទាល់របស់ពួកគេអំពីដំណឹងល្អដែលបានស្ដារឡើងវិញ និងបេសកកម្មរបស់យ៉ូសែប ស្ម៊ីធ ។
- ទីបន្ទាល់របស់ពួកគេអំពីព្រះគម្ពីរមរមន ។
- គំនិតរបស់ពួកគេអំពីគោលបំណងរបស់ពួកគេជាអ្នកផ្សព្វផ្សាយសាសនា ។
សូមអញ្ជើញពួកអ្នកផ្សព្វផ្សាយសាសនាឲ្យកត់ត្រានៅក្នុងសៀវភៅកំណត់ហេតុការសិក្សារបស់ពួកគេ នូវអ្វីដែលពួកគេមានអារម្មណ៍ថា គឺជាគោលបំណងខ្លះៗនៃបេសកកម្មរបស់ពួកគេ ។ នៅអំឡុងពេលសម្ភាសន៍ ឬការសន្ទនា សូមសួរពួកគេឲ្យចែកចាយនូវអ្វីដែលបានសរសេរ ។
សូមផ្ញើលិខិតអបអរសាទរដល់សមាជិកថ្មី ។