« ជំពូកទី ២ ៖ ស្រាវជ្រាវបទគម្ពីរ ហើយពាក់គ្រឿងសឹករបស់ព្រះ » ប្រកាសដំណឹងល្អរបស់យើង ៖ មគ្គុទេសន៍ចែកចាយដំណឹងល្អនៃព្រះយេស៊ូវគ្រីស្ទ ( ឆ្នាំ ២០២៣ )
« ស្រាវជ្រាវបទគម្ពីរ ហើយពាក់គ្រឿងសឹករបស់ព្រះ » ប្រកាសដំណឹងល្អរបស់យើង
ជំពូកទី ២
ស្រាវជ្រាវបទគម្ពីរ ហើយពាក់គ្រឿងសឹករបស់ព្រះ
សូមពិចារណាការណ៍នេះ
-
ហេតុអ្វីការសិក្សាបន្ទូលរបស់ព្រះនៅក្នុងព្រះគម្ពីរឲ្យបានទៀងទាត់មានសារៈសំខាន់ ?
-
តើខ្ញុំអាចធ្វើឲ្យការសិក្សាព្រះគម្ពីររបស់ខ្ញុំកាន់តែមានប្រសិទ្ធភាពដោយរបៀបណា ?
-
តើខ្ញុំអាចប្រើបច្ចេកវិទ្យាដោយសុចរិតដើម្បីជួយបំពេញគោលបំណងរបស់ខ្ញុំដោយរបៀបណា ?
-
តើការពាក់គ្រឿងសឹកនៃព្រះមានន័យដូចម្ដេច ?
ការស្រាវជ្រាវបទគម្ពីរ
ព្រះយេស៊ូវគ្រីស្ទ « គឺជាពន្លឺ និងជាជីវិតនៃពិភពលោក ។ មើលចុះ ទ្រង់គឺជាព្រះបន្ទូលនៃសេចក្ដីពិត និងសេចក្ដីសុចរិត » ( អាលម៉ា ៣៨:៩; សូមមើលផងដែរ យ៉ូហាន ១ ) ។ ការសិក្សាបន្ទូលរបស់ព្រះនៅក្នុងព្រះគម្ពីរបរិសុទ្ធនឹងនាំយកភាពពេញបរិបូរណ៌ដល់ជីវិតរបស់អ្នក ( សូមមើល យ៉ូហាន ១០:១០ ) ។ បន្ទូលរបស់ទ្រង់នឹងបំពេញអ្នក—និងមនុស្សដែលអ្នកបង្រៀន—ជាមួយនឹងពន្លឺ និងសេចក្ដីពិត ។ វានឹងជួយអ្នក—និងមនុស្សដែលអ្នកបង្រៀន—ឲ្យរស់នៅដោយសុចរិត ហើយទទួលបានការការពារ និងកម្លាំងមកពីព្រះ ។ វានឹងជួយអ្នកឲ្យមកស្គាល់ទ្រង់ ហើយភ្លក់នូវសេចក្ដីស្រឡាញ់របស់ទ្រង់ ដែលមានភាពផ្អែមល្ហែមលើសរាល់ភាពផ្អែមទាំងអស់ ។ បន្ទូលរបស់ទ្រង់នឹងបំពេញព្រលឹងរបស់អ្នកដោយអំណរ( នីហ្វៃទី ១ ៨:១១–១២; សូមមើល ខទី ១–៣៤ ) ។
ព្រះគម្ពីរគឺជាអំណោយទានមួយមកពីសួគ៌ា ។ ពរជ័យដ៏ធំមួយនៅក្នុងបេសកកម្មរបស់អ្នកគឺការមានកាលវិភាគដើម្បីសិក្សាព្រះគម្ពីរជារៀងរាល់ថ្ងៃ ។
ការសិក្សាដំណឹងល្អគឺជាប្រភេទនៃកិច្ចការខាងវិញ្ញាណដ៏មានតម្លៃបំផុតមួយដែលអ្នកអាចធ្វើ ។ វាធ្វើឲ្យមានកម្លាំងទាំងផ្លូវចិត្ត និងខាងវិញ្ញាណ ។ ដូចជាអាលម៉ាបានបង្រៀនថា នៅពេលអ្នក « បណ្ដុះ » ព្រះបន្ទូលរបស់ព្រះនៅក្នុងចិត្តរបស់អ្នក វានឹង « បំភ្លឺយោបល់របស់ [ អ្នក ] » និងចាប់ផ្ដើមឆ្ងាញ់ពិសារចំពោះអ្នក ( អាលម៉ា ៣២:២៨ សូមមើលផងដែរ អេណុស ១:៣–៤ ) ។ នៅពេលអ្នកបន្ដសិក្សា និងអនុវត្តព្រះបន្ទូលរបស់ព្រះ វានឹង « ចាក់ឫស ហើយ … ដុះទៅជាដើមមួយ ពន្លកឡើងជាជីវិតដ៏អស់កល្បជានិច្ច » ( អាលម៉ា ៣២:៤១ សូមមើលផងដែរ ខទី ៤២–៤៣ ) ។ ចំណេះដឹង និងទីបន្ទាល់របស់អ្នកអំពីដំណឹងល្អនឹងចម្រើនឡើង ។ បំណងប្រាថ្នា និងសមត្ថភាពរបស់អ្នកក្នុងការចែកចាយដំណឹងល្អក៏នឹងចម្រើនឡើងផងដែរ ។
ការរៀនមកពីគ្រូបង្រៀនល្អគឺមានសារៈសំខាន់ ប៉ុន្តែវាក៏សំខាន់ផងដែរសម្រាប់អ្នក ក្នុងការមានបទពិសោធន៍សិក្សាដ៏មានអត្ថន័យចេញមកពីការសិក្សាព្រះគម្ពីរផ្ទាល់ខ្លួនរបស់អ្នក ។ ការណ៍នេះក៏ពិតដូចគ្នាសម្រាប់មនុស្សដែលអ្នកបង្រៀនផងដែរ ។
ការយល់ដឹងពីបទគម្ពីរអាចជាការពិបាកនាគ្រាដំបូង ។ តែទោះយ៉ាងណាក៏ដោយ នៅពេលអ្នកព្យាយាមសិក្សាព្រះបន្ទូលរបស់ព្រះដោយអត់ធ្មត់ នោះការយល់ដឹងរបស់អ្នកនឹងរីកចម្រើនឡើង ។ អ្នកនឹងចាប់ផ្ដើមឲ្យតម្លៃពេលវេលារបស់អ្នកជាមួយនឹងព្រះគម្ពីរ ។ អ្នកនឹងទន្ទឹងរង់ចាំយ៉ាងអន្ទះសារនូវអ្វីដែលអ្នកនឹងរៀន និងទទួលបទពិសោធន៍ ។
ការយល់ដឹង និងស្រឡាញ់ព្រះគម្ពីរអាចជាពរជ័យដ៏មហិមានៃការបម្រើកិច្ចការផ្សព្វផ្សាយសាសនារបស់អ្នក ។ នៅពេលអ្នកដកពិសោធន៍ពរជ័យនៃការសិក្សាព្រះគម្ពីរអំឡុងពេលបេសកកម្មរបស់អ្នក នោះអ្នកនឹងចង់បន្តធ្វើវាពេញមួយជីវិតរបស់អ្នក ។
« នៅចុងបញ្ចប់ គោលបំណងដ៏សំខាន់បំផុតនៃរាល់ព្រះគម្ពីរគឺដើម្បីបំពេញព្រលឹងយើងដោយសេចក្ដីជំនឿទៅលើព្រះ ជាព្រះវរបិតា និងព្រះរាជបុត្រាទ្រង់ ព្រះយេស៊ូវគ្រីស្ទ—គឺជាសេចក្ដីជំនឿថា ទ្រង់ទាំងទ្វេមានព្រះជន្មរស់ពិត ជាសេចក្ដីជំនឿទៅលើផែនការរបស់ព្រះវរបិតាសម្រាប់ជីវិតអមត និងជីវិតដ៏នៅអស់កល្បជានិច្ចរបស់យើង ជាសេចក្ដីជំនឿទៅលើដង្វាយធួន និងការមានព្រះជន្មរស់ឡើងវិញរបស់ព្រះយេស៊ូវគ្រីស្ទដែលធ្វើឲ្យផែនការនៃសុភមង្គលមានដំណើរការរស់រវើក ជាសេចក្ដីជំនឿដើម្បីធ្វើឲ្យដំណឹងល្អនៃព្រះយេស៊ូវគ្រីស្ទជាផ្លូវជីវិតរបស់យើង ជាសេចក្ដីជំនឿដើម្បីមកស្គាល់ ‹ ព្រះពិតតែ១ និងព្រះយេស៊ូវគ្រីស្ទ ដែល [ ទ្រង់បាន ] ចាត់ឲ្យមក › ( យ៉ូហាន ១៧:៣ ) » ( ឌី ថត គ្រីស្តូហ្វឺសិន « The Blessing of Scripture » Liahona ខែ ឧសភា ឆ្នាំ ២០១០ ទំព័រ ៣៤ ) ។
ការសិក្សាផ្ទាល់ខ្លួន
សូមមើលរូបភាពយ៉ូសែប ស្ម៊ីធនៅខាងដើមជំពូកនេះ ។ សូមអាន យ៉ូសែប ស្ម៊ីធ—ប្រវត្តិ ១:១១–១៣ ។ សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ។
-
តើការអាន និងការសញ្ជឹងគិតរបស់យ៉ូសែប ស្ម៊ីធពី យ៉ាកុប ១:៥ បាននាំលោកឲ្យទទួលវិវរណៈបានដោយរបៀបណា ?
-
តើការសិក្សារបស់លោកមានឥទ្ធិពលអ្វីខ្លះទៅលើមនុស្សជំនាន់ក្រោយ ?
-
តើការសម្រេចចិត្តរបស់លោកក្នុងការសិក្សា និងស្វែងយល់ មានឥទ្ធិពលអ្វីខ្លះក្នុងជីវិតរបស់អ្នក ?
-
តើការសិក្សាដំណឹងល្អរបស់អ្នកមានឥទ្ធិពលលើជីវិតអ្នក និងជីវិតអ្នកដទៃដោយរបៀបណា ?
ការសិក្សាព្រះគម្ពីរ
តើអ្នកអាចរៀនអ្វីខ្លះចេញមកពីបទគម្ពីរខាងក្រោម អំពីរបៀបងាកទៅរកការសិក្សាដំណឹងល្អ ?
ស្វែងរកព្រះវិញ្ញាណ
ការរៀនសូត្រដំណឹងល្អគឺ លើសពីការទទួលបានព័ត៌មាន ។ វាក៏ជាដំណើរការខាងវិញ្ញាណនៃការអនុវត្តសេចក្ដីពិតដ៏នៅអស់កល្បជានិច្ចក្រោមការដឹកនាំនៃព្រះវិញ្ញាណបរិសុទ្ធ ( សូមមើល យ៉ាកុប ៤:៨; គោលលទ្ធិ និងសេចក្តី សញ្ញា ៥០:១៩–២៥ ) ។ សូមស្វែងរក និងទុកចិត្តលើព្រះវិញ្ញាណដើម្បីបង្រៀនអ្នក នៅពេលអ្នកសិក្សាព្រះគម្ពីរ ។ ការណ៍នេះនឹងកើតឡើងដល់កម្រិតដែលអ្នកប្រដូចបទគម្ពីរទៅនឹងខ្លួនអ្នកដោយស្មោះអស់ពីចិត្តដើម្បីធ្វើតាមអ្វីដែលអ្នកបានរៀន ( សូមមើល នីហ្វៃទី១ ១៩:២៣; មរ៉ូណៃ ១០:៤; យ៉ូសែប ស្ម៊ីធ—ប្រវត្តិ ១:១៨ ) ។
ការសិក្សាព្រះគម្ពីរប្រកបដោយការអធិស្ឋាន នឹងបើកបង្អួចនៃវិវរណៈដើម្បីឲ្យព្រះវិញ្ញាណមានបន្ទូលទៅកាន់គំនិត និងដួងចិត្តរបស់អ្នក ។ ទ្រង់នឹងប្រទានពរដល់អ្នកឲ្យទទួលបានការណែនាំ ការបំផុសគំនិត និងចម្លើយចំពោះសំណួរទាំងឡាយរបស់អ្នក ។ តាមរយៈការសិក្សាព្រះគម្ពីររបស់អ្នក ព្រះវិញ្ញាណបរិសុទ្ធនឹងពង្រឹង ហើយលួងលោមដល់អ្នក ។ ទ្រង់នឹងប្រទានចំណេះដឹង និងការជឿជាក់ដល់អ្នក ដែលផ្ដល់ពរដល់ជីវិតរបស់អ្នក ហើយអាចឲ្យអ្នកផ្ដល់ពរដល់អ្នកដទៃដ៏នៅអស់កល្បជានិច្ច ។
ការសិក្សាព្រះគម្ពីរ
តើព្រះវិញ្ញាណបរិសុទ្ធមានតួនាទីអ្វីខ្លះក្នុងការជួយបុគ្គលម្នាក់ឲ្យរៀនដំណឹងល្អ ?
ស្វែងរកចម្លើយចំពោះសំណួរ
ក្នុងនាមជាអ្នកផ្សព្វផ្សាយសាសនាម្នាក់ នោះអ្នកនឹងស្ដាប់ឮសំណួរជាច្រើន ។ អ្នកក៏នឹងមានសំណួរផ្ទាល់ខ្លួនរបស់អ្នកផងដែរ ។ ការស្វែងរកបទគម្ពីរ និងធនធានផ្សេងទៀតដែលបានអនុម័តដើម្បីឆ្លើយសំណួរទាំងនេះ គឺជារបៀបដ៏មានឥទ្ធិពលក្នុងការសិក្សា ។ សូមកត់ត្រាសំណួរ និងអ្វីដែលអ្នករៀន និងមានអារម្មណ៍នៅក្នុងសៀវភៅកំណត់ហេតុការសិក្សារបស់អ្នក ។
សូមប្រើធនធានត្រឹមត្រូវ និងគួរឲ្យទុកចិត្តនៅក្នុងការសិក្សារបស់អ្នក—ដែលសំខាន់គឺព្រះគម្ពីរ ប្រសាសន៍របស់ព្យាការីដែលនៅរស់ និង ប្រកាសដំណឹងល្អរបស់យើង ។ សូមប្រើធនធាននៅក្នុង បណ្ណាល័យដំណឹងល្អ ដូចជា សេចក្ដីណែនាំដល់បទគម្ពីរទាំងឡាយ, Bible Dictionary, index to the triple combination, Gospel Topics និង សំណេរប្រធានបទដំណឹងល្អ ។ សូមស្វែងយល់ថាតើធនធានអ្វីខ្លះដែលមានជាភាសារបស់បុគ្គលដែលអ្នកបង្រៀន ។
« រឿងមួយដែលខ្ញុំបានរៀនក្នុងជីវិតគឺថា ព្រះអម្ចាស់ឆ្លើយសំណួររបស់យើងញឹកញាប់ប៉ុនណា ហើយទ្រង់ប្រទានដំបូន្មានដល់យើងតាមរយៈព្រះគម្ពីរទាំងឡាយ ។ … បន្ទាប់មក សូមឲ្យយើងទៅរកព្រះអម្ចាស់ដោយការអធិស្ឋាន ដោយអង្វរទូលសូមជំនួយ ឬចម្លើយ ហើយចម្លើយទាំងនោះនឹងទទួលបាន នៅពេលយើងបើកព្រះគម្ពីរ ហើយចាប់ផ្ដើមសិក្សា ។ ពេលខ្លះ គឺវាហាក់ដូចជាវគ្គបទគម្ពីរមួយដែលមានអាយុរាប់រយពាន់ឆ្នាំ ត្រូវបានកំណត់ទុកជាពិសេសដើម្បីឆ្លើយសំណួររបស់យើង » ( អិម. រ័សុល បាឡឺត « Be Strong in the Lord, and in the Power of His Might » [ Brigham Young University fireside ថ្ងៃទី ៣ ខែ មីនា ឆ្នាំ ២០២២ ] ទំព័រ ៥ នៅលើគេហទំព័រ speeches.byu.edu ) ។
រស់នៅតាមអ្វីដែលអ្នកបានរៀន
នៅពេលអ្នកដឹងអំពីអំណរដែលកើតមានមកពីការយល់ដឹងដំណឹងល្អកាន់តែច្រើន នោះអ្នកនឹងចង់អនុវត្តនូវអ្វីដែលអ្នកបានរៀននោះ ។ សូមខិតខំរស់នៅតាមអ្វីដែលអ្នករៀន ។ ការធ្វើដូច្នោះនឹងពង្រឹងសេចក្ដីជំនឿ ចំណេះដឹង និងទីបន្ទាល់របស់អ្នក ។ ការធ្វើតាមអ្វីដែលអ្នករៀននឹងនាំមកនូវការយល់ដឹងបន្ថែម និងឋិតថេរ ។ ( សូមមើល យ៉ូហាន ៧:១៧ ) ។
« ប្រសិនបើមនុស្សយល់ពីគោលលទ្ធិត្រឹមត្រូវ នោះវានឹងកែប្រែឥរិយាបថ ព្រមទាំងចរិតរបស់មនុស្សនោះ ។ ការសិក្សាពី [ គោលលទ្ធិ ] នៃដំណឹងល្អនឹងអភិវឌ្ឍឥរិយាបថបានលឿនជាង ការសិក្សាពីឥរិយាបថដើម្បីអភិវឌ្ឍឥរិយាបថទៅទៀត » ( ប៊យដ៍ ឃេ ផាកកឺ Little Children » » Ensign ខែ វិច្ឆិកា ឆ្នាំ ១៩៨៦ ទំព័រ ១៧ ) ។
ការសិក្សាផ្ទាល់ខ្លួន
តើបទគម្ពីរខាងក្រោមបង្រៀនអ្វីខ្លះ អំពីការរៀនសូត្រដំណឹងល្អ ?
ប្រើប្រាស់បណ្ណាល័យដំណឹងល្អ
បណ្ណាល័យដំណឹងល្អគឺជាធនធានអនឡាញមួយ ដែលអាចជួយពង្រីកការសិក្សា និងការបង្រៀនរបស់អ្នកបានយ៉ាងច្រើន ។ សូមស្គាល់ពីមុខងារជាច្រើនរបស់កម្មវិធីនេះ ។ អត្ថប្រយោជន៍មួយចំនួននៃការប្រើប្រាស់បណ្ណាល័យដំណឹងល្អជាចំណែកក្នុងការសិក្សា និងការបង្រៀនរបស់អ្នកគឺ ត្រូវបានរាយបញ្ជីដូចខាងក្រោម ។
-
វាអាចឲ្យអ្នកចូលប្រើព្រះគម្ពីរ ប្រសាសន៍របស់ព្យាការីដែលនៅរស់ និងមាតិការបស់សាសនាចក្រផ្សេងៗជាភាសាជាច្រើនក្នុងទម្រង់ជាអត្ថបទ សំឡេង និងវីដេអូ ។
-
ប្រសិនបើអ្នកកត់ត្រានៅក្នុងបណ្ណាល័យដំណឹងល្អនូវអ្វីដែលអ្នករៀន និងចំណាប់អារម្មណ៍ដែលអ្នកបានទទួល នោះអ្នកអាចបន្តចូលប្រើប្រាស់ និងត្រូវបានពង្រឹងឲ្យរឹងមាំតាមរយៈព៍ត៌មាននោះបន្ទាប់ពីបេសកកម្មរបស់អ្នក ។
-
វាអនុញ្ញាតឲ្យអ្នកងាយស្រួលចែកចាយបទគម្ពីរ ការសម្រង់ប្រសាសន៍របស់ព្យាការីដែលនៅរស់ និងវីដេអូជាមួយអ្នកដែលអ្នកកំពុងបង្រៀន ។
-
មនុស្សដែលអ្នកបង្រៀន និងជ្រមុជទឹកភាគច្រើន នឹងប្រើប្រាស់បណ្ណាល័យដំណឹងល្អ ដើម្បីចូលប្រើធនធានទាំងឡាយរបស់សាសនាចក្រ ។ សូមយល់ដឹងពីមុខងារបណ្ណាល័យដំណឹងល្អ ដើម្បីឲ្យអ្នកអាចជួយពួកគេរៀនប្រើកម្មវិធីនេះបាន ។
ការសិក្សាផ្ទាល់ខ្លួន
ពិនិត្យមើល « Gospel Library User Guide » ។ សូមជ្រើសរើសមុខងារមួយនៅលើបណ្ណាល័យដំណឹងល្អ ដើម្បីសាកល្បងក្នុងការសិក្សាផ្ទាល់ខ្លួន និងជាដៃគូនៅលើកក្រោយ ។ តើមុខងារនេះបានជួយក្នុងការសិក្សារបស់អ្នកដោយរបៀបណា ? តើអ្នកនឹងសាកល្បងអ្វីខ្លះនៅពេលក្រោយ ? ចូរបង្រៀនអ្នកផ្សព្វផ្សាយសាសនាផ្សេងទៀតនូវអ្វីដែលអ្នករៀន ។
ប្រើប្រាស់បច្ចេកវិទ្យាប្រកបដោយសេចក្តីសុចរិត
ព្រះអម្ចាស់ និងព្យាការីរបស់ទ្រង់បានផ្ដាក់ផ្ទុកឲ្យអ្នកនូវបច្ចេកវិទ្យាដើម្បីជួយសម្រេចកិច្ចការរបស់ទ្រង់ ។ បច្ចេកវិទ្យាអាចពង្រីកការសិក្សាព្រះគម្ពីរ និងសៀវភៅ ប្រកាសដំណឹងល្អរបស់យើងរបស់អ្នក ។ ធនធានជាឌីជីថលក៏អាចជួយអ្នកដាក់ផែនការផងដែរ ។ វាអាចជួយក្នុងការបង្រៀន និងការខិតខំប្រឹងប្រែងរបស់អ្នកដើម្បីស្វែងរកមនុស្សបង្រៀន ។
ការប្រើប្រាស់បច្ចេកវិទ្យាដោយឈ្លាសវៃ និងដោយសុចរិត អាចជួយអ្នកឲ្យសម្រេចគោលបំណងជាអ្នកផ្សព្វផ្សាយសាសនានិងប្រើប្រាស់ពេលវេលាប្រកបដោយប្រសិទ្ធភាព ។ វាក៏នឹងអាចជួយអ្នកឲ្យចៀសវាងឯកសារដែលមិនសមរម្យផងដែរ ។
សូមធ្វើតាមព្រះវិញ្ញាណអំពីពេលវេលា និងរបៀបប្រើប្រាស់បច្ចេកវិទ្យាតាមរបៀបដែលនឹងជួយពង្រឹងសេចក្ដីជំនឿរបស់អ្នកទៅលើព្រះយេស៊ូវគ្រីស្ទ និងសេចក្ដីជំនឿនៃអ្នកដែលអ្នកបម្រើ និងបង្រៀន ។
សូមធ្វើតាមវិធីបង្ការក្នុងការប្រើប្រាស់បច្ចេកវិទ្យា
វិធីបង្ការទាំងបួនដែលបានរៀបរាប់ខាងក្រោមនេះនឹងជួយអ្នកប្រើប្រាស់បច្ចេកវិទ្យាឲ្យបានត្រឹមត្រូវ ។ ការធ្វើតាមវិធីបង្ការទាំងនេះគឺជារបៀបដ៏សំខាន់សម្រាប់អ្នកដើម្បី « ពាក់គ្រប់គ្រឿងសឹករបស់ព្រះ ដើម្បីឲ្យអាចនឹងឈរមាំមួន ទាស់នឹងឧបាយកលទាំងអម្បាលម៉ានរបស់អារក្ស » ( អេភេសូរ ៦:១១ ) ។
ធ្វើតាមការបំផុសគំនិតខាងវិញ្ញាណ
នីហ្វៃបានសន្យាថា « បើសិនជាអ្នករាល់គ្នា នឹងចូលទៅតាមផ្លូវនោះ ហើយទទួលព្រះវិញ្ញាណបរិសុទ្ធ នោះព្រះវិញ្ញាណបរិសុទ្ធនឹងបង្ហាញដល់អ្នក នូវគ្រប់អ្វីទាំងអស់ដែលអ្នកត្រូវធ្វើ » ( នីហ្វៃទី ២ ៣២:៥ ) ។ ព្រះវរបិតាសួគ៌របស់អ្នកបានប្រទានឲ្យអ្នកនូវអំណោយទានដ៏មានអានុភាពចំនួនពីរ ដែលនឹងជួយអ្នកគឺ ៖ សិទ្ធិជ្រើសរើសខាងសីលធម៌ និង អំណោយទាននៃព្រះវិញ្ញាណបរិសុទ្ធ ។ អ្នកមានអំណាចដើម្បីជ្រើសរើសធ្វើតាមការណែនាំនៃព្រះវិញ្ញាណបរិសុទ្ធ ។ ការណែនាំរបស់ទ្រង់គឺសំខាន់ក្នុងការជួយអ្នកធ្វើត្រឹមត្រូវកំឡុងពេលប្រើប្រាស់បច្ចេកវិទ្យា ។ វាក៏ជួយការពារអ្នកពីអារក្សផងដែរ ។
ផ្ដោតទៅលើគោលបំណងផ្សព្វផ្សាយសាសនារបស់អ្នក
ព្រះអម្ចាស់បានមានព្រះបន្ទូលថា « បើសិនជាភ្នែករបស់អ្នកស្មោះស្ម័គ្រទាំងស្រុងទៅចំពោះសិរីល្អរបស់យើង នោះរូបកាយអ្នកទាំងមូលនឹងបានពោរពេញទៅដោយពន្លឺ ហើយនឹងពុំមានសេចក្ដីងងឹតនៅក្នុងអ្នកឡើយ ហើយរូបកាយនោះដែលបានពោរពេញទៅដោយពន្លឺ យល់គ្រប់ទាំងអស់ » ( គោលលទ្ធិ និងសេចក្តីសញ្ញា ៨៨:៦៧ ) ។ ការមានភ្នែកស្មោះស្ម័គ្រទាំងស្រុងទៅចំពោះសិរីល្អរបស់ព្រះ មានន័យថា ជាការផ្ដោតអារម្មណ៍ទាំងស្រុងទៅលើព្រះរាជបំណងរបស់ព្រះ ដែលនោះក៏ជាគោលបំណងរបស់អ្នកក្នុងនាមជាផ្សព្វផ្សាយសាសនាផងដែរ ។
ការប្រើប្រាស់បច្ចេកវិទ្យារបស់អ្នកគួរតែផ្តោតទៅលើគោលបំណងរបស់អ្នក ។ បើកឧបករណ៍របស់អ្នក តែក្នុងគោលបំណងផ្សព្វផ្សាយសាសនាដែលអ្នកនឹងប្រើវាប៉ុណ្ណោះ ។ រួចបិទវាវិញ នៅពេលបានបំពេញគោលបំណងនោះចប់ ។
អ្នកទំនងជាជួបប្រទះនឹងមាតិកាមិនសមរម្យនៅពេលអ្នកចូលមើលគេហទំព័រនោះដោយចៃដន្យ ដោយគ្មានគោលបំណងជាក់លាក់ក្នុងគំនិត ។
ត្រូវមានវិន័យ
មរមនបានសរសេរថា ៖ « ខ្ញុំជាសិស្សម្នាក់នៃព្រះយេស៊ូវគ្រីស្ទ ជាព្រះរាជបុត្រានៃព្រះ ។ ខ្ញុំត្រូវបានហៅដោយទ្រង់ឲ្យប្រកាសព្រះបន្ទូលរបស់ទ្រង់នៅក្នុងចំណោមប្រជាជនទ្រង់ដើម្បីឲ្យពួកគេអាចបានជីវិតដ៏អស់កល្បជានិច្ច » ( នីហ្វៃទី ៣ ៥:១៣ ) ។ ដូចជាមរមនដែរអ្នកគឺជាសិស្សរបស់ព្រះយេស៊ូវគ្រីស្ទ ។ ការបម្រើជាអ្នកផ្សព្វផ្សាយសាសនាពេញម៉ោងគឺជាឱកាសដ៏ពិសេសមួយដើម្បីដុសខាត់ភាពជាសិស្សរបស់អ្នក ។
ពាក្យថា សិស្ស និង វិន័យ គឺចេញមកពីឬសគល់ពាក្យតែមួយដែលមានន័យថា « អ្នកសិក្សា » ឬ « សិស្ស » ។ ដើម្បីធ្វើជាសិស្សរបស់ព្រះគ្រីស្ទមានន័យថា អ្នកខិតខំដើម្បីធ្វើតាមទ្រង់ ហើយរក្សាព្រះបញ្ញត្តិទាំងឡាយរបស់ទ្រង់ ។ វាមានន័យថាអ្នករៀននិងបង្រៀនអំពីព្រះគ្រីស្ទដោយខ្ជាប់ខ្ជួន ។
សូមមានវិន័យ និងធ្វើការជ្រើសរើសសុចរិតពីរបៀបដែលអ្នកប្រើប្រាស់បច្ចេកវិទ្យា ។ សូមជ្រើសរើសធ្វើតាមវិធីបង្ការ ។ នៅពេលអ្នកកំពុងជជែកជាមួយមនុស្សជួបមុខគ្នាផ្ទាល់ ចូរកុំបើកមើលសារ ឬ ទទួលទូរសព្ទឲ្យសោះ ។ សូមគ្រប់គ្រងលើរបៀបដែលអ្នកប្រើប្រាស់ឧបករណ៍ទាំងនេះ ។ ចូរកុំឲ្យវាគ្រប់គ្រងលើអ្នកឲ្យសោះ ។
ព្រះអម្ចាស់បានប្រកាសថា « អ្នកណាដែលទទួលក្រឹត្យវិន័យរបស់យើង ហើយធ្វើតាម អ្នកនោះហើយជាសិស្សរបស់យើង ហើយអ្នកណាដែលនិយាយថា ខ្លួនទទួលក្រឹត្យវិន័យរបស់យើង តែមិនធ្វើតាមទេ អ្នកនោះមិនមែនជាសិស្សរបស់យើងទេ » ( គោលលទ្ធិ និងសេចក្តីសញ្ញា ៤១:៥ ) ។ ខណៈគ្មាននរណាម្នាក់ល្អឥតខ្ចោះ ព្រះអម្ចាស់រំពឹងថានឹងមានការខិតខំយ៉ាងខ្ជាប់ខ្ជួន និងជាប់លាប់ ដើម្បីដើរតាមទ្រង់ ។
ភាពស្រស់ស្អាតនៃដំណឹងល្អគឺថា យើងអាចទទួលបានការអភ័យទោសពេលយើងប្រែចិត្ត—ហើយព្រះអម្ចាស់ចង់ឲ្យយើងប្រែចិត្តដោយមិនពន្យារពេលឡើយ ( សូមមើល គោលលទ្ធិ និងសេចក្តីសញ្ញា ១០៩:២១ ) ។ ប្រសិនបើអ្នកធ្វើខុស រួមទាំងការប្រើប្រាស់បច្ចេកវិទ្យាមិនសមរម្យ សូមប្រែចិត្តក្នុងពេលនោះ ហើយបន្តព្យាយាមធ្វើតាមក្រឹត្យវិន័យរបស់ទ្រង់ ។ នេះជាផ្នែកមួយនៃការធ្វើជាសិស្សរបស់ព្រះគ្រីស្ទ ។
រួមគ្នាតែមួយ
ព្រះអម្ចាស់មានព្រះបន្ទូលថា « ចូររួមគ្នាតែមួយ ហើយបើសិនជាអ្នករាល់គ្នាមិនរួមគ្នាតែមួយទេ ឈ្មោះថាអ្នករាល់គ្នាពុំមែនជារបស់ផងយើងឡើយ » ( គោលលទ្ធិ និងសេចក្ដីសញ្ញា ៣៨:២៧ ) ។ សូមជួយបេសកកម្មរបស់អ្នកឲ្យបង្កើតទម្លាប់សាមគ្គីភាព ទំនុកចិត្ត ការទទួលខុសត្រូវ និងសេចក្តីមេត្តាករុណា ដើម្បីឲ្យអ្នកទាំងអស់គ្នាអាចពង្រឹង លើកទឹកចិត្ត ហើយគាំទ្រគ្នាទៅវិញទៅមក ។
ពួកអ្នកផ្សព្វផ្សាយសាសនាទាំងអស់គួរតែមានផាសុកភាពក្នុងការសុំជំនួយនៅពេលចាំបាច់ ។ អ្នកផ្សព្វផ្សាយសាសនាដែលរឹងមាំក្នុងព្រះវិញ្ញាណអាចជួយអ្នកដែលមានអារម្មណ៍ទន់ខ្សោយ ( សូមមើល គោលលទ្ធិ និងសេចក្តីសញ្ញា ៨៤:១០៦ ) ។ ប្រសិនបើអ្នកមានអារម្មណ៍ថាត្រូវបានល្បួង សូមសុំជំនួយពីដៃគូ ឬ អ្នកដឹកនាំបេសកកម្មរបស់អ្នក ។
មនុស្សស្ទើរតែទាំងអស់ មានបញ្ហាជាប់ទាក់ទងទៅនឹងអ៊ីនធឺណិត ឬ រូបអាសគ្រាម ដែលវាកើតឡើងនៅពេលនៅដាច់ដោយឡែកពីគេ ។ សូមប្រើឧបករណ៍តែនៅពេលណាដែលអ្នកអាចមើលឃើញអេក្រង់របស់គ្នាទៅវិញទៅមកប៉ុណ្ណោះ ។ សូមមានភាពក្លាហាន និងទទួលខុសត្រូវចំពោះគ្នាទៅវិញទៅមក ។
ព្រះអម្ចាស់មានទំនុកព្រះទ័យលើអ្នកផ្សព្វផ្សាយសាសនាម្នាក់ៗដែលទ្រង់បានហៅរួមទាំងអ្នកផងដែរ ។ ទ្រង់បានប្រទានដៃគូ និង អ្នកដឹកនាំដើម្បីការពារ ហើយគាំទ្រដល់អ្នក ។ ដូចជាអាលម៉ាបានគាំទ្រអាមូលេកដែលជាដៃគូរបស់លោកដែរ សូមព្យាយាមពង្រឹងគ្នាទៅវិញទៅមក ( សូមមើល អាលម៉ា ១៥:១៨ ) ។
តើអ្នកគួរធ្វើដូចម្តេច ប្រសិនបើអ្នកមានអារម្មណ៍ថាទន់ខ្សោយ និង ងាយរងឥទ្ធិពល ?
ការរៀនធ្វើតាមវិធីបង្ការទាំងបួននេះ ទាមទារឲ្យមានការខិតខំប្រឹងប្រែង វិន័យ និងការអនុវត្ត ។ ទោះជាបន្ទាប់ពីវិធីបង្ការទាំងនេះធ្វើបានយ៉ាងងាយទាំងរបៀបដែលអ្នកគិត ហើយអនុវត្តក្ដី អ្នកនឹងមានគ្រាដែលអ្នកអាចមានអារម្មណ៍ថាទន់ខ្សោយ និង ងាយរងឥទ្ធិពលដែរ ។ ប្រហែលជាអ្នកមានទម្លាប់មិនល្អក្នុងការប្រើបច្ចេកវិទ្យាពីមុនបេសកកម្ម ដែលអ្នកពិបាកនឹងយកឈ្នះ ។ អ្នកផ្សព្វផ្សាយសាសនាមួយចំនួនពុះពារនឹងការណ៍អាសគ្រាមពីមុនការហៅរបស់ពួកគេ ហើយអាចត្រូវល្បួងឲ្យត្រឡប់ទៅរកឥរិយាបថចាស់វិញ ។
គោលការណ៍ខាងក្រោមនឹងជួយអ្នកឲ្យរស់នៅតាមវិធីបង្ការ និងពង្រឹងខ្លួនអ្នកទប់ទល់នឹងការល្បួង ៖
-
សូមចាប់អារម្មណ៍ទៅលើគំនិត អារម្មណ៍ និងឥរិយាបថរបស់អ្នក ។ ត្រូវដឹងពីរបៀបគំនិត អារម្មណ៍ និងឥរិយាបថទាំងនេះ អាចធ្វើឲ្យអ្នកកាន់តែងាយរងគ្រោះពេលប្រើប្រាស់បច្ចេកវិទ្យាមិនត្រឹមត្រូវ ។
-
ជ្រើសរើសធ្វើសកម្មភាព ។ ឆ្លើយតបតាមវិធីសុចរិត វិជ្ជមានចំពោះអារម្មណ៍ដែលអ្នកមាន ។
-
រៀន ប្រែចិត្ត និងកែលម្អ ។ ប្រើប្រាស់បទពិសោធន៍របស់អ្នក ដើម្បីបន្តរៀនសូត្រ និងកែលម្អ ។
អ្នកមិនចាំបាច់យកឈ្នះលើឧបសគ្គនានាដោយខ្លួនអ្នកនោះទេ ។ សូមពឹងផ្អែកលើកម្លាំងដែលមានមកពីដង្វាយធួនរបស់ព្រះអង្គសង្គ្រោះ និងសេចក្តីសញ្ញាដែលអ្នកបានចុះជាមួយទ្រង់ ។ ព្រះអម្ចាស់ជ្រាបដឹងពីឧបសគ្គដែលអ្នកប្រឈមមុខ ហើយទ្រង់នឹងជួយអ្នកក្នុងកិច្ចការដ៏អស្ចារ្យនេះ ។
ការចងចាំព្រះអង្គសង្រ្គោះជានិច្ចអាចជួយអ្នកក្នុងការប្រើប្រាស់បច្ចេកវិទ្យាដោយសុចរិត ។ សូមស្មោះត្រង់ចំពោះទំនុកចិត្តដែលទ្រង់បានប្រទានឲ្យអ្នក ។ សូមប្តេជ្ញាចិត្តដើម្បី « ដើរដោយស្មោះត្រង់នៅចំពោះទ្រង់ » ( អាលម៉ា ៥៣:២១ សូមមើលផងដែរ ខទី ២០ ) ។ ការមានអំណរគុណចំពោះអ្វីៗដែលទ្រង់ និងព្រះវរបិតាបានធ្វើសម្រាប់អ្នក នឹងជួយអ្នកឲ្យធ្វើការជ្រើសរើសដ៏ល្អអំពីរបៀបដែលអ្នកប្រើធនធានឌីជីថល ។
បេសកកម្មរបស់អ្នកគឺជាឱកាសដ៏ល្អមួយដើម្បីរៀនប្រើប្រាស់បច្ចេកវិទ្យាដោយឈ្លាសវៃ ។ ការប្តេជ្ញាចិត្ត និងទម្លាប់ល្អដែលអ្នកអភិវឌ្ឍក្នុងអំឡុងពេលបេសកកម្មរបស់អ្នកនឹងផ្តល់អត្ថប្រយោជន៍ដល់អ្នកពេញមួយជីវិតរបស់អ្នក ។
ពាក់គ្រប់គ្រឿងសឹករបស់ព្រះ
សមត្ថភាពរបស់អ្នកដើម្បីទប់ទល់នឹងការល្បួងនឹងកើនឡើងនៅពេលអ្នកសិក្សា និងអនុវត្តព្រះគម្ពីរ ប្រសាសន៍របស់ព្យាការីដែលនៅរស់ ប្រកាសដំណឹងល្អរបស់យើង បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ និងវិធីបង្ការដែលបានរៀបរៀងឡើងនៅក្នុងជំពូកនេះ ។
តាមរយៈការពាក់ « គ្រប់គ្រឿងសឹករបស់ព្រះ » អ្នកនឹងអាចញែកដឹងរវាងខុស និងត្រូវ ។ ជើងរបស់អ្នកនឹងពាក់ « ដំណឹងល្អនៃសេចក្ដីសុខសាន្ត » ។ ការពាក់ « សេចក្ដីសុចរិតទុកជាប្រដាប់បាំងដើមទ្រូង » វានឹងការពារអ្នក ។ ការយក « សេចក្ដីជំនឿទុកជាខែល » អ្នកនឹងអាចរំលត់ព្រួញភ្លើងរបស់មារសត្រូវបាន ។ អ្នកនឹងយក « ដាវរបស់ព្រះវិញ្ញាណ [ របស់ទ្រង់ ] » ដើម្បីបង្រៀនសេចក្ដីពិតដោយអានុភាព និងសិទ្ធិអំណាច ។ អ្នកនឹងត្រូវបានពង្រឹងប្រឆាំងនឹងឥទ្ធិពលរបស់លោកិយ ដែលឥទ្ធិពលនេះអាចនាំឲ្យអ្នករសាត់ទៅឆ្ងាយ ឯកោ ថែមទាំងឃ្លាតឆ្ងាយ ។ ( សូមមើល អេភេសូរ ៦:១០–១៨ សូមមើលផងដែរ នីហ្វៃទី១ ៨:២០, ៣០; ១៥:២៤–២៥; ហេលេមិន ៣:២៩–៣០; គោលលទ្ធិ និងសេចក្តីសញ្ញា ២៧:១៥–១៨; យ៉ូសែប ស្ម៊ីធ—ម៉ាថាយ ១:៣៧; ធីម៉ូថេ ៣:១៥–១៧ ) ។
ការសិក្សាផ្ទាល់ខ្លួន
សូមស្វែងយល់ប្រកបដោយការអធិស្ឋានពីវិធីបង្ការមួយដើម្បីគិតផ្ដោតនៅសប្តាហ៍នេះ ។ ស្វែងរកជំនួយរបស់ព្រះអម្ចាស់ កត់ត្រាអារម្មណ៍របស់អ្នក និងអ្វីដែលអ្នកកំពុងរៀន ។
គំនិតសម្រាប់ការសិក្សា និងការអនុវត្ត
ការសិក្សាផ្ទាល់ខ្លួន
-
សូមសាកល្បងយោបល់ខាងក្រោមដើម្បីបង្កើនការសិក្សារបស់អ្នក ៖
-
សូមអានព្រះគម្ពីរដោយមានចម្ងល់ និងកង្វល់ក្នុងចិត្ត ។
-
ចែកចាយអ្វីដែលអ្នករៀនជាមួយពួកអ្នកផ្សព្វ្សាយសាសនាដទៃទៀត និងមនុស្សដែលអ្នកបង្រៀន ។ ការពន្យល់អំពីគោលលទ្ធិ ឬគោលការណ៍មួយនឹងជួយអ្នកចងចាំវា ហើយទទួលបានភាពច្បាស់លាស់ ។
-
សិក្សាតាមប្រធានបទ ។ សូមផ្តោតលើប្រធានបទដែលនឹងជួយអ្នក និងមនុស្សដែលអ្នកបង្រៀន ។
-
សូមសួរខ្លួនឯងថា « តើអ្នកនិពន្ធនិយាយអ្វី ? តើចំណុចសំខាន់នៃសារលិខិតជាអ្វី ? តើការណ៍នេះអនុវត្តចំពោះខ្ញុំយ៉ាងណាដែរ ? តើការណ៍នេះអាចជួយនរណាម្នាក់ដែលយើងកំពុងបង្រៀនដោយរបៀបណា ? »
-
សូមស្រមៃ ឬគូរអ្វីដែលអ្នកកំពុងសិក្សា ។ ឧទាហរណ៍ សូមស្រមៃថាតើវាមានសភាពយ៉ាងណាចំពោះ អាំម៉ូន ដើម្បីឈរនៅចំពោះព្រះភ័ក្រ្តរបស់ស្ដេចសាសន៍លេមិន ។
-
សរសេរ ប្រយោគ ឬកថាខណ្ឌខ្លីមួយអំពីគំនិតសំខាន់នៃអត្ថបទមួយ ។
-
ទន្ទេញបទគម្ពីរដែលពន្យល់ និងគាំទ្រដល់គោលការណ៍ដែលអ្នកបង្រៀន ។
-
-
វាយតម្លៃខ្លួនអ្នកដូចតទៅនេះ ( ១=មិនដែល, ៣=ពេលខ្លះ និង៥=ស្ទើរតែជានិច្ចកាល ) ។
-
សេចក្តីជំនឿរបស់ខ្ញុំកំពុងរីកចម្រើន ហើយចាប់ផ្ដើមស្គាល់ព្រះវរបិតាសួគ៌ និងព្រះយេស៊ូវគ្រីស្ទកាន់តែប្រសើរជាងមុន ។
-
ខ្ញុំគិតអំពីមនុស្សដែលខ្ញុំកំពុងបង្រៀនពេលខ្ញុំសិក្សា ។
-
នៅពេញមួយថ្ងៃ ខ្ញុំគិតអំពីអ្វីដែលខ្ញុំបានសិក្សានៅពេលព្រឹក ។
-
ពេលខ្ញុំសិក្សា គំនិតនានាបានផុសឡើងក្នុងចិត្តរបស់ខ្ញុំ ដែលខ្ញុំមិនធ្លាប់មានពីមុនមក ។
-
ខ្ញុំកត់ត្រាចំណាប់អារម្មណ៍ និងគំនិតខាងវិញ្ញាណនៅកន្លែងដែលសមរម្យមួយ ។
-
ខ្ញុំយកចិត្តទុកដាក់ពេលខ្ញុំសិក្សា ។
-
ខ្ញុំទន្ទឹងឲ្យតែដល់ពេលសិក្សាផ្ទាល់ខ្លួន ។
-
ខ្ញុំទន្ទឹងឲ្យតែដល់ពេលសិក្សាជាដៃគូ ។
ពិនិត្យមើលចម្លើយរបស់អ្នក ។ តើចំណុចណាអ្នកធ្វើបានល្អ ? តើអ្នកអាចកែលម្អដោយរបៀបណា ? ដាក់គោលដៅមួយ ឬពីរ ដើម្បីកែលម្អគុណភាពនៃការសិក្សារបស់អ្នក ។
-
ការសិក្សាជាមួយដៃគូ និងការផ្លាស់ប្តូរដៃគូ
-
សូមអានជាមួយគ្នានូវវគ្គបទគម្ពីរមួយចំនួនខាងក្រោម ។ ពិភាក្សាអំពីពរជ័យដែលទទួលបានពីការសិក្សាព្រះបន្ទូលរបស់ព្រះ ។ តើវគ្គបទគម្ពីរមួយណាដែលអាចជួយអ្នកបង្រៀនបានល្អបំផុត ?
ក្រុមប្រឹក្សាមណ្ឌល សន្និសីទហ្សូន និងក្រុមប្រឹក្សាថ្នាក់ដឹកនាំបេសកកម្ម
-
សុំឲ្យពួកអ្នកផ្សព្វផ្សាយសាសនាសរសេរសំណួរមួយ ឬពីរអំពីដំណឹងល្អពីមេរៀនមួយនៅក្នុង ជំពូកទី ៣ ។ សំណួរទាំងនេះអាចផ្ទាល់ខ្លួន ឬពីមនុស្សដែលពួកគេបង្រៀន ។ អញ្ជើញពួកអ្នកផ្សព្វផ្សាយសាសនាឲ្យចែកចាយសំណួររបស់ពួកគេជាមួយក្រុម ។ សម្រាប់សំណួរនីមួយៗ សូមពិភាក្សាដូចខាងក្រោម ៖
-
តើការឆ្លើយសំណួរនេះអាចផ្ដល់ពរជ័យដល់ជីវិតអ្នកផ្សព្វផ្សាយសាសនាដោយរបៀបណា ?
-
តើវាអាចផ្តល់ពរជ័យដល់ជីវិតរបស់មនុស្សដែលគាត់ ឬនាងកំពុងបង្រៀនដោយរបៀបណា ?
-
តើអ្នកផ្សព្វផ្សាយសាសនាអាចទទួលបានចម្លើយដោយរបៀបណា ?
-
-
សូមបែងចែកពួកអ្នកផ្សព្វផ្សាយសាសនាជាក្រុម ហើយចាត់តាំងក្រុមនីមួយៗឲ្យសិក្សានូវវិធីបង្ការមួយក្នុងចំណោមវិធីបង្ការទាំងបួន និងបទគម្ពីរអម ។ អញ្ជើញពួកអ្នកផ្សព្វផ្សាយសាសនាឲ្យចែកចាយអ្វីដែលពួកគេបានរៀន និងរបៀបដែលវិធីបង្ការបានជួយដល់ពួកគេ ។
ថ្នាក់ដឹកនាំបេសកកម្ម និងទីប្រឹក្សាបេសកកម្ម
-
សូមចូលរួមជាមួយពួកអ្នកផ្សព្វផ្សាយសាសនាក្នុងការសិក្សាជាដៃគូរបស់ពួកគេម្តងម្កាល ។
-
ក្នុងអំឡុងពេលសម្ភាសន៍ ឬការសន្ទនា សូមសួរសំណួរមួយចំនួនខាងក្រោម ៖
-
តើអ្នកមានចំណាប់អារម្មណ៍អ្វីខ្លះក្នុងការសិក្សាព្រះគម្ពីររបស់អ្នកនាពេលថ្មីៗនេះ ?
-
តើជំពូក ឬផ្នែកនៃសៀវភៅ ប្រកាសដំណឹងល្អរបស់យើង បានជួយអ្នកបំផុតនៅប៉ុន្មានសប្តាហ៍មុននេះ ? តើវាជួយដល់អ្នកយ៉ាងដូចម្ដេច ?
-
តើអ្វីដែលអ្នកកំពុងធ្វើនៅក្នុងការសិក្សាផ្ទាល់ខ្លួន បានជួយអ្នករៀនអ្វីខ្លះ ?
-
-
នៅក្នុងការសម្ភាសន៍ សូមពិចារណាពិនិត្យមើលវិធីបង្ការក្នុងការប្រើប្រាស់បច្ចេកវិទ្យា ហើយសួរពួកអ្នកផ្សព្វផ្សាយអំពីអ្វីដែលពួកគេកំពុងរៀន នៅពេលពួកគេអនុវត្តវិធីបង្ការនេះ ។
-
ចែកចាយការយល់ដឹងពីការសិក្សាផ្ទាល់ខ្លួនរបស់អ្នក ។ ចែកចាយខ្លឹមសារពីសៀវភៅកំណត់ហេតុការសិក្សារបស់អ្នក និងទីបន្ទាល់របស់អ្នកអំពីសារៈសំខាន់នៃការសិក្សាដំណឹងល្អ ។