« ជំពូកទី ៧ ៖ រៀនភាសាបេសកកម្មរបស់អ្នក » ប្រកាសដំណឹងល្អរបស់យើង ៖ មគ្គុទេសន៍ចែកចាយដំណឹងល្អនៃព្រះយេស៊ូវគ្រីស្ទ ( ឆ្នាំ ២០២៣ )
« ជំពូកទី ៧ » ប្រកាសដំណឹងល្អរបស់យើង
ជំពូកទី ៧
រៀនភាសាបេសកកម្មរបស់អ្នក
សូមពិចារណាការណ៍នេះ
-
តើខ្ញុំអាចពង្រឹងសេចក្ដីជំនឿខ្ញុំទៅលើព្រះអម្ចាស់ដើម្បីជួយខ្ញុំរៀនភាសាមួយថ្មីដោយរបៀបណា ?
-
ហេតុអ្វីខ្ញុំគួរកែលម្អសមត្ថភាពភាសារបស់ខ្ញុំជាបន្តបន្ទាប់ដូច្នេះ ?
-
តើខ្ញុំអាចពង្រីកសមត្ថភាពខ្ញុំដើម្បីនិយាយ និងបង្រៀនជាភាសាបេសកកម្មរបស់ខ្ញុំដោយរបៀបណា ?
-
តើខ្ញុំអាចទទួលបានអំណោយទាននៃភាសាដោយរបៀបណា ?
រៀបចំខ្លួនខាងវិញ្ញាណ
ព្រះអម្ចាស់បានប្រកាសថា « មនុស្សគ្រប់រូបនឹងឮភាពពោរពេញនៃដំណឹងល្អដោយនូវពាក្យសម្តីរបស់ខ្លួន និង ដោយនូវភាសារបស់ខ្លួន តាមរយៈពួកអ្នកដែលត្រូវបានតែងតាំងចំពោះអំណាចនេះ » ( គោលលទ្ធិ និង សេចក្ដីសញ្ញា ៩០:១១ ) ។
ចំណុចដែលបានរៀបរាប់ខាងក្រោមគឺជារបៀបដែលអ្នកអាចពង្រឹងសេចក្ដីជំនឿរបស់អ្នកថា ព្រះអម្ចាស់នឹងជួយអ្នកបង្រៀន ហើយថ្លែងទីបន្ទាល់ជាភាសាបេសកកម្មរបស់អ្នក ៖
-
សូមជឿថា អ្នកត្រូវបានហៅមកពីព្រះតាមរយៈព្យាការី ។
-
ចូរទូលសូមជំនួយរបស់ព្រះតាមរយៈការអធិស្ឋានដ៏ស្មោះត្រង់ ។
-
ចូរធ្វើការដោយឧស្សាហ៍តាមរយៈការសិក្សា ការអនុវត្ត និងការប្រើភាសាបេសកកម្មរបស់អ្នកជារៀងរាល់ថ្ងៃ ។
-
ចូរមានភាពស័ក្ដិសមចំពោះភាពជាដៃគូនៃព្រះវិញ្ញាណបរិសុទ្ធតាមរយៈការគោរពតាមបទបញ្ញត្តិ និងការរស់នៅតាមបទដ្ឋានអ្នកផ្សព្វផ្សាយសាសនា ។
-
ចូរបន្សុទ្ធបំណងចិត្តរបស់អ្នកដោយការស្រឡាញ់ព្រះ និងការស្រឡាញ់បុត្រាបុត្រីរបស់ទ្រង់ ព្រមទាំងការមានបំណងប្រាថ្នាចង់ផ្ដល់ពរជ័យដល់ពួកគេ ។
ត្រូវមានការលះបង់ខ្ពស់ និងឧស្សាហ៍ព្យាយាម
ការរៀនសូត្រភាសាបេសកកម្មរបស់អ្នកដើម្បីបង្រៀនឲ្យមានប្រសិទ្ធភាព តម្រូវឲ្យមានការខិតខំដ៏ឧស្សាហ៍ និងអំណោយទាននៃព្រះវិញ្ញាណ ។ សូមកុំភ្ញាក់ផ្អើល ប្រសិនបើកិច្ចការនោះមើលទៅពិបាក ។ វាត្រូវការពេលវលា ។ ចូរអត់ធ្មត់ជាមួយខ្លួនឯង ។ នៅពេលអ្នកខិតខំរៀនភាសានោះអ្នកនឹងទទួលបាននូវជំនាញចាំបាច់ដើម្បីបំពេញគោលបំណងរបស់អ្នកក្នុងនាមជាអ្នកផ្សព្វផ្សាយសាសនា ។
អ្នកមិនឯកោនៅក្នុងការរៀនភាសាបេសកកម្មរបស់អ្នកនោះទេ ។ ព្រះវរបិតាសួគ៌ និងព្រះយេស៊ូវគ្រីស្ទនឹងជួយអ្នក នៅពេលអ្នកស្វែងរកជំនួយពីទ្រង់ទាំងទ្វេ ។ សូមព្យាយាម ហើយបើកចិត្តដើម្បីទទួលជំនួយពីដៃគូ សមាជិក មនុស្សដែលអ្នកបង្រៀន ពួកអ្នកផ្សព្វផ្សាយសាសនាផ្សេងទៀត និងមនុស្សដទៃទៀត ។
សូមស្ដាប់ដោយប្រុងប្រយ័ត្ន ហើយនិយាយភាសានោះនៅគ្រប់ឱកាស ។ សូមកុំខ្លាចក្នុងការមានកំហុស ។ មនុស្សគ្រប់គ្នាដែលរៀនភាសាថ្មីតែងមានកំហុស ។ មនុស្សទូទៅនឹងយល់ ហើយពួកគេនឹងមានអំណរគុណចំពោះការខិតខំរបស់អ្នកដើម្បីរៀនភាសារបស់ពួកគេ ។
បន្តកែលម្អជំនាញភាសារបស់អ្នករហូតដល់ចុងបញ្ចប់នៃបេសកកម្មរបស់អ្នក ។ នៅពេលសមត្ថភាពនិយាយភាសារបស់អ្នករីកចម្រើន នោះមនុស្សនឹងស្ដាប់អ្វីដែលអ្នកនិយាយជាជាងរបៀបដែលអ្នកនិយាយ ។ អ្នកនឹងមិនសូវបារម្ភអំពីរបៀបប្រាស្រ័យទាក់ទង និងមានលទ្ធភាពកាន់តែប្រសើរដើម្បីឆ្លើយតបនឹងសេចក្ដីត្រូវការរបស់មនុស្សដទៃ ។
« យើងបាន … សង្ឃឹមថា អ្នកផ្សព្វផ្សាយសាសនាគ្រប់រូបដែលកំពុងរៀនភាសា … ថ្មីមួយនឹងចេះវាស្ទាត់ជំនាញតាមដែលអាចធ្វើទៅបាន ។… ហើយនៅពេលអ្នកធ្វើដូច្នេះ ជំនាញ [ បង្រៀន ] និងថ្លែងទីបន្ទាល់របស់អ្នកនឹងកែលម្អ ។ អ្នកនឹងត្រូវបានទទួលយក និងកាន់តែមានភាពទាក់ទាញខាងវិញ្ញាណដល់[ មនុស្សដែលអ្នកបង្រៀន ] ។ …
« សូមកុំរីករាយនឹងអ្វីដែលយើងហៅថា ជាអ្នកផ្សព្វផ្សាយសាសនាដែលចេះតែវាក្យសព្ទឡើយ ។ ពង្រីកសមត្ថភាពភាសារបស់អ្នក ហើយអ្នកនឹងអាចចូលទៅកាន់ដួងចិត្តរបស់មនុស្សទាំងនោះកាន់តែច្រើន »( ជេហ្វ្រី អ័រ ហូឡិន missionary satellite broadcast ខែ សីហា ឆ្នាំ១៩៩៨ ) ។
សូមបន្តប្រើភាសាបេសកកម្មរបស់អ្នកបន្ទាប់ពីអ្នកត្រឡប់ទៅផ្ទះវិញ ។ ព្រះអម្ចាស់បានដាក់ទុនច្រើនណាស់ទៅលើអ្នក ហើយទ្រង់ប្រហែលជាប្រើសមត្ថភាពភាសារបស់អ្នកនៅពេលក្រោយក្នុងជីវិតរបស់អ្នក ។
រៀនភាសាអង់គ្លេស
ប្រសិនបើអ្នកមិនចេះភាសាអង់គ្លេសទេ អ្នកគួរតែសិក្សាវាក្នុងនាមជាអ្នកផ្សព្វផ្សាយសាសនា ។ ការណ៍នេះនឹងផ្ដល់ពរជ័យដល់អ្នកអំឡុងបេសកកម្មនិងពេញមួយជីវិតរបស់អ្នក ។ ការរៀនភាសាអង់គ្លេសក៏នឹងផ្ដល់ពរជ័យដល់គ្រួសាររបស់អ្នកដែរ ។
សម្រាប់ជំនួយបន្ថែមអំពីការរៀនភាសាអង់គ្លេស សូមមើល EnglishConnect សម្រាប់ពួកអ្នកផ្សព្វផ្សាយសាសនា ។
គោលការណ៍នៃការរៀនភាសា
ត្រូវមានការទទួលខុសត្រូវ
ដាក់គោលដៅដើម្បីកែលម្អសមត្ថភាពភាសារបស់អ្នក ហើយកែតម្រូវវាជាទៀងទាត់ ។ បង្កើតផែនការសិក្សាភាសាមួយ ។ និយាយភាសានោះនៅគ្រប់ឱកាស ។
ធ្វើឲ្យការសិក្សារបស់អ្នកប្រកបដោយអត្ថន័យ
សូមអនុវត្តអ្វីដែលអ្នកសិក្សាទៅនឹងស្ថានភាពជីវិតពិត និងក្នុងសកម្មភាពប្រចាំថ្ងៃរបស់អ្នក ។ ផ្ដោតលើភាសាដែលនឹងជួយអ្នកឲ្យនិយាយអ្វី ដែលអ្នកត្រូវនិយាយ ។
ព្យាយាមប្រាស្រ័យទាក់ទង
សូមនិយាយភាសានោះជាមួយនឹងដៃគូរបស់អ្នកឲ្យបានច្រើនតាមដែលអាចធ្វើបាន ។ ក្ដាប់យកឱកាសគ្រប់ពេលដើម្បីរៀន និងអនុវត្ត ។ ឧទាហរណ៍ អ្នកអាចសុំឲ្យសមាជិកម្នាក់ដែលទើបត្រឡប់មក សកម្មវិញ ឬមនុស្សម្នាក់ដែលអ្នកកំពុងបង្រៀនជួយអ្នកជាមួយនឹងភាសា នោះ ។ គ្មានអ្វីជំនួសឲ្យការនិយាយជាមួយនឹងអ្នកដែលមាននិយាយភាសាកំណើតនោះទេ ។
កុំប្រៀបធៀប
សូមកុំប្រៀបធៀបជំនាញភាសារបស់អ្នកនឹងដៃគូ ឬពួកអ្នកផ្សព្វផ្សាយសាសនាផ្សេងទៀតឡើយ ។ ការប្រៀបធៀបនាំទៅរកអំនួត ឬការបាក់ទឹកចិត្ត ។
រៀនពីគំនិតថ្មីៗឲ្យបានហ្មត់ចត់
សូមរំឭកដែលអ្នកបានសិក្សាឲ្យបានទៀងទាត់ ហើយអនុវត្តវានៅក្នុងស្ថានភាពថ្មីៗ ។ វានឹងជួយអ្នកឲ្យនឹកចាំ ហើយអនុវត្តអ្វីដែលអ្នកកំពុងរៀន ។
បង្កើតផែនការសិក្សាភាសា
ផែនការសិក្សាភាសាមួយជួយទាំងពួកអ្នកផ្សព្វផ្សាយសាសនាថ្មី និងអ្នកដែលមានបទពិសោធន៍ឲ្យផ្ដោតលើអ្វីដែលពួកគេអាចធ្វើរៀងរាល់ថ្ងៃ ដើម្បីកែលម្អសមត្ថភាពរបស់ពួកគេក្នុងការនិយាយភាសាបេសកកម្មរបស់ពួកគេ ។ ផែនការរបស់អ្នកនឹងដាក់បញ្ចូលនូវអ្វីដែលអ្នកនឹងធ្វើអំឡុងម៉ោងសិក្សាភាសារបស់អ្នក និងពេញមួយថ្ងៃនោះ ។
ជំហានខាងក្រោមនេះបង្ហាញពីរបៀបដែលអ្នកអាចបង្កើតផែនការសិក្សាភាសាមួយ ដោយប្រើដំណើរការដាក់គោលដៅនៅក្នុងជំពូកទី ៨ ។ សូមសម្របដំណើរការនេះប្រសិនបើចាំបាច់ ។
-
ដាក់គោលដៅ និងធ្វើផែនការប្រកបដោយការអធិស្ឋាន ។ ដាក់គោលដៅប្រចាំសប្ដាហ៍ និងប្រចាំថ្ងៃដើម្បីកែលម្អសមត្ថភាពទូទៅរបស់អ្នកក្នុងការប្រាស្រ័យទាក់ទង និងបង្រៀនដំណឹងល្អ ។ សូមដាក់បញ្ចូលនូវរឿងដែលអ្នកចង់តាំងចិត្តដើម្បីទន្ទេញ ដូចជា ពាក្យ ឃ្លា បទគម្ពីរ និងវគ្គបទគម្ពីរ ។
-
កត់ត្រា និងដាក់កាលវិភាគ ។ សូមសម្រេចចិត្តថាតើឧបករណ៍ភាសាមួយណាដែលនឹងជួយអ្នកសម្រេចគោលដៅរបស់អ្នក ។ ឧបករណ៍ភាសាអាចរួមមានបទគម្ពីរ វចនានុក្រម សៀវភៅវេយ្យាករណ៍ កម្មវិធី TALL Embark និងផ្សេងទៀត ។ ដាក់កាលវិភាគពេលវេលាដែលអ្នកនឹងសិក្សា ហើយប្រើភាសានោះ ។ ឧទាហរណ៍ អ្នកអាចនឹងដាក់កាលវិភាគអានឮៗចេញពីព្រះគម្ពីរមរមនសម្រាប់រយៈពេល ១៥ នាទីរៀងរាល់ថ្ងៃអំឡុងពេលបាយថ្ងៃត្រង់ ។
-
អនុវត្តតាមផែនការរបស់អ្នក ។ ព្រះអម្ចាស់ស្រឡាញ់ការខិតខំ ដូច្នេះសូមធ្វើការដោយឧស្សាហ៍ដើម្បីសម្រេចគោលដៅរបស់អ្នក ។ ការពារម៉ោងសិក្សាភាសារបស់អ្នក ហើយដាក់កាលវិភាគវាជាថ្មីនៅពេលក្រោយ ប្រសិនបើមានការប៉ះពាល់កើតឡើង ។
-
រំឭក ហើយតាមដាន ។ សូមរំឭកផែនការសិក្សារបស់អ្នកជារឿយៗ ដើម្បីវាយតម្លៃថាតើវាដំណើរការល្អដល់កម្រិតណា ។ សូមអញ្ជើញដៃគូរបស់អ្នក ថ្នាក់ដឹកនាំបេសកកម្ម សមាជិក និងមនុស្សផ្សេងទៀតនៅក្នុងតំបន់របស់អ្នកឲ្យផ្ដល់យោបល់ អំពីវិធីដែលអ្នកអាចកែលម្អ ។ ចូលរួមក្នុងការវាយតម្លៃភាសាជាទៀងទាត់ ដើម្បីធ្វើតារាងអំពីការរីកចម្រើនរបស់អ្នក និងកំណត់ពីវិធីកែលម្អ ។
សូមដាក់តុល្យភាពរវាងការសិក្សាភាសារបស់អ្នក និងគោលដៅរយៈពេលវែងដើម្បីបង្កើតជាគ្រឹះភាសាមួយ និងគោលដៅរយៈពេលខ្លីសម្រាប់សកម្មភាពជាក់លាក់ ព្រមទាំងមនុស្សដែលអ្នកកំពុងបង្រៀន ។
អំឡុងម៉ោងសិក្សាភាសាផ្លូវការរបស់អ្នក សូមដាក់តុល្យភាពរវាងគោលដៅ និងផែនការរបស់អ្នកនៅក្នុងវិស័យភាសាជាមូលដ្ឋានដែលបានបង្ហាញខាងក្រោមនេះ ។ សម្រេចចិត្តនូវអ្វីដែលអ្នកនឹងរៀនពេញមួយថ្ងៃនោះ ។
|
ជំនាញស្ដាប់ |
ជំនាញអាន |
វេយ្យាករណ៍ |
|
ជំនាញនិយាយ |
ជំនាញសរសេរ |
វាក្យសព្ទ |
ការសិក្សាផ្ទាល់ខ្លួន ឬជាដៃគូ
សូមចំណាយពេលរៀងរាល់សប្ដាហ៍ដើម្បីវាយតម្លៃការសិក្សាភាសារបស់អ្នក ដោយសួរសំណួរដូចតទៅនេះ ៖
-
តើខ្ញុំបានសិក្សាភាសាបេសកកម្មរបស់ខ្ញុំរៀងរាល់ថ្ងៃនៅសប្ដាហ៍នេះដែរឬទេ ? តើខ្ញុំអាចធ្វើអ្វីខ្លះដើម្បីកែលម្អភាសាបេសកកម្មរបស់ខ្ញុំជាទៀងទាត់ ?
-
តើផែនការរបស់ខ្ញុំកំពុងជួយខ្ញុំឲ្យស្វែងរក បង្រៀន ហើយធ្វើការជាមួយនឹងសមាជិកឲ្យកាន់តែប្រសើរដែរឬទេ ? តើខ្ញុំត្រូវកែប្រែអ្វីខ្លះចំពោះផែនការរបស់ខ្ញុំ ?
-
តើអ្វីដែលខ្ញុំចូលចិត្តខ្លាំងបំផុតចំពោះការសិក្សាភាសារបស់ខ្ញុំ ? តើខ្ញុំអាចធ្វើអ្វីខ្លះដើម្បីចូលចិត្តវាឲ្យកាន់តែខ្លាំងជាងមុន ?
-
តើខ្ញុំគួរតែចំណាយពេលប៉ុន្មានដើម្បីអនុវត្តការស្ដាប់ ការអាន ការសរសេរ និងការនិយាយ ? តើខ្ញុំអាចរៀនវាក្យសព្ទ វេយ្យាករណ៍ និងការបញ្ចេញសម្លេងឲ្យកាន់តែប្រសើរដោយរបៀបណា ?
-
តើសកម្មភាព និងធនធានអ្វីខ្លះដែលខ្ញុំនឹងប្រើដើម្បីសិក្សាភាសានោះ ? តើធនធានមួយណាដែលនឹងជួយខ្ញុំច្រើនបំផុត ? តើធនធាន ឬសកម្មភាពអ្វីខ្លះទៀតដែលអាចមានប្រយោជន៍ ?
-
តើអ្វីដែលត្រូវការចំណាប់អារម្មណ៍ច្រើនជាង ?
បន្ទាប់ពីឆ្លើយសំណួរទាំងនេះ សូមកែតម្រូវផែនការការសិក្សារបស់អ្នក ហើយមើលថាតើវាកែលម្អលទ្ធផលរបស់អ្នកដែរឬទេ ។ ព្រះវិញ្ញាណនឹងដឹកនាំអ្នក ពេលអ្នកខិតខំកែលម្អការសិក្សាភាសារបស់អ្នកជាបន្តបន្ទាប់ ។
រៀនជាមួយដៃគូរបស់អ្នក
ជួយដៃគូរបស់អ្នកឲ្យដកពិសោធន៍នូវភាពជោគជ័យ ហើយទទួលបានទំនុកចិត្តក្នុងការរៀនភាសាបេសកកម្ម ឬការរៀនភាសាអង់គ្លេស ។ សូមសរសើរដៃគូរបស់អ្នក និងអ្នកផ្សព្វផ្សាយសាសនាផ្សេងទៀតដោយស្មោះ និងឲ្យបានញឹកញាប់ចំពោះការរីកចម្រើនរបស់ពួកគេ ។
ផ្តល់មតិកែលម្អសាមញ្ញៗ និងជាក់ស្តែងដោយចិត្តល្អ ។ ផ្ដល់ឱកាសច្រើនដល់ពួកគេដើម្បីបង្រៀន និងថ្លែងទីបន្ទាល់ប្រកបដោយភាពជោគជ័យ ។ សូមកត់សម្គាល់ពីរបៀបដែលអ្នកផ្សព្វផ្សាយសាសនាដែលមានបទពិសោធន៍ច្រើនម្នាក់បានជួយដៃគូរបស់គាត់នៅក្នុងដំណើររឿងពិតដូចខាងក្រោមនេះ ។
ខ្ញុំ ទើបតែទៅដល់តំបន់ទីពីរ ដៃគូរបស់ខ្ញុំបានប្រាប់ខ្ញុំថា ខ្ញុំដល់ វេនផ្តល់គំនិតខាងវិញ្ញាណនៅឯការណាត់ជួបអាហារពេលល្ងាចមួយ ។ ដៃគូដំបូងរបស់ ខ្ញុំតែងតែរីករាយក្នុងការបង្រៀន ហើយខ្ញុំ ធ្លាប់តែ ចែកចាយ ចំនុច តិចតួចនៃមេរៀន រួចហើយអង្គុយស្តាប់ ។
ខ្ញុំបានព្យាយាមបញ្ចុះបញ្ចូលដៃគូរបស់ខ្ញុំថាគាត់គួរតែផ្តល់គំនិតខាងវិញ្ញាណ ប៉ុន្តែគាត់បានលើកទឹកចិត្តខ្ញុំឲ្យធ្វើវិញ ។ ខ្មុំបានហាត់ធ្វើដោយមានជំនួយពីគាត់ ។
ពេលដល់វេណខ្ញុំ នោះខ្ញុំបានបើកព្រះគម្ពីរ ហើយអានចេញពី នីហ្វៃទី ៣ ៥ និង៧ ។ ខ្ញុំនិយាយរដាក់រដុប ប៉ុន្តែអាចពន្យល់ពីមូលហេតុដែលខ្ញុំមានអារម្មណ៍ថា វគ្គបទគម្ពីរដែលខ្ញុំបានជ្រើសរើសមានសារៈសំខាន់ ហើយខ្ញុំមានអារម្មណ៍ធូរស្រាល នៅពេលខ្ញុំចែកចាយចប់ ។ ពេលមានសំណួរមួយត្រូវបានចោទសួរ ខ្ញុំបានមើលទៅដៃគូររបស់ខ្ញុំឲ្យគាត់ឆ្លើយ ប៉ុន្តែគាត់មិនបានឆ្លើយទេ ។ នោះគឺជាពេលដែលខ្ញុំភ្ញាក់ផ្អើលចំពោះខ្លួនឯង ដែលនឹកឃើញចម្លើយមួយជាភាសាបារាំងដែលអាចយល់បាន ។ ខ្ញុំកាន់តែភ្ញាក់ផ្អើលថែមទៀតព្រោះសមាជិកនោះពុំមានអារម្មណ៍ថា ខ្ញុំភ័យខ្លាចចំពោះជំនាញប្រាស្រ័យទាក់ទងរបស់ខ្ញុំ ។ ខ្ញុំទទួលបានទំនុកចិត្ត ហើយបានដឹងថា ភាសាបារាំងរបស់ខ្ញុំល្អជាងខ្ញុំគិតទៅទៀត ។
ជាច្រើនសប្ដាហ៍បានកន្លងផុតទៅ ហើយដៃគូរបស់ខ្ញុំបានបន្តឲ្យខ្ញុំបង្រៀន—ទោះជាខ្ញុំគិតថា ខ្ញុំមិនអាចធ្វើវាបានក្ដី ហើយទោះជាគាត់ឆ្ងល់ថាតើខ្ញុំអាចធ្វើបាន ឬអត់ក្ដី ។ ខ្ញុំបានទទួលអារម្មណ៍ថា ខ្ញុំបានក្លាយជាឧបករណ៍របស់ព្រះវរបិតាយើងដែលគង់នៅស្ថានសួគ៌ ជាជាងគ្រាន់តែធ្វើជាដៃគូនៅស្ងៀមស្ងាត់ម្នាក់ ។
ការសិក្សាផ្ទាល់ខ្លួន ឬជាដៃគូ
សូមធ្វើការជាមួយនឹងអ្នកផ្សព្វផ្សាយសាសនាផ្សេងទៀតដើម្បីជួយអ្នកឲ្យរៀនភាសាបេសកកម្មរបស់អ្នក ។
-
ប្រសិនបើអ្នកធ្វើការជាមួយនឹងអ្នកផ្សព្វផ្សាយសាសនាថ្មីម្នាក់ តើអ្នកអាចជួយដៃគូឲ្យរៀនភាសានោះ ឬរៀនភាសាអង់គ្លេសបានល្អតាមរបៀបណា?
-
ប្រសិនបើអ្នកគឺជាអ្នកផ្សព្វផ្សាយសាសនាថ្មីម្នាក់ តើមានជំនួយអ្វីខ្លះដែលអ្នកអាចនឹងស្នើសុំពីដៃគូរបស់អ្នក ?
ការរៀនវប្បធម៌ និងភាសា
វប្បធម៌ និងភាសា មានទំនាក់ទំនងនឹងគ្នាយ៉ាងជិតស្និទ្ធ ។ ពេលយល់ដឹងអំពីវប្បធម៌របស់ប្រជាជននោះនឹងជួយពន្យល់ពីរបៀបដែលភាសានោះត្រូវបានប្រើប្រាស់ ។ ការយល់ដឹងនេះក៏នឹងជួយអ្នកឲ្យភ្ចាប់ទំនាក់ទំនងទិដ្ឋភាពពិសេសនៃសារលិខិតនៃការស្ដារឡើងវិញតាមរបៀបមួយដែលនឹងមានភាពច្បាស់លាស់សម្រាប់មនុស្សទូទៅ ។
រឿងដ៏ល្អបំផុតមួយដែលអ្នកអាចធ្វើដើម្បីទទួលបានការទុកចិត្ត និងសេចក្ដីស្រឡាញ់ពីមនុស្សទូទៅគឺការគោរព និងការឱបក្រសោបវប្បធម៌របស់ពួកគេតាមរបៀបសមរម្យ ។ ពួកអ្នកផ្សព្វផ្សាយសាសនាដ៏ឆ្នើមជាច្រើនបានធ្វើកិច្ចការនេះ( សូមមើល កូរិនថូសទី ១ ៩:២០–២៣ ) ។
ការសិក្សាផ្ទាល់ខ្លួន ឬជាដៃគូ
សូមប្រើគំនិតខាងក្រោមនេះដើម្បីជួយអ្នកឲ្យរៀបចំខ្លួនបង្រៀនមនុស្សម្នាក់ដែលមានវប្បធម៌ ឬប្រវត្តិខុសគ្នា ។
-
សូមគិតពីប្រវត្តិសាសនា និងវប្បធម៌របស់មនុស្សដែលអ្នកបង្រៀន ។ កំណត់ពីទិដ្ឋភាពនៃប្រវត្តិរបស់ពួកគេដែលអាចធ្វើឲ្យមានការលំបាកដល់ពួកគេដើម្បីយល់ពីគោលការណ៍ដំណឹងល្អមួយ ។ ដាក់ផែនការបង្រៀនគោលការណ៍នេះឲ្យបានច្បាស់ ។
អំណោយទានខាងភាសា
អំណោយទាននៃព្រះវិញ្ញាណគឺមានពិត ។ មានការបើកសម្ដែងអំណោយទានខាងភាសា និងការបកប្រែភាសាជាច្រើន ។ ការបើកសម្ដែងទាំងនេះមួយចំនួនរួមមាន ការនិយាយ ការយល់ និងការបកប្រែភាសា ។ សព្វថ្ងៃនេះ អំណោយទានខាងភាសាភាគច្រើនត្រូវបានបើកសម្ដែងនៅក្នុងការរៀនសូត្រ និងការសិក្សាដែលបានដឹកនាំដោយព្រះវិញ្ញាណ ដើម្បីជួយអ្នកផ្សព្វផ្សាយសាសនាឲ្យរៀនភាសានៅក្នុងបេសកម្មរបស់ពួកគេ ។
ព្រះវិញ្ញាណបរិសុទ្ធអាចបើកសម្ដែងសេចក្ដីពិតនៃទីបន្ទាល់របស់អ្នក ទោះជាមានការលំបាកក្នុងការនិយាយភាសារវាងអ្នក និងមនុស្សដែលអ្នកបង្រៀនក្ដី ។ ដូចគ្នានេះដែរ ព្រះវិញ្ញាណបរិសុទ្ធអាចនាំយកពាក្យ និងឃ្លាចូលទៅក្នុងការចងចាំរបស់អ្នក ហើយជួយអ្នកឲ្យយល់ពីអ្វីដែលមនុស្សកំពុងនិយាយចេញពីដួងចិត្តរបស់ពួកគេ ។
ភាគច្រើន អ្នកនឹងមិនទទួលបានអំណោយទានទាំងនេះដោយគ្មានការខិតខំនោះទេ ។ អ្នកត្រូវស្វែងរកវាយ៉ាងសកម្មដើម្បីផ្ដល់ពរជ័យដល់មនុស្សដទៃ ( សូមមើល គោលលទ្ធិ និងសេចក្តីសញ្ញា ៤៦:៨–៩, ២៦ ) ។ ផ្នែកមួយនៃការស្វែងរកអំំណោយទានខាងភាសាគឺការធ្វើការ និងការខំរៀនភាសាដោយអស់ពីសមត្ថភាព ។ ចូរអត់ធ្មត់ ក្នុងពេលដែលអ្នកសិក្សា និងអនុវត្តភាសានោះប្រកបដោយការអធិស្ឋាន ។ សូមទុកចិត្តថា ព្រះវិញ្ញាណនឹងជួយអ្នក នៅពេលអ្នកខិតខំដោយឧស្សាហ៍ ។ សូមមានសេចក្ដីជំនឿថា អ្នកអាចមានអំណោយទានខាងភាសាដើម្បីជួយដល់អ្នក និងមនុស្សដែលអ្នកបង្រៀន ។
នៅពេលអ្នកមានការពិបាកក្នុងការបង្ហាញពីអារម្មណ៍ខ្លួនឯងឲ្យច្បាស់តាមដែលអ្នកចង់បង្ហាញ សូមចាំថា ព្រះវិញ្ញាណមានលទ្ធភាពនិយាយទៅកាន់ដួងចិត្តរបស់បុត្រាបុត្រីរបស់ព្រះបាន ។ ប្រធាន ថូម៉ាស អេស ម៉នសុន បានបង្រៀន ៖
« មានភាសាមួយ … ដែលជាភាសាទូទៅសម្រាប់អ្នកផ្សព្វផ្សាយសាសនាម្នាក់ៗ—គឺភាសានៃព្រះវិញ្ញាណ ។ វាពុំមែនកើតចេញពីការរៀនសូត្រនៅក្នុងសៀវភៅដែលសរសេរដោយមនុស្ស ឬក៏តម្រូវឲ្យអាន និងទន្ទេញនោះឡើយ ។ ភាសានៃព្រះវិញ្ញាណកើតឡើងចំពោះអ្នកដែលស្វែងរកដោយអស់ពីដួងចិត្តដើម្បីស្គាល់ព្រះ និងគោរពតាមបទបញ្ញត្តិដ៏ទេវភាពរបស់ទ្រង់ ។ ភាពប៉ិនប្រសប់ក្នុងភាសានេះអនុញ្ញាតឲ្យមនុស្សម្នាក់ពុះពាររាល់ការលំបាក យកឈ្នះរាល់ឧបសគ្គ និងប៉ះពាល់ដល់ដួងចិត្តមនុស្ស »( « The Spirit Giveth Life » Ensign ខែមិថុនា ឆ្នាំ១៩៩៧ ទំព័រ ២ ) ។
ការសិក្សាផ្ទាល់ខ្លួន ឬជាដៃគូ
សូមប្រើសេចក្ដីថ្លែងការណ៍ដូចតទៅនេះ ដើម្បីវាយតម្លៃការខិតខំរបស់អ្នកក្នុងការស្វែងរកអំណោយទានខាងភាសា ។ សូមកត់ត្រាការបំផុសគំនិត និងគោលដៅដើម្បីជួយអ្នកកែលម្អការរៀនភាសារបស់អ្នក ។
-
ខ្ញុំជឿថា ខ្ញុំត្រូវបានហៅមកពីព្រះ តាមរយៈព្យាការី ដើម្បីផ្សាយដំណឹងល្អជាភាសាថ្មីមួយ ។ ( គោលលទ្ធិ និង សេចក្ដីសញ្ញា ៩០:១១ )
-
សេចក្ដីស្រឡាញ់របស់ខ្ញុំចំពោះព្រះអម្ចាស់ និងមនុស្សដែលខ្ញុំបម្រើបានជួយលើកទឹកចិត្តខ្ញុំ ។ (គោលលទ្ធិ និងសេចក្ដីសញ្ញា ៤៦:៩, កូរិនថូសទី ១ ១៤:១២ )
-
ខ្ញុំខិតខំរស់នៅឲ្យមានភាពស័ក្ដិសមដើម្បីមានព្រះវិញ្ញាណបរិសុទ្ធដោយការគោរពតាមបទបញ្ញត្តិ ការរស់នៅតាមបទដ្ឋានអ្នកផ្សព្វផ្សាយសាសនា និងការប្រែចិត្តជាប្រចាំថ្ងៃ ។ ( គោលលទ្ធិ និង សេចក្តីសញ្ញា ៤៦:៩, ៣៣ )
-
ខ្ញុំអធិស្ឋានជាបន្តបន្ទាប់ដើម្បីទទួលបានអំណោយទានខាងភាសា ។ ( គោលលទ្ធិ និង សេចក្តីសញ្ញា ៤៦:២៨, ៣០–៣២ )
-
ខ្ញុំសិក្សា អនុវត្ត ហើយប្រើភាសាបេសកកម្មរបស់ខ្ញុំឲ្យបានច្រើនតាមដែលអាចធ្វើបានជារៀងរាល់ថ្ងៃ ។ ( កូរិនថូសទី ១ ១២:៣១ )
គំនិតសម្រាប់ការសិក្សា និងការអនុវត្ត
ការសិក្សាផ្ទាល់ខ្លួន
-
សូមពិនិត្យមើលធនធានភាសានៅក្នុង Missionary Portal ។ កំណត់អ្វីមួយដែលអ្នកមិនទាន់បានសាកល្បង ហើយដាក់គោលដៅដើម្បីសាកល្បងវានៅពីរបីថ្ងៃក្រោយ ។
-
នៅក្នុងក្រុមប្រឹក្សាមណ្ឌលលើកក្រោយរបស់អ្នក ចូរសុំឲ្យអ្នកផ្សព្វផ្សាយសាសនាដែលមានបទពិសោធន៍ម្នាក់ដែលមានសមត្ថភាពល្អខាងភាសា ចែកចាយពីអ្វីដែលគាត់បានធ្វើដើម្បីរៀនភាសានោះ ។
ការសិក្សាជាមួយដៃគូ និងការផ្លាស់ប្តូរដៃគូ
-
សូមហាត់បង្រៀនគ្នាទៅវិញទៅមកនូវមេរៀនអ្នកផ្សព្វផ្សាយសាសនាជាភាសាបេសកកម្មរបស់អ្នក ។ ដំបូង អ្នកផ្សព្វផ្សាយសាសនាថ្មីអាចបង្រៀនដោយសាមញ្ញបំផុត ចែកចាយទីបន្ទាល់ដ៏សាមញ្ញ និងសូត្របទគម្ពីរដែលទន្ទេញចាំ ។ ពេលពួកគេមានទំនុកចិត្ត ហើយសមត្ថភាពរបស់ពួកគេកើនឡើង នោះពួកគេនឹងមានលទ្ធភាពចូលរួមកាន់តែពេញលេញនៅក្នុងការបង្រៀន ។
-
សូមពិនិត្យមើលគំនិតនានានៅក្នុងជំពូកនេះ និងធនធានភាសានៅក្នុ Missionary Portal ។ សូមពិភាក្សាថាតើយោបល់មួយណាដែលអ្នកអាចប្រើនៅក្នុងការសិក្សាជាដៃគូនៅសប្ដាហ៍ក្រោយ ។
-
ចូរសុំឲ្យដៃគូស្ដាប់ការបញ្ចេញសម្លេងរបស់អ្នក ហើយជួយកែលម្អអ្នក ។ ចូរសុំឲ្យគាត់កត់ចំណាំពីស្ថានភាពដែលអ្នកមិនយល់ ។ សូមធ្វើបញ្ជីពាក្យ ឃ្លា ឬវេយ្យាករណ៍មួយដែលនឹងជួយដល់អ្នក ។ សូមពន្យល់ ហើយអនុវត្តរបៀបប្រើអ្វីដែលនៅលើបញ្ជីនោះនៅសកម្មភាពលើកក្រោយ ។
-
សូមហាត់ស្ដាប់យ៉ាង សកម្ម ។ ដាក់ផែនការពីពេលវេលាមួយអំឡុងថ្ងៃនោះ ដើម្បីស្ដាប់ឲ្យសកម្មក្នុងការស្គាល់វាក្យសព្ទ និងលំនាំដែលអ្នកបានរៀន ។ នៅពេលអ្នកបានឮឃ្លាមួយដែលបានលើកឡើងខុសពីរបៀបដែលអ្នកនឹងនិយាយវា សូមកត់ត្រាទុក ហើយអនុវត្តវា ។
-
សូមធ្វើបញ្ជីពីអ្វីៗដែលមនុស្សទូទៅអាចនិយាយនៅថ្ងៃនោះ ។ ដាក់ផែនការ ហើយអនុវត្តរបៀបដែលអ្នកអាចឆ្លើយតប ។
ក្រុមប្រឹក្សាមណ្ឌល សន្និសីទហ្សូន និងក្រុមប្រឹក្សាថ្នាក់ដឹកនាំបេសកកម្ម
-
អញ្ជើញអ្នកនិយាយភាសាកំណើតឲ្យចូលរួមការប្រជុំមួយ ។ សូមរៀបចំឲ្យអ្នកផ្សព្វផ្សាយសាសនាបង្រៀនគ្នាជាក្រុមតូចៗ ។ សុំឲ្យអ្នកនិយាយភាសាកំណើត កត់ចំណាំ ហើយផ្ដល់ជាមតិកែលម្អអំពីសមត្ថភាពភាសារបស់អ្នកផ្សព្វផ្សាយសាសនាទាំងនោះ ។
-
សូមចាត់អ្នកផ្សព្វផ្សាយសាសនាម្នាក់ ឬពីរនាក់ទុកជាមុន ដើម្បីឲ្យពួកគេប្រាប់ពីភាពជោគជ័យដែលពួកគេធ្លាប់មាននៅក្នុងការសិក្សាភាសា ។
-
សូមចាត់អ្នកផ្សព្វផ្សាយសាសនាម្នាក់ដែលមានបទពិសោធន៍ឲ្យបង្ហាញនូវផ្នែកខ្លះៗនៃភាសាដែលជាទូទៅមានការលំបាកសម្រាប់អ្នកផ្សព្វផ្សាយសាសនា ។ ចូរសុំឲ្យគាត់បង្ហាញគំរូនៃការប្រើភាសាល្អ ហើយឲ្យអ្នកផ្សព្វផ្សាយសាសនាអនុវត្តវា ។
-
ចូរសុំឲ្យអ្នកផ្សព្វផ្សាយសាសនាដែលនិយាយភាសាកំណើតចែកចាយគោលគំនិតរបស់ពួកគេ ។
ថ្នាក់ដឹកនាំបេសកកម្ម និងទីប្រឹក្សាបេសកកម្ម
-
សូមគូសបញ្ជាក់ពីសារៈសំខាន់នៃការសិក្សាភាសាជាទៀងទាត់ប្រចាំថ្ងៃ ។
-
សូមលើកទឹកចិត្តអ្នកផ្សព្វផ្សាយសាសនាឲ្យប្រើភាសាបេសកកម្មឲ្យបានច្រើនតាមដែលអាចធ្វើបាន ។
-
ផ្ដល់នូវចំនុចនានានៃផែនការសិក្សាភាសាបេសកកម្ម ជាកាលវិភាគសិក្សាលក្ខណៈជាប្រព័ន្ធ ។ សូមពិនិត្យមើលកិច្ចការនេះនៅក្នុងការប្រជុំក្រុមប្រឹក្សាមណ្ឌល ។
-
សូមរកមើលឱកាសនិយាយជាមួយនឹងអ្នកផ្សព្វផ្សាយសាសនាតាមភាសាដែលពួកគេកំពុងរៀន ។ សូមសម្ភាសពួកគេម្ដងម្កាលជាភាសានេះ ។
-
សាកសួរថ្នាក់ដឹកនាំ និងសមាជិកក្នុងមូលដ្ឋាននូវគំនិតស្ដីពីរបៀបដែលអ្នកផ្សព្វផ្សាយសាសនាអាចកែលម្អសមត្ថភាពភាសារបស់ពួកគេ ។
-
ផ្ដល់ការណែនាំនៅក្នុងសន្និសីទហ្សូន ឬការប្រជុំថ្នាក់ដឹកនាំបេសកកម្មអំពីកំហុសទូទៅដែលអ្នកផ្សព្វផ្សាយសាសនាដែលកំពុងរៀនភាសាបេសកកម្មបានធ្វើ ។
-
បង្រៀនអ្នកផ្សព្វផ្សាយសាសនាអំពីអំណោយទានខាងវិញ្ញាណ ។
-
សូមសង្កេតមើលអ្នកផ្សព្វផ្សាយសាសនានៅពេលពួកគេបង្រៀនជាភាសាបេសកកម្ម ។