“ບົດທີ 2: ຄົ້ນຄວ້າພຣະຄຳພີ ແລະ ສວມຍຸດທະພັນຂອງພຣະເຈົ້າ,” ຈົ່ງສັ່ງສອນພຣະກິດຕິຄຸນຂອງເຮົາ: ຄູ່ມືຕໍ່ການແບ່ງປັນພຣະກິດຕິຄຸນຂອງພຣະເຢຊູຄຣິດ (2023)

“ຄົ້ນຄວ້າພຣະຄຳພີ ແລະ ສວມຍຸດທະພັນຂອງພຣະເຈົ້າ,” ຈົ່ງສັ່ງສອນພຣະກິດຕິຄຸນຂອງເຮົາ

ຮູບພາບ

ໂຈເຊັບ ສະມິດ ສະແຫວງຫາປັນຍາໃນພຣະຄຣິສຕະທຳຄຳພີ, ໂດຍ ແດວ ຄິວບອນ

ບົດທີ 2

ຄົ້ນຄວ້າພຣະຄຳພີ ແລະ ສວມຍຸດທະພັນຂອງພຣະເຈົ້າ

ໃຫ້ພິຈາລະນາສິ່ງນີ້

ເປັນຫຍັງມັນຈຶ່ງສຳຄັນທີ່ຈະສຶກສາພຣະຄຳຂອງພຣະເຈົ້າຢ່າງສະໝ່ຳສະເໝີໃນພຣະຄຳພີ?
ເຮົາຈະສາມາດເຮັດໃຫ້ການສຶກສາພຣະຄຳພີຂອງເຮົາມີປະສິດທິພາບຫລາຍຂຶ້ນໄດ້ແນວໃດ?
ເຮົາຈະສາມາດໃຊ້ເທັກໂນໂລຈີຢ່າງຊອບທຳ ເພື່ອຊ່ວຍເຮົາໃຫ້ບັນລຸຈຸດປະສົງຂອງເຮົາໄດ້ແນວໃດ?
ການສວມຍຸດທະພັນຂອງພຣະເຈົ້າໝາຍຄວາມວ່າແນວໃດ?

ຄົ້ນຄວ້າພຣະຄຳພີ

ພຣະເຢຊູຄຣິດ “ເປັນຊີວິດ ແລະ ຄວາມສະຫວ່າງຂອງໂລກ. ຈົ່ງເບິ່ງ, ພຣະອົງເປັນພຣະຄຳແຫ່ງຄວາມຈິງ ແລະ ຄວາມຊອບທຳ” (ແອວມາ 38:9; ເບິ່ງ ໂຢຮັນ 1 ນຳອີກ). ການສຶກສາພຣະຄຳຂອງພຣະເຈົ້າໃນພຣະຄຳພີທີ່ສັກສິດຈະນຳຄວາມອຸດົມສົມບູນມາສູ່ຊີວິດຂອງທ່ານ (ເບິ່ງ ໂຢຮັນ 10:10). ພຣະຄຳຂອງພຣະອົງຈະເຕີມເຕັມທ່ານ—ແລະ ຜູ້ທີ່ທ່ານສິດສອນ—ດ້ວຍຄວາມສະຫວ່າງ ແລະ ຄວາມຈິງ. ພຣະຄຳຈະຊ່ວຍທ່ານ—ແລະ ຜູ້ທີ່ທ່ານສິດສອນ—ໃຫ້ດຳລົງຊີວິດຢ່າງຊອບທຳ ແລະ ໄດ້ຮັບການປົກປ້ອງ ແລະ ພະລັງຈາກສະຫວັນ. ພຣະຄຳຈະຊ່ວຍທ່ານໃຫ້ມາຮູ້ຈັກພຣະອົງ ແລະ ຊີມຄວາມຮັກຂອງພຣະອົງ, ຊຶ່ງຫວານຊື່ນເໜືອສິ່ງອື່ນໃດທີ່ຫວານຊື່ນ. ພຣະຄຳຂອງພຣະອົງຈະເຮັດໃຫ້ຈິດວິນຍານຂອງທ່ານເຕັມໄປດ້ວຍຄວາມຊື່ນຊົມ (1 ນີໄຟ 8:11–12; ເບິ່ງ ຂໍ້ທີ 1–34).

ພຣະຄຳພີເປັນຂອງປະທານຈາກສະຫວັນ. ພອນອັນຍິ່ງໃຫຍ່ຢ່າງໜຶ່ງຂອງການເຜີຍແຜ່ຂອງທ່ານແມ່ນການມີເວລາຕາມກຳນົດ ເພື່ອສຶກສາມັນທຸກໆມື້.

ການສຶກສາພຣະກິດຕິຄຸນເປັນວຽກງານທາງວິນຍານທີ່ກຸ້ມຄ່າທີ່ສຸດ ທີ່ທ່ານສາມາດເຮັດໄດ້. ມັນເຮັດໃຫ້ທັງຈິດໃຈ ແລະ ວິນຍານສົດຊື່ນຂຶ້ນ. ດັ່ງທີ່ແອວມາໄດ້ສິດສອນ, ເມື່ອທ່ານ “ປູກ” ພຣະຄຳຂອງພຣະເຈົ້າໄວ້ໃນໃຈຂອງທ່ານ, ມັນຈະ “ເຮັດໃຫ້ຄວາມເຂົ້າໃຈ [ຂອງທ່ານ] ແຈ້ງອອກ” ແລະ ເລີ່ມມີລົດແຊບສຳລັບທ່ານ (ແອວມາ 32:28; ເບິ່ງ ເອໂນດ 1:3–4 ນຳອີກ). ເມື່ອທ່ານສືບຕໍ່ສຶກສາ ແລະ ນຳໃຊ້ພຣະຄຳຂອງພຣະເຈົ້າ, ມັນຈະ “ແຕກຮາກ; ແລະ … ຈະເປັນຕົ້ນທີ່ງອກງາມໄປສູ່ຊີວິດອັນເປັນນິດ” (ແອວມາ 32:41; ເບິ່ງ ຂໍ້ທີ 42–43 ນຳອີກ). ຄວາມຮູ້ ແລະ ປະຈັກພະຍານຂອງທ່ານເຖິງພຣະກິດຕິຄຸນຈະເພີ່ມຂຶ້ນ. ຄວາມປາດຖະໜາ ແລະ ຄວາມສາມາດຂອງທ່ານທີ່ຈະແບ່ງປັນພຣະກິດຕິຄຸນຈະເພີ່ມຂຶ້ນເຊັ່ນກັນ.

ການຮຽນຮູ້ຈາກຄູທີ່ດີເປັນສິ່ງສຳຄັນ, ແຕ່ກໍສຳຄັນຄືກັນທີ່ທ່ານຈະຕ້ອງມີປະສົບການ ການຮຽນຮູ້ທີ່ມີຄວາມໝາຍ ຈາກການສຶກສາພຣະຄຳພີດ້ວຍຕົວທ່ານເອງ. ສິ່ງນີ້ເປັນຄວາມຈິງສຳລັບຄົນທີ່ທ່ານສິດສອນ.

ການເຂົ້າໃຈພຣະຄຳພີອາດເປັນການທ້າທາຍໃນຕອນຕົ້ນ. ເຖິງຢ່າງໃດກໍຕາມ, ເມື່ອທ່ານບາກບັ່ນອົດທົນໃນການສຶກສາພຣະຄຳຂອງພຣະເຈົ້າ, ຄວາມເຂົ້າໃຈຂອງທ່ານຈະເຕີບໂຕຂຶ້ນ. ທ່ານຈະມາສະສົມເວລາຂອງທ່ານກັບພຣະຄຳພີ. ທ່ານຈະຕັ້ງຕາລໍຄອຍສິ່ງທີ່ທ່ານຈະໄດ້ຮຽນຮູ້ ແລະ ປະສົບການດ້ວຍໃຈຈົດຈໍ່.

ການໄດ້ຮູ້ຈັກ ແລະ ຮັກພຣະຄຳພີສາມາດເປັນພອນອັນຍິ່ງໃຫຍ່ຕະຫລອດຊີວິດ ໃນການຮັບໃຊ້ເຜີຍແຜ່ຂອງທ່ານ. ເມື່ອທ່ານປະສົບກັບພອນຂອງການສຶກສາພຣະຄຳພີ ລະຫວ່າງການເຜີຍແຜ່ຂອງທ່ານ, ທ່ານຈະຢາກສືບຕໍ່ໄປຕະຫລອດຊີວິດຂອງທ່ານ.

ຮູບພາບ
ແອວເດີ ດີ ທອດ ຄຣິສໂຕເຟີສັນ

“ຈຸດປະສົງແທ້ໆຂອງພຣະຄຳພີ ຄືທີ່ຈະເຮັດໃຫ້ຈິດວິນຍານເຕັມໄປດ້ວຍສັດທາໃນພຣະເຈົ້າອົງເປັນພຣະບິດາ ແລະ ໃນພຣະບຸດຂອງພຣະອົງ, ພຣະເຢຊູຄຣິດ—ມີສັດທາວ່າ ພວກພຣະອົງເປັນຢູ່; ວ່າແຜນຂອງພຣະບິດາແມ່ນສຳລັບຊີວິດອະມະຕະ ແລະ ນິລັນດອນຂອງເຮົາ; ມີສັດທາໃນການຊົດໃຊ້ ແລະ ການຟື້ນຄືນພຣະຊົນຂອງພຣະເຢຊູຄຣິດ, ຊຶ່ງເຮັດໃຫ້ແຜນແຫ່ງຄວາມສຸກນີ້ເປັນໄປໄດ້; ມີສັດທາທີ່ຈະເຮັດໃຫ້ພຣະກິດຕິຄຸນຂອງພຣະເຢຊູຄຣິດເປັນວິຖີຊີວິດຂອງເຮົາ; ແລະ ມີສັດທາທີ່ຈະມາຮູ້ຈັກ ‘ພຣະເຈົ້າທ່ຽງແທ້ແຕ່ອົງດຽວ, ແລະ ພຣະເຢຊູຄຣິດ, ຜູ້ທີ່ພຣະອົງໃຊ້ມາ’ (ໂຢຮັນ 17:3)” (D. Todd Christofferson, “The Blessing of Scripture,” Liahona, May 2010, 34).

ການສຶກສາສ່ວນຕົວ

ເບິ່ງຮູບພາບຂອງໂຈເຊັບ ສະມິດ ໃນຕອນຕົ້ນຂອງບົດນີ້. ອ່ານ ໂຈເຊັບ ສະມິດ—ປະຫວັດ 1:11–13. ຕອບຄຳຖາມດັ່ງຕໍ່ໄປນີ້ໃນບັນທຶກການສຶກສາຂອງທ່ານ.

ການອ່ານ ແລະ ການໄຕ່ຕອງຂອງໂຈເຊັບ ສະມິດ ກ່ຽວກັບ ຢາໂກໂບ 1:5 ເຮັດໃຫ້ເພິ່ນໄດ້ຮັບການເປີດເຜີຍແນວໃດ?
ການສຶກສາຂອງເພິ່ນມີອິດທິພົນຕໍ່ຄົນລຸ້ນຫລັງແນວໃດ?
ການຕັດສິນໃຈຂອງເພິ່ນທີ່ຈະສຶກສາ ແລະ ສະແຫວງຫາ ມີຜົນກະທົບຕໍ່ຊີວິດຂອງທ່ານແນວໃດ?
ການສຶກສາພຣະກິດຕິຄຸນຂອງທ່ານມີອິດທິພົນຕໍ່ຊີວິດຂອງທ່ານ ແລະ ຕໍ່ຊີວິດຂອງຄົນອື່ນແນວໃດ?

ການສຶກສາພຣະຄຳພີ

ທ່ານສາມາດຮຽນຮູ້ຫຍັງແດ່ຈາກຂໍ້ພຣະຄຳພີດັ່ງຕໍ່ໄປນີ້ ກ່ຽວກັບວິທີການເຂົ້າຫາການສຶກສາພຣະກິດຕິຄຸນ?

ສະແຫວງຫາພຣະວິນຍານ

ການຮຽນຮູ້ພຣະກິດຕິຄຸນເປັນຫລາຍກວ່າການໄດ້ຮັບຂໍ້ມູນເທົ່ານັ້ນ. ມັນຍັງເປັນຂະບວນການທາງວິນຍານຂອງການນຳໃຊ້ຄວາມຈິງນິລັນດອນ ພາຍໃຕ້ການນຳພາຂອງພຣະວິນຍານບໍລິສຸດນຳອີກ (ເບິ່ງ ຢາໂຄບ 4:8; ຄຳສອນ ແລະ ພັນທະສັນຍາ 50:19–25). ສະແຫວງຫາ ແລະ ໄວ້ວາງໃຈພຣະວິນຍານເພື່ອສິດສອນທ່ານ ຂະນະທີ່ທ່ານສຶກສາພຣະຄຳພີ. ສິ່ງນີ້ຈະເກີດຂຶ້ນໃນລະດັບທີ່ທ່ານປຽບທຽບພຣະຄຳພີກັບຕົວເອງ ດ້ວຍຄວາມຕັ້ງໃຈທີ່ຈະປະຕິບັດຕາມສິ່ງທີ່ທ່ານຮຽນຮູ້ (ເບິ່ງ 1 ນີໄຟ 19:23; ໂມໂຣໄນ 10:4; ໂຈເຊັບ ສະມິດ—ປະຫວັດ 1:18).

ການສຶກສາພຣະຄຳພີດ້ວຍການອະທິຖານ ຈະເປີດປ່ອງຢ້ຽມແຫ່ງການເປີດເຜີຍໃຫ້ພຣະວິນຍານກ່າວກັບຈິດໃຈ ແລະ ຫົວໃຈຂອງທ່ານ. ພຣະອົງຈະອວຍພອນທ່ານດ້ວຍການນຳພາ, ການດົນໃຈ, ແລະ ຕອບຄຳຖາມຂອງທ່ານ. ຜ່ານທາງການສຶກສາພຣະຄຳພີຂອງທ່ານ, ພຣະວິນຍານບໍລິສຸດຈະເພີ່ມຄວາມເຂັ້ມແຂງ ແລະ ປອບໂຍນທ່ານ. ພຣະອົງຈະໃຫ້ຄວາມຮູ້ ແລະ ຄວາມເຊື່ອໝັ້ນແກ່ທ່ານ ທີ່ຈະເປັນພອນໃຫ້ແກ່ຊີວິດຂອງທ່ານ ແລະ ເຮັດໃຫ້ທ່ານເປັນພອນໃຫ້ແກ່ຄົນອື່ນຊົ່ວນິລັນດອນ.

ການສຶກສາພຣະຄຳພີ

ແມ່ນຫຍັງຄືບົດບາດຂອງພຣະວິນຍານບໍລິສຸດໃນການຊ່ວຍເຫລືອຜູ້ຄົນໃຫ້ຮຽນຮູ້ພຣະກິດຕິຄຸນ?

ຊອກຫາຄຳຕອບໃຫ້ກັບຄຳຖາມ

ໃນຖານະຜູ້ສອນສາດສະໜາ, ທ່ານຈະໄດ້ຍິນຄຳຖາມຫລາຍຢ່າງ. ທ່ານກໍຍັງຈະມີຄຳຖາມຂອງທ່ານເອງນຳອີກ. ການຄົ້ນຄວ້າພຣະຄຳພີ ແລະ ແຫລ່ງຂໍ້ມູນອື່ນໆທີ່ໄດ້ຮັບການອະນຸມັດ ເພື່ອຫາຄຳຕອບໃຫ້ກັບຄຳຖາມເຫລົ່ານີ້ ເປັນວິທີທີ່ມີພະລັງໃນການສຶກສາ. ບັນທຶກຄຳຖາມ ແລະ ສິ່ງທີ່ທ່ານຮຽນຮູ້ ແລະ ຮູ້ສຶກໄວ້ໃນບັນທຶກການສຶກສາຂອງທ່ານ.

ໃຊ້ແຫລ່ງຂໍ້ມູນທີ່ຖືກຕ້ອງ ແລະ ເຊື່ອຖືໄດ້ໃນການສຶກສາຂອງທ່ານ—ໂດຍສະເພາະພຣະຄຳພີ, ຖ້ອຍຄຳຂອງສາດສະດາທີ່ມີຊີວິດຢູ່, ແລະ ຈົ່ງສັ່ງສອນພຣະກິດຕິຄຸນຂອງເຮົາ. ໃຊ້ແຫລ່ງຂໍ້ມູນໃນ ຫ້ອງສະໝຸດພຣະກິດຕິຄຸນ, ດັ່ງເຊັ່ນ ຄູ່ມືພຣະຄຳພີ, Bible Dictionary, ດັດຊະນີຂອງພຣະຄຳພີສາມເຫລັ້ມ, Gospel Topics, ແລະ Gospel Topics essays. ຮຽນຮູ້ວ່າມີແຫລ່ງຂໍ້ມູນໃດແດ່ໃນພາສາຂອງຜູ້ຄົນທີ່ທ່ານສິດສອນ.

ຮູບພາບ
ປະທານເອັມ ຣະໂຊ ບາເລີດ

“ສິ່ງໜຶ່ງທີ່ຂ້າພະເຈົ້າໄດ້ຮຽນຮູ້ໃນຊີວິດຄື ພຣະຜູ້ເປັນເຈົ້າຈະຕອບຄຳຖາມ ແລະ ໃຫ້ຄຳແນະນຳແກ່ເຮົາຜ່ານທາງພຣະຄຳພີເລື້ອຍໆ. … ແລ້ວໃຫ້ເຮົາໄປຫາພຣະຜູ້ເປັນເຈົ້າໃນການອະທິຖານ, ອ້ອນວອນຂໍຄວາມຊ່ວຍເຫລືອ ຫລື ຄຳຕອບ; ແລະ ຄຳຕອບເຫລົ່ານັ້ນຈະມາ ເມື່ອເຮົາເປີດພຣະຄຳພີ ແລະ ເລີ່ມສຶກສາ. ບາງຄັ້ງມັນຄືກັນກັບວ່າ ຂໍ້ພຣະຄຳພີໃດໜຶ່ງທີ່ມີອາຍຸຫລາຍຮ້ອຍ ຫລື ຫລາຍພັນປີໄດ້ຖືກບັນຍາຍໂດຍສະເພາະ ເພື່ອຕອບຄຳຖາມຂອງເຮົາ” (M. Russell Ballard, “Be Strong in the Lord, and in the Power of His Might” [Brigham Young University fireside, Mar. 3, 2002], 5, speeches.byu.edu).

ດຳລົງຊີວິດຕາມສິ່ງທີ່ທ່ານຮຽນຮູ້

ເມື່ອທ່ານຮູ້ສຶກເຖິງຄວາມຊື່ນຊົມທີ່ມາຈາກການເຂົ້າໃຈພຣະກິດຕິຄຸນ, ທ່ານຈະຢາກໃຊ້ສິ່ງທີ່ທ່ານຮຽນຮູ້. ພະຍາຍາມດຳລົງຊີວິດໃຫ້ສອດຄ່ອງກັບສິ່ງທີ່ທ່ານຮຽນຮູ້. ການເຮັດເຊັ່ນນັ້ນຈະເພີ່ມຄວາມເຂັ້ມແຂງໃຫ້ແກ່ສັດທາ, ຄວາມຮູ້, ແລະ ປະຈັກພະຍານຂອງທ່ານ. ການປະຕິບັດຕາມສິ່ງທີ່ທ່ານຮຽນຮູ້ຈະນຳຄວາມເຂົ້າໃຈເພີ່ມເຕີມ ແລະ ຍືນຍົງມາໃຫ້. (ເບິ່ງ ໂຢຮັນ 7:17.)

ຮູບພາບ
ປະທານບອຍ ເຄ ແພ໊ກເກີ

“ຄຳສອນທີ່ແທ້ຈິງ, ທີ່ຖືກເຂົ້າໃຈ, ປ່ຽນແປງທັດສະນະ ແລະ ພຶດຕິກຳ. ການສຶກສາຄຳສອນຂອງພຣະກິດຕິຄຸນຈະເຮັດໃຫ້ພຶດຕິກຳດີຂຶ້ນໄວກວ່າການສຶກສາພຶດຕິກຳຈະປັບປຸງພຶດຕິກຳ” (“Do Not Fear,” Liahona, May 1986, 17).

ການສຶກສາສ່ວນຕົວ

ຂໍ້ພຣະຄຳພີດັ່ງຕໍ່ໄປນີ້ສິດສອນຫຍັງແດ່ກ່ຽວກັບການຮຽນຮູ້ພຣະກິດຕິຄຸນ?

ໃຊ້ຫ້ອງສະໝຸດພຣະກິດຕິຄຸນ

ຫ້ອງສະໝຸດພຣະກິດຕິຄຸນເປັນແຫລ່ງຂໍ້ມູນອອນລາຍທີ່ສາມາດເສີມຂະຫຍາຍການສຶກສາ ແລະ ການສິດສອນຂອງທ່ານໄດ້ຢ່າງຫລວງຫລາຍ. ໃຫ້ຄຸ້ນເຄີຍກັບຄຸນລັກສະນະຫລາຍຢ່າງຂອງມັນ. ຜົນປະໂຫຍດບາງຢ່າງຂອງການໃຊ້ຫ້ອງສະໝຸດພຣະກິດຕິຄຸນເປັນສ່ວນໜຶ່ງຂອງການສຶກສາ ແລະ ການສິດສອນຂອງທ່ານ ມີຢູ່ໃນລາຍການຂ້າງລຸ່ມນີ້.

ມັນໃຫ້ທ່ານເຂົ້າເຖິງພຣະຄຳພີ, ຖ້ອຍຄຳຂອງສາດສະດາທີ່ມີຊີວິດຢູ່, ແລະ ເນື້ອຫາອື່ນໆຂອງສາດສະໜາຈັກ ໃນຫລາຍພາສາ ໃນຮູບແບບທີ່ເປັນຂໍ້ຄວາມ, ສຽງ, ແລະ ວິດີໂອ.
ຖ້າຫາກທ່ານບັນທຶກສິ່ງທີ່ທ່ານຮຽນຮູ້ ແລະ ຄວາມປະທັບໃຈທີ່ໄດ້ຮັບ ໄວ້ໃນຫ້ອງສະໝຸດພຣະກິດຕິຄຸນ, ທ່ານສາມາດສືບຕໍ່ເຂົ້າເຖິງຂໍ້ມູນ ແລະ ໄດ້ຮັບຄວາມເຂັ້ມແຂງໂດຍຂໍ້ມູນນັ້ນຫລັງຈາກການເຜີຍແຜ່ຂອງທ່ານ.
ມັນຊ່ວຍໃຫ້ທ່ານແບ່ງປັນຂໍ້ພຣະຄຳພີ, ຄຳເວົ້າຈາກສາດສະດາທີ່ມີຊີວິດຢູ່, ແລະ ວິດີໂອໄດ້ຢ່າງງ່າຍດາຍ ກັບຜູ້ທີ່ທ່ານກຳລັງສິດສອນ.
ຜູ້ຄົນທີ່ທ່ານສິດສອນ ແລະ ໃຫ້ບັບຕິສະມາ ສ່ວນຫລາຍຈະໃຊ້ຫ້ອງສະໝຸດພຣະກິດຕິຄຸນ ເພື່ອເຂົ້າຫາແຫລ່ງຂໍ້ມູນຂອງສາດສະໜາຈັກ. ໃຫ້ຄຸ້ນເຄີຍກັບຄຸນລັກສະນະຂອງຫ້ອງສະໝຸດພຣະກິດຕິຄຸນ ເພື່ອວ່າທ່ານຈະສາມາດຊ່ວຍເຂົາເຈົ້າຮຽນຮູ້ທີ່ຈະໃຊ້ມັນ.

ການສຶກສາສ່ວນຕົວ

ທົບທວນ “Gospel Library User Guide.” ເລືອກຄຸນລັກສະນະໃນຫ້ອງສະໝຸດພຣະກິດຕິຄຸນ ເພື່ອລອງເບິ່ງໃນການສຶກສາສ່ວນຕົວ ແລະ ການສຶກສາກັບຄູ່ສອນ ເທື່ອຕໍ່ໄປຂອງທ່ານ. ຄຸນລັກສະນະນີ້ຊ່ວຍໃນການສຶກສາຂອງທ່ານແນວໃດ? ເທື່ອໜ້າທ່ານຈະລອງຫຍັງແດ່? ສິດສອນຜູ້ສອນສາດສະໜາຄົນອື່ນໆກ່ຽວກັບສິ່ງທີ່ທ່ານຮຽນຮູ້.

ໃຊ້ເທັກໂນໂລຈີຢ່າງຊອບທຳ

ພຣະຜູ້ເປັນເຈົ້າ ແລະ ສາດສະດາຂອງພຣະອົງໄດ້ມອບເທັກໂນໂລຈີໃຫ້ທ່ານ ເພື່ອຊ່ວຍໃຫ້ວຽກງານຂອງພຣະອົງສຳເລັດ. ເທັກໂນໂລຈີສາມາດປັບປຸງການສຶກສາພຣະຄຳພີຂອງທ່ານ ແລະ ຈົ່ງສັ່ງສອນພຣະກິດຕິຄຸນຂອງເຮົາ. ແຫລ່ງຂໍ້ມູນໃນຮູບແບບດິຈິຕັນກໍສາມາດຊ່ວຍທ່ານວາງແຜນໄດ້ເຊັ່ນກັນ. ມັນສາມາດຊ່ວຍໃນການສິດສອນຂອງທ່ານ ແລະ ໃນຄວາມພະຍາຍາມຂອງທ່ານ ໃນການຊອກຫາຄົນເພື່ອສິດສອນ.

ການໃຊ້ເທັກໂນໂລຈີຢ່າງສະຫລາດ ແລະ ຊອບທຳ ສາມາດຊ່ວຍໃຫ້ທ່ານບັນລຸຈຸດປະສົງການເຜີຍແຜ່ຂອງທ່ານໄດ້ ແລະ ໃຊ້ເວລາຢ່າງມີປະສິດທິພາບ. ມັນກໍຍັງສາມາດຊ່ວຍໃຫ້ທ່ານຫລີກລ້ຽງຈາກເນື້ອຫາທີ່ບໍ່ເໝາະສົມນຳອີກ.

ປະຕິບັດຕາມພຣະວິນຍານວ່າຈະໃຊ້ເທັກໂນໂລຈີເມື່ອໃດ ແລະ ວິທີໃດ ໃນທາງທີ່ຈະຊ່ວຍເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານໃນພຣະເຢຊູຄຣິດ ແລະ ສັດທາຂອງຜູ້ທີ່ທ່ານຮັບໃຊ້ ແລະ ສິດສອນ.

ປະຕິບັດຕາມມາດຕະການປ້ອງກັນສຳລັບການໃຊ້ເທັກໂນໂລຈີ

ມາດຕະການປ້ອງກັນສີ່ຢ່າງຢູ່ຂ້າງລຸ່ມ ຈະຊ່ວຍໃຫ້ທ່ານໃຊ້ເທັກໂນໂລຈີໄດ້ຢ່າງເໝາະສົມ. ການປະຕິບັດຕາມມາດຕະການປ້ອງກັນເຫລົ່ານີ້ເປັນວິທີທີ່ສຳຄັນສຳລັບທ່ານທີ່ຈະ “ສວມຍຸດທະພັນຄົບຊຸດ ຊຶ່ງພຣະເຈົ້າໂຜດປະທານໃຫ້ພວກເຈົ້າ ເພື່ອວ່າພວກເຈົ້າຈະສາມາດຢືນຕໍ່ສູ້ກັບກົນອຸບາຍຂອງມານຮ້າຍໄດ້” (ເອເຟໂຊ 6:11).

ສອດຄ່ອງກັບການກະຕຸ້ນທາງວິນຍານ

ນີໄຟໄດ້ສັນຍາວ່າ, “ຖ້າຫາກພວກທ່ານຈະເຂົ້າໄປໂດຍທາງນັ້ນ ແລະ ໄດ້ຮັບພຣະວິນຍານບໍລິສຸດ, ພຣະອົງຈະສະແດງທຸກຢ່າງທີ່ພວກທ່ານຄວນເຮັດໃຫ້ແກ່ພວກທ່ານ” (2 ນີໄຟ 32:5). ພຣະບິດາເທິງສະຫວັນຂອງທ່ານໄດ້ມອບຂອງປະທານທີ່ມີພະລັງສອງຢ່າງໃຫ້ທ່ານ ເພື່ອຊ່ວຍທ່ານຄື: ອຳເພີໃຈທາງສິນທຳ ແລະ ຂອງປະທານແຫ່ງພຣະວິນຍານບໍລິສຸດ. ທ່ານມີອຳນາດທີ່ຈະເລືອກເຮັດຕາມການນຳພາຂອງພຣະວິນຍານບໍລິສຸດ. ການນຳພາຂອງພຣະອົງແມ່ນສຳຄັນໃນການຊ່ວຍທ່ານໃຫ້ເຮັດຄວາມດີ ຂະນະທີ່ທ່ານໃຊ້ເທັກໂນໂລຈີ. ມັນຍັງຊ່ວຍປົກປ້ອງທ່ານຈາກສິ່ງຊົ່ວຮ້າຍນຳອີກ.

ຈົ່ງສຸມໃສ່ຈຸດປະສົງການເຜີຍແຜ່ຂອງທ່ານ

ພຣະຜູ້ເປັນເຈົ້າໄດ້ກ່າວວ່າ, “ຖ້າຫາກດວງຕາຂອງພວກເຈົ້າ ເຫັນແກ່ລັດສະໝີພາບຂອງເຮົາແຕ່ຢ່າງດຽວ, ທັງຮ່າງກາຍຂອງພວກເຈົ້າຈະເຕັມໄປດ້ວຍຄວາມສະຫວ່າງ, ແລະ ຈະບໍ່ມີຄວາມມືດໃນພວກເຈົ້າ; ແລະ ຮ່າງກາຍນັ້ນ ຊຶ່ງເຕັມໄປດ້ວຍຄວາມສະຫວ່າງ ເຂົ້າໃຈທຸກສິ່ງທັງປວງ” (ຄຳສອນ ແລະ ພັນທະສັນຍາ 88:67). ການເຫັນແກ່ລັດສະໝີພາບຂອງພຣະເຈົ້າແຕ່ຢ່າງດຽວ ໝາຍເຖິງການສຸມໃສ່ຈຸດປະສົງຂອງພຣະເຈົ້າແທ້ໆ, ຊຶ່ງກໍເປັນຈຸດປະສົງຂອງທ່ານໃນຖານະຜູ້ສອນສາດສະໜາເຊັ່ນກັນ.

ການໃຊ້ເທັກໂນໂລຈີຂອງທ່ານຄວນມີຈຸດໃຈກາງຢູ່ທີ່ຈຸດປະສົງຂອງທ່ານ. ເປີດອຸປະກອນຂອງທ່ານພຽງແຕ່ຫລັງຈາກທີ່ທ່ານໄດ້ກຳນົດຈຸດປະສົງການເຜີຍແຜ່ທີ່ທ່ານຈະໃຊ້ເຮັດເທົ່ານັ້ນ. ແລ້ວປິດມັນເມື່ອເຮັດຈຸດປະສົງນັ້ນແລ້ວ.

ທ່ານມີແນວໂນ້ມທີ່ຈະພົບເນື້ອຫາທີ່ບໍ່ເໝາະສົມໃນອິນເຕີເນັດ ເມື່ອທ່ານກຳລັງທ່ອງເວັບຢ່າງສະບາຍໆ ໂດຍບໍ່ມີຈຸດປະສົງສະເພາະຢູ່ໃນໃຈ.

ຮູບພາບ

ຜູ້ສອນສາດສະໜາກຳລັງຫລຽວເບິ່ງໂທລະສັບ

ມີລະບຽບວິໄນ

ມໍມອນໄດ້ຂຽນວ່າ: “ຂ້າພະເຈົ້າເປັນສານຸສິດຂອງພຣະເຢຊູຄຣິດ, ພຣະບຸດຂອງພຣະເຈົ້າ. ຂ້າພະເຈົ້າໄດ້ຮັບການເອີ້ນຈາກພຣະອົງ ໃຫ້ປະກາດພຣະຄຳໃນບັນດາຜູ້ຄົນຂອງພຣະອົງ, ເພື່ອພວກເຂົາຈະໄດ້ມີຊີວິດອັນເປັນນິດ” (3 ນີໄຟ 5:13). ຄືກັນກັບມໍມອນ, ທ່ານເປັນສານຸສິດຂອງພຣະຄຣິດ. ການຮັບໃຊ້ໃນຖານະຜູ້ສອນສາດສະໜາເຕັມເວລາ ເປັນໂອກາດພິເສດທີ່ຈະເຮັດໃຫ້ການເປັນສານຸສິດຂອງທ່ານເລິກເຊິ່ງ.

ຄຳວ່າ ສານຸສິດ ແລະ ລະບຽບວິໄນ ແມ່ນມາຈາກຮາກສັບດຽວກັນ ຊຶ່ງແປວ່າ “ຜູ້ຮຽນ” ຫລື “ນັກຮຽນ.” ການເປັນສານຸສິດຂອງພຣະຄຣິດ ໝາຍຄວາມວ່າທ່ານສະແຫວງຫາທີ່ຈະຕິດຕາມພຣະອົງ ແລະ ຮັກສາພຣະບັນຍັດຂອງພຣະອົງ. ມັນໝາຍຄວາມວ່າ ທ່ານຮຽນຮູ້ ແລະ ສິດສອນກ່ຽວກັບພຣະຄຣິດຢ່າງສະໝ່ຳສະເໝີ.

ມີລະບຽບວິໄນ ແລະ ເລືອກຢ່າງຊອບທຳໃນການໃຊ້ເທັກໂນໂລຈີ. ເລືອກປະຕິບັດຕາມມາດຕະການປ້ອງກັນ. ເມື່ອທ່ານກຳລັງເວົ້າລົມແບບໜ້າຕໍ່ໜ້າກັບຜູ້ຄົນ, ຢ່າກວດເບິ່ງຂໍ້ຄວາມ ຫລື ຮັບສາຍ. ຄວບຄຸມວິທີທີ່ທ່ານໃຊ້ອຸປະກອນເຫລົ່ານີ້. ຢ່າປ່ອຍໃຫ້ມັນຄວບຄຸມທ່ານ.

ພຣະຜູ້ເປັນເຈົ້າໄດ້ປະກາດວ່າ, “ຄົນໃດທີ່ຍອມຮັບກົດຂອງເຮົາ ແລະ ປະຕິບັດຕາມ, ຄົນໆນັ້ນເປັນສານຸສິດຂອງເຮົາ; ແລະ ຄົນໃດທີ່ກ່າວວ່າເຂົາຍອມຮັບມັນ ແລະ ບໍ່ປະຕິບັດຕາມ, ຄົນໆນັ້ນບໍ່ໄດ້ເປັນສານຸສິດຂອງເຮົາ” (ຄຳສອນ ແລະ ພັນທະສັນຍາ 41:5). ເຖິງແມ່ນບໍ່ມີໃຜດີພ້ອມທຸກຢ່າງ, ແຕ່ພຣະຜູ້ເປັນເຈົ້າຄາດຫວັງໃຫ້ພະຍາຍາມຕິດຕາມພຣະອົງຢ່າງສະໝ່ຳສະເໝີ ແລະ ຕໍ່ເນື່ອງ.

ຄວາມງົດງາມຂອງພຣະກິດຕິຄຸນຄື ເຮົາສາມາດໄດ້ຮັບການໃຫ້ອະໄພເມື່ອເຮົາກັບໃຈ—ແລະ ພຣະຜູ້ເປັນເຈົ້າຕ້ອງການໃຫ້ເຮົາກັບໃຈໂດຍບໍ່ຊັກຊ້າ (ເບິ່ງ ຄຳສອນ ແລະ ພັນທະສັນຍາ 109:21). ຖ້າຫາກທ່ານເຮັດຜິດ, ລວມທັງການໃຊ້ເທັກໂນໂລຈີ, ຈົ່ງກັບໃຈໃນເວລານັ້ນ ແລະ ພະຍາຍາມດຳລົງຊີວິດຕາມກົດຂອງພຣະອົງ. ນີ້ຄືສ່ວນໜຶ່ງຂອງການເປັນສານຸສິດຂອງພຣະຄຣິດ.

ເປັນອັນໜຶ່ງດຽວກັນ

ພຣະຜູ້ເປັນເຈົ້າໄດ້ກ່າວວ່າ, “ຈົ່ງເປັນອັນໜຶ່ງດຽວກັນ; ແລະ ຖ້າຫາກພວກເຈົ້າບໍ່ເປັນອັນໜຶ່ງອັນດຽວກັນພວກເຈົ້າກໍບໍ່ແມ່ນຂອງເຮົາ” (ຄຳສອນ ແລະ ພັນທະສັນຍາ 38:27). ຊ່ວຍໃຫ້ການເຜີຍແຜ່ຂອງທ່ານພັດທະນາວັດທະນະທຳຂອງຄວາມສາມັກຄີ, ຄວາມໄວ້ວາງໃຈ, ຄວາມຮັບຜິດຊອບ, ແລະ ຄວາມເຫັນອົກເຫັນໃຈ ເພື່ອໃຫ້ທ່ານສາມາດເສີມສ້າງ ແລະ ສະໜັບສະໜູນຊຶ່ງກັນແລະກັນ.

ຜູ້ສອນສາດສະໜາທຸກຄົນຄວນຮູ້ສຶກສະບາຍໃຈທີ່ຈະຂໍຄວາມຊ່ວຍເຫລືອເມື່ອຈຳເປັນ. ຜູ້ສອນສາດສະໜາທີ່ເຂັ້ມແຂງທາງວິນຍານ ສາມາດຊ່ວຍຜູ້ທີ່ຮູ້ສຶກອ່ອນແອໄດ້ (ເບິ່ງ ຄຳສອນ ແລະ ພັນທະສັນຍາ 84:106). ຖ້າຫາກທ່ານຮູ້ສຶກຖືກລໍ້ໃຈ, ຂໍໃຫ້ຄູ່ສອນ ຫລື ຜູ້ນຳເຜີຍແຜ່ຂອງທ່ານຊ່ວຍເຫລືອ.

ການທ້າທາຍເກືອບທັງໝົດທີ່ກ່ຽວຂ້ອງກັບອິນເຕີເນັດ ຫລື ຮູບພາບລາມົກ ເກີດຂຶ້ນໃນຄວາມຢູ່ໂດດດ່ຽວ. ໃຊ້ອຸປະກອນພຽງແຕ່ເມື່ອພວກທ່ານເຫັນໜ້າຈໍຂອງກັນແລະກັນເທົ່ານັ້ນ. ມີຄວາມກ້າຫານ ແລະ ມີຄວາມຮັບຜິດຊອບຕໍ່ກັນແລະກັນ.

ພຣະຜູ້ເປັນເຈົ້າມີຄວາມໝັ້ນພຣະໄທໃນຜູ້ສອນສາດສະໜາແຕ່ລະຄົນ ທີ່ພຣະອົງໄດ້ເອີ້ນ, ລວມທັງທ່ານ. ພຣະອົງໄດ້ຈັດຫາໝູ່ເພື່ອນ ແລະ ຜູ້ນຳທີ່ຈະຊ່ວຍປົກປ້ອງ ແລະ ສະໜັບສະໜູນທ່ານ. ເຊັ່ນດຽວກັບທີ່ແອວມາໄດ້ຮັບການສະໜັບສະໜູນໂດຍຄູ່ສອນຂອງເພິ່ນ ແອມມິວເລັກ, ຈົ່ງສະແຫວງຫາຄວາມເຂັ້ມແຂງຈາກກັນແລະກັນ (ເບິ່ງ ແອວມາ 15:18).

ທ່ານຈະເຮັດສິ່ງໃດ ຖ້າຫາກທ່ານຮູ້ສຶກມີຄວາມສ່ຽງ ຫລື ອ່ອນໄຫວ?

ການຮຽນຮູ້ທີ່ຈະປະຕິບັດຕາມມາດຕະການປ້ອງກັນສີ່ຢ່າງເຫລົ່ານີ້ ຮຽກຮ້ອງໃຫ້ມີຄວາມພະຍາຍາມ, ມີລະບຽບວິໄນ, ແລະ ການປະຕິບັດ. ເຖິງແມ່ນຫລັງຈາກມາດຕະການປົກປ້ອງກາຍເປັນສ່ວນທຳມະຊາດຂອງວິທີທີ່ທ່ານຄິດ ແລະ ປະຕິບັດແລ້ວ, ທ່ານຈະມີເວລາທີ່ທ່ານຮູ້ສຶກວ່າມີຄວາມສ່ຽງ ຫລື ອ່ອນໄຫວ. ບາງທີທ່ານອາດມີນິໄສບໍ່ດີດ້ານເທັກໂນໂລຈີ ກ່ອນການເຜີຍແຜ່ຂອງທ່ານ ທີ່ຍາກຈະເອົາຊະນະໄດ້. ຜູ້ສອນສາດສະໜາບາງຄົນມີບັນຫາກັບຮູບພາບລາມົກ ກ່ອນການເອີ້ນຂອງເຂົາເຈົ້າ ແລະ ອາດຖືກລໍ້ໃຈໃຫ້ກັບຄືນໄປຫາແບບແຜນພຶດຕິກຳເກົ່າ.

ຫລັກທຳຢູ່ຂ້າງລຸ່ມນີ້ຈະຊ່ວຍໃຫ້ທ່ານດຳລົງຊີວິດຕາມມາດຕະການປ້ອງກັນ ແລະ ປ້ອງກັນຕົວເອງຈາກການຖືກລໍ້ລວງ:

ລະວັງຄວາມນຶກຄິດ, ຄວາມຮູ້ສຶກ, ແລະ ພຶດຕິກຳ. ເຂົ້າໃຈວ່າມັນສາມາດເຮັດໃຫ້ທ່ານມີຄວາມສ່ຽງໃນການໃຊ້ເທັກໂນໂລຈີແນວໃດ.
ເລືອກທີ່ຈະປະຕິບັດ. ຕອບສະໜອງຕໍ່ສິ່ງທີ່ທ່ານຮູ້ສຶກໃນວິທີທາງທີ່ຊອບທຳ ແລະ ມີປະສິດທິພາບ.
ຮຽນຮູ້, ກັບໃຈ, ແລະ ປັບປຸງ. ໃຊ້ປະສົບການຂອງທ່ານເພື່ອສືບຕໍ່ການຮຽນຮູ້ ແລະ ປັບປຸງ.

ທ່ານບໍ່ຈຳເປັນຕ້ອງເອົາຊະນະການທ້າທາຍດ້ວຍຕົນເອງ. ເພິ່ງອາໄສຄວາມເຂັ້ມແຂງທີ່ມາເຖິງຜ່ານທາງການຊົດໃຊ້ຂອງພຣະຜູ້ຊ່ວຍໃຫ້ລອດ ແລະ ພັນທະສັນຍາທີ່ທ່ານໄດ້ເຮັດກັບພຣະອົງ. ພຣະຜູ້ເປັນເຈົ້າຮູ້ເຖິງການທ້າທາຍທີ່ທ່ານປະເຊີນ, ແລະ ພຣະອົງຈະຊ່ວຍທ່ານໃນວຽກງານອັນຍິ່ງໃຫຍ່ນີ້.

ຈົ່ງຈື່ຈຳສະເໝີວ່າ ພຣະຜູ້ຊ່ວຍໃຫ້ລອດສາມາດຊ່ວຍທ່ານໃຊ້ເທັກໂນໂລຈີຢ່າງຊອບທຳ. ຈົ່ງຈິງໃຈຕໍ່ຄວາມໄວ້ວາງພຣະໄທທີ່ພຣະອົງປະທານໃຫ້ແກ່ທ່ານ. ຕັ້ງໃຈທີ່ຈະ “ເດີນໄປຢ່າງພາກພູມໃຈຕໍ່ພຣະພັກຂອງພຣະອົງ” (ແອວມາ 53:21; ເບິ່ງ ຂໍ້ທີ 20 ນຳອີກ). ການຮູ້ສຶກກະຕັນຍູສຳລັບທຸກສິ່ງທີ່ພຣະອົງ ແລະ ພຣະບິດາໄດ້ກະທຳເພື່ອທ່ານ ຈະຊ່ວຍໃຫ້ທ່ານຕັດສິນໃຈໄດ້ດີກ່ຽວກັບວິທີໃຊ້ແຫລ່ງດິຈິຕັນ.

ການເຜີຍແຜ່ຂອງທ່ານແມ່ນໂອກາດທີ່ດີເລີດ ທີ່ຈະຮຽນຮູ້ການໃຊ້ເທັກໂນໂລຈີຢ່າງສະຫລາດ. ຄຳໝັ້ນສັນຍາ ແລະ ນິໄສທີ່ດີທີ່ທ່ານພັດທະນາໃນລະຫວ່າງການເຜີຍແຜ່ຂອງທ່ານ ຈະເປັນປະໂຫຍດຕໍ່ທ່ານຕະຫລອດຊີວິດຂອງທ່ານ.

ສວມຍຸດທະພັນຂອງພຣະເຈົ້າ

ຄວາມສາມາດຂອງທ່ານທີ່ຈະຕ້ານທານກັບການລໍ້ລວງ ຈະເພີ່ມຂຶ້ນ ເມື່ອທ່ານສຶກສາ ແລະ ນຳໃຊ້ພຣະຄຳພີ, ຖ້ອຍຄຳຂອງສາດສະດາທີ່ມີຊີວິດຢູ່, ຈົ່ງສັ່ງສອນພຣະກິດຕິຄຸນຂອງເຮົາ, Missionary Standards for Disciples of Jesus Christ, ແລະ ມາດຕະການປ້ອງກັນມີລະບຸໄວ້ຢູ່ໃນບົດນີ້.

ຮູບພາບ

ຜູ້ສອນສາດສະໜາກຳລັງທັກທາຍຜູ້ຊາຍຄົນໜຶ່ງ

ໂດຍການສວມ “ຍຸດທະພັນຄົບຊຸດຂອງພຣະເຈົ້າ,” ທ່ານຈະສາມາດຫລິງເຫັນຄວາມຈິງຈາກຄວາມຜິດພາດ. ທ່ານຈະສວມຕີນຂອງທ່ານດ້ວຍ “ພຣະກິດຕິຄຸນແຫ່ງສັນຕິສຸກ.” ການສວມ “ແຜ່ນປົກເອິກແຫ່ງຄວາມຊອບທຳ” ຈະປົກປ້ອງທ່ານ. ດ້ວຍ “ເຄື່ອງປ້ອງກັນແຫ່ງສັດທາ,” ທ່ານຈະສາມາດດັບລູກສອນໄຟຂອງຜູ້ປໍລະປັກໄດ້. ທ່ານຈະຖື “ພຣະແສງຂອງພຣະວິນຍານ [ຂອງພຣະອົງ]” ເພື່ອສິດສອນຄວາມຈິງດ້ວຍພະລັງ ແລະ ສິດອຳນາດ. ທ່ານຈະໄດ້ຮັບການປ້ອງກັນຈາກອິດທິພົນທາງໂລກ ຖ້າບໍ່ດັ່ງນັ້ນອາດຈະພາທ່ານລ່ອງລອຍໄປ, ໂດດດ່ຽວ, ແລະ ແມ່ນແຕ່ແປກຕ່າງ. (ເບິ່ງ ເອເຟໂຊ 6:10–18; ເບິ່ງ 1 ນີໄຟ 8:20, 30; 15:24–25; ຮີລາມັນ 3:29–30; ຄຳສອນ ແລະ ພັນທະສັນຍາ 27:15–18; ໂຈເຊັບ ສະມິດ—ມັດທາຍ 1:37; 2 ຕີໂມທຽວ 3:15–17 ນຳອີກ.)

ການສຶກສາສ່ວນຕົວ

ອະທິຖານເພື່ອລະບຸມາດຕະການປ້ອງກັນຢ່າງໜຶ່ງທີ່ຄວນສຸມໃສ່ໃນອາທິດນີ້. ສະແຫວງຫາຄວາມຊ່ວຍເຫລືອຈາກພຣະຜູ້ເປັນເຈົ້າ. ບັນທຶກຄວາມຮູ້ສຶກຂອງທ່ານ ແລະ ສິ່ງທີ່ທ່ານກຳລັງຮຽນຮູ້.

ຈື່ຈຳສິ່ງນີ້

ການຄົ້ນຄວ້າພຣະຄຳພີ ແລະ ການພັດທະນານິໄສການສຶກສາທຸກວັນ ເພື່ອຮຽນຮູ້ພຣະກິດຕິຄຸນ ຈະເປັນພອນໃຫ້ແກ່ທ່ານຢ່າງຫລວງຫລາຍ ໃນຖານະຜູ້ສອນສາດສະໜາ ແລະ ຕະຫລອດຊີວິດຂອງທ່ານ.
ທ່ານຮຽນຮູ້ພຣະກິດຕິຄຸນໂດຍການສຶກສາ, ສັດທາ, ແລະ ອຳນາດຂອງພຣະວິນຍານບໍລິສຸດ.
ການໃຊ້ເທັກໂນໂລຈີຢ່າງຊອບທຳຈະຊ່ວຍໃຫ້ທ່ານບັນລຸຈຸດປະສົງການເຜີຍແຜ່ຂອງທ່ານ ແລະ ເປັນພອນໃຫ້ແກ່ທ່ານຕະຫລອດຊີວິດຂອງທ່ານ.
ປະຕິບັດຕາມມາດຕະການປ້ອງກັນນຳການໃຊ້ເທັກໂນໂລຈີ.
ຈົ່ງສວມຍຸດທະພັນຂອງພຣະເຈົ້າ.

ແນວຄິດສຳລັບການສຶກສາ ແລະ ການນຳໃຊ້

ການສຶກສາສ່ວນຕົວ

ໃຫ້ລອງໃຊ້ຄຳແນະນຳດັ່ງຕໍ່ໄປນີ້ເພື່ອສົ່ງເສີມການສຶກສາຂອງທ່ານ:
- ອ່ານພຣະຄຳພີໂດຍມີຄຳຖາມ ແລະ ຂໍ້ກັງວົນຢູ່ໃນໃຈ.
- ແບ່ງປັນສິ່ງທີ່ທ່ານຮຽນຮູ້ກັບຜູ້ສອນສາດສະໜາຄົນອື່ນ ແລະ ກັບຜູ້ທີ່ທ່ານສິດສອນ. ການອະທິບາຍຄຳສອນ ຫລື ຫລັກທຳ ຈະຊ່ວຍໃຫ້ທ່ານຈື່ຈຳມັນ ແລະ ໄດ້ຮັບຄວາມແຈ່ມແຈ້ງ.
- ສຶກສາຕາມຫົວຂໍ້. ສຸມໃສ່ຫົວຂໍ້ທີ່ຈະຊ່ວຍທ່ານ ແລະ ຜູ້ທີ່ທ່ານສິດສອນ.
- ຖາມຕົວເອງວ່າ, “ຜູ້ຂຽນກຳລັງເວົ້າຫຍັງ? ແມ່ນຫຍັງຄືຂ່າວສານຫລັກ? ສິ່ງນີ້ກ່ຽວຂ້ອງກັບເຮົາແນວໃດ? ອັນນີ້ຈະຊ່ວຍຄົນທີ່ເຮົາກຳລັງສິດສອນໄດ້ແນວໃດ?”
- ວາດພາບ ຫລື ແຕ້ມສິ່ງທີ່ທ່ານກຳລັງສຶກສາຢູ່. ຍົກຕົວຢ່າງ, ໃຫ້ນຶກພາບວ່າ ມັນໄດ້ເປັນແບບໃດທີ່ ອຳໂມນໄດ້ຢືນຢູ່ຕໍ່ໜ້າກະສັດຊາວເລມັນ.
- ຂຽນແນວຄິດຫລັກຂອງບົດເລື່ອງໃນປະໂຫຍກ ຫລື ວັກສັ້ນໆ.
- ທ່ອງຈຳຂໍ້ພຣະຄຳພີທີ່ອະທິບາຍ ແລະ ສະໜັບສະໜູນຫລັກທຳທີ່ທ່ານສິດສອນ.
ປະເມີນຕົວເອງໃນເລື່ອງດັ່ງຕໍ່ໄປນີ້ (1=ບໍ່ເຄີຍ, 3=ບາງເວລາ, ແລະ 5=ເກືອບຕະຫລອດເວລາ).
- ເຮົາເຕີບໂຕໃນສັດທາ ແລະ ມາຮູ້ຈັກພຣະບິດາເທິງສະຫວັນ ແລະ ພຣະເຢຊູຄຣິດດີຂຶ້ນກວ່າເກົ່າ.
- ເຮົາຄິດກ່ຽວກັບຜູ້ຄົນທີ່ເຮົາກຳລັງສິດສອນເມື່ອເຮົາສຶກສາ.
- ຕະຫລອດທັງວັນ, ເຮົາຄິດກ່ຽວກັບສິ່ງທີ່ເຮົາໄດ້ສຶກສາໃນຕອນເຊົ້າ.
- ຂະນະທີ່ເຮົາສຶກສາ, ແນວຄິດໄດ້ເຂົ້າມາໃນຄວາມຄິດຂອງເຮົາ ທີ່ບໍ່ເຄີຍເກີດຂຶ້ນກັບເຮົາມາກ່ອນ.
- ເຮົາບັນທຶກຄວາມປະທັບໃຈ ແລະ ແນວຄິດໄວ້ໃນບ່ອນທີ່ເໝາະສົມ.
- ເຮົາບໍ່ໄດ້ເຊືອບຫລັບໃນຂະນະທີ່ເຮົາສຶກສາ.
- ເຮົາຕັ້ງຕາລໍຄອຍທີ່ຈະສຶກສາສ່ວນຕົວ.
- ເຮົາຕັ້ງຕາລໍຄອຍທີ່ຈະສຶກສາກັບຄູ່ສອນ.
ທົບທວນຄຳຕອບຂອງທ່ານ. ທ່ານເຮັດຫຍັງໄດ້ດີ? ທ່ານຈະປັບປຸງແນວໃດ? ຕັ້ງເປົ້າໝາຍໜຶ່ງ ຫລື ສອງຢ່າງ ເພື່ອປັບປຸງຄຸນນະພາບຂອງການສຶກສາຂອງທ່ານ.

ການສຶກສາກັບຄູ່ສອນ ແລະ ການສັບປ່ຽນຄູ່ສອນ

ອ່ານຂໍ້ພຣະຄຳພີຫລາຍຂໍ້ຕໍ່ໄປນີ້ນຳກັນ. ສົນທະນາພອນທີ່ມາຈາກການສຶກສາພຣະຄຳຂອງພຣະເຈົ້າ. ມີຂໍ້ພຣະຄຳພີໃດແດ່ທີ່ຈະຊ່ວຍຜູ້ທີ່ທ່ານສິດສອນໄດ້ຫລາຍທີ່ສຸດ?

ສະພາທ້ອງຖິ່ນ, ກອງປະຊຸມອະນາເຂດ, ແລະ ສະພາຜູ້ນຳເຂດເຜີຍແຜ່

ຂໍໃຫ້ຜູ້ສອນສາດສະໜາຂຽນຄຳຖາມໜຶ່ງ ຫລື ສອງຂໍ້ກ່ຽວກັບພຣະກິດຕິຄຸນຈາກບົດຮຽນໃນ ບົດທີ 3. ຄຳຖາມເຫລົ່ານີ້ສາມາດເປັນເລື່ອງສ່ວນຕົວ ຫລື ຈາກຜູ້ທີ່ເຂົາເຈົ້າສິດສອນ. ເຊື້ອເຊີນຜູ້ສອນສາດສະໜາໃຫ້ແບ່ງປັນຄຳຖາມຂອງເຂົາເຈົ້າກັບກຸ່ມ. ສຳລັບຄຳຖາມແຕ່ລະຂໍ້, ໃຫ້ສົນທະນາດັ່ງຕໍ່ໄປນີ້:
- ການຕອບຄຳຖາມນີ້ຈະສາມາດເປັນພອນໃຫ້ແກ່ຊີວິດຂອງຜູ້ສອນສາດສະໜາໄດ້ແນວໃດ?
- ສິ່ງນີ້ຈະສາມາດເປັນພອນໃຫ້ແກ່ຊີວິດຂອງຜູ້ຄົນທີ່ເຂົາເຈົ້າກຳລັງສິດສອນໄດ້ແນວໃດ?
- ຜູ້ສອນສາດສະໜາຈະສາມາດຫາຄຳຕອບໄດ້ແນວໃດ?
ແຍກຜູ້ສອນສາດສະໜາອອກເປັນຫລາຍກຸ່ມ, ແລະ ມອບໝາຍໃຫ້ແຕ່ລະກຸ່ມສຶກສາມາດຕະການປ້ອງກັນໜຶ່ງໃນສີ່ຂໍ້ ແລະ ພຣະຄຳພີທີ່ໃຫ້ມານຳ. ເຊື້ອເຊີນຜູ້ສອນສາດສະໜາໃຫ້ແບ່ງປັນສິ່ງທີ່ເຂົາເຈົ້າໄດ້ຮຽນຮູ້ ແລະ ວິທີທີ່ມາດຕະການປ້ອງກັນໄດ້ຊ່ວຍເຂົາເຈົ້າແນວໃດ.

ຜູ້ນຳເຜີຍແຜ່ ແລະ ທີ່ປຶກສາເຜີຍແຜ່

ບາງຄັ້ງຈະເຂົ້າຮ່ວມກັບຜູ້ສອນສາດສະໜາໃນການສຶກສາກັບຄູ່ສອນຂອງເຂົາເຈົ້າ.
ລະຫວ່າງການສຳພາດ ຫລື ການສົນທະນາ, ໃຫ້ຖາມບາງຄຳຖາມດັ່ງຕໍ່ໄປນີ້:
- ເມື່ອບໍ່ດົນມານີ້ເຈົ້າມີຄວາມປະທັບໃຈຢ່າງໃດແດ່ໃນການສຶກສາພຣະຄຳພີຂອງເຈົ້າ?
- ບົດໃດ ຫລື ພາກໃດຂອງ ຈົ່ງສັ່ງສອນພຣະກິດຕິຄຸນຂອງເຮົາ ໄດ້ຊ່ວຍເຈົ້າຫລາຍທີ່ສຸດ ໃນລະຫວ່າງສອງອາທິດຜ່ານມານີ້? ມັນໄດ້ຊ່ວຍເຈົ້າແນວໃດ?
- ເຈົ້າເຮັດຫຍັງໃນການສຶກສາສ່ວນຕົວຂອງເຈົ້າທີ່ຊ່ວຍໃຫ້ເຈົ້າຮຽນຮູ້?
ໃນການສຳພາດ, ໃຫ້ພິຈາລະນາທົບທວນມາດຕະການປ້ອງກັນສຳລັບການໃຊ້ເທັກໂນໂລຈີ ແລະ ຖາມຜູ້ສອນສາດສະໜາວ່າເຂົາເຈົ້າຮຽນຮູ້ຫຍັງແດ່ຂະນະທີ່ເຂົາເຈົ້ານຳໃຊ້ມັນ.
ແບ່ງປັນຄວາມຮູ້ຈາກການສຶກສາສ່ວນຕົວຂອງທ່ານ. ແບ່ງປັນລາຍການຈາກບັນທຶກການສຶກສາຂອງທ່ານ ແລະ ປະຈັກພະຍານຂອງທ່ານ ເຖິງຄວາມສຳຄັນຂອງການສຶກສາພຣະກິດຕິຄຸນ.