“Kapitulo 13: Makighiusa sa mga Lider ug mga Miyembro aron Mapalig-on ang Simbahan,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)

“Kapitulo 13,” Isangyaw ang Akong Ebanghelyo

Kapitulo 13

Makighiusa sa mga Lider ug mga Miyembro aron Mapalig-on ang Simbahan

Hunahunaa Kini

Unsaon nako sa pakigtambayayong uban sa mga lider ug mga miyembro sa pagpalig-on sa Simbahan?
Unsa ang mga responsibilidad sa mga lider sa stake ug ward sa misyonaryo nga buhat?
Unsa ang kinahanglang mahitabo sa sinemana nga miting sa pakigsabot uban sa ward mission leader?
Unsaon nako sa pagsuporta sa mga lider sa pagpakigbahin sa ebanghelyo ug sa pagpalig-on sa bag-o ug mibalik nga mga miyembro?

Ang mga misyonaryo makigtambayayong sa lokal nga mga lider ug mga miyembro aron sa pagpangita og mga tawo nga katudloan ug giyahan sila ngadto sa Manluluwas. Kamo maghiusa pinaagi sa inyong gugma alang sa Dios ug sa Iyang mga anak. Siya mopadako sa inyong mga paningkamot sa punto nga kamo maghiusa sa pagtrabaho uban sa lokal nga mga lider ug mga miyembro. Himoa nga ang pakigtambayayong kanila usa ka importanteng bahin sa inyong tumong ug mga plano.

Sa inyong pagkaila ug paghigugma sa lokal nga mga lider ug mga miyembro, kamo makakita og mga paagi nga makasuporta kanila sa ilang mga tawag ug sa misyonaryo nga mga paningkamot. Itanyag ang inyong mga gasa ug mga talento sa mga paagi nga mobayaw ug mopalig-on kanila.

Kini nga kapitulo magpasabot kon sa unsang paagi nga kamo makigtambayayong sa mga miyembro sa pagpakigbahin sa ebanghelyo ug sa pagpalig-on sa bag-o ug mibalik nga mga miyembro. Alang sa dugang nga impormasyon, tan-awa sa kapitulo 23 sa Kinatibuk-ang Tamdanan nga Basahon.

Personal nga Pagtuon o Pagtuon uban sa Kompanyon

Rebyoha ang sugilanon sa panag-estorya ni Hari Lamoni, sa iyang asawa, ug sa iyang katawhan diha sa Alma 18–19.

Unsa ang papel ni Abish niining panag-estorya? Unsa ang iyang mahimo nga dili mahimo ni Ammon?
Unsa ang inyong nakat-onan gikan sa iyang ehemplo mahitungod sa mga miyembro ug mga misyonaryo nga nagtambayayong?

Hunahunaa kining uban nga mga ehemplo sa mga miyembro nga mitabang sa misyonaryo nga buhat:

Amulek (Alma 10:1–11)
Priscila ug Aquila (Mga Buhat 18:24–28)
Ang babayeng Taga-Samaria (Juan 4:5–30, 39–42)

Unsaon nimo sa pag-awhag sa mga lider ug mga miyembro nga mosunod sa ilang mga ehemplo?

Pagpalambo og mga Relasyon uban sa Lokal nga mga Lider ug mga Miyembro

Ang lokal nga mga lider ug ang mga miyembro sa Simbahan mao ang inyong mga kauban sa buhat sa Ginoo. Pag-ugmad og mga relasyon nga makatabang ninyo sa pagpakigtambayayong aron sa pagdala sa gipahiuli nga ebanghelyo ngadto sa mga anak sa Langitnong Amahan. Kini nga mga relasyon makapanalangin kaninyo sa inyong tibuok kinabuhi.

Lig-ona ang pagsalig ug tinuod nga panaghigalaay uban sa lokal nga mga lider ug mga miyembro. Pakig-estorya kanila ug pagkat-on mahitungod sa ilang mga pamilya, mga kagikan, mga kaikag, ug kasinatian sa Simbahan. Tinud-anay nga interesado sa ilang kinabuhi.

Kon mobisita kamo, buhata nga may katuyoan. Ipakita nga kamo matinguhaon nga moapil sa buhat sa pagpangita ug pagtudlo. Tahora ang ilang panahon ug eskedyul.

Kon kamo magkita o magtudlo sa ebanghelyo sa ilang mga panimalay, tinguhaa ang pagtabang kanila nga malig-on ang ilang patuo. Mainampoon nga magtinguha sa pagbaton sa Espiritu nga magauban kaninyo. Ipakigbahin ang inyong mga kasinatian sa misyonaryo nga buhat sa inyong dapit.

Mosuporta sa Lokal nga mga Lider sa Ilang mga Tahas

Ang uban nga mga tawag sa pagkalider adunay mga responsibilidad alang sa misyonaryo nga buhat. Ang pagsabot niining mga responsibilidad makatabang kaninyo sa pagsuporta niining mga lider. Ang mosunod nga mga deskripsiyon naggikan sa kapitulo 23 sa Kinatibuk-ang Tamdanan nga Basahon.

Presidente sa Stake: Naghupot sa mga yawe diha sa stake alang sa pagpakigbahin sa ebanghelyo ug sa pagpalig-on sa bag-o ug mibalik nga mga miyembro. Siya ug ang iyang mga magtatambag naghatag sa kinatibuk-ang direksiyon alang niini nga mga paningkamot.

Bishopric: Makigsabot sa mga kapangulohan sa korum sa mga elder ug sa Relief Society samtang sila mangulo sa mga paningkamot sa ward sa pagpakigbahin sa ebanghelyo ug sa pagpalig-on sa bag-o ug mibalik nga mga miyembro.

Kapangulohan sa korum sa mga elder ug Relief Society: Mangulo sa inadlaw-adlaw nga mga paningkamot sa pagpakigbahin sa ebanghelyo ug sa paglig-on sa bag-o ug mibalik nga mga miyembro. Sila magtambayayong sa pagpangulo niini nga mga paningkamot uban sa konseho sa ward, ubos sa pagpakigsabot sa bishop. Tan-awa sa Kinatibuk-ang Tamdanan nga Basahon, 8.2.3 ug 9.2.3.

Lider sa Misyon sa Ward (kon natawag): Makigsabot sa buhat sa mga miyembro ug mga lider, mga misyonaryo sa ward, ug full-time nga mga misyonaryo. Kon walay usa ka lider sa misyon sa ward nga natawag, ang usa ka sakop sa kapangulohan sa korum sa mga elder mao ang mopuli niini nga tahas. Tan-awa sa Kinatibuk-ang Tamdanan nga Basahon, 23.5.3.

Kanunayng mangutana sa imong kaugalingon, “Usa ba ako ka panalangin ngadto sa lokal nga mga lider?” Palamboa ang kinaiya nga “Unsaon nako pagtabang?”

Pagtuon uban sa Kompanyon

Pag-eskedyul og oras sa mubo nga pagbisita sa lider sa ward. Pangutana kon unsaon ninyo nga mas makasuporta kaniya. Paghimo og mga plano sa paglambo.

Sinemana nga mga Miting sa Pakigsabot

Ang pakigsabot uban sa lokal nga mga lider—lakip na sa mga lider sa kabatan-onan—mahinungdanon aro magkahiusa diha sa inyong misyonaryo nga mga paningkamot. Kon ang usa ka lider sa misyon sa ward gitawag, siya ang mopahigayon sa sinemana nga mga miting sa pakigsabot. Kon dili, ang mga sakop sa kapangulohan sa korum sa mga elder kinsa gihatagan niini nga tahas mao ang mopahigayon.

Niining mubo, dili pormal nga mga miting, ang lokal nga mga lider ug kamo magsabot sa mga paningkamot sa pagpakigbahin sa ebanghelyo ug sa pagpalig-on sa bag-o ug mibalik nga mga miyembro (tan-awa sa Kinatibuk-ang Tamdanan nga Basahon, 23.4). Kini nga mga miting mahimong ipahigayon nga personal nga magkita o sa lagyo. Ang pakigsabot kinahanglan usab mahitabo sa laing paagi atol sa semana, lakip sa pagtawag sa telepono, mga text, ug mga email.

“Ang hiniusang paningkamot ug pagtutok diin ang pagplano ug pagtakda og tumong sa misyonaryo nahiuyon sa pagplano ug pagtakda og tumong sa ward o branch mahimong makatabang kaayo sa pagtuman sa buhat sa pagpundok sa Israel” (Quentin L. Cook, “Purpose and Planning,” mission leadership seminar, Hunyo 25, 2019).

Pag-andam alang sa Sinemana nga Miting sa Pakigsabot

Suportahi ang mga lider sa ward pinaagi sa pag-adto nga andam sa pag-apil sa sinemana nga miting sa pakigsabot. Sa dili pa ang miting, paggahin og oras atol sa pagtuon uban sa kompanyon aron maghisgot kon unsaon ninyo nga epektibong moapil.

Ipabiling naka-update ang inyong mga rekord sa Isangyaw ang Akong Ebanghelyo nga app aron ang mga lider adunay kasamtangan nga impormasyon bahin niadtong inyong gitudloan. Pag-andam sa pagreport sa mga buluhaton gikan sa miagi nga mga miting.

Apil alang sa Sinemana nga Miting sa Pakigsabot

Ang sinemana nga mga miting sa pakigsabot gituyo aron matutokan ang mga panginahanglan sa mga indibidwal. Atol sa miting, itanyag kon unsaon ninyo nga makasuporta sa mga miyembro sa ward, lakip na sa mga kabatan-onan, sa pagtabang nga matubag ang mga panginahanglan sa indibidwal.

Ang sinemana nga miting sa pakigsabot kasagaran maglangkob sa upat ka hilisgotan:

Sa unsang paagi nga kita makatabang niadtong gitudloan? Posibleng mga butang nga hisgotan:

Hain sa mga miyembro ang makaapil sa mga leksiyon niining umaabot nga semana? Kinsa ang moimbitar kanila sa pag-apil?
Unsa ang mga hagit niadtong mga gitudloan? Sa unsang paagi nga makatabang ang mga miyembro?
Unsa ang mga panginahanglan niadtong aduna nay petsa nga naeskedyul sa bunyag? Naplano na ba ang bunyag? (Tan-awa sa “Ang Tulumanon sa Bunyag” sa kapitulo 12.)

Sa unsang paagi nga kita makatabang niadtong bag-ohay lang nabunyagan? Posibleng mga butang nga hisgotan:

Hain sa bag-ong mga miyembro sa ilang unang tuig sa pagkamiyembro ang nagtambong sa miting sa sakramento? Sa unsang paagi kita makatabang ni bisan kinsa nga wala magtambongan?
Hain sa bag-ong mga miyembro ang adunay mga higala sa ward? Sa unsang paagi nga ang mga tigpangalagad nga mga igsoong lalaki ug mga igsoong babaye makatabang? Sa unsang paagi nga ang mga korum ug mga klase sa kabatan-onan makatabang?
Hain sa bag-ong mga miyembro ang adunay mga buluhaton o tawag?
Sa unsang paagi nga kita makatabang sa bag-ong mga miyembro nga makasugod sa pagsiksik sa ilang namatay na nga mga katigulangan aron mapahigayon ang mga ordinansa sa templo alang kanila? Aduna na bay rekomend sa templo ang bag-o nga mga miyembro? Kon ang usa ka templo duol ra, sa unsang paagi nga kita makatabang nila nga makaadto sa templo aron mapahigayon ang mga bunyag alang niining mga katigulangan?
Hain sa mga leksiyon gikan sa kapitulo 3 ang gikinahanglan gihapon nga itudlo pag-usab? Sa unsang paagi nga ang mga miyembro makaapil?
Rebyoha ang Akong Dalan sa Pakigsaad nga pag-uswag alang sa matag bag-o nga miyembro.

Sa unsang paagi nga kita makatabang sa mibalik nga mga miyembro? Posibleng mga butang nga hisgotan:

Hain sa mga pamilya nga dili tanan miyembro ang mahimong bisitahan ug tudloan sa mga misyonaryo?
Hain sa mibalik nga mga miyembro mahimong bisitahan ug tudloan sa mga misyonaryo?
Hain sa mibalik nga mga miyembro ang adunay mga higala sa ward ug tukma nga mga oportunidad sa pagserbisyo?
Sa unsang paagi nga kita makatabang niini nga mga miyembro?

Unsaon nako pagpangita og mga tawo nga katudloan? Posibleng mga butang nga hisgotan:

Sa unsang paagi nga kita makatabang sa mga indibidwal, lakip na sa kabatan-onan, ug mga pamilya nga makagamit sa mga baroganan sa gugma, pagpakigbahin, ug pag-imbitar? (Tan-awa sa “Pakighiusa sa mga Miyembro” sa kapitulo 9.)
Sa unsang paagi nga kita makatabang sa mga miyembro, lakip na sa mga lider sa Primary, nga moimbitar sa mga higala ngadto sa mga kalihokan sa ward?

Pagtuon uban sa Kompanyon

Tan-awa ang bidyo sa sinemana nga miting sa pakigsabot sa Kinatibuk-ang Tamdanan nga Basahon, 23.4. Unsa ang inyong nakat-onan nga inyong magamit sa sunod nga sinemana nga miting sa pakigsabot? Unsaon ninyo nga mas maandam aron hisgotan ang mga panginahanglan ug plano uban sa mga lider sa ward? Sa inyong sunod nga sesyon sa pagplano, pagtakda og mga tumong kon unsaon ninyo nga molambo.

Suportahi ang Plano sa Ward alang sa Pagpakigbahin sa Ebanghelyo

Ang konseho sa ward makahimo og usa ka yano nga plano sa pagpakigbahin sa ebanghelyo (tan-awa sa Kinatibuk-ang Tamdanan nga Basahon, 23.5.6). Magmahimong pamilyar niini nga plano. Sa sinemana nga mga miting sa pakigsabot, pangita og mga paagi sa pagtabang sa mga lider nga makabuhat sa ilang mga tumong. Pahibaloa kanunay ang mga lider mahitungod sa unsay inyong gibuhat aron masuportahan ang mga miyembro sa pagpakigbahin sa ebanghelyo.

Kon kamo giimbitar sa pagtambong sa usa ka miting sa konseho sa ward, pangandam sa paghatag og mubo nga update kabahin sa pag-uswag niadtong inyong gitudloan ug sa bisan unsa nga mga buluhaton nga inyong nadawat (tan-awa sa Kinatibuk-ang Tamdanan nga Basahon, 29.2.5). Tan-awa kini nga oportunidad isip usa ka higayon sa pagpalig-on sa kamasaligon ug pagsalig sa mga lider sa ward.

Mopahiangay sa mga Panginahanglan sa mga Lokal nga Dapit

Ang matag ward o branch adunay lahi nga mga panginahanglan para kamo makapahiangay ngadto niini. Kamo mahimong moserbisyo diha sa gamay nga branch o sa usa ka ward sa young single adult, o kamo mahimong moserbisyo og daghan nga ward. Ang uban nga mga lider adunay mas daghang kasinatian ug ang uban diyotay ra. Ang uban nga mga lider adunay mas daghang panahon kay sa uban.

Pangita og mga paagi sa pagtabang sa lokal nga mga lider. Sila mahimong mohangyo kaninyo sa pagtabang sa pagsuporta sa mga miyembro diha sa ilang mga buluhaton sa pagpangalagad. Sila mahimong mohangyo kaninyo sa pag-awhag sa bag-ong mga miyembro sa pag-imbitar sa ilang mga higala sa pagtambong sa simbahan. Kamo makahatag og bililhon nga mga ideya mahitungod sa misyonaryo nga buhat samtang ang mga lider ug mga miyembro magkat-on og mga paagi sa pagpakigbahin sa ebanghelyo.

Diin medyo bag-o pa ang Simbahan, ang mga lider sa branch tingali mohangyo kaninyo sa pagtabang sa bag-ong miyembro nga makasabot kon sa unsang paagi ang Ginoo miorganisar sa Iyang Simbahan.

Ang inyong trabaho uban sa mga lider mahimong lahi sa lain nga mga dapit, apan ang tanan niining mga kalihokan mahinungdanon sa pagpanalangin sa mga indibidwal ug sa pagpalig-on sa Simbahan sa Ginoo.

Tabangi ang mga Miyembro ug mga Lider sa Paghigugma, Pagpakigbahin, ug Pag-imbitar

Awhaga ang mga miyembro sa pagpakigbahin sa ebanghelyo sa normal ug natural nga mga paagi. Ang Kinatibuk-ang Tamdanan nga Basahon nagtanyag og instruksiyon ug mga bidyo sa pagtabang sa mga miyembro ug mga lider sa pagbuhat niini pinaagi sa pagsunod sa mga baroganan sa gugma, pagpakigbahin, ug pag-imbitar (tan-awa sa Kinatibuk-ang Tamdanan nga Basahon, 23.1.1, 23.1.2, ug 23.1.3). Hinumdomi kini nga mga baroganan samtang kamo makigtambayayong sa mga lider.

Mahimo kamo nga usa ka panalangin ngadto sa mga lider samtang kamo mosuporta sa ilang mga paningkamot niini nga buhat. Agig balos, ang ilang ehemplo motabang sa mga miyembro nga mahimong mas moapil sa pagpakigbahin sa ebanghelyo ug sa pagpalig-on sa bag-o ug mibalik nga mga miyembro.

Tan-awa sa “Pakighiusa sa mga Miyembro” sa kapitulo 9 alang sa mga ideya mahitungod sa pagsuporta sa mga miyembro sa ilang mga paningkamot sa pagpakigbahin sa ebanghelyo.

Pagtuon sa Kasulatan

Tun-i ang mosunod nga mga bersikulo. Giunsa sa Manluluwas ug niining mga disipulo sa paghigugma, pagpakigbahin, ug pag-imbitar? Unsa nga mga aksiyon niini nga mga ehemplo nga nakadasig diha sa inyong pagtudlo? Sa unsang paagi nga kamo makatabang sa mga miyembro sa pagpakigbahin sa ebanghelyo sa normal ug natural nga mga paagi?

Gugma

Pagpakigbahin

Pag-imbitar

Sa matag higayon nga kamo magtuon, irekord unsa ang inyong nakat-onan.

Mosuporta sa Lokal nga mga Lider sa Pagpalig-on sa Bag-ong mga Miyembro

Sa dihang ang mga tawo nabunyagan ug nakompirmahan, sila nahimong “mga kauban na sa katawhan sa Dios ug mga sakop na sa iyang banay” (Mga Taga-Efeso 2:19; tan-awa usab sa 1 Mga Taga-Corinto 12:12–27). Pakigtambayayong sa lokal nga mga lider aron motabang sa bag-o nga mga miyembro nga “maamumahan pinaagi sa maayo nga pulong sa Dios, aron sa pag-agak kanila sa matarong nga dalan, … mosalig lamang diha sa mga maayo nga buhat ni Kristo” (Moroni 6:4).

“Ang bag-o nga mga kinabig moadto sa Simbahan uban sa kadasig alang sa unsay ilang nakit-an. Ug dihadiha dayon kita kinahanglan gayod nga mopalig-on niana nga kadasig. … Ang mga misyonaryo makatabang sa pagpaila-ila ug pagkonektar sa mga tawo nga ilang gitudloan ug sa bag-ong mga kinabig ngadto sa matinud-anong mga miyembro kinsa maoy motabang kanila, maminaw kanila, mogiya kanila, ug mohangop kanila diha sa simbahan bisan sa dili pa sila mabunyagan. … Samtang kita [mangalagad] niadtong kinsa mosulod sa tubig sa bunyag, atong makita ang daghan pang mga anak sa Dios nga molahutay hangtod sa kataposan ug makadawat og kinabuhi nga dayon” (Ulisses S. Soares, “Convert Retention,” mission leadership seminar, Hunyo 25, 2018).

Tabangi ang Bag-ong mga Miyembro nga Motambong og Miting sa Sakramento

Kamo adunay usa ka importante nga papel sa pagtabang sa bag-ong mga miyembro nga motambong sa simbahan. Pakigtambayayong sa mga lider aron maseguro nga kamo o ang mga miyembro sa ward motabang kanila nga motambong. Ang importanteng timailhan nga nagpakita sa pagtambong sa usa ka bag-ong miyembro diha sa miting sa sakramento makatabang nimo ug sa mga lider sa ward nga makita kon siya mahimong nagkinahanglan og dugang nga pag-awhag.

Ang bag-ong mga miyembro adunay mas dakong kalagmitan sa pagpadayon og tambong sa panagtigom alang sa sakramento ug sa pag-ambit sa sakramento kon sila adunay mga higala diha sa ward. Tabangi sila nga mobati nga nahisakop, ilabi na atol sa ilang unang tuig sa pagsunod sa ebanghelyo. (Tan-awa sa Doktrina ug mga Pakigsaad 84:106, 108.)

Itudlo pag-usab ang mga Leksiyon diha sa Kapitulo 3

Tabangi ang bag-o nga mga miyembro nga mopadayon sa pagpalig-on sa ilang pagtuo diha sa Manluluwas nga si Jesukristo ug sa Iyang ebanghelyo. Ang mga kamatuoran ug mga baroganan sa ebanghelyo mas makagamot og lawom kon ang bag-ong miyembro magpadayon sa pagkat-on pinaagi sa Espiritu.

Human sa kompirmasyon, itudlo pag-usab ang misyonaryo nga mga leksiyon. Kamo ang mangulo sa pagtudlo. Apan, pakigsabot sa mga lider sa ward aron ang mga misyonaryo sa ward o ubang mga miyembro moapil. Ang pagtudlo og usab sa mga leksiyon diha sa kapitulo 3 mao ang usa ka importanteng paagi aron matabangan ang bag-ong miyembro nga “maamumahan pinaagi sa maayo nga pulong sa Dios” (Moroni 6:4). Samtang magtudlo kamo, awhaga ang bag-ong mga miyembro sa pagtuman sa tanang pasalig diha sa mga leksiyon.

Basaha ang mga kasulatan uban sa bag-ong mga miyembro, ilabi na ang Basahon ni Mormon, ug itudlo ang mga baroganan sa ebanghelyo. Tabangi sila nga mopakigbahin sa ebanghelyo sa ilang mga higala ug pamilya. Ang matag miyembro adunay piho nga mga panginahanglan, ug kamo makatabang kaniya nga mobati nga gimahal ug gihangop.

Report sa Pag-uswag diha sa Dalan sa Pakigsaad Akong Dalan sa Pakigsaad

Ang lokal nga mga lider adunay mga kapanguhaan alang sa ilang mga misyonaryo nga paningkamot sama kaninyo. Usa niini mao ang report sa Pag-uswag diha sa Dalan sa Pakigsaad, nga makita diha sa Member Tools nga app o sa Leader and Clerk Resources. Kini nga report nagtugot sa lokal nga mga lider nga makita ang importante nga mga kasinatian sa usa ka tawo nga kinahanglan magpadayon sa pag-uswag diha sa dalan sa pakigsaad sa dili pa ug human sa bunyag.

Ang Akong Dalan sa Pakigsaad usa ka tinubdan aron matabangan ang bag-o nga mga miyembro nga “magpabilin nga nakaangkla ngadto sa [ilang] hugot nga pagtuo ni Jesukristo ug komportable diha sa Simbahan” (Akong Dalan sa Pakigsaad, iv). Kini nagpaila-ila sa bag-ong mga miyembro ngadto sa mga kalihokan ug mga oportunidad, sama sa family history ug pagtabang sa namatay na nga mga katigulangan nga makadawat sa sagrado nga mga ordinansa diha sa templo. Awhaga ang lokal nga mga miyembro sa paggiya sa bag-ong miyembro pinaagi niining mga kasinatian. Mohatag og suporta sumala sa gihangyo.

Personal nga Pagtuon o Pagtuon uban sa Kompanyon

Tun-i ang Akong Dalan sa Pakigsaad. Unsa ang inyong nakat-onan mahitungod sa inyong tahas sa pagtabang sa mga miyembro nga mapalig-on ang bag-o nga mga kinabig? Sa unsang paagi kamo makasuporta sa mga paningkamot sa konseho sa ward? Sa matag higayon nga kamo magtuon niini nga kapitulo, irekord unsa ang inyong nakat-onan.

Mosuporta sa Lokal nga mga Lider sa Pagpalig-on sa Mibalik nga mga Miyembro

Ang pipila ka miyembro mipili sa paghunong sa pag-apil sa Simbahan. Ang lokal nga mga lider ug ubang mga miyembro naningkamot sa paghimo og lig-on nga mga relasyon uban kanila ug sa pagtabang kanila. Miingon ang Manluluwas:

“Ngadto kanila kamo magpadayon sa pag-alagad; kay kamo wala masayod kanus-a sila mobalik ug mohinulsol, ug moduol ngari kanako uban sa hingpit nga katuyoan sa kasingkasing, ug ako moayo kanila; ug kamo mao ang hinungdan sa pagdala og kaluwsan ngadto kanila” (3 Nephi 18:32).

Ang lokal nga mga lider tingali mohangyo kaninyo sa pagtabang sa mibalik nga mga miyembro sa paglig-on sa ilang pagtuo. Kasagaran kini nga mga buluhaton pagahimoon uban sa mga pamilya nga dili tanan miyembro. Sa mainampoon nga paagi hunahunaa kon unsaon ninyo nga makaimbitar sa Espiritu ngadto sa mga panimalay sa mibalik nga mga miyembro samtang kamo magtudlo kanila sa mga baroganan sa ebanghelyo ug moimbitar kanila sa pagbuhat. Pagpakita og pagsabot ug kapuangod alang sa ilang mga kabalaka.

Kon itugot sa mga kahigayonan, itudlo ang ebanghelyo ngadto sa panimalay nga wala pa mabunyagi. Ang inyong gugma ug suporta makatabang kanila nga mapalawman ang ilang hugot nga pagtuo ni Kristo ug madugangan ang ilang tinguha sa paghimo ug pagtuman sa mga pakigsaad.

Pakigsabot sa lokal nga mga lider kon kamo makigtambayayong sa mibalik nga mga miyembro. Kini nga mga paningkamot mahimong adunay malungtaron nga epekto diha sa mga indibidwal ug sa lokal nga mga kongregasyon.

Pagtuon sa Kasulatan

Unsa ang gitudlo ni Jesukristo mahitungod sa pagtabang niadtong kinsa nanglimbasog?

Si Alma ug si Amulek nagtudlo og daghan nga mibiya sa Simbahan. Unsa ang inyong makat-onan gikan niini nga mga kasinatian mahitungod sa pagpalig-on sa mibalik nga mga miyembro?

Mga Ideya sa Pagtuon ug Paggamit

Personal nga Pagtuon

Gamit ang Isangyaw ang Akong Ebanghelyo nga app sa paghimo og mga plano sa pagpakig-estorya ngadto sa bag-o ug kasamtangan nga mibalik nga mga miyembro kinsa nag-usab sa ilang mga kinabuhi ug nagtambong sa simbahan. Unsa ang mas nakatabang kaayo kanila? Diha sa imong journal sa pagtuon, isulat ang imong mga hunahuna mahitungod sa ilang mga kasinatian. Unsa ang imong nakat-onan nga makatabang kanimo nga makigtambayayong niadtong inyong gitudloan sa kasamtangan?
Pagtuon sa 2 Nephi 31:18–20, Alma 26:1–7, Alma 32:32–43, ug Moroni 6. Isulat kon unsa ang imong nakat-onan gikan niining mga bersikulo kabahin sa paglig-on sa bag-o nga mga miyembro.

Pagtuon uban sa Kompanyon ug Panagbaylo sa Kompanyon

Basaha ug hisgoti ang kapitulo 23 sa Kinatibuk-ang Tamdanan nga Basahon. Sa unsang paagi nga kamo makasuporta sa lokal nga mga lider sa ilang mga responsibilidad?
Atol sa sinemana nga mga miting sa pakigsabot, pangutan-a ang mga lider sa ward kon aduna bay mibalik nga mga miyembro sa inyong dapit nga gusto nilang inyong bisitahon karong semanaha. Sa inyong pagbisita kanila, tinguhaa ang paglig-on sa ilang hugot nga pagtuo diha ni Jesukristo.
Ilha ang tanan nga nabunyagan ug nakompirmahan sa miaging tuig. Rebyoha ang rekord sa usa nila ug hisgoti kon unsaon ninyo sa pagpakigtambayayong uban sa mga lider sa sunod nga sinemana nga miting sa pakigsabot aron sa pagtabang niini nga tawo. Irekord ang inyong mga ideya ug mga sugyot diha sa Isangyaw ang Akong Ebanghelyo nga app. Sublia kini alang sa bag-ong mga kinabig sa inyong dapit.

Konseho sa District, mga Komperensiya sa Zone, ug Konseho sa Pagpangulo sa Misyon

Pag-imbitar og usa ka bishop o ubang mga lider sa ward aron hisgotan ang pagpalig-on sa bag-o ug mibalik nga mga miyembro. Hangyoa kini nga tawo sa pagpasabot kon sa unsang paagi nga ang mga misyonaryo makatabang.
Hisgoti ang mga sambingay sa nawala nga karnero, sa nawala nga sensilyo, ug sa usikan nga anak nga lalaki (tan-awa sa Lucas 15). Imbitara ang mga misyonaryo nga mopakigbahin sa unsay ilang nakat-onan ug sa unsang paagi nga maggamit nila kini sa ilang misyonaryo nga buhat.

Mga Lider sa Misyon ug Mga Magtatambag sa Misyon

Pakigtambayayong uban sa lokal nga mga lider sa pag-awhag kanila aron motabang sa bag-ong mga miyembro nga:
- Maorden ngadto sa usa ka katungdanan sa pagkapari (alang sa mga lalaki sa tukma nga edad).
- Mahatagan og tigpangalagad nga brother (ug tigpangalagad nga sister alang sa kababayen-an).
- Makadawat og rekomend sa templo aron mabunyagan didto sa templo alang sa ilang namatay na nga mga katigulangan.
- Makaandam og mga ngalan sa namatay na nga katigulangan aron madala ngadto sa templo.
- Makadawat og usa ka buluhaton o tawag sa pagserbisyo sa ilang ward o branch.
Sa pagpakigsabot sa presidente sa stake, tudloi ang lokal nga mga lider kon unsaon sa pagpahigayon og epektibo nga sinema nga mga miting sa pakigsabot.
Panagsa nga mag-follow up sa bag-ong mga miyembro aron masuta kon kumusta na sila ug kon sa unsa nga paagi nga makatabang ang mga misyonaryo ug mga miyembro.
Imbitara ang bag-ong miyembro nga mosulti sa mga misyonaryo ug mosaysay sa ilang mga kasinatian diha sa Simbahan.