« Nāhea vau e nehenehe ai e tauturu i te mau melo e parau nei e homo’āpeni rātou ’aore rā, ’o tē nā roto nei i te fa’ahina’arora’a ta’ata nō tō rātou iho ’āpeni ’ia ’ite i te here, te tāpa’o mānava ’e te fa’aurura’a i te fare purera’a ? » Te fa’ahina’arora’a ta’ata nō tōna iho ’āpeni : Feiā fa’atere o te ’Ēkālesia (2020)
« Nāhea vau e nehenehe ai e tauturu i te mau melo e parau nei e homo’āpeni rātou ’aore rā, ’o tē nā roto nei i te fa’ahina’arora’a ta’ata nō tō rātou iho ’āpeni ’ia ’ite i te here, te tāpa’o mānava ’e te fa’aurura’a i te fare purera’a ? » Te fa’ahina’arora’a ta’ata nō tōna iho ’āpeni : Feiā fa’atere o te ’Ēkālesia
Nāhea vau e nehenehe ai e tauturu i te mau melo e parau nei e homo’āpeni rātou ’aore rā, ’o tē nā roto nei i te fa’ahina’arora’a ta’ata nō tō rātou iho ’āpeni ’ia ’ite i te here, te tāpa’o mānava ’e te fa’aurura’a i te fare purera’a ?
Fa’ati’a i te tupura’a ’e te hōpoi’a
« E mea faufaa rahi roa ’ia māramarama tātou nā mua roa ē, tei te hō’ē vāhi ta’a ’ē te mau ta’ata ato’a i ni’a i te ’ē’a ’e tē patu nei tātou i tā tātou huru hi’ora’a i te ta’ata e hā’ati nei ia tātou.
« ’Ua ’ite au i te mau ta’ata e haere mai nei i te fare purera’a i te mau sābati ato’a ’ia nehenehe ia rātou ’ia fa’auruhia ’e ’ia fa’aitoitohia ’e ’o tē haere nei i rāpae mai te ra ē e mana’o ha’avā i ni’a ia rātou, ’e ’aita rātou i herehia, ’e ’aita i hina’arohia, mai te mea ra ē ’aita e pārahira’a nō rātou i te fare purera’a. E mea ti’a ia tātou ’ia taui i te reira. E mea ti’a ia tātou ’ia ’ite hōhonu i te tumu tātou e haere mai nei i te purera’a i te sābati, ’e ’ia ha’apāpū ato’a ē, tē vai nei i roto i te mau ta’ata ato’a e haere mai nei i te mana’o ē, ’ua herehia rātou, ’ua hina’arohia, ’ua fāri’ihia ’e ’ua fa’aitoitohia. E mau ’arora’a tā te ta’ata ’aita roa atu tātou i ’ite. ’E e mea faufa’a roa ’ia ’ite tātou ē te mau ta’ata ato’a e hā’ati nei ia tātou e mea herehia ïa e te Atua ’e e tītauhia ia tātou ’ia hi’o ia rātou mai tā te Mesia e hi’o nei. ’E ’eiaha nā te mana’o ha’avā e parau mai i tō tātou huru i ni’a i te ta’ata. E ’ere roa atu i te mea tano. Tē mana’o nei au ē nā te Fatu i tu’u ia tātou i te vāhi tei reira tātou ’e i fa’atū’ati ia tātou i te mau ta’ata ’ati a’e ia tātou nō te hō’ē ’ōpuara’a.
« Nō te mea e ’ere tō tātou noa iho haerera’a i mua, ’o te tauturura’a ato’a rā ia vetahi ’ē ’ia haere i mua. ’E ’ua ’ite au ē ’ua tu’uhia tātou i te vāhi tei reira tātou ’ia ti’a ia tātou ’ia here ’e ’ia fa’aitoito ia vetahi ’ē.
« E ’ere tātou, ’e e’ita e nehenehe ia tātou ’ia parau ē, e pipi tātou nā te Mesia mai te mea ē ’aita tātou e tauturu ia vetahi ’ē i ni’a i terā ’ē’a. ’Aita roa atu te ’evanelia a Iesu Mesia e tu’u nei i te mau ta’ata i te hiti. Nā te ta’ata e tu’u i te ta’ata i te hiti. ’Ia tātā’i tātou i te reira e ti’a ai. E tītauhia ia tātou ’ia vai ara noa ’e ’ia here ia rātou ’e ’ia vaiiho ’ia rātou ’ia tupu mai ’e ’ia ’ūa’a mai ’e ’ia riro i te fāito ta’ata maita’i roa a’e e noa’a ia rātou. E mau tārēni ’e te ’aravihi tō rātou tei hina’arohia i roto i te bāsileia o te Atua. ’E mai te mea e patu tātou i te bāsileia o te Atua i ni’a i te fenua nei, e hina’aro tātou i te mau ta’ata ato’a ’ia haere mai, ’ia haere mai ’e ’ia rave i tā rātou tuha’a. E mea ti’a ia tātou ’ia ’ite i te reira. ’Ia ti’a mai te ata ta’ata i mua i te ’ūputa o te fare purera’a, e mea ti’a ia rātou ’ia ’ite vave i te tāuahira’a ’e te here ’e te fa’aitoito ’e te fa’aurura’a, ’e ’ia haere atu ra i rāpae’au i taua ’ūputa ra, ’ua haere ’e ’ua maita’i a’e. Nō te mea ’ua ’ite rātou ē ’ua here te Fatu ia rātou. ’E nō te mea ē tē vai ra tō rātou mau hoa i roto i tā rātou fa’aro’o » (Carol F. McConkie, « Lifting Others [Te fa’ateiteira’a ia vetahi ’ē] », ChurchofJesusChrist.org).